৪. নৰসুত্তং

২৩৮. সাৰত্থিযং ৰিহরতি. তেন খো পন সমযেন অঞ্ঞতরো নৰো ভিক্খু পচ্ছাভত্তং পিণ্ডপাতপটিক্কন্তো ৰিহারং পৰিসিত্ৰা অপ্পোস্সুক্কো তুণ্হীভূতো সঙ্কসাযতি, ন ভিক্খূনং ৰেয্যাৰচ্চং করোতি চীৰরকারসমযে. অথ খো সম্বহুলা ভিক্খূ যেন ভগৰা তেনুপসঙ্কমিংসু; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদিংসু. একমন্তং নিসিন্না খো তে ভিক্খূ ভগৰন্তং এতদৰোচুং – ‘‘ইধ, ভন্তে, অঞ্ঞতরো নৰো ভিক্খু পচ্ছাভত্তং পিণ্ডপাতপটিক্কন্তো ৰিহারং পৰিসিত্ৰা অপ্পোস্সুক্কো তুণ্হীভূতো সঙ্কসাযতি, ন ভিক্খূনং ৰেয্যাৰচ্চং করোতি চীৰরকারসমযে’’তি.

অথ খো ভগৰা অঞ্ঞতরং ভিক্খুং আমন্তেসি – ‘‘এহি ত্ৰং, ভিক্খু, মম ৰচনেন তং ভিক্খুং আমন্তেহি ‘সত্থা তং, আৰুসো, আমন্তেতী’’’তি. ‘‘এৰং ভন্তে’’তি খো সো ভিক্খু ভগৰতো পটিস্সুত্ৰা যেন সো ভিক্খু তেনুপসঙ্কমি; উপসঙ্কমিত্ৰা তং ভিক্খুং এতদৰোচ – ‘‘সত্থা তং, আৰুসো, আমন্তেতী’’তি. ‘‘এৰমাৰুসো’’তি খো সো ভিক্খু তস্স ভিক্খুনো পটিস্সুত্ৰা যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি. একমন্তং নিসিন্নং খো তং ভিক্খুং ভগৰা এতদৰোচ – ‘‘সচ্চং কির ত্ৰং, ভিক্খু, পচ্ছাভত্তং পিণ্ডপাতপটিক্কন্তো ৰিহারং পৰিসিত্ৰা অপ্পোস্সুক্কো তুণ্হীভূতো সঙ্কসাযসি, ন ভিক্খূনং ৰেয্যাৰচ্চং করোসি চীৰরকারসমযে’’তি? ‘‘অহম্পি খো, ভন্তে, সকং কিচ্চং করোমী’’তি.

অথ খো ভগৰা তস্স ভিক্খুনো চেতসা চেতোপরিৰিতক্কমঞ্ঞায ভিক্খূ আমন্তেসি – ‘‘মা খো তুম্হে, ভিক্খৰে, এতস্স ভিক্খুনো উজ্ঝাযিত্থ. এসো খো, ভিক্খৰে, ভিক্খু চতুন্নং ঝানানং আভিচেতসিকানং দিট্ঠধম্মসুখৰিহারানং নিকামলাভী অকিচ্ছলাভী অকসিরলাভী, যস্স চত্থায কুলপুত্তা সম্মদেৰ অগারস্মা অনগারিযং পব্বজন্তি, তদনুত্তরং ব্রহ্মচরিযপরিযোসানং দিট্ঠেৰ ধম্মে সযং অভিঞ্ঞা সচ্ছিকত্ৰা উপসম্পজ্জ ৰিহরতী’’তি.

ইদমৰোচ ভগৰা. ইদং ৰত্ৰান সুগতো অথাপরং এতদৰোচ সত্থা –

‘‘নযিদং সিথিলমারব্ভ, নযিদং অপ্পেন থামসা;

নিব্বানং অধিগন্তব্বং, সব্বদুক্খপ্পমোচনং.

‘‘অযঞ্চ দহরো ভিক্খু, অযমুত্তমপুরিসো;

ধারেতি অন্তিমং দেহং, জেত্ৰা মারং সৰাহিনি’’ন্তি. চতুত্থং;