১২. ৰচ্ছগোত্তসংযুত্তং

১. রূপঅঞ্ঞাণসুত্তং

৬০৭. একং সমযং ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. অথ খো ৰচ্ছগোত্তো পরিব্বাজকো যেন ভগৰা তেনুপসঙ্কমি; উপসঙ্কমিত্ৰা ভগৰতা সদ্ধিং সম্মোদি. সম্মোদনীযং কথং সারণীযং ৰীতিসারেত্ৰা একমন্তং নিসীদি. একমন্তং নিসিন্নো খো ৰচ্ছগোত্তো পরিব্বাজকো ভগৰন্তং এতদৰোচ – ‘‘কো নু খো, ভো গোতম, হেতু, কো পচ্চযো, যানিমানি [যেনিমানি (?)] অনেকৰিহিতানি দিট্ঠিগতানি লোকে উপ্পজ্জন্তি – সস্সতো লোকোতি ৰা, অসস্সতো লোকোতি ৰা, অন্তৰা লোকোতি ৰা, অনন্তৰা লোকোতি ৰা, তং জীৰং তং সরীরন্তি ৰা, অঞ্ঞং জীৰং অঞ্ঞং সরীরন্তি ৰা, হোতি তথাগতো পরং মরণাতি ৰা, ন হোতি তথাগতো পরং মরণাতি ৰা, হোতি চ ন চ হোতি তথাগতো পরং মরণাতি ৰা, নেৰ হোতি ন ন হোতি তথাগতো পরং মরণাতি ৰা’’তি? ‘‘রূপে খো, ৰচ্ছ, অঞ্ঞাণা, রূপসমুদযে অঞ্ঞাণা, রূপনিরোধে অঞ্ঞাণা, রূপনিরোধগামিনিযা পটিপদায অঞ্ঞাণা; এৰমিমানি অনেকৰিহিতানি দিট্ঠিগতানি লোকে উপ্পজ্জন্তি – সস্সতো লোকোতি ৰা…পে… নেৰ হোতি ন ন হোতি তথাগতো পরং মরণাতি ৰাতি. অযং খো, ৰচ্ছ, হেতু, অযং পচ্চযো, যানিমানি [যেন (সী.), যেনিমানি (?)] অনেকৰিহিতানি দিট্ঠিগতানি লোকে উপ্পজ্জন্তি – সস্সতো লোকোতি ৰা, অসস্সতো লোকোতি ৰা…পে… নেৰ হোতি ন ন হোতি তথাগতো পরং মরণাতি ৰা’’তি. পঠমং.

২. ৰেদনাঅঞ্ঞাণসুত্তং

৬০৮. সাৰত্থিনিদানং. একমন্তং নিসিন্নো খো ৰচ্ছগোত্তো পরিব্বাজকো ভগৰন্তং এতদৰোচ – ‘‘কো নু খো, ভো গোতম, হেতু, কো পচ্চযো, যানিমানি অনেকৰিহিতানি দিট্ঠিগতানি লোকে উপ্পজ্জন্তি – সস্সতো লোকোতি ৰা, অসস্সতো লোকোতি ৰা…পে… নেৰ হোতি ন ন হোতি তথাগতো পরং মরণাতি ৰা’’তি? ‘‘ৰেদনায খো, ৰচ্ছ, অঞ্ঞাণা, ৰেদনাসমুদযে অঞ্ঞাণা, ৰেদনানিরোধে অঞ্ঞাণা, ৰেদনানিরোধগামিনিযা পটিপদায অঞ্ঞাণা; এৰমিমানি অনেকৰিহিতানি দিট্ঠিগতানি লোকে উপ্পজ্জন্তি – সস্সতো লোকোতি ৰা, অসস্সতো লোকোতি ৰা…পে… নেৰ হোতি ন ন হোতি তথাগতো পরং মরণাতি ৰাতি. অযং খো, ৰচ্ছ, হেতু, অযং পচ্চযো, যানিমানি অনেকৰিহিতানি দিট্ঠিগতানি লোকে উপ্পজ্জন্তি – সস্সতো লোকোতি ৰা, অসস্সতো লোকোতি ৰা…পে… নেৰ হোতি ন ন হোতি তথাগতো পরং মরণাতি ৰা’’তি. দুতিযং.

