৭. সারিপুত্তসংযুত্তং

১. ৰিৰেকজসুত্তং

৩৩২. একং সমযং আযস্মা সারিপুত্তো সাৰত্থিযং ৰিহরতি জেতৰনে অনাথপিণ্ডিকস্স আরামে. অথ খো আযস্মা সারিপুত্তো পুব্বণ্হসমযং নিৰাসেত্ৰা পত্তচীৰরমাদায সাৰত্থিং পিণ্ডায পাৰিসি. সাৰত্থিযং পিণ্ডায চরিত্ৰা পচ্ছাভত্তং পিণ্ডপাতপটিক্কন্তো যেন অন্ধৰনং তেনুপসঙ্কমি দিৰাৰিহারায. অন্ধৰনং অজ্ঝোগাহেত্ৰা অঞ্ঞতরস্মিং রুক্খমূলে দিৰাৰিহারং নিসীদি.

অথ খো আযস্মা সারিপুত্তো সাযন্হসমযং পটিসল্লানা ৰুট্ঠিতো যেন জেতৰনং অনাথপিণ্ডিকস্স আরামো তেনুপসঙ্কমি. অদ্দসা খো আযস্মা আনন্দো আযস্মন্তং সারিপুত্তং দূরতোৰ আগচ্ছন্তং. দিস্ৰান আযস্মন্তং সারিপুত্তং এতদৰোচ – ‘‘ৰিপ্পসন্নানি খো তে, আৰুসো সারিপুত্ত, ইন্দ্রিযানি; পরিসুদ্ধো মুখৰণ্ণো পরিযোদাতো. কতমেনাযস্মা সারিপুত্তো অজ্জ ৰিহারেন ৰিহাসী’’তি?

‘‘ইধাহং, আৰুসো, ৰিৰিচ্চেৰ কামেহি ৰিৰিচ্চ অকুসলেহি ধম্মেহি সৰিতক্কং সৰিচারং ৰিৰেকজং পীতিসুখং পঠমং ঝানং উপসম্পজ্জ ৰিহরামি. তস্স ময্হং, আৰুসো, ন এৰং হোতি – ‘অহং পঠমং ঝানং সমাপজ্জামী’তি ৰা ‘অহং পঠমং ঝানং সমাপন্নো’তি ৰা ‘অহং পঠমা ঝানা ৰুট্ঠিতো’তি ৰা’’তি. ‘‘তথা হি পনাযস্মতো সারিপুত্তস্স দীঘরত্তং অহঙ্কারমমঙ্কারমানানুসযা সুসমূহতা. তস্মা আযস্মতো সারিপুত্তস্স ন এৰং হোতি – ‘অহং পঠমং ঝানং সমাপজ্জামী’তি ৰা ‘অহং পঠমং ঝানং সমাপন্নো’তি ৰা ‘অহং পঠমা ঝানা ৰুট্ঠিতো’তি ৰা’’তি. পঠমং.

২. অৰিতক্কসুত্তং

৩৩৩. সাৰত্থিনিদানং. অদ্দসা খো আযস্মা আনন্দো…পে… আযস্মন্তং সারিপুত্তং এতদৰোচ – ‘‘ৰিপ্পসন্নানি খো তে, আৰুসো সারিপুত্ত, ইন্দ্রিযানি; পরিসুদ্ধো মুখৰণ্ণো পরিযোদাতো. কতমেনাযস্মা সারিপুত্তো অজ্জ ৰিহারেন ৰিহাসী’’তি?

‘‘ইধাহং, আৰুসো, ৰিতক্কৰিচারানং ৰূপসমা অজ্ঝত্তং সম্পসাদনং চেতসো একোদিভাৰং অৰিতক্কং অৰিচারং সমাধিজং পীতিসুখং দুতিযং ঝানং উপসম্পজ্জ ৰিহরামি. তস্স ময্হং, আৰুসো, ন এৰং হোতি – ‘অহং দুতিযং ঝানং সমাপজ্জামী’তি ৰা ‘অহং দুতিযং ঝানং সমাপন্নো’তি ৰা ‘অহং দুতিযা ঝানা ৰুট্ঠিতো’তি ৰা’’তি. ‘‘তথা হি পনাযস্মতো সারিপুত্তস্স দীঘরত্তং অহঙ্কারমমঙ্কারমানানুসযা সুসমূহতা. তস্মা আযস্মতো সারিপুত্তস্স ন এৰং হোতি – ‘অহং দুতিযং ঝানং সমাপজ্জামী’তি ৰা ‘অহং দুতিযং ঝানং সমাপন্নো’তি ৰা ‘অহং দুতিযা ঝানা ৰুট্ঠিতো’তি ৰা’’তি. দুতিযং.

