১৩. ঝানসংযুত্তং

১. সমাধিমূলকসমাপত্তিসুত্তং

৬৬২. সাৰত্থিনিদানং. ‘‘চত্তারোমে, ভিক্খৰে, ঝাযী. কতমে চত্তারো? ইধ, ভিক্খৰে, একচ্চো ঝাযী সমাধিস্মিং সমাধিকুসলো হোতি, ন সমাধিস্মিং সমাপত্তিকুসলো. ইধ পন, ভিক্খৰে, একচ্চো ঝাযী সমাধিস্মিং সমাপত্তিকুসলো হোতি, ন সমাধিস্মিং সমাধিকুসলো. ইধ পন, ভিক্খৰে, একচ্চো ঝাযী নেৰ সমাধিস্মিং সমাধিকুসলো হোতি, ন চ সমাধিস্মিং সমাপত্তিকুসলো. ইধ পন, ভিক্খৰে, একচ্চো ঝাযী সমাধিস্মিং সমাধিকুসলো চ হোতি, সমাধিস্মিং সমাপত্তিকুসলো চ. তত্র, ভিক্খৰে, য্ৰাযং ঝাযী সমাধিস্মিং সমাধিকুসলো চ হোতি সমাধিস্মিং সমাপত্তিকুসলো চ অযং ইমেসং চতুন্নং ঝাযীনং অগ্গো চ সেট্ঠো চ মোক্খো [পামোক্খো (স্যা. কং.) এৰমুপরিপি] চ উত্তমো চ পৰরো চ. সেয্যথাপি, ভিক্খৰে, গৰা খীরং, খীরম্হা দধি, দধিম্হা নৰনীতং, নৰনীতম্হা সপ্পি, সপ্পিম্হা সপ্পিমণ্ডো তত্র অগ্গমক্খাযতি; এৰমেৰ খো, ভিক্খৰে, য্ৰাযং ঝাযী সমাধিস্মিং সমাধিকুসলো চ হোতি সমাধিস্মিং সমাপত্তিকুসলো চ অযং ইমেসং চতুন্নং ঝাযীনং অগ্গো চ সেট্ঠো চ মোক্খো চ উত্তমো চ পৰরো চা’’তি. পঠমং.

২. সমাধিমূলকঠিতিসুত্তং

৬৬৩. সাৰত্থিনিদানং. ‘‘চত্তারোমে, ভিক্খৰে, ঝাযী. কতমে চত্তারো? ইধ, ভিক্খৰে, একচ্চো ঝাযী সমাধিস্মিং সমাধিকুসলো হোতি, ন সমাধিস্মিং ঠিতিকুসলো. ইধ পন, ভিক্খৰে, একচ্চো ঝাযী সমাধিস্মিং ঠিতিকুসলো হোতি, ন সমাধিস্মিং সমাধিকুসলো. ইধ পন, ভিক্খৰে, একচ্চো ঝাযী নেৰ সমাধিস্মিং সমাধিকুসলো হোতি, ন চ সমাধিস্মিং ঠিতিকুসলো. ইধ পন, ভিক্খৰে, একচ্চো ঝাযী সমাধিস্মিং সমাধিকুসলো চ হোতি, সমাধিস্মিং ঠিতিকুসলো চ. তত্র, ভিক্খৰে, য্ৰাযং ঝাযী সমাধিস্মিং সমাধিকুসলো চ হোতি সমাধিস্মিং ঠিতিকুসলো চ অযং ইমেসং চতুন্নং ঝাযীনং অগ্গো চ সেট্ঠো চ মোক্খো চ উত্তমো চ পৰরো চ. সেয্যথাপি, ভিক্খৰে, গৰা খীরং, খীরম্হা দধি, দধিম্হা নৰনীতং, নৰনীতম্হা সপ্পি, সপ্পিম্হা সপ্পিমণ্ডো তত্র অগ্গমক্খাযতি; এৰমেৰ খো, ভিক্খৰে, য্ৰাযং ঝাযী সমাধিস্মিং সমাধিকুসলো চ হোতি সমাধিস্মিং ঠিতিকুসলো চ অযং ইমেসং চতুন্নং ঝাযীনং অগ্গো চ সেট্ঠো চ মোক্খো চ উত্তমো চ পৰরো চা’’তি. দুতিযং.