৩. সঞ্ঞাঅঞ্ঞাণসুত্তং

৬০৯. সাৰত্থিনিদানং. একমন্তং নিসিন্নো খো ৰচ্ছগোত্তো পরিব্বাজকো ভগৰন্তং এতদৰোচ – ‘‘কো নু খো, ভো গোতম, হেতু, কো পচ্চযো, যানিমানি অনেকৰিহিতানি দিট্ঠিগতানি লোকে উপ্পজ্জন্তি – সস্সতো লোকোতি ৰা, অসস্সতো লোকোতি ৰা…পে… নেৰ হোতি ন ন হোতি তথাগতো পরং মরণাতি ৰা’’তি? ‘‘সঞ্ঞায খো, ৰচ্ছ, অঞ্ঞাণা, সঞ্ঞাসমুদযে অঞ্ঞাণা, সঞ্ঞানিরোধে অঞ্ঞাণা, সঞ্ঞানিরোধগামিনিযা পটিপদায অঞ্ঞাণা; এৰমিমানি অনেকৰিহিতানি দিট্ঠিগতানি লোকে উপ্পজ্জন্তি – সস্সতো লোকোতি ৰা, অসস্সতো লোকোতি ৰা…পে… নেৰ হোতি ন ন হোতি তথাগতো পরং মরণাতি ৰাতি. অযং খো, ৰচ্ছ, হেতু, অযং পচ্চযো, যানিমানি অনেকৰিহিতানি দিট্ঠিগতানি লোকে উপ্পজ্জন্তি – সস্সতো লোকোতি ৰা, অসস্সতো লোকোতি ৰা…পে… নেৰ হোতি ন ন হোতি তথাগতো পরং মরণাতি ৰা’’তি. ততিযং.

৪. সঙ্খারঅঞ্ঞাণসুত্তং

৬১০. সাৰত্থিনিদানং. একমন্তং নিসিন্নো খো ৰচ্ছগোত্তো পরিব্বাজকো ভগৰন্তং এতদৰোচ – ‘‘কো নু খো, ভো গোতম, হেতু, কো পচ্চযো, যানিমানি অনেকৰিহিতানি দিট্ঠিগতানি লোকে উপ্পজ্জন্তি – সস্সতো লোকোতি ৰা, অসস্সতো লোকোতি ৰা…পে… নেৰ হোতি ন ন হোতি তথাগতো পরং মরণাতি ৰা’’তি? ‘‘সঙ্খারেসু খো, ৰচ্ছ, অঞ্ঞাণা, সঙ্খারসমুদযে অঞ্ঞাণা, সঙ্খারনিরোধে অঞ্ঞাণা, সঙ্খারনিরোধগামিনিযা পটিপদায অঞ্ঞাণা; এৰমিমানি অনেকৰিহিতানি দিট্ঠিগতানি লোকে উপ্পজ্জন্তি – সস্সতো লোকোতি ৰা, অসস্সতো লোকোতি ৰা…পে… নেৰ হোতি ন ন হোতি তথাগতো পরং মরণাতি ৰাতি. অযং খো, ৰচ্ছ, হেতু, অযং পচ্চযো, যানিমানি অনেকৰিহিতানি দিট্ঠিগতানি লোকে উপ্পজ্জন্তি – সস্সতো লোকোতি ৰা, অসস্সতো লোকোতি ৰা…পে… নেৰ হোতি ন ন হোতি তথাগতো পরং মরণাতি ৰা’’তি. চতুত্থং.

৫. ৰিঞ্ঞাণঅঞ্ঞাণসুত্তং

৬১১. সাৰত্থিনিদানং. একমন্তং নিসিন্নো খো ৰচ্ছগোত্তো পরিব্বাজকো ভগৰন্তং এতদৰোচ – ‘‘কো নু খো, ভো গোতম, হেতু, কো পচ্চযো, যানিমানি অনেকৰিহিতানি দিট্ঠিগতানি লোকে উপ্পজ্জন্তি – সস্সতো লোকোতি ৰা, অসস্সতো লোকোতি ৰা …পে… নেৰ হোতি ন ন হোতি তথাগতো পরং মরণাতি ৰা’’তি? ‘‘ৰিঞ্ঞাণে খো, ৰচ্ছ, অঞ্ঞাণা, ৰিঞ্ঞাণসমুদযে অঞ্ঞাণা, ৰিঞ্ঞাণনিরোধে অঞ্ঞাণা, ৰিঞ্ঞাণনিরোধগামিনিযা পটিপদায অঞ্ঞাণা; এৰমিমানি অনেকৰিহিতানি দিট্ঠিগতানি লোকে উপ্পজ্জন্তি – সস্সতো লোকোতি ৰা, অসস্সতো লোকোতি ৰা…পে… নেৰ হোতি ন ন হোতি তথাগতো পরং মরণাতি ৰাতি. অযং খো, ৰচ্ছ, হেতু, অযং পচ্চযো, যানিমানি অনেকৰিহিতানি দিট্ঠিগতানি লোকে উপ্পজ্জন্তি – সস্সতো লোকোতি ৰা, অসস্সতো লোকোতি ৰা…পে… নেৰ হোতি ন ন হোতি তথাগতো পরং মরণাতি ৰা’’তি. পঞ্চমং.

