৯. ৰনসংযুত্তং

১. ৰিৰেকসুত্তং

২২১. এৰং মে সুতং – একং সমযং অঞ্ঞতরো ভিক্খু কোসলেসু ৰিহরতি অঞ্ঞতরস্মিং ৰনসণ্ডে. তেন খো পন সমযেন সো ভিক্খু দিৰাৰিহারগতো পাপকে অকুসলে ৰিতক্কে ৰিতক্কেতি গেহনিস্সিতে. অথ খো যা তস্মিং ৰনসণ্ডে অধিৰত্থা দেৰতা তস্স ভিক্খুনো অনুকম্পিকা অত্থকামা তং ভিক্খুং সংৰেজেতুকামা যেন সো ভিক্খু তেনুপসঙ্কমি; উপসঙ্কমিত্ৰা তং ভিক্খুং গাথাহি অজ্ঝভাসি –

‘‘ৰিৰেককামোসি ৰনং পৰিট্ঠো,

অথ তে মনো নিচ্ছরতী বহিদ্ধা;

জনো জনস্মিং ৰিনযস্সু ছন্দং,

ততো সুখী হোহিসি ৰীতরাগো.

‘‘অরতিং পজহাসি সতো, ভৰাসি সতং তং সারযামসে;

পাতালরজো হি দুত্তরো, মা তং কামরজো অৰাহরি.

‘‘সকুণো যথা পংসুকুন্থিতো [পংসুকুণ্ঠিতো (ক.), পংসুকুণ্ডিতো (সী. স্যা. কং. পী.)], ৰিধুনং পাতযতি সিতং রজং;

এৰং ভিক্খু পধানৰা সতিমা, ৰিধুনং পাতযতি সিতং রজ’’ন্তি.

অথ খো সো ভিক্খু তায দেৰতায সংৰেজিতো সংৰেগমাপাদীতি.

২. উপট্ঠানসুত্তং

২২২. একং সমযং অঞ্ঞতরো ভিক্খু কোসলেসু ৰিহরতি অঞ্ঞতরস্মিং ৰনসণ্ডে. তেন খো পন সমযেন সো ভিক্খু দিৰাৰিহারগতো সুপতি. অথ খো যা তস্মিং ৰনসণ্ডে অধিৰত্থা দেৰতা তস্স ভিক্খুনো অনুকম্পিকা অত্থকামা তং ভিক্খুং সংৰেজেতুকামা যেন সো ভিক্খু তেনুপসঙ্কমি; উপসঙ্কমিত্ৰা তং ভিক্খুং গাথাহি অজ্ঝভাসি –

‘‘উট্ঠেহি ভিক্খু কিং সেসি, কো অত্থো সুপিতেন [সুপিনেন (সী.)] তে;

আতুরস্স হি কা নিদ্দা, সল্লৰিদ্ধস্স রুপ্পতো.

‘‘যায সদ্ধায পব্বজিতো [যায সদ্ধাপব্বজিতো (সী. স্যা. কং.)], অগারস্মানগারিযং;

তমেৰ সদ্ধং ব্রূহেহি, মা নিদ্দায ৰসং গমী’’তি.

‘‘অনিচ্চা অদ্ধুৰা কামা, যেসু মন্দোৰ মুচ্ছিতো;

বদ্ধেসু [খন্ধেসু (সী.)] মুত্তং অসিতং, কস্মা পব্বজিতং তপে.

‘‘ছন্দরাগস্স ৰিনযা, অৰিজ্জাসমতিক্কমা;

তং ঞাণং পরমোদানং [পরিযোদাতং (সী. পী.), পরমোদাতং (স্যা. কং.), পরমৰোদানং (সী. অট্ঠ.)], কস্মা পব্বজিতং তপে.

‘‘ছেত্ৰা [ভেত্ৰা (সী. স্যা. কং. পী.)] অৰিজ্জং ৰিজ্জায, আসৰানং পরিক্খযা;

অসোকং অনুপাযাসং, কস্মা পব্বজিতং তপে.

