৫. দুক্খসুত্তং

৬৭. সাৰত্থিনিদানং. অথ খো অঞ্ঞতরো ভিক্খু…পে… একমন্তং নিসিন্নো খো সো ভিক্খু ভগৰন্তং এতদৰোচ – ‘‘সাধু মে, ভন্তে, ভগৰা সংখিত্তেন ধম্মং দেসেতু…পে… আতাপী পহিতত্তো ৰিহরেয্য’’ন্তি. ‘‘যং খো, ভিক্খু, দুক্খং; তত্র তে ছন্দো পহাতব্বো’’তি. ‘‘অঞ্ঞাতং ভগৰা; অঞ্ঞাতং সুগতা’’তি.

‘‘যথা কথং পন ত্ৰং, ভিক্খু, মযা সংখিত্তেন ভাসিতস্স ৰিত্থারেন অত্থং আজানাসী’’তি? ‘‘রূপং খো, ভন্তে, দুক্খং; তত্র মে ছন্দো পহাতব্বো. ৰেদনা… সঞ্ঞা… সঙ্খারা… ৰিঞ্ঞাণং দুক্খং; তত্র মে ছন্দো পহাতব্বো. ইমস্স খ্ৰাহং, ভন্তে, ভগৰতা সংখিত্তেন ভাসিতস্স এৰং ৰিত্থারেন অত্থং আজানামী’’তি.

‘‘সাধু সাধু, ভিক্খু! সাধু খো ত্ৰং, ভিক্খু, মযা সংখিত্তেন ভাসিতস্স ৰিত্থারেন অত্থং আজানাসি. রূপং খো ভিক্খু, দুক্খং; তত্র তে ছন্দো পহাতব্বো. ৰেদনা… সঞ্ঞা… সঙ্খারা… ৰিঞ্ঞাণং দুক্খং; তত্র তে ছন্দো পহাতব্বো. ইমস্স খো, ভিক্খু, মযা সংখিত্তেন ভাসিতস্স এৰং ৰিত্থারেন অত্থো দট্ঠব্বো’’তি…পে… অঞ্ঞতরো চ পন সো ভিক্খু অরহতং অহোসীতি. পঞ্চমং.