১. নন্দনসুত্তং

১১. এৰং মে সুতং – একং সমযং ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. তত্র খো ভগৰা ভিক্খূ আমন্তেসি – ‘‘ভিক্খৰো’’তি. ‘‘ভদন্তে’’তি তে ভিক্খূ ভগৰতো পচ্চস্সোসুং. ভগৰা এতদৰোচ –

‘‘ভূতপুব্বং, ভিক্খৰে, অঞ্ঞতরা তাৰতিংসকাযিকা দেৰতা নন্দনে ৰনে অচ্ছরাসঙ্ঘপরিৰুতা দিব্বেহি পঞ্চহি কামগুণেহি সমপ্পিতা সমঙ্গীভূতা পরিচারিযমানা [পরিচারিযমানা (স্যা. কং. ক.)] তাযং ৰেলাযং ইমং গাথং অভাসি –

‘‘ন তে সুখং পজানন্তি, যে ন পস্সন্তি নন্দনং;

আৰাসং নরদেৰানং, তিদসানং যসস্সিন’’ন্তি.

‘‘এৰং ৰুত্তে, ভিক্খৰে, অঞ্ঞতরা দেৰতা তং দেৰতং গাথায পচ্চভাসি –

‘‘ন ত্ৰং বালে পজানাসি, যথা অরহতং ৰচো;

অনিচ্চা সব্বসঙ্খারা [সব্বে সঙ্খারা (সী. স্যা. কং.)], উপ্পাদৰযধম্মিনো;

উপ্পজ্জিত্ৰা নিরুজ্ঝন্তি, তেসং ৰূপসমো সুখো’’তি.