৬. কিলেসসংযুত্তং

১. চক্খুসুত্তং

৩২২. সাৰত্থিনিদানং. ‘‘যো, ভিক্খৰে, চক্খুস্মিং ছন্দরাগো, চিত্তস্সেসো উপক্কিলেসো. যো সোতস্মিং ছন্দরাগো, চিত্তস্সেসো উপক্কিলেসো. যো ঘানস্মিং ছন্দরাগো, চিত্তস্সেসো উপক্কিলেসো. যো জিৰ্হায ছন্দরাগো, চিত্তস্সেসো উপক্কিলেসো. যো কাযস্মিং ছন্দরাগো, চিত্তস্সেসো উপক্কিলেসো. যো মনস্মিং ছন্দরাগো, চিত্তস্সেসো উপক্কিলেসো. যতো খো, ভিক্খৰে, ভিক্খুনো ইমেসু ছসু ঠানেসু চেতসো উপক্কিলেসো পহীনো হোতি, নেক্খম্মনিন্নঞ্চস্স চিত্তং হোতি. নেক্খম্মপরিভাৰিতং চিত্তং কম্মনিযং খাযতি, অভিঞ্ঞা সচ্ছিকরণীযেসু ধম্মেসূ’’তি. পঠমং.

২. রূপসুত্তং

৩২৩. সাৰত্থিনিদানং. ‘‘যো, ভিক্খৰে, রূপেসু ছন্দরাগো, চিত্তস্সেসো উপক্কিলেসো. যো সদ্দেসু… যো গন্ধেসু… যো রসেসু… যো ফোট্ঠব্বেসু… যো ধম্মেসু ছন্দরাগো, চিত্তস্সেসো উপক্কিলেসো. যতো খো, ভিক্খৰে, ভিক্খুনো ইমেসু ছসু ঠানেসু চেতসো উপক্কিলেসো পহীনো হোতি, নেক্খম্মনিন্নঞ্চস্স চিত্তং হোতি. নেক্খম্মপরিভাৰিতং চিত্তং কম্মনিযং খাযতি, অভিঞ্ঞা সচ্ছিকরণীযেসু ধম্মেসূ’’তি. দুতিযং.

৩. ৰিঞ্ঞাণসুত্তং

৩২৪. সাৰত্থিনিদানং. ‘‘যো, ভিক্খৰে, চক্খুৰিঞ্ঞাণস্মিং ছন্দরাগো, চিত্তস্সেসো উপক্কিলেসো. যো সোতৰিঞ্ঞাণস্মিং… যো ঘানৰিঞ্ঞাণস্মিং… যো জিৰ্হাৰিঞ্ঞাণস্মিং… যো কাযৰিঞ্ঞাণস্মিং… যো মনোৰিঞ্ঞাণস্মিং ছন্দরাগো, চিত্তস্সেসো উপক্কিলেসো. যতো খো, ভিক্খৰে, ভিক্খুনো ইমেসু ছসু ঠানেসু চেতসো উপক্কিলেসো পহীনো হোতি, নেক্খম্মনিন্নঞ্চস্স চিত্তং হোতি. নেক্খম্মপরিভাৰিতং চিত্তং কম্মনিযং খাযতি, অভিঞ্ঞা সচ্ছিকরণীযেসু ধম্মেসূ’’তি. ততিযং.

৪. সম্ফস্সসুত্তং

৩২৫. সাৰত্থিনিদানং. ‘‘যো, ভিক্খৰে, চক্খুসম্ফস্সস্মিং ছন্দরাগো, চিত্তস্সেসো উপক্কিলেসো. যো সোতসম্ফস্সস্মিং… যো ঘানসম্ফস্সস্মিং… যো জিৰ্হাসম্ফস্সস্মিং… যো কাযসম্ফস্সস্মিং… যো মনোসম্ফস্সস্মিং ছন্দরাগো, চিত্তস্সেসো উপক্কিলেসো. যতো খো, ভিক্খৰে, ভিক্খুনো…পে… অভিঞ্ঞা সচ্ছিকরণীযেসু ধম্মেসূ’’তি. চতুত্থং.