‘‘আরদ্ধৰীরিযং পহিতত্তং, নিচ্চং দল়্হপরক্কমং;

নিব্বানং অভিকঙ্খন্তং, কস্মা পব্বজিতং তপে’’তি.

৩. কস্সপগোত্তসুত্তং

২২৩. একং সমযং আযস্মা কস্সপগোত্তো কোসলেসু ৰিহরতি অঞ্ঞতরস্মিং ৰনসণ্ডে. তেন খো পন সমযেন আযস্মা কস্সপগোত্তো দিৰাৰিহারগতো অঞ্ঞতরং ছেতং ওৰদতি. অথ খো যা তস্মিং ৰনসণ্ডে অধিৰত্থা দেৰতা আযস্মন্তং কস্সপগোত্তং সংৰেজেতুকামা যেনাযস্মা কস্সপগোত্তো তেনুপসঙ্কমি; উপসঙ্কমিত্ৰা আযস্মন্তং কস্সপগোত্তং গাথাহি অজ্ঝভাসি –

‘‘গিরিদুগ্গচরং ছেতং, অপ্পপঞ্ঞং অচেতসং;

অকালে ওৰদং ভিক্খু, মন্দোৰ পটিভাতি মং.

‘‘সুণাতি ন ৰিজানাতি, আলোকেতি ন পস্সতি;

ধম্মস্মিং ভঞ্ঞমানস্মিং, অত্থং বালো ন বুজ্ঝতি.

‘‘সচেপি দস পজ্জোতে, ধারযিস্সসি কস্সপ;

নেৰ দক্খতি রূপানি, চক্খু হিস্স ন ৰিজ্জতী’’তি.

অথ খো আযস্মা কস্সপগোত্তো তায দেৰতায সংৰেজিতো সংৰেগমাপাদীতি.

৪. সম্বহুলসুত্তং

২২৪. একং সমযং সম্বহুলা ভিক্খূ কোসলেসু ৰিহরন্তি অঞ্ঞতরস্মিং ৰনসণ্ডে. অথ খো তে ভিক্খূ ৰস্সংৰুট্ঠা [ৰস্সংৰুত্থা (সী. স্যা. কং. পী.)] তেমাসচ্চযেন চারিকং পক্কমিংসু. অথ খো যা তস্মিং ৰনসণ্ডে অধিৰত্থা দেৰতা তে ভিক্খূ অপস্সন্তী পরিদেৰমানা তাযং ৰেলাযং ইমং গাথং অভাসি –

‘‘অরতি ৰিয মেজ্জ খাযতি,

বহুকে দিস্ৰান ৰিৰিত্তে আসনে;

তে চিত্তকথা বহুস্সুতা,

কোমে গোতমসাৰকা গতা’’তি.

এৰং ৰুত্তে, অঞ্ঞতরা দেৰতা তং দেৰতং গাথায পচ্চভাসি –

‘‘মাগধং গতা কোসলং গতা, একচ্চিযা পন ৰজ্জিভূমিযা;

মগা ৰিয অসঙ্গচারিনো, অনিকেতা ৰিহরন্তি ভিক্খৰো’’তি.

৫. আনন্দসুত্তং

২২৫. একং সমযং আযস্মা আনন্দো কোসলেসু ৰিহরতি অঞ্ঞতরস্মিং ৰনসণ্ডে. তেন খো পন সমযেন আযস্মা আনন্দো অতিৰেলং গিহিসঞ্ঞত্তিবহুলো ৰিহরতি. অথ খো যা তস্মিং ৰনসণ্ডে অধিৰত্থা দেৰতা আযস্মতো আনন্দস্স অনুকম্পিকা অত্থকামা আযস্মন্তং আনন্দং সংৰেজেতুকামা যেনাযস্মা আনন্দো তেনুপসঙ্কমি; উপসঙ্কমিত্ৰা আযস্মন্তং আনন্দং গাথায অজ্ঝভাসি –

‘‘রুক্খমূলগহনং পসক্কিয, নিব্বানং হদযস্মিং ওপিয;

ঝা গোতম মা পমাদো [মা চ পমাদো (সী. পী.)], কিং তে বিল়িবিল়িকা করিস্সতী’’তি.