৩. সমাধিমূলকৰুট্ঠানসুত্তং

৬৬৪. সাৰত্থিনিদানং. ‘‘চত্তারোমে, ভিক্খৰে, ঝাযী. কতমে চত্তারো? ইধ, ভিক্খৰে, একচ্চো ঝাযী সমাধিস্মিং সমাধিকুসলো হোতি, ন সমাধিস্মিং ৰুট্ঠানকুসলো. ইধ পন, ভিক্খৰে, একচ্চো ঝাযী সমাধিস্মিং ৰুট্ঠানকুসলো হোতি, ন সমাধিস্মিং সমাধিকুসলো. ইধ পন, ভিক্খৰে, একচ্চো ঝাযী নেৰ সমাধিস্মিং সমাধিকুসলো হোতি, ন চ সমাধিস্মিং ৰুট্ঠানকুসলো. ইধ পন, ভিক্খৰে, একচ্চো ঝাযী সমাধিস্মিং সমাধিকুসলো চ হোতি, সমাধিস্মিং ৰুট্ঠানকুসলো চ. তত্র, ভিক্খৰে, য্ৰাযং ঝাযী সমাধিস্মিং সমাধিকুসলো চ হোতি সমাধিস্মিং ৰুট্ঠানকুসলো চ অযং ইমেসং চতুন্নং ঝাযীনং অগ্গো চ সেট্ঠো চ মোক্খো চ উত্তমো চ পৰরো চ. সেয্যথাপি, ভিক্খৰে, গৰা খীরং…পে… পৰরো চা’’তি. ততিযং.

৪. সমাধিমূলককল্লিতসুত্তং

৬৬৫. সাৰত্থিনিদানং. ‘‘চত্তারোমে, ভিক্খৰে, ঝাযী. কতমে চত্তারো? ইধ, ভিক্খৰে, একচ্চো ঝাযী সমাধিস্মিং সমাধিকুসলো হোতি, ন সমাধিস্মিং কল্লিতকুসলো. ইধ পন, ভিক্খৰে, একচ্চো ঝাযী সমাধিস্মিং কল্লিতকুসলো হোতি, ন সমাধিস্মিং সমাধিকুসলো. ইধ পন, ভিক্খৰে, একচ্চো ঝাযী নেৰ সমাধিস্মিং সমাধিকুসলো হোতি, ন চ সমাধিস্মিং কল্লিতকুসলো. ইধ পন, ভিক্খৰে, একচ্চো ঝাযী সমাধিস্মিং সমাধিকুসলো চ হোতি, সমাধিস্মিং কল্লিতকুসলো চ. তত্র, ভিক্খৰে, য্ৰাযং ঝাযী সমাধিস্মিং সমাধিকুসলো চ হোতি সমাধিস্মিং কল্লিতকুসলো চ অযং ইমেসং চতুন্নং ঝাযীনং অগ্গো চ সেট্ঠো চ মোক্খো চ উত্তমো চ পৰরো চ. সেয্যথাপি, ভিক্খৰে, গৰা খীরং…পে… পৰরো চা’’তি. চতুত্থং.

৫. সমাধিমূলকআরম্মণসুত্তং

৬৬৬. সাৰত্থিনিদানং. ‘‘চত্তারোমে, ভিক্খৰে, ঝাযী. কতমে চত্তারো? ইধ, ভিক্খৰে, একচ্চো ঝাযী সমাধিস্মিং সমাধিকুসলো হোতি, ন সমাধিস্মিং আরম্মণকুসলো. ইধ পন, ভিক্খৰে, একচ্চো ঝাযী সমাধিস্মিং আরম্মণকুসলো হোতি, ন সমাধিস্মিং সমাধিকুসলো. ইধ পন, ভিক্খৰে, একচ্চো ঝাযী নেৰ সমাধিস্মিং সমাধিকুসলো হোতি, ন চ সমাধিস্মিং আরম্মণকুসলো. ইধ পন, ভিক্খৰে, একচ্চো ঝাযী সমাধিস্মিং সমাধিকুসলো চ হোতি, সমাধিস্মিং আরম্মণকুসলো চ. তত্র, ভিক্খৰে, য্ৰাযং ঝাযী সমাধিস্মিং সমাধিকুসলো চ হোতি সমাধিস্মিং আরম্মণকুসলো চ অযং ইমেসং চতুন্নং ঝাযীনং অগ্গো চ সেট্ঠো চ মোক্খো চ উত্তমো চ পৰরো চ. সেয্যথাপি, ভিক্খৰে, গৰা খীরং…পে… পৰরো চা’’তি. পঞ্চমং.

৬. সমাধিমূলকগোচরসুত্তং

৬৬৭. সাৰত্থিনিদানং. ‘‘চত্তারোমে, ভিক্খৰে, ঝাযী. কতমে চত্তারো? ইধ, ভিক্খৰে, একচ্চো ঝাযী সমাধিস্মিং সমাধিকুসলো হোতি, ন সমাধিস্মিং গোচরকুসলো. ইধ পন, ভিক্খৰে, একচ্চো ঝাযী সমাধিস্মিং গোচরকুসলো হোতি, ন সমাধিস্মিং সমাধিকুসলো. ইধ পন, ভিক্খৰে, একচ্চো ঝাযী নেৰ সমাধিস্মিং সমাধিকুসলো হোতি, ন চ সমাধিস্মিং গোচরকুসলো. ইধ পন, ভিক্খৰে, একচ্চো ঝাযী সমাধিস্মিং সমাধিকুসলো চ হোতি, সমাধিস্মিং গোচরকুসলো চ. তত্র, ভিক্খৰে, য্ৰাযং ঝাযী সমাধিস্মিং সমাধিকুসলো চ হোতি সমাধিস্মিং গোচরকুসলো চ অযং ইমেসং চতুন্নং ঝাযীনং অগ্গো চ সেট্ঠো চ মোক্খো চ উত্তমো চ পৰরো চ. সেয্যথাপি, ভিক্খৰে, গৰা খীরং…পে… পৰরো চা’’তি. ছট্ঠং.