৩. পীতিসুত্তং

৩৩৪. সাৰত্থিনিদানং. অদ্দসা খো আযস্মা আনন্দো…পে… ‘‘ৰিপ্পসন্নানি খো তে, আৰুসো সারিপুত্ত, ইন্দ্রিযানি; পরিসুদ্ধো মুখৰণ্ণো পরিযোদাতো. কতমেনাযস্মা সারিপুত্তো অজ্জ ৰিহারেন ৰিহাসী’’তি?

‘‘ইধাহং, আৰুসো, পীতিযা চ ৰিরাগা উপেক্খকো চ ৰিহাসিং সতো চ সম্পজানো সুখঞ্চ কাযেন পটিসংৰেদেমি; যং তং অরিযা আচিক্খন্তি ‘উপেক্খকো সতিমা সুখৰিহারী’তি ততিযং ঝানং উপসম্পজ্জ ৰিহরামি. তস্স ময্হং, আৰুসো, ন এৰং হোতি – ‘অহং ততিযং ঝানং সমাপজ্জামী’তি ৰা ‘অহং ততিযং ঝানং সমাপন্নো’তি ৰা ‘অহং ততিযা ঝানা ৰুট্ঠিতো’তি ৰা’’তি. ‘‘তথা হি পনাযস্মতো সারিপুত্তস্স দীঘরত্তং অহঙ্কারমমঙ্কারমানানুসযা সুসমূহতা. তস্মা আযস্মতো সারিপুত্তস্স ন এৰং হোতি – ‘অহং ততিযং ঝানং সমাপজ্জামী’তি ৰা ‘অহং ততিযং ঝানং সমাপন্নো’তি ৰা ‘অহং ততিযা ঝানা ৰুট্ঠিতো’তি ৰা’’তি. ততিযং.

৪. উপেক্খাসুত্তং

৩৩৫. সাৰত্থিনিদানং. অদ্দসা খো আযস্মা আনন্দো…পে… ‘‘ৰিপ্পসন্নানি খো তে, আৰুসো সারিপুত্ত, ইন্দ্রিযানি; পরিসুদ্ধো মুখৰণ্ণো পরিযোদাতো. কতমেনাযস্মা সারিপুত্তো অজ্জ ৰিহারেন ৰিহাসী’’তি?

‘‘ইধাহং, আৰুসো, সুখস্স চ পহানা দুক্খস্স চ পহানা পুব্বেৰ সোমনস্সদোমনস্সানং অত্থঙ্গমা অদুক্খমসুখং উপেক্খাসতিপারিসুদ্ধিং চতুত্থং ঝানং উপসম্পজ্জ ৰিহরামি. তস্স ময্হং, আৰুসো, ন এৰং হোতি – ‘অহং চতুত্থং ঝানং সমাপজ্জামী’তি ৰা ‘অহং চতুত্থং ঝানং সমাপন্নো’তি ৰা ‘অহং চতুত্থা ঝানা ৰুট্ঠিতো’তি ৰা’’তি. ‘‘তথা হি পনাযস্মতো সারিপুত্তস্স দীঘরত্তং অহঙ্কারমমঙ্কারমানানুসযা সুসমূহতা. তস্মা আযস্মতো সারিপুত্তস্স ন এৰং হোতি – ‘অহং চতুত্থং ঝানং সমাপজ্জামী’তি ৰা ‘অহং চতুত্থং ঝানং সমাপন্নো’তি ৰা ‘অহং চতুত্থা ঝানা ৰুট্ঠিতো’তি ৰা’’তি. চতুত্থং.

৫. আকাসানঞ্চাযতনসুত্তং

৩৩৬. সাৰত্থিনিদানং. অদ্দসা খো আযস্মা আনন্দো…পে… ‘‘ইধাহং, আৰুসো, সব্বসো রূপসঞ্ঞানং সমতিক্কমা পটিঘসঞ্ঞানং অত্থঙ্গমা নানত্তসঞ্ঞানং অমনসিকারা অনন্তো আকাসোতি আকাসানঞ্চাযতনং উপসম্পজ্জ ৰিহরামি…পে… ৰুট্ঠিতোতি ৰা’’তি. পঞ্চমং.

৬. ৰিঞ্ঞাণঞ্চাযতনসুত্তং

৩৩৭. সাৰত্থিনিদানং. অদ্দসা খো আযস্মা আনন্দো…পে… ‘‘ইধাহং, আৰুসো, সব্বসো আকাসানঞ্চাযতনং সমতিক্কম্ম অনন্তং ৰিঞ্ঞাণন্তি ৰিঞ্ঞাণঞ্চাযতনং উপসম্পজ্জ ৰিহরামি…পে… ৰুট্ঠিতোতি ৰা’’তি. ছট্ঠং.

