১. নতুম্হাকংসুত্তং

৩৩. সাৰত্থিনিদানং. ‘‘যং, ভিক্খৰে, ন তুম্হাকং, তং পজহথ. তং ৰো পহীনং হিতায সুখায ভৰিস্সতি. কিঞ্চ, ভিক্খৰে, ন তুম্হাকং? রূপং, ভিক্খৰে, ন তুম্হাকং, তং পজহথ. তং ৰো পহীনং হিতায সুখায ভৰিস্সতি. ৰেদনা ন তুম্হাকং, তং পজহথ. সা ৰো পহীনা হিতায সুখায ভৰিস্সতি. সঞ্ঞা ন তুম্হাকং… সঙ্খারা ন তুম্হাকং, তে পজহথ. তে ৰো পহীনা হিতায সুখায ভৰিস্সন্তি. ৰিঞ্ঞাণং ন তুম্হাকং, তং পজহথ. তং ৰো পহীনং হিতায সুখায ভৰিস্সতি’’.

‘‘সেয্যথাপি, ভিক্খৰে, যং ইমস্মিং জেতৰনে তিণকট্ঠসাখাপলাসং তং জনো হরেয্য ৰা ডহেয্য ৰা যথাপচ্চযং ৰা করেয্য. অপি নু তুম্হাকং এৰমস্স – ‘অম্হে জনো হরতি ৰা ডহতি ৰা যথাপচ্চযং ৰা করোতী’’’তি? ‘‘নো হেতং, ভন্তে’’. ‘‘তং কিস্স হেতু’’? ‘‘ন হি নো এতং, ভন্তে, অত্তা ৰা অত্তনিযং ৰা’’তি. ‘‘এৰমেৰ খো, ভিক্খৰে, রূপং ন তুম্হাকং, তং পজহথ. তং ৰো পহীনং হিতায সুখায ভৰিস্সতি. ৰেদনা ন তুম্হাকং, তং পজহথ. সা ৰো পহীনা হিতায সুখায ভৰিস্সতি. সঞ্ঞা ন তুম্হাকং… সঙ্খারা ন তুম্হাকং… ৰিঞ্ঞাণং ন তুম্হাকং, তং পজহথ. তং ৰো পহীনং হিতায সুখায ভৰিস্সতী’’তি. পঠমং.