১. সত্তধাতুসুত্তং

৯৫. সাৰত্থিযং ৰিহরতি…পে… ‘‘সত্তিমা, ভিক্খৰে, ধাতুযো. কতমা সত্ত? আভাধাতু, সুভধাতু, আকাসানঞ্চাযতনধাতু, ৰিঞ্ঞাণঞ্চাযতনধাতু, আকিঞ্চঞ্ঞাযতনধাতু, নেৰসঞ্ঞানাসঞ্ঞাযতনধাতু, সঞ্ঞাৰেদযিতনিরোধধাতু – ইমা খো, ভিক্খৰে, সত্ত ধাতুযো’’তি.

এৰং ৰুত্তে, অঞ্ঞতরো ভিক্খু ভগৰন্তং এতদৰোচ – ‘‘যা চাযং, ভন্তে, আভাধাতু যা চ সুভধাতু যা চ আকাসানঞ্চাযতনধাতু যা চ ৰিঞ্ঞাণঞ্চাযতনধাতু যা চ আকিঞ্চঞ্ঞাযতনধাতু যা চ নেৰসঞ্ঞানাসঞ্ঞাযতনধাতু যা চ সঞ্ঞাৰেদযিতনিরোধধাতু – ইমা নু খো, ভন্তে, ধাতুযো কিং পটিচ্চ পঞ্ঞাযন্তী’’তি?

‘‘যাযং, ভিক্খু, আভাধাতু – অযং ধাতু অন্ধকারং পটিচ্চ পঞ্ঞাযতি. যাযং, ভিক্খু, সুভধাতু – অযং ধাতু অসুভং পটিচ্চ পঞ্ঞাযতি. যাযং, ভিক্খু, আকাসানঞ্চাযতনধাতু – অযং ধাতু রূপং পটিচ্চ পঞ্ঞাযতি. যাযং, ভিক্খু, ৰিঞ্ঞাণঞ্চাযতনধাতু – অযং ধাতু আকাসানঞ্চাযতনং পটিচ্চ পঞ্ঞাযতি. যাযং, ভিক্খু, আকিঞ্চঞ্ঞাযতনধাতু – অযং ধাতু ৰিঞ্ঞাণঞ্চাযতনং পটিচ্চ পঞ্ঞাযতি. যাযং, ভিক্খু, নেৰসঞ্ঞানাসঞ্ঞাযতনধাতু – অযং ধাতু আকিঞ্চঞ্ঞাযতনং পটিচ্চ পঞ্ঞাযতি. যাযং, ভিক্খু, সঞ্ঞাৰেদযিতনিরোধধাতু – অযং ধাতু নিরোধং পটিচ্চ পঞ্ঞাযতী’’তি.

‘‘যা চাযং, ভন্তে, আভাধাতু যা চ সুভধাতু যা চ আকাসানঞ্চাযতনধাতু যা চ ৰিঞ্ঞাণঞ্চাযতনধাতু যা চ আকিঞ্চঞ্ঞাযতনধাতু যা চ নেৰসঞ্ঞানাসঞ্ঞাযতনধাতু যা চ সঞ্ঞাৰেদযিতনিরোধধাতু – ইমা নু খো, ভন্তে, ধাতুযো কথং সমাপত্তি পত্তব্বা’’তি?

‘‘যা চাযং, ভিক্খু, আভাধাতু যা চ সুভধাতু যা চ আকাসানঞ্চাযতনধাতু যা চ ৰিঞ্ঞাণঞ্চাযতনধাতু যা চ আকিঞ্চঞ্ঞাযতনধাতু – ইমা ধাতুযো সঞ্ঞাসমাপত্তি পত্তব্বা. যাযং, ভিক্খু, নেৰসঞ্ঞানাসঞ্ঞাযতনধাতু – অযং ধাতু সঙ্খারাৰসেসসমাপত্তি পত্তব্বা. যাযং, ভিক্খু, সঞ্ঞাৰেদযিতনিরোধধাতু – অযং ধাতু নিরোধসমাপত্তি পত্তব্বা’’তি. পঠমং.