৮. কোট্ঠিকসুত্তং

১৩৩. বারাণসিযং ৰিহরন্তি ইসিপতনে মিগদাযে. অথ খো আযস্মা সারিপুত্তো সাযন্হসমযং…পে… একমন্তং নিসিন্নো খো আযস্মা সারিপুত্তো আযস্মন্তং মহাকোট্ঠিকং এতদৰোচ – ‘‘‘অৰিজ্জা, অৰিজ্জা’তি, আৰুসো কোট্ঠিক, ৰুচ্চতি. কতমা নু খো, আৰুসো, অৰিজ্জা, কিত্তাৰতা চ অৰিজ্জাগতো হোতী’’তি?

‘‘ইধাৰুসো, অস্সুতৰা পুথুজ্জনো রূপস্স অস্সাদঞ্চ আদীনৰঞ্চ নিস্সরণঞ্চ যথাভূতং নপ্পজানাতি. ৰেদনায…পে… সঞ্ঞায… সঙ্খারানং… ৰিঞ্ঞাণস্স অস্সাদঞ্চ আদীনৰঞ্চ নিস্সরণঞ্চ যথাভূতং নপ্পজানাতি. অযং ৰুচ্চতাৰুসো, অৰিজ্জা; এত্তাৰতা চ অৰিজ্জাগতো হোতী’’তি.

এৰং ৰুত্তে, আযস্মা সারিপুত্তো আযস্মন্তং মহাকোট্ঠিকং এতদৰোচ – ‘‘‘ৰিজ্জা, ৰিজ্জা’তি, আৰুসো কোট্ঠিক, ৰুচ্চতি. কতমা নু খো, আৰুসো, ৰিজ্জা, কিত্তাৰতা চ ৰিজ্জাগতো হোতী’’তি?

‘‘ইধাৰুসো সুতৰা অরিযসাৰকো রূপস্স অস্সাদঞ্চ আদীনৰঞ্চ নিস্সরণঞ্চ যথাভূতং পজানাতি. ৰেদনায…পে… সঞ্ঞায… সঙ্খারানং… ৰিঞ্ঞাণস্স অস্সাদঞ্চ আদীনৰঞ্চ নিস্সরণঞ্চ যথাভূতং পজানাতি. অযং ৰুচ্চতাৰুসো, ৰিজ্জা; এত্তাৰতা চ ৰিজ্জাগতো হোতী’’তি. অট্ঠমং.