১১. ৰলাহকসংযুত্তং

১. সুদ্ধিকসুত্তং

৫৫০. সাৰত্থিনিদানং. ‘‘ৰলাহককাযিকে ৰো, ভিক্খৰে, দেৰে দেসেস্সামি. তং সুণাথ. কতমে চ, ভিক্খৰে, ৰলাহককাযিকা দেৰা? সন্তি, ভিক্খৰে, সীতৰলাহকা দেৰা; সন্তি উণ্হৰলাহকা দেৰা; সন্তি অব্ভৰলাহকা দেৰা; সন্তি ৰাতৰলাহকা দেৰা; সন্তি ৰস্সৰলাহকা দেৰা – ইমে ৰুচ্চন্তি, ভিক্খৰে, ‘ৰলাহককাযিকা দেৰা’’’তি. পঠমং.

২. সুচরিতসুত্তং

৫৫১. সাৰত্থিনিদানং. একমন্তং নিসিন্নো খো সো ভিক্খু ভগৰন্তং এতদৰোচ – ‘‘কো নু খো, ভন্তে, হেতু, কো পচ্চযো, যেন মিধেকচ্চো কাযস্স ভেদা পরং মরণা ৰলাহককাযিকানং দেৰানং সহব্যতং উপপজ্জতী’’তি? ‘‘ইধ, ভিক্খু, একচ্চো কাযেন সুচরিতং চরতি, ৰাচায সুচরিতং চরতি, মনসা সুচরিতং চরতি. তস্স সুতং হোতি – ‘ৰলাহককাযিকা দেৰা দীঘাযুকা ৰণ্ণৰন্তো সুখবহুলা’তি. তস্স এৰং হোতি – ‘অহো ৰতাহং কাযস্স ভেদা পরং মরণা ৰলাহককাযিকানং দেৰানং সহব্যতং উপপজ্জেয্য’ন্তি. সো কাযস্স ভেদা পরং মরণা ৰলাহককাযিকানং দেৰানং সহব্যতং উপপজ্জতি. অযং খো, ভিক্খু, হেতু, অযং পচ্চযো, যেন মিধেকচ্চো কাযস্স ভেদা পরং মরণা ৰলাহককাযিকানং দেৰানং সহব্যতং উপপজ্জতী’’তি. দুতিযং.

৩-১২. সীতৰলাহকদানূপকারসুত্তদসকং

৫৫২-৫৬১. সাৰত্থিনিদানং. একমন্তং নিসিন্নো খো সো ভিক্খু ভগৰন্তং এতদৰোচ – ‘‘কো নু খো, ভন্তে, হেতু, কো পচ্চযো, যেন মিধেকচ্চো কাযস্স ভেদা পরং মরণা সীতৰলাহকানং দেৰানং সহব্যতং উপপজ্জতী’’তি? ‘‘ইধ ভিক্খু, একচ্চো কাযেন সুচরিতং চরতি, ৰাচায সুচরিতং চরতি, মনসা সুচরিতং চরতি. তস্স সুতং হোতি – ‘সীতৰলাহকা দেৰা দীঘাযুকা ৰণ্ণৰন্তো সুখবহুলা’তি. তস্স এৰং হোতি – ‘অহো ৰতাহং কাযস্স ভেদা পরং মরণা সীতৰলাহকানং দেৰানং সহব্যতং উপপজ্জেয্য’ন্তি. সো অন্নং দেতি…পে… পদীপেয্যং দেতি. সো কাযস্স ভেদা পরং মরণা সীতৰলাহকানং দেৰানং সহব্যতং উপপজ্জতি. অযং খো, ভিক্খু, হেতু, অযং পচ্চযো, যেন মিধেকচ্চো কাযস্স ভেদা পরং মরণা সীতৰলাহকানং দেৰানং সহব্যতং উপপজ্জতী’’তি. দ্ৰাদসমং.

১৩-৫২. উণ্হৰলাহকদানূপকারসুত্তচালীসকং

৫৬২-৬০১. সাৰত্থিনিদানং. একমন্তং নিসিন্নো খো সো ভিক্খু ভগৰন্তং এতদৰোচ – ‘‘কো নু খো, ভন্তে, হেতু, কো পচ্চযো, যেন মিধেকচ্চো কাযস্স ভেদা পরং মরণা উণ্হৰলাহকানং দেৰানং…পে… অব্ভৰলাহকানং দেৰানং…পে… ৰাতৰলাহকানং দেৰানং…পে… ৰস্সৰলাহকানং দেৰানং সহব্যতং উপপজ্জতী’’তি? ‘‘ইধ, ভিক্খু, একচ্চো কাযেন সুচরিতং চরতি, ৰাচায সুচরিতং চরতি, মনসা সুচরিতং চরতি. তস্স সুতং হোতি – ‘ৰস্সৰলাহকা দেৰা দীঘাযুকা ৰণ্ণৰন্তো সুখবহুলা’তি. তস্স এৰং হোতি – ‘অহো ৰতাহং কাযস্স ভেদা পরং মরণা ৰস্সৰলাহকানং দেৰানং সহব্যতং উপপজ্জেয্য’ন্তি. সো অন্নং দেতি…পে… পদীপেয্যং দেতি. সো কাযস্স ভেদা পরং মরণা ৰস্সৰলাহকানং দেৰানং সহব্যতং উপপজ্জতি. অযং খো, ভিক্খু, হেতু, অযং পচ্চযো, যেন মিধেকচ্চো কাযস্স ভেদা পরং মরণা ৰস্সৰলাহকানং দেৰানং সহব্যতং উপপজ্জতী’’তি. দ্ৰেপঞ্ঞাসমং.