অথ খো আযস্মা আনন্দো তায দেৰতায সংৰেজিতো সংৰেগমাপাদীতি.

৬. অনুরুদ্ধসুত্তং

২২৬. একং সমযং আযস্মা অনুরুদ্ধো কোসলেসু ৰিহরতি অঞ্ঞতরস্মিং ৰনসণ্ডে. অথ খো অঞ্ঞতরা তাৰতিংসকাযিকা দেৰতা জালিনী নাম আযস্মতো অনুরুদ্ধস্স পুরাণদুতিযিকা যেনাযস্মা অনুরুদ্ধো তেনুপসঙ্কমি; উপসঙ্কমিত্ৰা আযস্মন্তং অনুরুদ্ধং গাথায অজ্ঝভাসি –

‘‘তত্থ চিত্তং পণিধেহি, যত্থ তে ৰুসিতং পুরে;

তাৰতিংসেসু দেৰেসু, সব্বকামসমিদ্ধিসু;

পুরক্খতো পরিৰুতো, দেৰকঞ্ঞাহি সোভসী’’তি.

‘‘দুগ্গতা দেৰকঞ্ঞাযো, সক্কাযস্মিং পতিট্ঠিতা;

তে চাপি দুগ্গতা সত্তা, দেৰকঞ্ঞাহি পত্থিতা’’তি.

‘‘ন তে সুখং পজানন্তি, যে ন পস্সন্তি নন্দনং;

আৰাসং নরদেৰানং, তিদসানং যসস্সিন’’ন্তি.

‘‘ন ত্ৰং বালে ৰিজানাসি, যথা অরহতং ৰচো;

অনিচ্চা সব্বসঙ্খারা, উপ্পাদৰযধম্মিনো;

উপ্পজ্জিত্ৰা নিরুজ্ঝন্তি, তেসং ৰূপসমো সুখো.

‘‘নত্থি দানি পুনাৰাসো, দেৰকাযস্মি জালিনি;

ৰিক্খীণো জাতিসংসারো, নত্থি দানি পুনব্ভৰো’’তি.

৭. নাগদত্তসুত্তং

২২৭. একং সমযং আযস্মা নাগদত্তো কোসলেসু ৰিহরতি অঞ্ঞতরস্মিং ৰনসণ্ডে. তেন খো পন সমযেন আযস্মা নাগদত্তো অতিকালেন গামং পৰিসতি, অতিদিৰা পটিক্কমতি. অথ খো যা তস্মিং ৰনসণ্ডে অধিৰত্থা দেৰতা আযস্মতো নাগদত্তস্স অনুকম্পিকা অত্থকামা আযস্মন্তং নাগদত্তং সংৰেজেতুকামা যেনাযস্মা নাগদত্তো তেনুপসঙ্কমি; উপসঙ্কমিত্ৰা আযস্মন্তং নাগদত্তং গাথাহি অজ্ঝভাসি –

‘‘কালে পৰিস নাগদত্ত, দিৰা চ আগন্ত্ৰা অতিৰেলচারী;

সংসট্ঠো গহট্ঠেহি, সমানসুখদুক্খো.

‘‘ভাযামি নাগদত্তং সুপ্পগব্ভং, কুলেসু ৰিনিবদ্ধং;

মা হেৰ মচ্চুরঞ্ঞো বলৰতো, অন্তকস্স ৰসং উপেসী’’তি [ৰসমেয্যাতি (সী. পী.), ৰসমেসীতি (স্যা. কং.)].

অথ খো আযস্মা নাগদত্তো তায দেৰতায সংৰেজিতো সংৰেগমাপাদীতি.

