২. নিমোক্খসুত্তং

২. সাৰত্থিনিদানং. অথ খো অঞ্ঞতরা দেৰতা অভিক্কন্তায রত্তিযা অভিক্কন্তৰণ্ণা কেৰলকপ্পং জেতৰনং ওভাসেত্ৰা যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং অট্ঠাসি. একমন্তং ঠিতা খো সা দেৰতা ভগৰন্তং এতদৰোচ –

‘‘জানাসি নো ত্ৰং, মারিস, সত্তানং নিমোক্খং পমোক্খং ৰিৰেক’’ন্তি?

‘‘জানামি খ্ৰাহং, আৰুসো, সত্তানং নিমোক্খং পমোক্খং ৰিৰেক’’ন্তি.

‘‘যথা কথং পন ত্ৰং, মারিস, জানাসি সত্তানং নিমোক্খং পমোক্খং ৰিৰেক’’ন্তি?

‘‘নন্দীভৰপরিক্খযা [নন্দিভৰপরিক্খযা (স্যা. কং.)], সঞ্ঞাৰিঞ্ঞাণসঙ্খযা, ৰেদনানং নিরোধা উপসমা – এৰং খ্ৰাহং, আৰুসো, জানামি সত্তানং নিমোক্খং পমোক্খং ৰিৰেক’’ন্তি.