১২. আল়ৰকসুত্তং

২৪৬. এৰং মে সুতং – একং সমযং ভগৰা আল়ৰিযং ৰিহরতি আল়ৰকস্স যক্খস্স ভৰনে. অথ খো আল়ৰকো যক্খো যেন ভগৰা তেনুপসঙ্কমি; উপসঙ্কমিত্ৰা ভগৰন্তং এতদৰোচ – ‘‘নিক্খম, সমণা’’তি. ‘‘সাধাৰুসো’’তি ভগৰা নিক্খমি. ‘‘পৰিস, সমণা’’তি. ‘‘সাধাৰুসো’’তি ভগৰা পাৰিসি. দুতিযম্পি খো আল়ৰকো যক্খো ভগৰন্তং এতদৰোচ – ‘‘নিক্খম, সমণা’’তি. ‘‘সাধাৰুসো’’তি ভগৰা নিক্খমি. ‘‘পৰিস, সমণা’’তি. ‘‘সাধাৰুসো’’তি ভগৰা পাৰিসি. ততিযম্পি খো আল়ৰকো যক্খো ভগৰন্তং এতদৰোচ – ‘‘নিক্খম, সমণা’’তি. ‘‘সাধাৰুসো’’তি ভগৰা নিক্খমি. ‘‘পৰিস, সমণা’’তি. ‘‘সাধাৰুসো’’তি ভগৰা পাৰিসি. চতুত্থম্পি খো আল়ৰকো যক্খো ভগৰন্তং এতদৰোচ – ‘‘নিক্খম, সমণা’’তি. ‘‘ন খ্ৰাহং তং, আৰুসো, নিক্খমিস্সামি. যং তে করণীযং তং করোহী’’তি. ‘‘পঞ্হং তং, সমণ, পুচ্ছিস্সামি. সচে মে ন ব্যাকরিস্সসি, চিত্তং ৰা তে খিপিস্সামি, হদযং ৰা তে ফালেস্সামি, পাদেসু ৰা গহেত্ৰা পারগঙ্গায খিপিস্সামী’’তি. ‘‘ন খ্ৰাহং তং, আৰুসো, পস্সামি সদেৰকে লোকে সমারকে সব্রহ্মকে সস্সমণব্রাহ্মণিযা পজায সদেৰমনুস্সায, যে মে চিত্তং ৰা খিপেয্য হদযং ৰা ফালেয্য, পাদেসু ৰা গহেত্ৰা পারগঙ্গায খিপেয্য. অপি চ ত্ৰং, আৰুসো, পুচ্ছ যদা কঙ্খসী’’তি [(অথ খো আল়ৰকো যক্খো ভগৰন্তং গাথায অজ্ঝভাসি.) (সী.)].

‘‘কিংসূধ ৰিত্তং পুরিসস্স সেট্ঠং, কিংসু সুচিণ্ণং সুখমাৰহাতি;

কিংসু হৰে সাদুতরং রসানং, কথংজীৰিং জীৰিতমাহু সেট্ঠ’’ন্তি.

‘‘সদ্ধীধ ৰিত্তং পুরিস্স সেট্ঠং, ধম্মো সুচিণ্ণো সুখমাৰহাতি;

সচ্চং হৰে সাদুতরং রসানং, পঞ্ঞাজীৰিং জীৰিতমাহু সেট্ঠ’’ন্তি.

‘‘কথংসু তরতি ওঘং, কথংসু তরতি অণ্ণৰং;

কথংসু দুক্খমচ্চেতি, কথংসু পরিসুজ্ঝতী’’তি.

‘‘সদ্ধায তরতি ওঘং, অপ্পমাদেন অণ্ণৰং;

ৰীরিযেন দুক্খমচ্চেতি, পঞ্ঞায পরিসুজ্ঝতী’’তি.

‘‘কথংসু লভতে পঞ্ঞং, কথংসু ৰিন্দতে ধনং;

কথংসু কিত্তিং পপ্পোতি, কথং মিত্তানি গন্থতি;

অস্মা লোকা পরং লোকং, কথং পেচ্চ ন সোচতী’’তি.

‘‘সদ্দহানো অরহতং, ধম্মং নিব্বানপত্তিযা;

সুস্সূসং [সুস্সূসা (সী. পী.)] লভতে পঞ্ঞং, অপ্পমত্তো ৰিচক্খণো.

‘‘পতিরূপকারী ধুরৰা, উট্ঠাতা ৰিন্দতে ধনং;

সচ্চেন কিত্তিং পপ্পোতি, দদং মিত্তানি গন্থতি;

অস্মা লোকা পরং লোকং, এৰং পেচ্চ ন সোচতি.

‘‘যস্সেতে চতুরো ধম্মা, সদ্ধস্স ঘরমেসিনো;

সচ্চং দম্মো ধিতি চাগো, স ৰে পেচ্চ ন সোচতি.

‘‘ইঙ্ঘ অঞ্ঞেপি পুচ্ছস্সু, পুথূ সমণব্রাহ্মণে;

যদি সচ্চা দম্মা চাগা, খন্ত্যা ভিয্যোধ ৰিজ্জতী’’তি.

‘‘কথং নু দানি পুচ্ছেয্যং, পুথূ সমণব্রাহ্মণে;

যোহং [সোহং (সী.), স্ৰাহং (ক.)] অজ্জ পজানামি, যো অত্থো সম্পরাযিকো.

‘‘অত্থায ৰত মে বুদ্ধো, ৰাসাযাল়ৰিমাগমা [মাগতো (পী. ক.)];

যোহং [সোহং (সী.)] অজ্জ পজানামি, যত্থ দিন্নং মহপ্ফলং.

‘‘সো অহং ৰিচরিস্সামি, গামা গামং পুরা পুরং;

নমস্সমানো সম্বুদ্ধং, ধম্মস্স চ সুধম্মত’’ন্তি.

যক্খসংযুত্তং সমত্তং.