৫. সম্ফস্সজসুত্তং

৩২৬. সাৰত্থিনিদানং. ‘‘যো, ভিক্খৰে, চক্খুসম্ফস্সজায ৰেদনায ছন্দরাগো, চিত্তস্সেসো উপক্কিলেসো. যো সোতসম্ফস্সজায ৰেদনায… যো ঘানসম্ফস্সজায ৰেদনায… যো জিৰ্হাসম্ফস্সজায ৰেদনায… যো কাযসম্ফস্সজায ৰেদনায… যো মনোসম্ফস্সজায ৰেদনায ছন্দরাগো, চিত্তস্সেসো উপক্কিলেসো. যতো খো, ভিক্খৰে, ভিক্খুনো…পে… অভিঞ্ঞা সচ্ছিকরণীযেসু ধম্মেসূ’’তি. পঞ্চমং.

৬. সঞ্ঞাসুত্তং

৩২৭. সাৰত্থিনিদানং. ‘‘যো, ভিক্খৰে, রূপসঞ্ঞায ছন্দরাগো, চিত্তস্সেসো উপক্কিলেসো. যো সদ্দসঞ্ঞায… যো গন্ধসঞ্ঞায… যো রসসঞ্ঞায… যো ফোট্ঠব্বসঞ্ঞায… যো ধম্মসঞ্ঞায ছন্দরাগো, চিত্তস্সেসো উপক্কিলেসো. যতো খো, ভিক্খৰে, ভিক্খুনো…পে… অভিঞ্ঞা সচ্ছিকরণীযেসু ধম্মেসূ’’তি. ছট্ঠং.

৭. সঞ্চেতনাসুত্তং

৩২৮. সাৰত্থিনিদানং. ‘‘যো, ভিক্খৰে, রূপসঞ্চেতনায ছন্দরাগো, চিত্তস্সেসো উপক্কিলেসো. যো সদ্দসঞ্চেতনায… যো গন্ধসঞ্চেতনায… যো রসসঞ্চেতনায… যো ফোট্ঠব্বসঞ্চেতনায… যো ধম্মসঞ্চেতনায ছন্দরাগো, চিত্তস্সেসো উপক্কিলেসো. যতো খো, ভিক্খৰে, ভিক্খুনো…পে… অভিঞ্ঞা সচ্ছিকরণীযেসু ধম্মেসূ’’তি. সত্তমং.

৮. তণ্হাসুত্তং

৩২৯. সাৰত্থিনিদানং. ‘‘যো, ভিক্খৰে, রূপতণ্হায ছন্দরাগো, চিত্তস্সেসো উপক্কিলেসো. যো সদ্দতণ্হায… যো গন্ধতণ্হায… যো রসতণ্হায… যো ফোট্ঠব্বতণ্হায… যো ধম্মতণ্হায ছন্দরাগো, চিত্তস্সেসো উপক্কিলেসো. যতো খো, ভিক্খৰে, ভিক্খুনো…পে… অভিঞ্ঞা সচ্ছিকরণীযেসু ধম্মেসূ’’তি. অট্ঠমং.

৯. ধাতুসুত্তং

৩৩০. সাৰত্থিনিদানং. ‘‘যো, ভিক্খৰে, পথৰীধাতুযা ছন্দরাগো, চিত্তস্সেসো উপক্কিলেসো. যো আপোধাতুযা… যো তেজোধাতুযা… যো ৰাযোধাতুযা… যো আকাসধাতুযা… যো ৰিঞ্ঞাণধাতুযা ছন্দরাগো, চিত্তস্সেসো উপক্কিলেসো. যতো খো, ভিক্খৰে, ভিক্খুনো ইমেসু ছসু ঠানেসু চেতসো উপক্কিলেসো পহীনো হোতি, নেক্খম্মনিন্নঞ্চস্স চিত্তং হোতি. নেক্খম্মপরিভাৰিতং চিত্তং কম্মনিযং খাযতি, অভিঞ্ঞা সচ্ছিকরণীযেসু ধম্মেসূ’’তি. নৰমং.

১০. খন্ধসুত্তং

৩৩১. সাৰত্থিনিদানং. ‘‘যো, ভিক্খৰে, রূপস্মিং ছন্দরাগো, চিত্তস্সেসো উপক্কিলেসো…পে… যো ৰিঞ্ঞাণস্মিং ছন্দরাগো, চিত্তস্সেসো উপক্কিলেসো. যতো খো, ভিক্খৰে, ভিক্খুনো ইমেসু পঞ্চসু ঠানেসু চেতসো উপক্কিলেসো পহীনো হোতি, নেক্খম্মনিন্নঞ্চস্স চিত্তং হোতি. নেক্খম্মপরিভাৰিতং চিত্তং কম্মনিযং খাযতি, অভিঞ্ঞা সচ্ছিকরণীযেসু ধম্মেসূ’’তি. দসমং.

কিলেসসংযুত্তং সমত্তং.