৫৩. সীতৰলাহকসুত্তং

৬০২. সাৰত্থিনিদানং. একমন্তং নিসিন্নো খো সো ভিক্খু ভগৰন্তং এতদৰোচ – ‘‘কো নু খো, ভন্তে, হেতু, কো পচ্চযো, যেনেকদা সীতং হোতী’’তি? ‘‘সন্তি, ভিক্খু, সীতৰলাহকা নাম দেৰা. তেসং যদা এৰং হোতি – ‘যংনূন মযং সকায রতিযা ৰসেয্যামা’তি [রমেয্যামাতি (সী. স্যা. কং. পী.) এৰমুপরিপি], তেসং তং চেতোপণিধিমন্ৰায সীতং হোতি. অযং খো, ভিক্খু, হেতু, অযং পচ্চযো, যেনেকদা সীতং হোতী’’তি. তেপঞ্ঞাসমং.

৫৪. উণ্হৰলাহকসুত্তং

৬০৩. সাৰত্থিনিদানং. একমন্তং নিসিন্নো খো সো ভিক্খু ভগৰন্তং এতদৰোচ – ‘‘কো নু খো, ভন্তে, হেতু, কো পচ্চযো, যেনেকদা উণ্হং হোতী’’তি? ‘‘সন্তি, ভিক্খু, উণ্হৰলাহকা নাম দেৰা. তেসং যদা এৰং হোতি – ‘যংনূন মযং সকায রতিযা ৰসেয্যামা’তি, তেসং তং চেতোপণিধিমন্ৰায উণ্হং হোতি. অযং খো, ভিক্খু, হেতু, অযং পচ্চযো, যেনেকদা উণ্হং হোতী’’তি. চতুপঞ্ঞাসমং.

৫৫. অব্ভৰলাহকসুত্তং

৬০৪. সাৰত্থিনিদানং. একমন্তং নিসিন্নো খো সো ভিক্খু ভগৰন্তং এতদৰোচ – ‘‘কো নু খো, ভন্তে, হেতু, কো পচ্চযো, যেনেকদা অব্ভং হোতী’’তি? ‘‘সন্তি, ভিক্খু, অব্ভৰলাহকা নাম দেৰা. তেসং যদা এৰং হোতি – ‘যংনূন মযং সকায রতিযা ৰসেয্যামা’তি, তেসং তং চেতোপণিধিমন্ৰায অব্ভং হোতি. অযং খো, ভিক্খু, হেতু, অযং পচ্চযো, যেনেকদা অব্ভং হোতী’’তি. পঞ্চপঞ্ঞাসমং.

৫৬. ৰাতৰলাহকসুত্তং

৬০৫. সাৰত্থিনিদানং. একমন্তং নিসিন্নো খো সো ভিক্খু ভগৰন্তং এতদৰোচ – ‘‘কো নু খো, ভন্তে, হেতু, কো পচ্চযো, যেনেকদা ৰাতো হোতী’’তি? ‘‘সন্তি, ভিক্খু, ৰাতৰলাহকা নাম দেৰা. তেসং যদা এৰং হোতি – ‘যংনূন মযং সকায রতিযা ৰসেয্যামা’তি, তেসং তং চেতোপণিধিমন্ৰায ৰাতো হোতি. অযং খো, ভিক্খু, হেতু, অযং পচ্চযো, যেনেকদা ৰাতো হোতী’’তি. ছপ্পঞ্ঞাসমং.

৫৭. ৰস্সৰলাহকসুত্তং

৬০৬. সাৰত্থিনিদানং. একমন্তং নিসিন্নো খো সো ভিক্খু ভগৰন্তং এতদৰোচ – ‘‘কো নু খো, ভন্তে, হেতু, কো পচ্চযো, যেনেকদা দেৰো ৰস্সতী’’তি? ‘‘সন্তি, ভিক্খু, ৰস্সৰলাহকা নাম দেৰা. তেসং যদা এৰং হোতি – ‘যংনূন মযং সকায রতিযা ৰসেয্যামা’তি, তেসং তং চেতোপণিধিমন্ৰায দেৰো ৰস্সতি. অযং খো, ভিক্খু, হেতু, অযং পচ্চযো, যেনেকদা দেৰো ৰস্সতী’’তি. সত্তপঞ্ঞাসমং.

সত্তপঞ্ঞাসসুত্তন্তং নিট্ঠিতং.

ৰলাহকসংযুত্তং সমত্তং.