৮. নন্দসুত্তং

২৪২. সাৰত্থিযং ৰিহরতি. অথ খো আযস্মা নন্দো ভগৰতো মাতুচ্ছাপুত্তো আকোটিতপচ্চাকোটিতানি চীৰরানি পারুপিত্ৰা অক্খীনি অঞ্জেত্ৰা অচ্ছং পত্তং গহেত্ৰা যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি. একমন্তং নিসিন্নং খো আযস্মন্তং নন্দং ভগৰা এতদৰোচ – ‘‘ন খো তে তং, নন্দ, পতিরূপং কুলপুত্তস্স সদ্ধা অগারস্মা অনগারিযং পব্বজিতস্স, যং ত্ৰং আকোটিতপচ্চাকোটিতানি চীৰরানি পারুপেয্যাসি, অক্খীনি চ অঞ্জেয্যাসি, অচ্ছঞ্চ পত্তং ধারেয্যাসি. এতং খো তে, নন্দ, পতিরূপং কুলপুত্তস্স সদ্ধা অগারস্মা অনগারিযং পব্বজিতস্স, যং ত্ৰং আরঞ্ঞিকো চ অস্সসি, পিণ্ডপাতিকো চ পংসুকুলিকো চ কামেসু চ অনপেক্খো ৰিহরেয্যাসী’’তি. ইদমৰোচ ভগৰা…পে… সত্থা –

‘‘কদাহং নন্দং পস্সেয্যং, আরঞ্ঞং পংসুকূলিকং;

অঞ্ঞাতুঞ্ছেন যাপেন্তং, কামেসু অনপেক্খিন’’ন্তি.

অথ খো আযস্মা নন্দো অপরেন সমযেন আরঞ্ঞিকো চ পিণ্ডপাতিকো চ পংসুকূলিকো চ কামেসু চ অনপেক্খো ৰিহাসীতি. অট্ঠমং.