৭. মহাচত্তারীসকসুত্তং

১৩৬. এৰং মে সুতং – একং সমযং ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. তত্র খো ভগৰা ভিক্খূ আমন্তেসি – ‘‘ভিক্খৰো’’তি. ‘‘ভদন্তে’’তি তে ভিক্খূ ভগৰতো পচ্চস্সোসুং. ভগৰা এতদৰোচ – ‘‘অরিযং ৰো, ভিক্খৰে, সম্মাসমাধিং দেসেস্সামি সউপনিসং সপরিক্খারং. তং সুণাথ, সাধুকং মনসি করোথ; ভাসিস্সামী’’তি. ‘‘এৰং, ভন্তে’’তি খো তে ভিক্খূ ভগৰতো পচ্চস্সোসুং. ভগৰা এতদৰোচ –

‘‘কতমো চ, ভিক্খৰে, অরিযো সম্মাসমাধি সউপনিসো সপরিক্খারো? সেয্যথিদং – সম্মাদিট্ঠি, সম্মাসঙ্কপ্পো, সম্মাৰাচা, সম্মাকম্মন্তো, সম্মাআজীৰো, সম্মাৰাযামো, সম্মাসতি; যা খো, ভিক্খৰে, ইমেহি সত্তহঙ্গেহি চিত্তস্স একগ্গতা পরিক্খতা – অযং ৰুচ্চতি, ভিক্খৰে, অরিযো সম্মাসমাধি সউপনিসো ইতিপি, সপরিক্খারো ইতিপি. তত্র, ভিক্খৰে, সম্মাদিট্ঠি পুব্বঙ্গমা হোতি. কথঞ্চ, ভিক্খৰে, সম্মাদিট্ঠি পুব্বঙ্গমা হোতি? মিচ্ছাদিট্ঠিং ‘মিচ্ছাদিট্ঠী’তি পজানাতি, সম্মাদিট্ঠিং ‘সম্মাদিট্ঠী’তি পজানাতি – সাস্স হোতি সম্মাদিট্ঠি.

‘‘কতমা চ, ভিক্খৰে, মিচ্ছাদিট্ঠি? ‘নত্থি দিন্নং, নত্থি যিট্ঠং, নত্থি হুতং, নত্থি সুকতদুক্কটানং কম্মানং ফলং ৰিপাকো, নত্থি অযং লোকো, নত্থি পরো লোকো, নত্থি মাতা, নত্থি পিতা, নত্থি সত্তা ওপপাতিকা, নত্থি লোকে সমণব্রাহ্মণা সম্মগ্গতা সম্মাপটিপন্না যে ইমঞ্চ লোকং পরঞ্চ লোকং সযং অভিঞ্ঞা সচ্ছিকত্ৰা পৰেদেন্তী’তি – অযং, ভিক্খৰে, মিচ্ছাদিট্ঠি.

‘‘কতমা চ, ভিক্খৰে, সম্মাদিট্ঠি? সম্মাদিট্ঠিংপহং [সম্মাদিট্ঠিমহং (ক.) এৰং সম্মাসঙ্কপ্পংপহংক্যাদীসুপি], ভিক্খৰে, দ্ৰাযং [দ্ৰযং (সী. স্যা. কং. পী.) টীকা ওলোকেতব্বা] ৰদামি – অত্থি, ভিক্খৰে, সম্মাদিট্ঠি সাসৰা পুঞ্ঞভাগিযা উপধিৰেপক্কা; অত্থি, ভিক্খৰে, সম্মাদিট্ঠি অরিযা অনাসৰা লোকুত্তরা মগ্গঙ্গা. কতমা চ, ভিক্খৰে, সম্মাদিট্ঠি সাসৰা পুঞ্ঞভাগিযা উপধিৰেপক্কা? ‘অত্থি দিন্নং, অত্থি যিট্ঠং, অত্থি হুতং, অত্থি সুকতদুক্কটানং কম্মানং ফলং ৰিপাকো, অত্থি অযং লোকো, অত্থি পরো লোকো, অত্থি মাতা, অত্থি পিতা, অত্থি সত্তা ওপপাতিকা, অত্থি লোকে সমণব্রাহ্মণা সম্মগ্গতা সম্মাপটিপন্না যে ইমঞ্চ লোকং পরঞ্চ লোকং সযং অভিঞ্ঞা সচ্ছিকত্ৰা পৰেদেন্তী’তি – অযং, ভিক্খৰে, সম্মাদিট্ঠি সাসৰা পুঞ্ঞভাগিযা উপধিৰেপক্কা.

‘‘কতমা চ, ভিক্খৰে, সম্মাদিট্ঠি অরিযা অনাসৰা লোকুত্তরা মগ্গঙ্গা? যা খো, ভিক্খৰে, অরিযচিত্তস্স অনাসৰচিত্তস্স অরিযমগ্গসমঙ্গিনো অরিযমগ্গং ভাৰযতো পঞ্ঞা পঞ্ঞিন্দ্রিযং পঞ্ঞাবলং ধম্মৰিচযসম্বোজ্ঝঙ্গো সম্মাদিট্ঠি মগ্গঙ্গং [মগ্গঙ্গা (সী. পী.)] – অযং ৰুচ্চতি, ভিক্খৰে, সম্মাদিট্ঠি অরিযা অনাসৰা লোকুত্তরা মগ্গঙ্গা. সো মিচ্ছাদিট্ঠিযা পহানায ৰাযমতি, সম্মাদিট্ঠিযা, উপসম্পদায, স্ৰাস্স [স্ৰাযং (ক.)] হোতি সম্মাৰাযামো. সো সতো মিচ্ছাদিট্ঠিং পজহতি, সতো সম্মাদিট্ঠিং উপসম্পজ্জ ৰিহরতি, সাস্স [সাযং (ক.)] হোতি সম্মাসতি. ইতিযিমে [ইতিমে (সী.), ইতিস্সিমে (স্যা. কং. পী.)] তযো ধম্মা সম্মাদিট্ঠিং অনুপরিধাৰন্তি অনুপরিৰত্তন্তি, সেয্যথিদং – সম্মাদিট্ঠি, সম্মাৰাযামো, সম্মাসতি.