৭. আকিঞ্চঞ্ঞাযতনসুত্তং

৩৩৮. সাৰত্থিনিদানং. অথ খো আযস্মা সারিপুত্তো…পে… ‘‘ইধাহং, আৰুসো, সব্বসো ৰিঞ্ঞাণঞ্চাযতনং সমতিক্কম্ম, নত্থি কিঞ্চীতি আকিঞ্চঞ্ঞাযতনং উপসম্পজ্জ ৰিহরামি…পে… ৰুট্ঠিতোতি ৰা’’তি. সত্তমং.

৮. নেৰসঞ্ঞানাসঞ্ঞাযতনসুত্তং

৩৩৯. সাৰত্থিনিদানং. অথ খো আযস্মা সারিপুত্তো…পে… ‘‘ইধাহং, আৰুসো, আকিঞ্চঞ্ঞাযতনং সমতিক্কম্ম নেৰসঞ্ঞানাসঞ্ঞাযতনং উপসম্পজ্জ ৰিহরামি…পে… ৰুট্ঠিতোতি ৰা’’তি. অট্ঠমং.

৯. নিরোধসমাপত্তিসুত্তং

৩৪০. সাৰত্থিনিদানং. অথ খো আযস্মা সারিপুত্তো…পে…. ‘‘ইধাহং, আৰুসো, সব্বসো নেৰসঞ্ঞানাসঞ্ঞাযতনং সমতিক্কম্ম সঞ্ঞাৰেদযিতনিরোধং উপসম্পজ্জ ৰিহরামি. তস্স ময্হং, আৰুসো, ন এৰং হোতি – ‘অহং সঞ্ঞাৰেদযিতনিরোধং সমাপজ্জামী’তি ৰা ‘অহং সঞ্ঞাৰেদযিতনিরোধং সমাপন্নো’তি ৰা ‘অহং সঞ্ঞাৰেদযিতনিরোধা ৰুট্ঠিতো’তি ৰা’’তি. ‘‘তথা হি পনাযস্মতো সারিপুত্তস্স দীঘরত্তং অহঙ্কারমমঙ্কারমানানুসযা সুসমূহতা. তস্মা আযস্মতো সারিপুত্তস্স ন এৰং হোতি – ‘অহং সঞ্ঞাৰেদযিতনিরোধং সমাপজ্জামী’তি ৰা ‘অহং সঞ্ঞাৰেদযিতনিরোধং সমাপন্নো’তি ৰা ‘অহং সঞ্ঞাৰেদযিতনিরোধা ৰুট্ঠিতো’তি ৰা’’তি. নৰমং.

১০. সূচিমুখীসুত্তং

৩৪১. একং সমযং আযস্মা সারিপুত্তো রাজগহে ৰিহরতি ৰেল়ুৰনে কলন্দকনিৰাপে. অথ খো আযস্মা সারিপুত্তো পুব্বণ্হসমযং নিৰাসেত্ৰা পত্তচীৰরমাদায রাজগহে পিণ্ডায পাৰিসি. রাজগহে সপদানং পিণ্ডায চরিত্ৰা তং পিণ্ডপাতং অঞ্ঞতরং কুট্টমূলং [কুড্ডমূলং (সী. স্যা. কং.), কুড্ডং (পী.)] নিস্সায পরিভুঞ্জতি. অথ খো সূচিমুখী পরিব্বাজিকা যেনাযস্মা সারিপুত্তো তেনুপসঙ্কমি; উপসঙ্কমিত্ৰা আযস্মন্তং সারিপুত্তং এতদৰোচ –

‘‘কিং নু খো, সমণ, অধোমুখো ভুঞ্জসী’’তি? ‘‘ন খ্ৰাহং, ভগিনি, অধোমুখো ভুঞ্জামী’’তি. ‘‘তেন হি, সমণ, উব্ভমুখো [উদ্ধংমুখো (সী. অট্ঠ.)] ভুঞ্জসী’’তি? ‘‘ন খ্ৰাহং, ভগিনি, উব্ভমুখো ভুঞ্জামী’’তি. ‘‘তেন হি, সমণ, দিসামুখো ভুঞ্জসী’’তি? ‘‘ন খ্ৰাহং, ভগিনি, দিসামুখো ভুঞ্জামী’’তি. ‘‘তেন হি, সমণ, ৰিদিসামুখো ভুঞ্জসী’’তি? ‘‘ন খ্ৰাহং, ভগিনি, ৰিদিসামুখো ভুঞ্জামী’’তি.

