৬. সম্মাসম্বুদ্ধসুত্তং

৫৮. সাৰত্থিনিদানং. ‘‘তথাগতো, ভিক্খৰে, অরহং সম্মাসম্বুদ্ধো রূপস্স নিব্বিদা ৰিরাগা নিরোধা অনুপাদা ৰিমুত্তো সম্মাসম্বুদ্ধোতি ৰুচ্চতি. ভিক্খুপি, ভিক্খৰে, পঞ্ঞাৰিমুত্তো রূপস্স নিব্বিদা ৰিরাগা নিরোধা অনুপাদা ৰিমুত্তো পঞ্ঞাৰিমুত্তোতি ৰুচ্চতি.

‘‘তথাগতো, ভিক্খৰে, অরহং সম্মাসম্বুদ্ধো ৰেদনায নিব্বিদা ৰিরাগা নিরোধা অনুপাদা ৰিমুত্তো সম্মাসম্বুদ্ধোতি ৰুচ্চতি. ভিক্খুপি, ভিক্খৰে, পঞ্ঞাৰিমুত্তো ৰেদনায নিব্বিদা…পে… পঞ্ঞাৰিমুত্তোতি ৰুচ্চতি.

‘‘তথাগতো, ভিক্খৰে, অরহং সম্মাসম্বুদ্ধো সঞ্ঞায… সঙ্খারানং… ৰিঞ্ঞাণস্স নিব্বিদা ৰিরাগা নিরোধা অনুপাদা ৰিমুত্তো সম্মাসম্বুদ্ধোতি ৰুচ্চতি. ভিক্খুপি, ভিক্খৰে, পঞ্ঞাৰিমুত্তো ৰিঞ্ঞাণস্স নিব্বিদা ৰিরাগা নিরোধা অনুপাদা ৰিমুত্তো পঞ্ঞাৰিমুত্তোতি ৰুচ্চতি.

‘‘তত্র খো, ভিক্খৰে, কো ৰিসেসো, কো অধিপ্পযাসো [অধিপ্পাযো (সী.), অধিপ্পাযসো (স্যা. কং. পী. ক.)], কিং নানাকরণং, তথাগতস্স অরহতো সম্মাসম্বুদ্ধস্স পঞ্ঞাৰিমুত্তেন ভিক্খুনা’’তি? ‘‘ভগৰংমূলকা নো, ভন্তে, ধম্মা ভগৰংনেত্তিকা ভগৰংপটিসরণা. সাধু ৰত, ভন্তে, ভগৰন্তঞ্ঞেৰ পটিভাতু এতস্স ভাসিতস্স অত্থো. ভগৰতো সুত্ৰা ভিক্খূ ধারেস্সন্তী’’তি. ‘‘তেন হি, ভিক্খৰে, সুণাথ, সাধুকং মনসি করোথ; ভাসিস্সামী’’তি. ‘‘এৰং, ভন্তে’’তি খো তে ভিক্খূ ভগৰতো পচ্চস্সোসুং. ভগৰা এতদৰোচ –

‘‘তথাগতো, ভিক্খৰে, অরহং সম্মাসম্বুদ্ধো অনুপ্পন্নস্স মগ্গস্স উপ্পাদেতা, অসঞ্জাতস্স মগ্গস্স সঞ্জনেতা [সঞ্জানেতা (স্যা. কং.)], অনক্খাতস্স মগ্গস্স অক্খাতা মগ্গঞ্ঞূ, মগ্গৰিদূ, মগ্গকোৰিদো; মগ্গানুগা চ, ভিক্খৰে, এতরহি সাৰকা ৰিহরন্তি পচ্ছাসমন্নাগতা. অযং খো, ভিক্খৰে, ৰিসেসো, অযং অধিপ্পযাসো, ইদং নানাকরণং তথাগতস্স অরহতো সম্মাসম্বুদ্ধস্স পঞ্ঞাৰিমুত্তেন ভিক্খুনা’’তি. ছট্ঠং.