৭. সমাধিমূলকঅভিনীহারসুত্তং

৬৬৮. সাৰত্থিনিদানং. ‘‘চত্তারোমে, ভিক্খৰে, ঝাযী. কতমে চত্তারো? ইধ, ভিক্খৰে, একচ্চো ঝাযী সমাধিস্মিং সমাধিকুসলো হোতি, ন সমাধিস্মিং অভিনীহারকুসলো. ইধ পন, ভিক্খৰে, একচ্চো ঝাযী সমাধিস্মিং অভিনীহারকুসলো হোতি, ন সমাধিস্মিং সমাধিকুসলো. ইধ পন, ভিক্খৰে, একচ্চো ঝাযী নেৰ সমাধিস্মিং সমাধিকুসলো হোতি, ন চ সমাধিস্মিং অভিনীহারকুসলো. ইধ পন, ভিক্খৰে, একচ্চো ঝাযী সমাধিস্মিং সমাধিকুসলো চ হোতি, সমাধিস্মিং অভিনীহারকুসলো চ. তত্র, ভিক্খৰে, য্ৰাযং ঝাযী সমাধিস্মিং সমাধিকুসলো চ হোতি সমাধিস্মিং অভিনীহারকুসলো চ অযং ইমেসং চতুন্নং ঝাযীনং অগ্গো চ সেট্ঠো চ মোক্খো চ উত্তমো চ পৰরো চ. সেয্যথাপি, ভিক্খৰে, গৰা খীরং…পে… পৰরো চা’’তি. সত্তমং.

৮. সমাধিমূলকসক্কচ্চকারীসুত্তং

৬৬৯. সাৰত্থিনিদানং. ‘‘চত্তারোমে, ভিক্খৰে, ঝাযী. কতমে চত্তারো? ইধ, ভিক্খৰে, একচ্চো ঝাযী সমাধিস্মিং সমাধিকুসলো হোতি, ন সমাধিস্মিং সক্কচ্চকারী. ইধ পন, ভিক্খৰে, একচ্চো ঝাযী সমাধিস্মিং সক্কচ্চকারী হোতি, ন সমাধিস্মিং সমাধিকুসলো. ইধ পন, ভিক্খৰে, একচ্চো ঝাযী নেৰ সমাধিস্মিং সমাধিকুসলো হোতি, ন চ সমাধিস্মিং সক্কচ্চকারী. ইধ পন, ভিক্খৰে, একচ্চো ঝাযী সমাধিস্মিং সমাধিকুসলো চ হোতি, সমাধিস্মিং সক্কচ্চকারী চ. তত্র, ভিক্খৰে, য্ৰাযং ঝাযী সমাধিস্মিং সমাধিকুসলো চ হোতি সমাধিস্মিং সক্কচ্চকারী চ অযং ইমেসং চতুন্নং ঝাযীনং অগ্গো চ সেট্ঠো চ মোক্খো চ উত্তমো চ পৰরো চ. সেয্যথাপি, ভিক্খৰে, গৰা খীরং…পে… পৰরো চা’’তি. অট্ঠমং.

৯. সমাধিমূলকসাতচ্চকারীসুত্তং

৬৭০. সাৰত্থিনিদানং. ‘‘চত্তারোমে, ভিক্খৰে, ঝাযী. কতমে চত্তারো? ইধ, ভিক্খৰে, একচ্চো ঝাযী সমাধিস্মিং সমাধিকুসলো হোতি, ন সমাধিস্মিং সাতচ্চকারী. ইধ পন, ভিক্খৰে, একচ্চো ঝাযী সমাধিস্মিং সাতচ্চকারী হোতি, ন সমাধিস্মিং সমাধিকুসলো. ইধ পন, ভিক্খৰে, একচ্চো ঝাযী নেৰ সমাধিস্মিং সমাধিকুসলো হোতি, ন চ সমাধিস্মিং সাতচ্চকারী. ইধ পন, ভিক্খৰে, একচ্চো ঝাযী সমাধিস্মিং সমাধিকুসলো চ হোতি, সমাধিস্মিং সাতচ্চকারী চ. তত্র, ভিক্খৰে, য্ৰাযং ঝাযী সমাধিস্মিং সমাধিকুসলো চ হোতি, সমাধিস্মিং সাতচ্চকারী চ অযং ইমেসং চতুন্নং ঝাযীনং অগ্গো চ সেট্ঠো চ মোক্খো চ উত্তমো চ পৰরো চ. সেয্যথাপি, ভিক্খৰে, গৰা খীরং…পে… পৰরো চা’’তি. নৰমং.

