৫. আনন্দসুত্তং

৩৭. সাৰত্থিনিদানং. অথ খো আযস্মা আনন্দো যেন ভগৰা তেনুপসঙ্কমি; উপসঙ্কমিত্ৰা ভগৰতা সদ্ধিং সম্মোদি. সম্মোদনীযং কথং সারণীযং ৰীতিসারেত্ৰা একমন্তং নিসীদি. একমন্তং নিসিন্নং খো আযস্মন্তং আনন্দং ভগৰা এতদৰোচ –

‘‘সচে তং, আনন্দ, এৰং পুচ্ছেয্যুং – ‘কতমেসং, আৰুসো আনন্দ, ধম্মানং উপ্পাদো পঞ্ঞাযতি, ৰযো পঞ্ঞাযতি, ঠিতস্স [ঠিতানং (স্যা. কং. পী. ক.)] অঞ্ঞথত্তং পঞ্ঞাযতী’তি? এৰং পুট্ঠো ত্ৰং, আনন্দ, কিন্তি ব্যাকরেয্যাসী’’তি? ‘‘সচে মং, ভন্তে, এৰং পুচ্ছেয্যুং – ‘কতমেসং, আৰুসো আনন্দ, ধম্মানং উপ্পাদো পঞ্ঞাযতি, ৰযো পঞ্ঞাযতি, ঠিতস্স অঞ্ঞথত্তং পঞ্ঞাযতী’তি? এৰং পুট্ঠোহং, ভন্তে, এৰং ব্যাকরেয্যং – ‘রূপস্স খো, আৰুসো, উপ্পাদো পঞ্ঞাযতি, ৰযো পঞ্ঞাযতি, ঠিতস্স অঞ্ঞথত্তং পঞ্ঞাযতি. ৰেদনায… সঞ্ঞায… সঙ্খারানং… ৰিঞ্ঞাণস্স উপ্পাদো পঞ্ঞাযতি, ৰযো পঞ্ঞাযতি, ঠিতস্স অঞ্ঞথত্তং পঞ্ঞাযতি. ইমেসং খো, আৰুসো, ধম্মানং উপ্পাদো পঞ্ঞাযতি, ৰযো পঞ্ঞাযতি, ঠিতস্স অঞ্ঞথত্তং পঞ্ঞাযতী’তি. এৰং পুট্ঠোহং, ভন্তে, এৰং ব্যাকরেয্য’’ন্তি.

‘‘সাধু সাধু, আনন্দ! রূপস্স খো, আনন্দ, উপ্পাদো পঞ্ঞাযতি, ৰযো পঞ্ঞাযতি, ঠিতস্স অঞ্ঞথত্তং পঞ্ঞাযতি. ৰেদনায… সঞ্ঞায… সঙ্খারানং… ৰিঞ্ঞাণস্স উপ্পাদো পঞ্ঞাযতি, ৰযো পঞ্ঞাযতি, ঠিতস্স অঞ্ঞথত্তং পঞ্ঞাযতি. ইমেসং খো, আনন্দ, ধম্মানং উপ্পাদো পঞ্ঞাযতি, ৰযো পঞ্ঞাযতি, ঠিতস্স অঞ্ঞথত্তং পঞ্ঞাযতীতি. এৰং পুট্ঠো ত্ৰং, আনন্দ, এৰং ব্যাকরেয্যাসী’’তি. পঞ্চমং.