৮. কুলঘরণীসুত্তং

২২৮. একং সমযং অঞ্ঞতরো ভিক্খু কোসলেসু ৰিহরতি অঞ্ঞতরস্মিং ৰনসণ্ডে. তেন খো পন সমযেন সো ভিক্খু অঞ্ঞতরস্মিং কুলে অতিৰেলং অজ্ঝোগাল়্হপ্পত্তো ৰিহরতি. অথ খো যা তস্মিং ৰনসণ্ডে অধিৰত্থা দেৰতা তস্স ভিক্খুনো অনুকম্পিকা অত্থকামা তং ভিক্খুং সংৰেজেতুকামা যা তস্মিং কুলে কুলঘরণী, তস্সা ৰণ্ণং অভিনিম্মিনিত্ৰা যেন সো ভিক্খু তেনুপসঙ্কমি; উপসঙ্কমিত্ৰা তং ভিক্খুং গাথায অজ্ঝভাসি –

‘‘নদীতীরেসু সণ্ঠানে, সভাসু রথিযাসু চ;

জনা সঙ্গম্ম মন্তেন্তি, মঞ্চ তঞ্চ [ত্ৰঞ্চ (ক.)] কিমন্তর’’ন্তি.

‘‘বহূহি সদ্দা পচ্চূহা, খমিতব্বা তপস্সিনা;

ন তেন মঙ্কু হোতব্বং, ন হি তেন কিলিস্সতি.

‘‘যো চ সদ্দপরিত্তাসী, ৰনে ৰাতমিগো যথা;

লহুচিত্তোতি তং আহু, নাস্স সম্পজ্জতে ৰত’’ন্তি.

৯. ৰজ্জিপুত্তসুত্তং

২২৯. একং সমযং অঞ্ঞতরো ৰজ্জিপুত্তকো ভিক্খু ৰেসালিযং ৰিহরতি অঞ্ঞতরস্মিং ৰনসণ্ডে. তেন খো পন সমযেন ৰেসালিযং ৰজ্জিপুত্তকো সব্বরত্তিচারো হোতি. অথ খো সো ভিক্খু ৰেসালিযা তূরিয-তাল়িত-ৰাদিত-নিগ্ঘোসসদ্দং সুত্ৰা পরিদেৰমানো তাযং ৰেলাযং ইমং গাথং অভাসি –

‘‘এককা মযং অরঞ্ঞে ৰিহরাম,

অপৰিদ্ধংৰ [অপৰিট্ঠংৰ (স্যা. কং.)] ৰনস্মিং দারুকং;

এতাদিসিকায রত্তিযা,

কো সু নামম্হেহি [নাম অম্হেহি (সী. পী.)] পাপিযো’’তি.

অথ খো যা তস্মিং ৰনসণ্ডে অধিৰত্থা দেৰতা তস্স ভিক্খুনো অনুকম্পিকা অত্থকামা তং ভিক্খুং সংৰেজেতুকামা যেন সো ভিক্খু তেনুপসঙ্কমি; উপসঙ্কমিত্ৰা তং ভিক্খুং গাথায অজ্ঝভাসি –

‘‘এককোৰ ত্ৰং অরঞ্ঞে ৰিহরসি, অপৰিদ্ধংৰ ৰনস্মিং দারুকং;

তস্স তে বহুকা পিহযন্তি, নেরযিকা ৰিয সগ্গগামিন’’ন্তি.

অথ খো সো ভিক্খু তায দেৰতায সংৰেজিতো সংৰেগমাপাদীতি.

১০. সজ্ঝাযসুত্তং

২৩০. একং সমযং অঞ্ঞতরো ভিক্খু কোসলেসু ৰিহরতি অঞ্ঞতরস্মিং ৰনসণ্ডে. তেন খো পন সমযেন সো ভিক্খু যং সুদং পুব্বে অতিৰেলং সজ্ঝাযবহুলো ৰিহরতি সো অপরেন সমযেন অপ্পোস্সুক্কো তুণ্হীভূতো সঙ্কসাযতি. অথ খো যা তস্মিং ৰনসণ্ডে অধিৰত্থা দেৰতা তস্স ভিক্খুনো ধম্মং অসুণন্তী যেন সো ভিক্খু তেনুপসঙ্কমি; উপসঙ্কমিত্ৰা তং ভিক্খুং গাথায অজ্ঝভাসি –

‘‘কস্মা তুৰং ধম্মপদানি ভিক্খু, নাধীযসি ভিক্খূহি সংৰসন্তো;

সুত্ৰান ধম্মং লভতিপ্পসাদং, দিট্ঠেৰ ধম্মে লভতিপ্পসংস’’ন্তি.