১০. সমাধিমূলকসপ্পাযকারীসুত্তং

৬৭১. সাৰত্থিনিদানং. ‘‘চত্তারোমে, ভিক্খৰে, ঝাযী. কতমে চত্তারো? ইধ, ভিক্খৰে, একচ্চো ঝাযী সমাধিস্মিং সমাধিকুসলো হোতি, ন সমাধিস্মিং সপ্পাযকারী. ইধ পন, ভিক্খৰে, একচ্চো ঝাযী সমাধিস্মিং সপ্পাযকারী হোতি, ন সমাধিস্মিং সমাধিকুসলো. ইধ পন, ভিক্খৰে, একচ্চো ঝাযী নেৰ সমাধিস্মিং সমাধিকুসলো হোতি, ন চ সমাধিস্মিং সপ্পাযকারী. ইধ পন, ভিক্খৰে, একচ্চো ঝাযী সমাধিস্মিং সমাধিকুসলো চ হোতি, সমাধিস্মিং সপ্পাযকারী চ. তত্র, ভিক্খৰে, য্ৰাযং ঝাযী সমাধিস্মিং সমাধিকুসলো চ হোতি সমাধিস্মিং সপ্পাযকারী চ অযং ইমেসং চতুন্নং ঝাযীনং অগ্গো চ সেট্ঠো চ মোক্খো চ উত্তমো চ পৰরো চ. সেয্যথাপি, ভিক্খৰে, গৰা খীরং…পে… পৰরো চা’’তি. দসমং. (সমাধিমূলকং.)

১১. সমাপত্তিমূলকঠিতিসুত্তং

৬৭২. সাৰত্থিনিদানং. ‘‘চত্তারোমে, ভিক্খৰে, ঝাযী. কতমে চত্তারো? ইধ, ভিক্খৰে, একচ্চো ঝাযী সমাধিস্মিং সমাপত্তিকুসলো হোতি, ন সমাধিস্মিং ঠিতিকুসলো. ইধ পন, ভিক্খৰে, একচ্চো ঝাযী সমাধিস্মিং ঠিতিকুসলো হোতি, ন সমাধিস্মিং সমাপত্তিকুসলো. ইধ পন, ভিক্খৰে, একচ্চো ঝাযী নেৰ সমাধিস্মিং সমাপত্তিকুসলো হোতি, ন চ সমাধিস্মিং ঠিতিকুসলো. ইধ পন, ভিক্খৰে, একচ্চো ঝাযী সমাধিস্মিং সমাপত্তিকুসলো চ হোতি, সমাধিস্মিং ঠিতিকুসলো চ. তত্র, ভিক্খৰে, য্ৰাযং ঝাযী সমাধিস্মিং সমাপত্তিকুসলো চ হোতি, সমাধিস্মিং ঠিতিকুসলো চ অযং ইমেসং চতুন্নং ঝাযীনং অগ্গো চ সেট্ঠো চ মোক্খো চ উত্তমো চ পৰরো চ. সেয্যথাপি, ভিক্খৰে, গৰা খীরং…পে… পৰরো চা’’তি. একাদসমং.

১২. সমাপত্তিমূলকৰুট্ঠানসুত্তং

৬৭৩. সাৰত্থিনিদানং. ‘‘চত্তারোমে, ভিক্খৰে, ঝাযী. কতমে চত্তারো? ইধ, ভিক্খৰে, একচ্চো ঝাযী সমাধিস্মিং সমাপত্তিকুসলো হোতি, ন সমাধিস্মিং ৰুট্ঠানকুসলো. ইধ পন, ভিক্খৰে, একচ্চো ঝাযী সমাধিস্মিং ৰুট্ঠানকুসলো হোতি, ন সমাধিস্মিং সমাপত্তিকুসলো. ইধ পন, ভিক্খৰে, একচ্চো ঝাযী নেৰ সমাধিস্মিং সমাপত্তিকুসলো হোতি, ন চ সমাধিস্মিং ৰুট্ঠানকুসলো. ইধ পন, ভিক্খৰে, একচ্চো ঝাযী সমাধিস্মিং সমাপত্তিকুসলো চ হোতি, সমাধিস্মিং ৰুট্ঠানকুসলো চ. তত্র, ভিক্খৰে, য্ৰাযং ঝাযী …পে… পৰরো চা’’তি. দ্ৰাদসমং.

১৩. সমাপত্তিমূলককল্লিতসুত্তং

৬৭৪. সাৰত্থিনিদানং. ‘‘চত্তারোমে, ভিক্খৰে, ঝাযী. কতমে চত্তারো? ইধ, ভিক্খৰে, একচ্চো ঝাযী সমাধিস্মিং সমাপত্তিকুসলো হোতি, ন সমাধিস্মিং কল্লিতকুসলো. ইধ পন, ভিক্খৰে, একচ্চো ঝাযী সমাধিস্মিং কল্লিতকুসলো হোতি, ন সমাধিস্মিং সমাপত্তিকুসলো. ইধ পন, ভিক্খৰে, একচ্চো ঝাযী নেৰ সমাধিস্মিং সমাপত্তিকুসলো হোতি, ন চ সমাধিস্মিং কল্লিতকুসলো. ইধ পন, ভিক্খৰে, একচ্চো ঝাযী সমাধিস্মিং সমাপত্তিকুসলো চ হোতি, সমাধিস্মিং কল্লিতকুসলো চ. তত্র…পে… পৰরো চা’’তি. তেরসমং.