৬-১০. রূপঅদস্সনাদিসুত্তপঞ্চকং

৬১২-৬১৬. সাৰত্থিনিদানং. একমন্তং নিসিন্নো খো ৰচ্ছগোত্তো পরিব্বাজকো ভগৰন্তং এতদৰোচ – ‘‘কো নু খো, ভো গোতম, হেতু, কো পচ্চযো, যানিমানি অনেকৰিহিতানি দিট্ঠিগতানি লোকে উপ্পজ্জন্তি – সস্সতো লোকোতি ৰা, অসস্সতো লোকোতি ৰা…পে… নেৰ হোতি ন ন হোতি তথাগতো পরং মরণাতি ৰা’’তি? রূপে খো, ৰচ্ছ, অদস্সনা…পে… রূপনিরোধগামিনিযা পটিপদায অদস্সনা…পে… ৰেদনায … সঞ্ঞায … সঙ্খারেসু খো, ৰচ্ছ, অদস্সনা…পে… ৰিঞ্ঞাণে খো, ৰচ্ছ, অদস্সনা…পে… ৰিঞ্ঞাণনিরোধগামিনিযা পটিপদায অদস্সনা…পে…. দসমং.

১১-১৫. রূপঅনভিসমযাদিসুত্তপঞ্চকং

৬১৭-৬২১. সাৰত্থিনিদানং. রূপে খো, ৰচ্ছ, অনভিসমযা…পে… রূপনিরোধগামিনিযা পটিপদায অনভিসমযা…পে….

সাৰত্থিনিদানং. ৰেদনায খো, ৰচ্ছ, অনভিসমযা…পে….

সাৰত্থিনিদানং. সঞ্ঞায খো, ৰচ্ছ, অনভিসমযা…পে….

সাৰত্থিনিদানং. সঙ্খারেসু খো, ৰচ্ছ, অনভিসমযা…পে….

সাৰত্থিনিদানং. ৰিঞ্ঞাণে খো, ৰচ্ছ, অনভিসমযা…পে…. পন্নরসমং.

১৬-২০. রূপঅননুবোধাদিসুত্তপঞ্চকং

৬২২-৬২৬. সাৰত্থিনিদানং. একমন্তং নিসিন্নো খো ৰচ্ছগোত্তো পরিব্বাজকো ভগৰন্তং এতদৰোচ – কো নু খো, ভো গোতম, হেতু, কো পচ্চযো…পে… রূপে খো, ৰচ্ছ, অননুবোধা…পে… রূপনিরোধগামিনিযা পটিপদায অননুবোধা…পে….

সাৰত্থিনিদানং. ৰেদনায খো, ৰচ্ছ…পে….

সাৰত্থিনিদানং. সঞ্ঞায খো, ৰচ্ছ…পে….

সাৰত্থিনিদানং. সঙ্খারেসু খো, ৰচ্ছ…পে….

সাৰত্থিনিদানং. ৰিঞ্ঞাণে খো, ৰচ্ছ অননুবোধা…পে… ৰিঞ্ঞাণনিরোধগামিনিযা পটিপদায অননুবোধা. ৰীসতিমং.

২১-২৫. রূপঅপ্পটিৰেধাদিসুত্তপঞ্চকং

৬২৭-৬৩১. সাৰত্থিনিদানং. কো নু খো, ভো গোতম, হেতু, কো পচ্চযো…পে…. রূপে খো, ৰচ্ছ, অপ্পটিৰেধা…পে… ৰিঞ্ঞাণে খো, ৰচ্ছ, অপ্পটিৰেধা…পে…. পঞ্চৰীসতিমং.

২৬-৩০. রূপঅসল্লক্খণাদিসুত্তপঞ্চকং

৬৩২-৬৩৬. সাৰত্থিনিদানং. রূপে খো, ৰচ্ছ, অসল্লক্খণা…পে… ৰিঞ্ঞাণে খো, ৰচ্ছ, অসল্লক্খণা…পে…. তিংসতিমং.

৩১-৩৫. রূপঅনুপলক্খণাদিসুত্তপঞ্চকং

৬৩৭-৬৪১. সাৰত্থিনিদানং. রূপে খো, ৰচ্ছ, অনুপলক্খণা…পে… ৰিঞ্ঞাণে খো, ৰচ্ছ, অনুপলক্খণা…পে…. পঞ্চতিংসতিমং.

৩৬-৪০. রূপঅপ্পচ্চুপলক্খণাদিসুত্তপঞ্চকং

৬৪২-৬৪৬. সাৰত্থিনিদানং. রূপে খো, ৰচ্ছ, অপ্পচ্চুপলক্খণা…পে… ৰিঞ্ঞাণে খো, ৰচ্ছ, অপ্পচ্চুপলক্খণা…পে…. চত্তালীসমং.

