১. নখসিখাসুত্তং

৭৪. এৰং মে সুতং – একং সমযং ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. অথ খো ভগৰা পরিত্তং নখসিখাযং পংসুং আরোপেত্ৰা ভিক্খূ আমন্তেসি – ‘‘তং কিং মঞ্ঞথ, ভিক্খৰে, কতমং নু খো বহুতরং, যো ৰাযং [যো চাযং (সব্বত্থ) দুতিযসুত্তাদীসু পন ৰাসদ্দোযেৰ দিস্সতি] মযা পরিত্তো নখসিখাযং পংসু আরোপিতো, অযং ৰা মহাপথৰী’’তি?

‘‘এতদেৰ, ভন্তে, বহুতরং, যদিদং মহাপথৰী. অপ্পমত্তকো ভগৰতা পরিত্তো নখসিখাযং পংসু আরোপিতো. নেৰ সতিমং কলং উপেতি ন সহস্সিমং কলং উপেতি ন সতসহস্সিমং কলং উপেতি মহাপথৰিং উপনিধায ভগৰতা পরিত্তো নখসিখাযং পংসু আরোপিতো’’তি. ‘‘এৰমেৰ খো, ভিক্খৰে, অরিযসাৰকস্স দিট্ঠিসম্পন্নস্স পুগ্গলস্স অভিসমেতাৰিনো এতদেৰ বহুতরং দুক্খং যদিদং পরিক্খীণং পরিযাদিণ্ণং; অপ্পমত্তকং অৰসিট্ঠং. নেৰ সতিমং কলং উপেতি ন সহস্সিমং কলং উপেতি ন সতসহস্সিমং কলং উপেতি পুরিমং দুক্খক্খন্ধং পরিক্খীণং পরিযাদিণ্ণং উপনিধায যদিদং সত্তক্খত্তুংপরমতা. এৰং মহত্থিযো খো, ভিক্খৰে, ধম্মাভিসমযো; এৰং মহত্থিযো ধম্মচক্খুপটিলাভো’’তি. পঠমং.