‘‘‘কিং নু, সমণ, অধোমুখো ভুঞ্জসী’তি ইতি পুট্ঠো সমানো ‘ন খ্ৰাহং, ভগিনি, অধোমুখো ভুঞ্জামী’তি ৰদেসি. ‘তেন হি, সমণ, উব্ভমুখো ভুঞ্জসী’তি ইতি পুট্ঠো সমানো ‘ন খ্ৰাহং, ভগিনি, উব্ভমুখো ভুঞ্জামী’তি ৰদেসি. ‘তেন হি, সমণ, দিসামুখো ভুঞ্জসী’তি ইতি পুট্ঠো সমানো ‘ন খ্ৰাহং, ভগিনি, দিসামুখো ভুঞ্জামী’তি ৰদেসি. ‘তেন হি, সমণ, ৰিদিসামুখো ভুঞ্জসী’তি ইতি পুট্ঠো সমানো ‘ন খ্ৰাহং, ভগিনি, ৰিদিসামুখো ভুঞ্জামী’তি ৰদেসি’’.

‘‘কথঞ্চরহি, সমণ, ভুঞ্জসী’’তি? ‘‘যে হি কেচি, ভগিনি, সমণব্রাহ্মণা [সমণা ৰা ব্রাহ্মণা ৰা (সী.) নিগমনৰাক্যে পন সব্বত্থাপি সমাসোযেৰ দিস্সতি] ৰত্থুৰিজ্জাতিরচ্ছানৰিজ্জায মিচ্ছাজীৰেন জীৰিকং [জীৰিতং (ক.)] কপ্পেন্তি, ইমে ৰুচ্চন্তি, ভগিনি, সমণব্রাহ্মণা ‘অধোমুখা ভুঞ্জন্তী’তি. যে হি কেচি, ভগিনি, সমণব্রাহ্মণা নক্খত্তৰিজ্জাতিরচ্ছানৰিজ্জায মিচ্ছাজীৰেন জীৰিকং কপ্পেন্তি, ইমে ৰুচ্চন্তি, ভগিনি, সমণব্রাহ্মণা ‘উব্ভমুখা ভুঞ্জন্তী’তি. যে হি কেচি, ভগিনি, সমণব্রাহ্মণা দূতেয্যপহিণগমনানুযোগায [… নুযোগা (সী. স্যা. কং. পী.), … নুযোগেন (?)] মিচ্ছাজীৰেন জীৰিকং কপ্পেন্তি, ইমে ৰুচ্চন্তি, ভগিনি, সমণব্রাহ্মণা ‘দিসামুখা ভুঞ্জন্তী’তি. যে হি কেচি, ভগিনি, সমণব্রাহ্মণা অঙ্গৰিজ্জাতিরচ্ছানৰিজ্জায মিচ্ছাজীৰেন জীৰিকং কপ্পেন্তি, ইমে ৰুচ্চন্তি, ভগিনি, সমণব্রাহ্মণা ‘ৰিদিসামুখা ভুঞ্জন্তী’’’তি.

‘‘সো খ্ৰাহং, ভগিনি, ন ৰত্থুৰিজ্জাতিরচ্ছানৰিজ্জায মিচ্ছাজীৰেন জীৰিকং কপ্পেমি, ন নক্খত্তৰিজ্জাতিরচ্ছানৰিজ্জায মিচ্ছাজীৰেন জীৰিকং কপ্পেমি, ন দূতেয্যপহিণগমনানুযোগায মিচ্ছাজীৰেন জীৰিকং কপ্পেমি, ন অঙ্গৰিজ্জাতিরচ্ছানৰিজ্জায মিচ্ছাজীৰেন জীৰিকং কপ্পেমি. ধম্মেন ভিক্খং পরিযেসামি; ধম্মেন ভিক্খং পরিযেসিত্ৰা ভুঞ্জামী’’তি.

অথ খো সূচিমুখী পরিব্বাজিকা রাজগহে রথিযায রথিযং, সিঙ্ঘাটকেন সিঙ্ঘাটকং উপসঙ্কমিত্ৰা এৰমারোচেসি – ‘‘ধম্মিকং সমণা সক্যপুত্তিযা আহারং আহারেন্তি; অনৰজ্জং [অনৰজ্জেন (ক.)] সমণা সক্যপুত্তিযা আহারং আহারেন্তি. দেথ সমণানং সক্যপুত্তিযানং পিণ্ড’’ন্তি. দসমং.

সারিপুত্তসংযুত্তং সমত্তং.