১৪. সমাপত্তিমূলকআরম্মণসুত্তং

৬৭৫. সাৰত্থিনিদানং. ‘‘চত্তারোমে, ভিক্খৰে, ঝাযী. কতমে চত্তারো? ইধ, ভিক্খৰে, একচ্চো ঝাযী সমাধিস্মিং সমাপত্তিকুসলো হোতি, ন সমাধিস্মিং আরম্মণকুসলো. ইধ পন, ভিক্খৰে, একচ্চো ঝাযী সমাধিস্মিং আরম্মণকুসলো হোতি, ন সমাধিস্মিং সমাপত্তিকুসলো. ইধ পন, ভিক্খৰে, একচ্চো ঝাযী নেৰ সমাধিস্মিং সমাপত্তিকুসলো হোতি, ন চ সমাধিস্মিং আরম্মণকুসলো. ইধ পন, ভিক্খৰে, একচ্চো ঝাযী সমাধিস্মিং সমাপত্তিকুসলো চ হোতি, সমাধিস্মিং আরম্মণকুসলো চ. তত্র…পে… পৰরো চা’’তি. চুদ্দসমং.

১৫. সমাপত্তিমূলকগোচরসুত্তং

৬৭৬. সাৰত্থিনিদানং. ‘‘চত্তারোমে, ভিক্খৰে, ঝাযী. কতমে চত্তারো? ইধ, ভিক্খৰে, একচ্চো ঝাযী সমাধিস্মিং সমাপত্তিকুসলো হোতি, ন সমাধিস্মিং গোচরকুসলো. ইধ পন, ভিক্খৰে, একচ্চো ঝাযী সমাধিস্মিং গোচরকুসলো হোতি, ন সমাধিস্মিং সমাপত্তিকুসলো. ইধ পন, ভিক্খৰে, একচ্চো ঝাযী নেৰ সমাধিস্মিং সমাপত্তিকুসলো হোতি, ন চ সমাধিস্মিং গোচরকুসলো. ইধ পন, ভিক্খৰে, একচ্চো ঝাযী সমাধিস্মিং সমাপত্তিকুসলো চ হোতি, সমাধিস্মিং গোচরকুসলো চ. তত্র…পে… পৰরো চা’’তি. পন্নরসমং.

১৬. সমাপত্তিমূলকঅভিনীহারসুত্তং

৬৭৭. সাৰত্থিনিদানং. ‘‘চত্তারোমে, ভিক্খৰে, ঝাযী. কতমে চত্তারো? ইধ, ভিক্খৰে, একচ্চো ঝাযী সমাধিস্মিং সমাপত্তিকুসলো হোতি, ন সমাধিস্মিং অভিনীহারকুসলো. ইধ পন, ভিক্খৰে, একচ্চো ঝাযী সমাধিস্মিং অভিনীহারকুসলো হোতি, ন সমাধিস্মিং সমাপত্তিকুসলো. ইধ পন, ভিক্খৰে, একচ্চো ঝাযী নেৰ সমাধিস্মিং সমাপত্তিকুসলো হোতি, ন চ সমাধিস্মিং অভিনীহারকুসলো. ইধ পন, ভিক্খৰে, একচ্চো ঝাযী সমাধিস্মিং সমাপত্তিকুসলো চ হোতি, সমাধিস্মিং অভিনীহারকুসলো চ. তত্র…পে… পৰরো চা’’তি. সোল়সমং.

১৭. সমাপত্তিমূলকসক্কচ্চসুত্তং

৬৭৮. সাৰত্থিনিদানং. ‘‘চত্তারোমে, ভিক্খৰে, ঝাযী. কতমে চত্তারো? ইধ, ভিক্খৰে, একচ্চো ঝাযী সমাধিস্মিং সমাপত্তিকুসলো হোতি, ন সমাধিস্মিং সক্কচ্চকারী. ইধ পন, ভিক্খৰে, একচ্চো ঝাযী সমাধিস্মিং সক্কচ্চকারী হোতি, ন সমাধিস্মিং সমাপত্তিকুসলো. ইধ পন, ভিক্খৰে, একচ্চো ঝাযী নেৰ সমাধিস্মিং সমাপত্তিকুসলো হোতি, ন চ সমাধিস্মিং সক্কচ্চকারী. ইধ পন, ভিক্খৰে, একচ্চো ঝাযী সমাধিস্মিং সমাপত্তিকুসলো চ হোতি, সমাধিস্মিং সক্কচ্চকারী চ. তত্র…পে… পৰরো চা’’তি. সত্তরসমং.

