২. উপতিস্সসুত্তং

২৩৬. সাৰত্থিযং ৰিহরতি. তত্র খো আযস্মা সারিপুত্তো ভিক্খূ আমন্তেসি – ‘‘আৰুসো ভিক্খৰে’’তি. ‘‘আৰুসো’’তি খো তে ভিক্খূ আযস্মতো সারিপুত্তস্স পচ্চস্সোসুং. আযস্মা সারিপুত্তো এতদৰোচ –

‘‘ইধ ময্হং, আৰুসো, রহোগতস্স পটিসল্লীনস্স এৰং চেতসো পরিৰিতক্কো উদপাদি – ‘অত্থি নু খো তং কিঞ্চি লোকস্মিং যস্স মে ৰিপরিণামঞ্ঞথাভাৰা উপ্পজ্জেয্যুং সোকপরিদেৰদুক্খদোমনস্সুপাযাসা’তি? তস্স ময্হং, আৰুসো, এতদহোসি – ‘নত্থি খো তং কিঞ্চি লোকস্মিং যস্স মে ৰিপরিণামঞ্ঞথাভাৰা উপ্পজ্জেয্যুং সোকপরিদেৰদুক্খদোমনস্সুপাযাসা’’’তি.

এৰং ৰুত্তে, আযস্মা আনন্দো আযস্মন্তং সারিপুত্তং এতদৰোচ – ‘‘সত্থুপি খো তে, আৰুসো সারিপুত্ত, ৰিপরিণামঞ্ঞথাভাৰা নুপ্পজ্জেয্যুং সোকপরিদেৰদুক্খদোমনস্সুপাযাসা’’তি? ‘‘সত্থুপি খো মে, আৰুসো, ৰিপরিণামঞ্ঞথাভাৰা নুপ্পজ্জেয্যুং সোকপরিদেৰদুক্খদোমনস্সুপাযাসা, অপি চ মে এৰমস্স – ‘মহেসক্খো ৰত, ভো, সত্থা অন্তরহিতো মহিদ্ধিকো মহানুভাৰো. সচে হি ভগৰা চিরং দীঘমদ্ধানং তিট্ঠেয্য তদস্স বহুজনহিতায বহুজনসুখায লোকানুকম্পায অত্থায হিতায সুখায দেৰমনুস্সান’ন্তি. তথা হি পনাযস্মতো সারিপুত্তস্স দীঘরত্তং অহঙ্কারমমঙ্কারমানানুসযা সুসমূহতা. তস্মা আযস্মতো সারিপুত্তস্স সত্থুপি ৰিপরিণামঞ্ঞথাভাৰা নুপ্পজ্জেয্যুং সোকপরিদেৰদুক্খদোমনস্সুপাযাসা’’তি. দুতিযং.