৩. কুলসুত্তং

২২৫. সাৰত্থিযং ৰিহরতি…পে… ‘‘সেয্যথাপি, ভিক্খৰে, যানি কানিচি কুলানি বহুত্থিকানি অপ্পপুরিসানি তানি সুপ্পধংসিযানি হোন্তি চোরেহি কুম্ভত্থেনকেহি; এৰমেৰ খো, ভিক্খৰে, যস্স কস্সচি ভিক্খুনো মেত্তাচেতোৰিমুত্তি অভাৰিতা অবহুলীকতা সো সুপ্পধংসিযো হোতি অমনুস্সেহি. সেয্যথাপি, ভিক্খৰে, যানি কানিচি কুলানি অপ্পিত্থিকানি বহুপুরিসানি তানি দুপ্পধংসিযানি হোন্তি চোরেহি কুম্ভত্থেনকেহি, এৰমেৰ খো, ভিক্খৰে, যস্স কস্সচি ভিক্খুনো মেত্তাচেতোৰিমুত্তি ভাৰিতা বহুলীকতা সো দুপ্পধংসিযো হোতি অমনুস্সেহি. তস্মাতিহ, ভিক্খৰে, এৰং সিক্খিতব্বং – ‘মেত্তা নো চেতোৰিমুত্তি ভাৰিতা ভৰিস্সতি বহুলীকতা যানীকতা ৰত্থুকতা অনুট্ঠিতা পরিচিতা সুসমারদ্ধা’তি. এৰঞ্হি ৰো, ভিক্খৰে, সিক্খিতব্ব’’ন্তি. ততিযং.