১৮. সমাপত্তিমূলকসাতচ্চসুত্তং

৬৭৯. সাৰত্থিনিদানং. ‘‘চত্তারোমে, ভিক্খৰে, ঝাযী. কতমে চত্তারো? ইধ, ভিক্খৰে, একচ্চো ঝাযী সমাধিস্মিং সমাপত্তিকুসলো হোতি, ন সমাধিস্মিং সাতচ্চকারী. ইধ পন, ভিক্খৰে, একচ্চো ঝাযী সমাধিস্মিং সাতচ্চকারী হোতি, ন সমাধিস্মিং সমাপত্তিকুসলো. ইধ পন, ভিক্খৰে, একচ্চো ঝাযী নেৰ সমাধিস্মিং সমাপত্তিকুসলো হোতি, ন চ সমাধিস্মিং সাতচ্চকারী. ইধ পন, ভিক্খৰে, একচ্চো ঝাযী সমাধিস্মিং সমাপত্তিকুসলো চ হোতি, সমাধিস্মিং সাতচ্চকারী চ. তত্র…পে… পৰরো চা’’তি. অট্ঠারসমং.

১৯. সমাপত্তিমূলকসপ্পাযকারীসুত্তং

৬৮০. সাৰত্থিনিদানং. ‘‘চত্তারোমে, ভিক্খৰে, ঝাযী. কতমে চত্তারো? ইধ, ভিক্খৰে, একচ্চো ঝাযী সমাধিস্মিং সমাপত্তিকুসলো হোতি, ন সমাধিস্মিং সপ্পাযকারী. ইধ পন, ভিক্খৰে, একচ্চো ঝাযী সমাধিস্মিং সপ্পাযকারী হোতি, ন সমাধিস্মিং সমাপত্তিকুসলো. ইধ পন, ভিক্খৰে, একচ্চো ঝাযী নেৰ সমাধিস্মিং সমাপত্তিকুসলো হোতি, ন চ সমাধিস্মিং সপ্পাযকারী. ইধ পন, ভিক্খৰে, একচ্চো ঝাযী সমাধিস্মিং সমাপত্তিকুসলো চ হোতি, সমাধিস্মিং সপ্পাযকারী চ. তত্র, ভিক্খৰে, য্ৰাযং ঝাযী সমাধিস্মিং সমাপত্তিকুসলো চ হোতি সমাধিস্মিং সপ্পাযকারী চ অযং ইমেসং চতুন্নং ঝাযীনং অগ্গো চ সেট্ঠো চ মোক্খো চ উত্তমো চ পৰরো চ. সেয্যথাপি, ভিক্খৰে, গৰা খীরং, খীরম্হা দধি, দধিম্হা নৰনীতং, নৰনীতম্হা সপ্পি, সপ্পিম্হা সপ্পিমণ্ডো তত্র অগ্গমক্খাযতি; এৰমেৰ খো, ভিক্খৰে, য্ৰাযং ঝাযী সমাধিস্মিং সমাপত্তিকুসলো চ হোতি সমাধিস্মিং সপ্পাযকারী চ অযং ইমেসং চতুন্নং ঝাযীনং অগ্গো চ সেট্ঠো চ মোক্খো চ উত্তমো চ পৰরো চা’’তি. একূনৰীসতিমং. (সমাপত্তিমূলকং.)

২০-২৭. ঠিতিমূলকৰুট্ঠানসুত্তাদিঅট্ঠকং

৬৮১-৬৮৮. সাৰত্থিনিদানং. ‘‘চত্তারোমে, ভিক্খৰে, ঝাযী. কতমে চত্তারো? ইধ, ভিক্খৰে, একচ্চো ঝাযী সমাধিস্মিং ঠিতিকুসলো হোতি, ন সমাধিস্মিং ৰুট্ঠানকুসলো. ইধ পন, ভিক্খৰে, একচ্চো ঝাযী সমাধিস্মিং ৰুট্ঠানকুসলো হোতি, ন সমাধিস্মিং ঠিতিকুসলো. ইধ পন, ভিক্খৰে, একচ্চো ঝাযী নেৰ সমাধিস্মিং ঠিতিকুসলো হোতি, ন চ সমাধিস্মিং ৰুট্ঠানকুসলো. ইধ পন, ভিক্খৰে, একচ্চো ঝাযী সমাধিস্মিং ঠিতিকুসলো চ হোতি, সমাধিস্মিং ৰুট্ঠানকুসলো চ. তত্র, ভিক্খৰে, য্ৰাযং ঝাযী…পে… উত্তমো চ পৰরো চা’’তি. ৰীসতিমং. (পুরিমমূলকানি ৰিয যাৰ সত্তৰীসতিমা ঠিতিমূলকসপ্পাযকারীসুত্তা অট্ঠ সুত্তানি পূরেতব্বানি. ঠিতিমূলকং.)

