৭. সহেতুঅনিচ্চসুত্তং

১৮. সাৰত্থিনিদানং. ‘‘রূপং, ভিক্খৰে, অনিচ্চং. যোপি হেতু, যোপি পচ্চযো রূপস্স উপ্পাদায, সোপি অনিচ্চো. অনিচ্চসম্ভূতং, ভিক্খৰে, রূপং কুতো নিচ্চং ভৰিস্সতি! ৰেদনা অনিচ্চা. যোপি হেতু, যোপি পচ্চযো ৰেদনায উপ্পাদায, সোপি অনিচ্চো. অনিচ্চসম্ভূতা, ভিক্খৰে, ৰেদনা কুতো নিচ্চা ভৰিস্সতি! সঞ্ঞা অনিচ্চা… সঙ্খারা অনিচ্চা. যোপি হেতু যোপি পচ্চযো সঙ্খারানং উপ্পাদায, সোপি অনিচ্চো. অনিচ্চসম্ভূতা, ভিক্খৰে, সঙ্খারা কুতো নিচ্চা ভৰিস্সন্তি! ৰিঞ্ঞাণং অনিচ্চং. যোপি হেতু যোপি পচ্চযো ৰিঞ্ঞাণস্স উপ্পাদায, সোপি অনিচ্চো. অনিচ্চসম্ভূতং, ভিক্খৰে, ৰিঞ্ঞাণং কুতো নিচ্চং ভৰিস্সতি! এৰং পস্সং…পে… নাপরং ইত্থত্তাযাতি পজানাতী’’তি. সত্তমং.