৭. অদ্ধৰগ্গো

১. নামসুত্তং

৬১. ‘‘কিংসু সব্বং অদ্ধভৰি [অন্ৰভৰি (সী.)], কিস্মা ভিয্যো ন ৰিজ্জতি;

কিস্সস্সু একধম্মস্স, সব্বেৰ ৰসমন্ৰগূ’’তি [ৰসমদ্ধগূ (ক.)].

‘‘নামং সব্বং অদ্ধভৰি, নামা ভিয্যো ন ৰিজ্জতি;

নামস্স একধম্মস্স, সব্বেৰ ৰসমন্ৰগূ’’তি.

২. চিত্তসুত্তং

৬২. ‘‘কেনস্সু নীযতি লোকো, কেনস্সু পরিকস্সতি;

কিস্সস্সু একধম্মস্স, সব্বেৰ ৰসমন্ৰগূ’’তি.

‘‘চিত্তেন নীযতি লোকো, চিত্তেন পরিকস্সতি;

চিত্তস্স একধম্মস্স, সব্বেৰ ৰসমন্ৰগূ’’তি.

৩. তণ্হাসুত্তং

৬৩. ‘‘কেনস্সু নীযতি লোকো, কেনস্সু পরিকস্সতি;

কিস্সস্সু একধম্মস্স, সব্বেৰ ৰসমন্ৰগূ’’তি.

‘‘তণ্হায নীযতি লোকো, তণ্হায পরিকস্সতি;

তণ্হায একধম্মস্স, সব্বেৰ ৰসমন্ৰগূ’’তি.

৪. সংযোজনসুত্তং

৬৪. ‘‘কিংসু সংযোজনো লোকো, কিংসু তস্স ৰিচারণং;

কিস্সস্সু ৰিপ্পহানেন, নিব্বানং ইতি ৰুচ্চতী’’তি.

‘‘নন্দীসংযোজনো [নন্দিসংযোজনো (সী. স্যা. কং.)] লোকো, ৰিতক্কস্স ৰিচারণং;

তণ্হায ৰিপ্পহানেন, নিব্বানং ইতি ৰুচ্চতী’’তি.

৫. বন্ধনসুত্তং

৬৫. ‘‘কিংসু সম্বন্ধনো লোকো, কিংসু তস্স ৰিচারণং;

কিস্সস্সু ৰিপ্পহানেন, সব্বং ছিন্দতি বন্ধন’’ন্তি.

‘‘নন্দীসম্বন্ধনো লোকো, ৰিতক্কস্স ৰিচারণং;

তণ্হায ৰিপ্পহানেন, সব্বং ছিন্দতি বন্ধন’’ন্তি.

৬. অত্তহতসুত্তং

৬৬. ‘‘কেনস্সুব্ভাহতো লোকো, কেনস্সু পরিৰারিতো;

কেন সল্লেন ওতিণ্ণো, কিস্স ধূপাযিতো সদা’’তি.

‘‘মচ্চুনাব্ভাহতো লোকো, জরায পরিৰারিতো;

তণ্হাসল্লেন ওতিণ্ণো, ইচ্ছাধূপাযিতো সদা’’তি.

৭. উড্ডিতসুত্তং

৬৭. ‘‘কেনস্সু উড্ডিতো লোকো, কেনস্সু পরিৰারিতো;

কেনস্সু পিহিতো লোকো, কিস্মিং লোকো পতিট্ঠিতো’’তি.

‘‘তণ্হায উড্ডিতো লোকো, জরায পরিৰারিতো;

মচ্চুনা পিহিতো লোকো, দুক্খে লোকো পতিট্ঠিতো’’তি.

৮. পিহিতসুত্তং

৬৮. ‘‘কেনস্সু পিহিতো লোকো, কিস্মিং লোকো পতিট্ঠিতো;

কেনস্সু উড্ডিতো লোকো, কেনস্সু পরিৰারিতো’’তি.

‘‘মচ্চুনা পিহিতো লোকো, দুক্খে লোকো পতিট্ঠিতো;

তণ্হায উড্ডিতো লোকো, জরায পরিৰারিতো’’তি.

৯. ইচ্ছাসুত্তং

৬৯. ‘‘কেনস্সু বজ্ঝতী লোকো, কিস্স ৰিনযায মুচ্চতি;

কিস্সস্সু ৰিপ্পহানেন, সব্বং ছিন্দতি বন্ধন’’ন্তি.

‘‘ইচ্ছায বজ্ঝতী লোকো, ইচ্ছাৰিনযায মুচ্চতি;

ইচ্ছায ৰিপ্পহানেন, সব্বং ছিন্দতি বন্ধন’’ন্তি.

১০. লোকসুত্তং

৭০. ‘‘কিস্মিং লোকো সমুপ্পন্নো, কিস্মিং কুব্বতি সন্থৰং;

কিস্স লোকো উপাদায, কিস্মিং লোকো ৰিহঞ্ঞতী’’তি.

‘‘ছসু লোকো সমুপ্পন্নো, ছসু কুব্বতি সন্থৰং;

ছন্নমেৰ উপাদায, ছসু লোকো ৰিহঞ্ঞতী’’তি.

অদ্ধৰগ্গো [অন্ৰৰগ্গো (সী.)] সত্তমো.

তস্সুদ্দানং –

নামং চিত্তঞ্চ তণ্হা চ, সংযোজনঞ্চ বন্ধনা;

অব্ভাহতুড্ডিতো পিহিতো, ইচ্ছা লোকেন তে দসাতি.