২৮-৩৪. ৰুট্ঠানমূলককল্লিতসুত্তাদিসত্তকং

৬৮৯-৬৯৫. সাৰত্থিনিদানং. ‘‘চত্তারোমে, ভিক্খৰে, ঝাযী. কতমে চত্তারো? ইধ, ভিক্খৰে, একচ্চো ঝাযী সমাধিস্মিং ৰুট্ঠানকুসলো হোতি, ন সমাধিস্মিং কল্লিতকুসলো… সমাধিস্মিং কল্লিতকুসলো হোতি, ন সমাধিস্মিং ৰুট্ঠানকুসলো… নেৰ সমাধিস্মিং ৰুট্ঠানকুসলো হোতি, ন চ সমাধিস্মিং কল্লিতকুসলো… সমাধিস্মিং ৰুট্ঠানকুসলো চ হোতি সমাধিস্মিং কল্লিতকুসলো চ. তত্র, ভিক্খৰে, য্ৰাযং ঝাযী…পে… উত্তমো চ পৰরো চা’’তি. অট্ঠৰীসতিমং. (পুরিমমূলকানি ৰিয যাৰ চতুত্তিংসতিমা ৰুট্ঠানমূলকসপ্পাযকারীসুত্তা সত্ত সুত্তানি পূরেতব্বানি. ৰুট্ঠানমূলকং.)

৩৫-৪০. কল্লিতমূলকআরম্মণসুত্তাদিছক্কং

৬৯৬-৭০১. সাৰত্থিনিদানং … ‘‘সমাধিস্মিং কল্লিতকুসলো হোতি, ন সমাধিস্মিং আরম্মণকুসলো… সমাধিস্মিং আরম্মণকুসলো হোতি, ন সমাধিস্মিং কল্লিতকুসলো… নেৰ সমাধিস্মিং কল্লিতকুসলো হোতি, ন চ সমাধিস্মিং আরম্মণকুসলো… সমাধিস্মিং কল্লিতকুসলো চ হোতি, সমাধিস্মিং আরম্মণকুসলো চ. তত্র, ভিক্খৰে, য্ৰাযং ঝাযী…পে… উত্তমো চ পৰরো চা’’তি. পঞ্চতিংসতিমং. (পুরিমমূলকানি ৰিয যাৰ চত্তালীসমা কল্লিতমূলকসপ্পাযকারীসুত্তা ছ সুত্তানি পূরেতব্বানি. কল্লিতমূলকং.)

৪১-৪৫. আরম্মণমূলকগোচরসুত্তাদিপঞ্চকং

৭০২-৭০৬. সাৰত্থিনিদানং … ‘‘সমাধিস্মিং আরম্মণকুসলো হোতি, ন সমাধিস্মিং গোচরকুসলো… সমাধিস্মিং গোচরকুসলো হোতি, ন সমাধিস্মিং আরম্মণকুসলো… নেৰ সমাধিস্মিং আরম্মণকুসলো হোতি, ন চ সমাধিস্মিং গোচরকুসলো… সমাধিস্মিং আরম্মণকুসলো চ হোতি, সমাধিস্মিং গোচরকুসলো চ. তত্র, ভিক্খৰে, য্ৰাযং ঝাযী…পে… উত্তমো চ পৰরো চা’’তি. একচত্তালীসমং. (পুরিমমূলকানি ৰিয যাৰ পঞ্চচত্তালীসমা আরম্মণমূলকসপ্পাযকারীসুত্তা পঞ্চ সুত্তানি পূরেতব্বানি. আরম্মণমূলকং.)

৪৬-৪৯. গোচরমূলকঅভিনীহারসুত্তাদিচতুক্কং

৭০৭. সাৰত্থিনিদানং… ‘‘সমাধিস্মিং গোচরকুসলো হোতি, ন সমাধিস্মিং অভিনীহারকুসলো… সমাধিস্মিং অভিনীহারকুসলো হোতি, ন সমাধিস্মিং গোচরকুসলো… নেৰ সমাধিস্মিং গোচরকুসলো হোতি, ন চ সমাধিস্মিং অভিনীহারকুসলো… সমাধিস্মিং গোচরকুসলো চ হোতি, সমাধিস্মিং অভিনীহারকুসলো চ… সেয্যথাপি, ভিক্খৰে, গৰা খীরং, খীরম্হা দধি, দধিম্হা নৰনীতং, নৰনীতম্হা সপ্পি, সপ্পিম্হা সপ্পিমণ্ডো তত্র অগ্গমক্খাযতি; এৰমেৰ খো, ভিক্খৰে, য্ৰাযং ঝাযী সমাধিস্মিং গোচরকুসলো চ হোতি সমাধিস্মিং অভিনীহারকুসলো চ অযং ইমেসং চতুন্নং ঝাযীনং…পে… উত্তমো চ পৰরো চা’’তি. ছচত্তালীসমং.

৭০৮. সমাধিস্মিং গোচরকুসলো হোতি, ন সমাধিস্মিং সক্কচ্চকারী…পে…. ৰিত্থারেতব্বং. সত্তচত্তালীসমং.

৭০৯. সমাধিস্মিং গোচরকুসলো হোতি, ন সমাধিস্মিং সাতচ্চকারী…পে…. অট্ঠচত্তালীসমং.

