২. সনিদানসুত্তং

৯৬. সাৰত্থিযং ৰিহরতি…পে… ‘‘সনিদানং, ভিক্খৰে, উপ্পজ্জতি কামৰিতক্কো, নো অনিদানং; সনিদানং উপ্পজ্জতি ব্যাপাদৰিতক্কো, নো অনিদানং; সনিদানং উপ্পজ্জতি ৰিহিংসাৰিতক্কো, নো অনিদানং’’.

‘‘কথঞ্চ, ভিক্খৰে, সনিদানং উপ্পজ্জতি কামৰিতক্কো, নো অনিদানং; সনিদানং উপ্পজ্জতি ব্যাপাদৰিতক্কো, নো অনিদানং; সনিদানং উপ্পজ্জতি ৰিহিংসাৰিতক্কো, নো অনিদানং? কামধাতুং, ভিক্খৰে, পটিচ্চ উপ্পজ্জতি কামসঞ্ঞা, কামসঞ্ঞং পটিচ্চ উপ্পজ্জতি কামসঙ্কপ্পো, কামসঙ্কপ্পং পটিচ্চ উপ্পজ্জতি কামচ্ছন্দো, কামচ্ছন্দং পটিচ্চ উপ্পজ্জতি কামপরিল়াহো, কামপরিল়াহং পটিচ্চ উপ্পজ্জতি কামপরিযেসনা. কামপরিযেসনং, ভিক্খৰে, পরিযেসমানো অস্সুতৰা পুথুজ্জনো তীহি ঠানেহি মিচ্ছা পটিপজ্জতি – কাযেন, ৰাচায, মনসা.

‘‘ব্যাপাদধাতুং, ভিক্খৰে, পটিচ্চ উপ্পজ্জতি ব্যাপাদসঞ্ঞা, ব্যাপাদসঞ্ঞং পটিচ্চ উপ্পজ্জতি ব্যাপাদসঙ্কপ্পো…পে… ব্যাপাদচ্ছন্দো… ব্যাপাদপরিল়াহো… ব্যাপাদপরিযেসনা… ব্যাপাদপরিযেসনং, ভিক্খৰে, পরিযেসমানো অস্সুতৰা পুথুজ্জনো তীহি ঠানেহি মিচ্ছা পটিপজ্জতি – কাযেন, ৰাচায, মনসা.

‘‘ৰিহিংসাধাতুং, ভিক্খৰে, পটিচ্চ উপ্পজ্জতি ৰিহিংসাসঞ্ঞা; ৰিহিংসাসঞ্ঞং পটিচ্চ উপ্পজ্জতি ৰিহিংসাসঙ্কপ্পো…পে… ৰিহিংসাছন্দো… ৰিহিংসাপরিল়াহো… ৰিহিংসাপরিযেসনা… ৰিহিংসাপরিযেসনং, ভিক্খৰে, পরিযেসমানো অস্সুতৰা পুথুজ্জনো তীহি ঠানেহি মিচ্ছা পটিপজ্জতি – কাযেন, ৰাচায, মনসা.

‘‘সেয্যথাপি, ভিক্খৰে, পুরিসো আদিত্তং তিণুক্কং সুক্খে তিণদাযে নিক্খিপেয্য; নো চে হত্থেহি চ পাদেহি চ খিপ্পমেৰ নিব্বাপেয্য. এৰঞ্হি, ভিক্খৰে, যে তিণকট্ঠনিস্সিতা পাণা তে অনযব্যসনং আপজ্জেয্যুং. এৰমেৰ খো, ভিক্খৰে, যো হি কোচি সমণো ৰা ব্রাহ্মণো ৰা উপ্পন্নং ৰিসমগতং সঞ্ঞং ন খিপ্পমেৰ পজহতি ৰিনোদেতি ব্যন্তীকরোতি অনভাৰং গমেতি, সো দিট্ঠে চেৰ ধম্মে দুক্খং ৰিহরতি সৰিঘাতং সউপাযাসং সপরিল়াহং; কাযস্স চ ভেদা পরং মরণা দুগ্গতি পাটিকঙ্খা.

