৭. অনুধম্মসুত্তং

৩৯. সাৰত্থিনিদানং. ‘‘ধম্মানুধম্মপ্পটিপন্নস্স, ভিক্খৰে, ভিক্খুনো অযমনুধম্মো হোতি যং রূপে নিব্বিদাবহুলো [নিব্বিদাবহুলং (পী. ক.)] ৰিহরেয্য, ৰেদনায নিব্বিদাবহুলো ৰিহরেয্য, সঞ্ঞা নিব্বিদাবহুলো ৰিহরেয্য, সঙ্খারেসু নিব্বিদাবহুলো ৰিহরেয্য, ৰিঞ্ঞাণে নিব্বিদাবহুলো ৰিহরেয্য. যো রূপে নিব্বিদাবহুলো ৰিহরন্তো, ৰেদনায… সঞ্ঞায… সঙ্খারেসু নিব্বিদাবহুলো ৰিহরন্তো, ৰিঞ্ঞাণে নিব্বিদাবহুলো ৰিহরন্তো রূপং পরিজানাতি, ৰেদনং… সঞ্ঞং… সঙ্খারে… ৰিঞ্ঞাণং পরিজানাতি, সো রূপং পরিজানং, ৰেদনং… সঞ্ঞং… সঙ্খারে… ৰিঞ্ঞাণং পরিজানং পরিমুচ্চতি রূপম্হা, পরিমুচ্চতি ৰেদনা, পরিমুচ্চতি সঞ্ঞায, পরিমুচ্চতি সঙ্খারেহি, পরিমুচ্চতি ৰিঞ্ঞাণম্হা, পরিমুচ্চতি জাতিযা জরামরণেন সোকেহি পরিদেৰেহি দুক্খেহি দোমনস্সেহি উপাযাসেহি, পরিমুচ্চতি দুক্খস্মাতি ৰদামী’’তি. সত্তমং.