২. সমাধিমূলকঠিতিসুত্তং

৬৬৩. সাৰত্থিনিদানং. ‘‘চত্তারোমে, ভিক্খৰে, ঝাযী. কতমে চত্তারো? ইধ, ভিক্খৰে, একচ্চো ঝাযী সমাধিস্মিং সমাধিকুসলো হোতি, ন সমাধিস্মিং ঠিতিকুসলো. ইধ পন, ভিক্খৰে, একচ্চো ঝাযী সমাধিস্মিং ঠিতিকুসলো হোতি, ন সমাধিস্মিং সমাধিকুসলো. ইধ পন, ভিক্খৰে, একচ্চো ঝাযী নেৰ সমাধিস্মিং সমাধিকুসলো হোতি, ন চ সমাধিস্মিং ঠিতিকুসলো. ইধ পন, ভিক্খৰে, একচ্চো ঝাযী সমাধিস্মিং সমাধিকুসলো চ হোতি, সমাধিস্মিং ঠিতিকুসলো চ. তত্র, ভিক্খৰে, য্ৰাযং ঝাযী সমাধিস্মিং সমাধিকুসলো চ হোতি সমাধিস্মিং ঠিতিকুসলো চ অযং ইমেসং চতুন্নং ঝাযীনং অগ্গো চ সেট্ঠো চ মোক্খো চ উত্তমো চ পৰরো চ. সেয্যথাপি, ভিক্খৰে, গৰা খীরং, খীরম্হা দধি, দধিম্হা নৰনীতং, নৰনীতম্হা সপ্পি, সপ্পিম্হা সপ্পিমণ্ডো তত্র অগ্গমক্খাযতি; এৰমেৰ খো, ভিক্খৰে, য্ৰাযং ঝাযী সমাধিস্মিং সমাধিকুসলো চ হোতি সমাধিস্মিং ঠিতিকুসলো চ অযং ইমেসং চতুন্নং ঝাযীনং অগ্গো চ সেট্ঠো চ মোক্খো চ উত্তমো চ পৰরো চা’’তি. দুতিযং.