১. চক্খুসুত্তং

৩০২. সাৰত্থিনিদানং. ‘‘চক্খুং, ভিক্খৰে, অনিচ্চং ৰিপরিণামি অঞ্ঞথাভাৰি; সোতং অনিচ্চং ৰিপরিণামি অঞ্ঞথাভাৰি; ঘানং অনিচ্চং ৰিপরিণামি অঞ্ঞথাভাৰি; জিৰ্হা অনিচ্চা ৰিপরিণামী অঞ্ঞথাভাৰী [ৰিপরিণামিনী অঞ্ঞথাভাৰিনী (?)]; কাযো অনিচ্চো ৰিপরিণামী অঞ্ঞথাভাৰী; মনো অনিচ্চো ৰিপরিণামী অঞ্ঞথাভাৰী. যো, ভিক্খৰে, ইমে ধম্মে এৰং সদ্দহতি অধিমুচ্চতি – অযং ৰুচ্চতি সদ্ধানুসারী, ওক্কন্তো সম্মত্তনিযামং, সপ্পুরিসভূমিং ওক্কন্তো, ৰীতিৰত্তো পুথুজ্জনভূমিং; অভব্বো তং কম্মং কাতুং, যং কম্মং কত্ৰা নিরযং ৰা তিরচ্ছানযোনিং ৰা পেত্তিৰিসযং ৰা উপপজ্জেয্য; অভব্বো চ [অভব্বোৰ (সী. স্যা. কং.)] তাৰ কালং কাতুং যাৰ ন সোতাপত্তিফলং সচ্ছিকরোতি’’.

‘‘যস্স খো, ভিক্খৰে, ইমে ধম্মা এৰং পঞ্ঞায মত্তসো নিজ্ঝানং খমন্তি, অযং ৰুচ্চতি – ‘ধম্মানুসারী, ওক্কন্তো সম্মত্তনিযামং, সপ্পুরিসভূমিং ওক্কন্তো, ৰীতিৰত্তো পুথুজ্জনভূমিং; অভব্বো তং কম্মং কাতুং, যং কম্মং কত্ৰা নিরযং ৰা তিরচ্ছানযোনিং ৰা পেত্তিৰিসযং ৰা উপপজ্জেয্য; অভব্বো চ তাৰ কালং কাতুং যাৰ ন সোতাপত্তিফলং সচ্ছিকরোতি’. যো, ভিক্খৰে, ইমে ধম্মে এৰং পজানাতি এৰং পস্সতি, অযং ৰুচ্চতি – ‘সোতাপন্নো অৰিনিপাতধম্মো নিযতো সম্বোধিপরাযনো’’’তি. পঠমং.