৪১-৪৫. রূপঅসমপেক্খণাদিসুত্তপঞ্চকং

৬৪৭-৬৫১. সাৰত্থিনিদানং. রূপে খো, ৰচ্ছ, অসমপেক্খণা…পে… ৰিঞ্ঞাণে খো, ৰচ্ছ, অসমপেক্খণা…পে…. পঞ্চচত্তালীসমং.

৪৬-৫০. রূপঅপ্পচ্চুপেক্খণাদিসুত্তপঞ্চকং

৬৫২-৬৫৬. সাৰত্থিনিদানং. রূপে খো, ৰচ্ছ, অপ্পচ্চুপেক্খণা…পে… ৰিঞ্ঞাণে খো, ৰচ্ছ, অপ্পচ্চুপেক্খণা…পে…. পঞ্ঞাসমং.

৫১-৫৪. রূপঅপ্পচ্চক্খকম্মাদিসুত্তচতুক্কং

৬৫৭-৬৬০. সাৰত্থিনিদানং. অথ খো ৰচ্ছগোত্তো পরিব্বাজকো যেন ভগৰা তেনুপসঙ্কমি; উপসঙ্কমিত্ৰা ভগৰতা সদ্ধিং সম্মোদি. সম্মোদনীযং কথং সারণীযং ৰীতিসারেত্ৰা একমন্তং নিসীদি. একমন্তং নিসিন্নো খো ৰচ্ছগোত্তো পরিব্বাজকো ভগৰন্তং এতদৰোচ – ‘‘কো নু খো, ভো গোতম, হেতু, কো পচ্চযো, যানিমানি অনেকৰিহিতানি দিট্ঠিগতানি লোকে উপ্পজ্জন্তি – সস্সতো লোকোতি ৰা…পে… নেৰ হোতি ন ন হোতি তথাগতো পরং মরণাতি ৰা’’তি? রূপে খো, ৰচ্ছ, অপ্পচ্চক্খকম্মা, রূপসমুদযে অপ্পচ্চক্খকম্মা, রূপনিরোধে অপ্পচ্চক্খকম্মা, রূপনিরোধগামিনিযা পটিপদায অপ্পচ্চক্খকম্মা…পে….

সাৰত্থিনিদানং. ৰেদনায খো, ৰচ্ছ, অপ্পচ্চক্খকম্মা…পে… ৰেদনানিরোধগামিনিযা পটিপদায অপ্পচ্চক্খকম্মা…পে….

সাৰত্থিনিদানং. সঞ্ঞায খো, ৰচ্ছ, অপ্পচ্চক্খকম্মা…পে… সঞ্ঞানিরোধগামিনিযা পটিপদায অপ্পচ্চক্খকম্মা…পে….

সাৰত্থিনিদানং. সঙ্খারেসু খো, ৰচ্ছ, অপ্পচ্চক্খকম্মা…পে… সঙ্খারনিরোধগামিনিযা পটিপদায অপ্পচ্চক্খকম্মা…পে…. চতুপঞ্ঞাসমং.

৫৫. ৰিঞ্ঞাণঅপ্পচ্চক্খকম্মসুত্তং

৬৬১. সাৰত্থিনিদানং. ‘‘ৰিঞ্ঞাণে খো, ৰচ্ছ, অপ্পচ্চক্খকম্মা, ৰিঞ্ঞাণসমুদযে অপ্পচ্চক্খকম্মা, ৰিঞ্ঞাণনিরোধে অপ্পচ্চক্খকম্মা, ৰিঞ্ঞাণনিরোধগামিনিযা পটিপদায অপ্পচ্চক্খকম্মা; এৰমিমানি অনেকৰিহিতানি দিট্ঠিগতানি লোকে উপ্পজ্জন্তি – সস্সতো লোকোতি ৰা, অসস্সতো লোকোতি ৰা…পে… নেৰ হোতি ন ন হোতি তথাগতো পরং মরণাতি ৰাতি. অযং খো, ৰচ্ছ, হেতু, অযং পচ্চযো, যানিমানি অনেকৰিহিতানি দিট্ঠিগতানি লোকে উপ্পজ্জন্তি – সস্সতো লোকোতি ৰা, অসস্সতো লোকোতি ৰা, অন্তৰা লোকোতি ৰা, অনন্তৰা লোকোতি ৰা, তং জীৰং তং সরীরন্তি ৰা, অঞ্ঞং জীৰং অঞ্ঞং সরীরন্তি ৰা, হোতি তথাগতো পরং মরণাতি ৰা, ন হোতি তথাগতো পরং মরণাতি ৰা, হোতি চ ন চ হোতি তথাগতো পরং মরণাতি ৰা, নেৰ হোতি ন ন হোতি তথাগতো পরং মরণাতি ৰা’’তি. পঞ্চপঞ্ঞাসমং.

ৰচ্ছগোত্তসংযুত্তং সমত্তং.