‘‘অহু পুরে ধম্মপদেসু ছন্দো, যাৰ ৰিরাগেন সমাগমিম্হ;

যতো ৰিরাগেন সমাগমিম্হ, যং কিঞ্চি দিট্ঠংৰ সুতং মুতং ৰা;

অঞ্ঞায নিক্খেপনমাহু সন্তো’’তি.

১১. অকুসলৰিতক্কসুত্তং

২৩১. একং সমযং অঞ্ঞতরো ভিক্খু কোসলেসু ৰিহরতি অঞ্ঞতরস্মিং ৰনসণ্ডে. তেন খো পন সমযেন সো ভিক্খু দিৰাৰিহারগতো পাপকে অকুসলে ৰিতক্কে ৰিতক্কেতি, সেয্যথিদং – কামৰিতক্কং, ব্যাপাদৰিতক্কং, ৰিহিংসাৰিতক্কং. অথ খো যা তস্মিং ৰনসণ্ডে অধিৰত্থা দেৰতা তস্স ভিক্খুনো অনুকম্পিকা অত্থকামা তং ভিক্খুং সংৰেজেতুকামা যেন সো ভিক্খু তেনুপসঙ্কমি; উপসঙ্কমিত্ৰা তং ভিক্খুং গাথাহি অজ্ঝভাসি –

‘‘অযোনিসো মনসিকারা, সো ৰিতক্কেহি খজ্জসি;

অযোনিসো [অযোনিং (পী. ক.)] পটিনিস্সজ্জ, যোনিসো অনুচিন্তয.

‘‘সত্থারং ধম্মমারব্ভ, সঙ্ঘং সীলানি অত্তনো;

অধিগচ্ছসি পামোজ্জং, পীতিসুখমসংসযং;

ততো পামোজ্জবহুলো, দুক্খস্সন্তং করিস্সসী’’তি.

অথ খো সো ভিক্খু তায দেৰতায সংৰেজিতো সংৰেগমাপাদীতি.

১২. মজ্ঝন্হিকসুত্তং

২৩২. একং সমযং অঞ্ঞতরো ভিক্খু কোসলেসু ৰিহরতি অঞ্ঞতরস্মিং ৰনসণ্ডে. অথ খো তস্মিং ৰনসণ্ডে অধিৰত্থা দেৰতা যেন সো ভিক্খু তেনুপসঙ্কমি; উপসঙ্কমিত্ৰা তস্স ভিক্খুনো সন্তিকে ইমং গাথং অভাসি –

‘‘ঠিতে মজ্ঝন্হিকে কালে, সন্নিসীৰেসু [সন্নিসিন্নেসু (স্যা. কং. পী.)] পক্খিসু;

সণতেৰ ব্রহারঞ্ঞং, তং ভযং পটিভাতি মং.

‘‘ঠিতে মজ্ঝন্হিকে কালে, সন্নিসীৰেসু পক্খিসু;

সণতেৰ ব্রহারঞ্ঞং, সা রতি পটিভাতি ম’’ন্তি.

১৩. পাকতিন্দ্রিযসুত্তং

২৩৩. একং সমযং সম্বহুলা ভিক্খূ কোসলেসু ৰিহরন্তি অঞ্ঞতরস্মিং ৰনসণ্ডে উদ্ধতা উন্নল়া চপলা মুখরা ৰিকিণ্ণৰাচা মুট্ঠস্সতিনো অসম্পজানা অসমাহিতা ৰিব্ভন্তচিত্তা পাকতিন্দ্রিযা. অথ খো যা তস্মিং ৰনসণ্ডে অধিৰত্থা দেৰতা তেসং ভিক্খূনং অনুকম্পিকা অত্থকামা তে ভিক্খূ সংৰেজেতুকামা যেন তে ভিক্খূ তেনুপসঙ্কমি; উপসঙ্কমিত্ৰা তে ভিক্খূ গাথাহি অজ্ঝভাসি –

‘‘সুখজীৰিনো পুরে আসুং, ভিক্খূ গোতমসাৰকা;

অনিচ্ছা পিণ্ডমেসনা, অনিচ্ছা সযনাসনং;

লোকে অনিচ্চতং ঞত্ৰা, দুক্খস্সন্তং অকংসু তে.

