২. পটিপদাসুত্তং

৪৪. সাৰত্থিনিদানং. ‘‘সক্কাযসমুদযগামিনিঞ্চ ৰো, ভিক্খৰে, পটিপদং দেসেস্সামি, সক্কাযনিরোধগামিনিঞ্চ পটিপদং. তং সুণাথ. কতমা চ, ভিক্খৰে, সক্কাযসমুদযগামিনী পটিপদা? ইধ, ভিক্খৰে, অস্সুতৰা পুথুজ্জনো অরিযানং অদস্সাৰী অরিযধম্মস্স অকোৰিদো অরিযধম্মে অৰিনীতো, সপ্পুরিসানং অদস্সাৰী সপ্পুরিসধম্মস্স অকোৰিদো সপ্পুরিসধম্মে অৰিনীতো, রূপং অত্ততো সমনুপস্সতি, রূপৰন্তং ৰা অত্তানং; অত্তনি ৰা রূপং, রূপস্মিং ৰা অত্তানং. ৰেদনং অত্ততো… সঞ্ঞং… সঙ্খারে… ৰিঞ্ঞাণং অত্ততো সমনুপস্সতি, ৰিঞ্ঞাণৰন্তং ৰা অত্তানং; অত্তনি ৰা ৰিঞ্ঞাণং, ৰিঞ্ঞাণস্মিং ৰা অত্তানং. অযং ৰুচ্চতি, ভিক্খৰে, ‘সক্কাযসমুদযগামিনী পটিপদা, সক্কাযসমুদযগামিনী পটিপদা’তি. ইতি হিদং, ভিক্খৰে, ৰুচ্চতি ‘দুক্খসমুদযগামিনী সমনুপস্সনা’তি. অযমেৰেত্থ অত্থো’’.

‘‘কতমা চ, ভিক্খৰে, সক্কাযনিরোধগামিনী পটিপদা? ইধ, ভিক্খৰে, সুতৰা অরিযসাৰকো অরিযানং দস্সাৰী অরিযধম্মস্স কোৰিদো অরিযধম্মে সুৰিনীতো, সপ্পুরিসানং দস্সাৰী সপ্পুরিসধম্মস্স কোৰিদো সপ্পুরিসধম্মে সুৰিনীতো, ন রূপং অত্ততো সমনুপস্সতি, ন রূপৰন্তং ৰা অত্তানং; ন অত্তনি ৰা রূপং, ন রূপস্মিং ৰা অত্তানং. ন ৰেদনং অত্ততো… ন সঞ্ঞং… ন সঙ্খারে… ন ৰিঞ্ঞাণং অত্ততো সমনুপস্সতি, ন ৰিঞ্ঞাণৰন্তং ৰা অত্তানং; ন অত্তনি ৰা ৰিঞ্ঞাণং, ন ৰিঞ্ঞাণস্মিং ৰা অত্তানং. অযং ৰুচ্চতি, ভিক্খৰে, ‘সক্কাযনিরোধগামিনী পটিপদা, সক্কাযনিরোধগামিনী পটিপদা’তি. ইতি হিদং, ভিক্খৰে, ৰুচ্চতি ‘দুক্খনিরোধগামিনী সমনুপস্সনা’তি. অযমেৰেত্থ অত্থো’’তি. দুতিযং.