৩. অঞ্ঞতরভিক্খুসুত্তং

৩৫. সাৰত্থিনিদানং. অথ খো অঞ্ঞতরো ভিক্খু যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি. একমন্তং নিসিন্নো খো সো ভিক্খু ভগৰন্তং এতদৰোচ – ‘‘সাধু মে, ভন্তে, ভগৰা সংখিত্তেন ধম্মং দেসেতু; যমহং ভগৰতো ধম্মং সুত্ৰা একো ৰূপকট্ঠো, অপ্পমত্তো আতাপী পহিতত্তো ৰিহরেয্য’’ন্তি. ‘‘যং খো, ভিক্খু, অনুসেতি, তেন সঙ্খং গচ্ছতি; যং নানুসেতি, ন তেন সঙ্খং গচ্ছতী’’তি. ‘‘অঞ্ঞাতং, ভগৰা; অঞ্ঞাতং, সুগতা’’তি.

‘‘যথা কথং পন ত্ৰং, ভিক্খু, মযা সংখিত্তেন ভাসিতস্স ৰিত্থারেন অত্থং আজানাসী’’তি? ‘‘রূপং চে, ভন্তে, অনুসেতি তেন সঙ্খং গচ্ছতি. ৰেদনং চে অনুসেতি তেন সঙ্খং গচ্ছতি. সঞ্ঞং চে অনুসেতি তেন সঙ্খং গচ্ছতি. সঙ্খারে চে অনুসেতি তেন সঙ্খং গচ্ছতি. ৰিঞ্ঞাণং চে অনুসেতি তেন সঙ্খং গচ্ছতি. রূপং চে, ভন্তে, নানুসেতি ন তেন সঙ্খং গচ্ছতি. ৰেদনং চে… সঞ্ঞং চে… সঙ্খারে চে… ৰিঞ্ঞাণং চে নানুসেতি ন তেন সঙ্খং গচ্ছতি. ইমস্স খ্ৰাহং, ভন্তে, ভগৰতা সংখিত্তেন ভাসিতস্স এৰং ৰিত্থারেন অত্থং আজানামী’’তি.

‘‘সাধু সাধু, ভিক্খু! সাধু খো ত্ৰং, ভিক্খু, মযা সংখিত্তেন ভাসিতস্স ৰিত্থারেন অত্থং আজানাসি. রূপং চে, ভিক্খু, অনুসেতি তেন সঙ্খং গচ্ছতি. ৰেদনং চে… সঞ্ঞং চে… সঙ্খারে চে… ৰিঞ্ঞাণং চে অনুসেতি তেন সঙ্খং গচ্ছতি. রূপং চে, ভিক্খু, নানুসেতি ন তেন সঙ্খং গচ্ছতি. ৰেদনং চে… সঞ্ঞং চে… সঙ্খারে চে… ৰিঞ্ঞাণং চে নানুসেতি ন তেন সঙ্খং গচ্ছতি. ইমস্স খো, ভিক্খু, মযা সংখিত্তেন, ভাসিতস্স এৰং ৰিত্থারেন অত্থো দট্ঠব্বো’’তি.

অথ খো সো ভিক্খু ভগৰতো ভাসিতং অভিনন্দিত্ৰা অনুমোদিত্ৰা উট্ঠাযাসনা ভগৰন্তং অভিৰাদেত্ৰা পদক্খিণং কত্ৰা পক্কামি.

অথ খো সো ভিক্খু একো ৰূপকট্ঠো অপ্পমত্তো আতাপী পহিতত্তো ৰিহরন্তো নচিরস্সেৰ – যস্সত্থায কুলপুত্তা সম্মদেৰ অগারস্মা অনগারিযং পব্বজন্তি তদনুত্তরং – ব্রহ্মচরিযপরিযোসানং দিট্ঠেৰ ধম্মে সযং অভিঞ্ঞা সচ্ছিকত্ৰা উপসম্পজ্জ ৰিহাসি. ‘‘খীণা জাতি, ৰুসিতং ব্রহ্মচরিযং, কতং করণীযং, নাপরং ইত্থত্তাযা’’তি অব্ভঞ্ঞাসি. অঞ্ঞতরো চ পন সো ভিক্খু অরহতং অহোসীতি. ততিযং.