‘‘দুপ্পোসং কত্ৰা অত্তানং, গামে গামণিকা ৰিয;

ভুত্ৰা ভুত্ৰা নিপজ্জন্তি, পরাগারেসু মুচ্ছিতা.

‘‘সঙ্ঘস্স অঞ্জলিং কত্ৰা, ইধেকচ্চে ৰদামহং;

অপৰিদ্ধা [অপৰিট্ঠা (স্যা. কং.)] অনাথা তে, যথা পেতা তথেৰ তে.

‘‘যে খো পমত্তা ৰিহরন্তি, তে মে সন্ধায ভাসিতং;

যে অপ্পমত্তা ৰিহরন্তি, নমো তেসং করোমহ’’ন্তি.

অথ খো তে ভিক্খূ তায দেৰতায সংৰেজিতা সংৰেগমাপাদুন্তি.

১৪. গন্ধত্থেনসুত্তং

২৩৪. একং সমযং অঞ্ঞতরো ভিক্খু কোসলেসু ৰিহরতি অঞ্ঞতরস্মিং ৰনসণ্ডে. তেন খো পন সমযেন সো ভিক্খু পচ্ছাভত্তং পিণ্ডপাতপটিক্কন্তো পোক্খরণিং ওগাহেত্ৰা পদুমং উপসিঙ্ঘতি. অথ খো যা তস্মিং ৰনসণ্ডে অধিৰত্থা দেৰতা তস্স ভিক্খুনো অনুকম্পিকা অত্থকামা তং ভিক্খুং সংৰেজেতুকামা যেন সো ভিক্খু তেনুপসঙ্কমি; উপসঙ্কমিত্ৰা তং ভিক্খুং গাথায অজ্ঝভাসি –

‘‘যমেতং ৰারিজং পুপ্ফং, অদিন্নং উপসিঙ্ঘসি;

একঙ্গমেতং থেয্যানং, গন্ধত্থেনোসি মারিসা’’তি.

‘‘ন হরামি ন ভঞ্জামি, আরা সিঙ্ঘামি ৰারিজং;

অথ কেন নু ৰণ্ণেন, গন্ধত্থেনোতি ৰুচ্চতি.

‘‘য্ৰাযং ভিসানি খনতি, পুণ্ডরীকানি ভঞ্জতি;

এৰং আকিণ্ণকম্মন্তো, কস্মা এসো ন ৰুচ্চতী’’তি.

‘‘আকিণ্ণলুদ্দো পুরিসো, ধাতিচেলংৰ মক্খিতো;

তস্মিং মে ৰচনং নত্থি, ত্ৰঞ্চারহামি ৰত্তৰে.

‘‘অনঙ্গণস্স পোসস্স, নিচ্চং সুচিগৰেসিনো;

ৰালগ্গমত্তং পাপস্স, অব্ভামত্তংৰ খাযতী’’তি.

‘‘অদ্ধা মং যক্খ জানাসি, অথো মে অনুকম্পসি;

পুনপি যক্খ ৰজ্জাসি, যদা পস্সসি এদিস’’ন্তি.

‘‘নেৰ তং উপজীৰাম, নপি তে ভতকাম্হসে;

ত্ৰমেৰ ভিক্খু জানেয্য, যেন গচ্ছেয্য সুগ্গতি’’ন্তি.

অথ খো সো ভিক্খু তায দেৰতায সংৰেজিতো সংৰেগমাপাদীতি.

ৰনসংযুত্তং সমত্তং.