‘‘সনিদানং, ভিক্খৰে, উপ্পজ্জতি নেক্খম্মৰিতক্কো, নো অনিদানং; সনিদানং উপ্পজ্জতি অব্যাপাদৰিতক্কো, নো অনিদানং; সনিদানং উপ্পজ্জতি অৰিহিংসাৰিতক্কো, নো অনিদানং.

‘‘কথঞ্চ, ভিক্খৰে, সনিদানং উপ্পজ্জতি নেক্খম্মৰিতক্কো, নো অনিদানং; সনিদানং উপ্পজ্জতি অব্যাপাদৰিতক্কো, নো অনিদানং; সনিদানং উপ্পজ্জতি অৰিহিংসাৰিতক্কো, নো অনিদানং? নেক্খম্মধাতুং, ভিক্খৰে, পটিচ্চ উপ্পজ্জতি নেক্খম্মসঞ্ঞা, নেক্খম্মসঞ্ঞং পটিচ্চ উপ্পজ্জতি নেক্খম্মসঙ্কপ্পো, নেক্খম্মসঙ্কপ্পং পটিচ্চ উপ্পজ্জতি নেক্খম্মচ্ছন্দো, নেক্খম্মচ্ছন্দং পটিচ্চ উপ্পজ্জতি নেক্খম্মপরিল়াহো, নেক্খম্মপরিল়াহং পটিচ্চ উপ্পজ্জতি নেক্খম্মপরিযেসনা; নেক্খম্মপরিযেসনং, ভিক্খৰে, পরিযেসমানো সুতৰা অরিযসাৰকো তীহি ঠানেহি সম্মা পটিপজ্জতি – কাযেন, ৰাচায, মনসা.

‘‘অব্যাপাদধাতুং, ভিক্খৰে, পটিচ্চ উপ্পজ্জতি অব্যাপাদসঞ্ঞা, অব্যাপাদসঞ্ঞং পটিচ্চ উপ্পজ্জতি অব্যাপাদসঙ্কপ্পো…পে… অব্যাপাদচ্ছন্দো… অব্যাপাদপরিল়াহো… অব্যাপাদপরিযেসনা, অব্যাপাদপরিযেসনং, ভিক্খৰে, পরিযেসমানো সুতৰা অরিযসাৰকো তীহি ঠানেহি সম্মা পটিপজ্জতি – কাযেন, ৰাচায, মনসা.

‘‘অৰিহিংসাধাতুং, ভিক্খৰে, পটিচ্চ উপ্পজ্জতি অৰিহিংসাসঞ্ঞা, অৰিহিংসাসঞ্ঞং পটিচ্চ উপ্পজ্জতি অৰিহিংসাসঙ্কপ্পো, অৰিহিংসাসঙ্কপ্পং পটিচ্চ উপ্পজ্জতি অৰিহিংসাছন্দো, অৰিহিংসাছন্দং পটিচ্চ উপ্পজ্জতি অৰিহিংসাপরিল়াহো, অৰিহিংসাপরিল়াহং পটিচ্চ উপ্পজ্জতি অৰিহিংসাপরিযেসনা; অৰিহিংসাপরিযেসনং, ভিক্খৰে, পরিযেসমানো সুতৰা অরিযসাৰকো তীহি ঠানেহি সম্মা পটিপজ্জতি – কাযেন, ৰাচায, মনসা.

‘‘সেয্যথাপি, ভিক্খৰে, পুরিসো আদিত্তং তিণুক্কং সুক্খে তিণদাযে নিক্খিপেয্য; তমেনং হত্থেহি চ পাদেহি চ খিপ্পমেৰ নিব্বাপেয্য. এৰঞ্হি, ভিক্খৰে, যে তিণকট্ঠনিস্সিতা পাণা তে ন অনযব্যসনং আপজ্জেয্যুং. এৰমেৰ খো, ভিক্খৰে, যো হি কোচি সমণো ৰা ব্রাহ্মণো ৰা উপ্পন্নং ৰিসমগতং সঞ্ঞং খিপ্পমেৰ পজহতি ৰিনোদেতি ব্যন্তীকরোতি অনভাৰং গমেতি, সো দিট্ঠে চেৰ ধম্মে সুখং ৰিহরতি অৰিঘাতং অনুপাযাসং অপরিল়াহং; কাযস্স চ ভেদা পরং মরণা সুগতি পাটিকঙ্খা’’তি. দুতিযং.