৭১০. সমাধিস্মিং গোচরকুসলো হোতি, ন সমাধিস্মিং সপ্পাযকারী…পে…. একূনপঞ্ঞাসমং. (গোচরমূলকং.)

৫০-৫২. অভিনীহারমূলকসক্কচ্চসুত্তাদিতিকং

৭১১. সাৰত্থিনিদানং … ‘‘সমাধিস্মিং অভিনীহারকুসলো হোতি, ন সমাধিস্মিং সক্কচ্চকারী… সমাধিস্মিং সক্কচ্চকারী হোতি, ন সমাধিস্মিং অভিনীহারকুসলো… নেৰ সমাধিস্মিং অভিনীহারকুসলো হোতি, ন চ সমাধিস্মিং সক্কচ্চকারী… সমাধিস্মিং অভিনীহারকুসলো চ হোতি, সমাধিস্মিং সক্কচ্চকারী চ. তত্র, ভিক্খৰে, য্ৰাযং ঝাযী…পে… উত্তমো চ পৰরো চা’’তি. পঞ্ঞাসমং.

৭১২. সমাধিস্মিং অভিনীহারকুসলো হোতি, ন সমাধিস্মিং সাতচ্চকারী…পে…. একপঞ্ঞাসমং.

৭১৩. সমাধিস্মিং অভিনীহারকুসলো হোতি, ন সমাধিস্মিং সপ্পাযকারী…পে…. দ্ৰেপঞ্ঞাসমং. (অভিনীহারমূলকং.)

৫৩-৫৪. সক্কচ্চমূলকসাতচ্চকারীসুত্তাদিদুকং

৭১৪. সাৰত্থিনিদানং … ‘‘সমাধিস্মিং সক্কচ্চকারী হোতি, ন সমাধিস্মিং সাতচ্চকারী… সমাধিস্মিং সাতচ্চকারী হোতি, ন সমাধিস্মিং সক্কচ্চকারী … নেৰ সমাধিস্মিং সক্কচ্চকারী হোতি, ন চ সমাধিস্মিং সাতচ্চকারী… সমাধিস্মিং সক্কচ্চকারী চ হোতি, সমাধিস্মিং সাতচ্চকারী চ. তত্র, ভিক্খৰে, য্ৰাযং…পে… উত্তমো চ পৰরো চা’’তি. তেপঞ্ঞাসমং.

৭১৫. সমাধিস্মিং সক্কচ্চকারী হোতি, ন সমাধিস্মিং সপ্পাযকারী…পে…. চতুপঞ্ঞাসমং.

৫৫. সাতচ্চমূলকসপ্পাযকারীসুত্তং

৭১৬. সাৰত্থিনিদানং. ‘‘চতারোমে, ভিক্খৰে, ঝাযী. কতমে চত্তারো? ইধ, ভিক্খৰে, একচ্চো ঝাযী সমাধিস্মিং সাতচ্চকারী হোতি, ন সমাধিস্মিং সপ্পাযকারী. ইধ পন, ভিক্খৰে, একচ্চো ঝাযী সমাধিস্মিং সপ্পাযকারী হোতি, ন সমাধিস্মিং সাতচ্চকারী. ইধ পন, ভিক্খৰে, একচ্চো ঝাযী নেৰ সমাধিস্মিং সাতচ্চকারী হোতি, ন চ সমাধিস্মিং সপ্পাযকারী. ইধ পন, ভিক্খৰে, একচ্চো ঝাযী সমাধিস্মিং সাতচ্চকারী চ হোতি, সমাধিস্মিং সপ্পাযকারী চ. তত্র, ভিক্খৰে, য্ৰাযং ঝাযী সমাধিস্মিং সাতচ্চকারী চ হোতি সমাধিস্মিং সপ্পাযকারী চ অযং ইমেসং চতুন্নং ঝাযীনং অগ্গো চ সেট্ঠো চ মোক্খো চ উত্তমো চ পৰরো চ. সেয্যথাপি, ভিক্খৰে, গৰা খীরং, খীরম্হা দধি, দধিম্হা নৰনীতং, নৰনীতম্হা সপ্পি, সপ্পিম্হা সপ্পিমণ্ডো তত্র অগ্গমক্খাযতি; এৰমেৰ খো, ভিক্খৰে, য্ৰাযং ঝাযী সমাধিস্মিং সাতচ্চকারী চ হোতি, সমাধিস্মিং সপ্পাযকারী অযং ইমেসং চতুন্নং ঝাযীনং অগ্গো চ সেট্ঠো চ মোক্খো চ উত্তমো চ পৰরো চা’’তি. ইদমৰোচ ভগৰা. অত্তমনা তে ভিক্খূ ভগৰতো ভাসিতং অভিনন্দুন্তি. পঞ্চপঞ্ঞাসমং. (যথা পঞ্চপঞ্ঞাসং ৰেয্যাকরণানি হোন্তি তথা ৰিত্থারেতব্বানি.)

ঝানসংযুত্তং [সমাধিসংযুত্তং (স্যা. কং.)] সমত্তং.