১৩৭. ‘‘তত্র, ভিক্খৰে, সম্মাদিট্ঠি পুব্বঙ্গমা হোতি. কথঞ্চ, ভিক্খৰে, সম্মাদিট্ঠি পুব্বঙ্গমা হোতি? মিচ্ছাসঙ্কপ্পং ‘মিচ্ছাসঙ্কপ্পো’তি পজানাতি, সম্মাসঙ্কপ্পং ‘সম্মাসঙ্কপ্পো’তি পজানাতি, সাস্স হোতি সম্মাদিট্ঠি.

‘‘কতমো চ, ভিক্খৰে, মিচ্ছাসঙ্কপ্পো? কামসঙ্কপ্পো, ব্যাপাদসঙ্কপ্পো, ৰিহিংসাসঙ্কপ্পো – অযং, ভিক্খৰে, মিচ্ছাসঙ্কপ্পো.

‘‘কতমো চ, ভিক্খৰে, সম্মাসঙ্কপ্পো? সম্মাসঙ্কপ্পংপহং, ভিক্খৰে, দ্ৰাযং ৰদামি – অত্থি, ভিক্খৰে, সম্মাসঙ্কপ্পো সাসৰো পুঞ্ঞভাগিযো উপধিৰেপক্কো; অত্থি, ভিক্খৰে, সম্মাসঙ্কপ্পো অরিযো অনাসৰো লোকুত্তরো মগ্গঙ্গো. কতমো চ, ভিক্খৰে, সম্মাসঙ্কপ্পো সাসৰো পুঞ্ঞভাগিযো উপধিৰেপক্কো? নেক্খম্মসঙ্কপ্পো, অব্যাপাদসঙ্কপ্পো, অৰিহিংসাসঙ্কপ্পো – ‘অযং, ভিক্খৰে, সম্মাসঙ্কপ্পো সাসৰো পুঞ্ঞভাগিযো উপধিৰেপক্কো’’’.

‘‘কতমো চ, ভিক্খৰে, সম্মাসঙ্কপ্পো অরিযো অনাসৰো লোকুত্তরো মগ্গঙ্গো? যো খো, ভিক্খৰে, অরিযচিত্তস্স অনাসৰচিত্তস্স অরিযমগ্গসমঙ্গিনো অরিযমগ্গং ভাৰযতো তক্কো ৰিতক্কো সঙ্কপ্পো অপ্পনা ব্যপ্পনা চেতসো অভিনিরোপনা ৰচীসঙ্খারো – অযং, ভিক্খৰে, সম্মাসঙ্কপ্পো অরিযো অনাসৰো লোকুত্তরো মগ্গঙ্গো. সো মিচ্ছাসঙ্কপ্পস্স পহানায ৰাযমতি, সম্মাসঙ্কপ্পস্স উপসম্পদায, স্ৰাস্স হোতি সম্মাৰাযামো. সো সতো মিচ্ছাসঙ্কপ্পং পজহতি, সতো সম্মাসঙ্কপ্পং উপসম্পজ্জ ৰিহরতি; সাস্স হোতি সম্মাসতি. ইতিযিমে তযো ধম্মা সম্মাসঙ্কপ্পং অনুপরিধাৰন্তি অনুপরিৰত্তন্তি, সেয্যথিদং – সম্মাদিট্ঠি, সম্মাৰাযামো, সম্মাসতি.

১৩৮. ‘‘তত্র, ভিক্খৰে, সম্মাদিট্ঠি পুব্বঙ্গমা হোতি. কথঞ্চ, ভিক্খৰে, সম্মাদিট্ঠি পুব্বঙ্গমা হোতি? মিচ্ছাৰাচং ‘মিচ্ছাৰাচা’তি পজানাতি, সম্মাৰাচং ‘সম্মাৰাচা’তি পজানাতি; সাস্স হোতি সম্মাদিট্ঠি. কতমা চ, ভিক্খৰে, মিচ্ছাৰাচা? মুসাৰাদো, পিসুণা ৰাচা, ফরুসা ৰাচা, সম্ফপ্পলাপো – অযং, ভিক্খৰে, মিচ্ছাৰাচা. কতমা চ, ভিক্খৰে, সম্মাৰাচা? সম্মাৰাচংপহং, ভিক্খৰে, দ্ৰাযং ৰদামি – অত্থি, ভিক্খৰে, সম্মাৰাচা সাসৰা পুঞ্ঞভাগিযা উপধিৰেপক্কা; অত্থি, ভিক্খৰে, সম্মাৰাচা অরিযা অনাসৰা লোকুত্তরা মগ্গঙ্গা. কতমা চ, ভিক্খৰে, সম্মাৰাচা সাসৰা পুঞ্ঞভাগিযা উপধিৰেপক্কা? মুসাৰাদা ৰেরমণী, পিসুণায ৰাচায ৰেরমণী, ফরুসায ৰাচায ৰেরমণী, সম্ফপ্পলাপা ৰেরমণী – অযং, ভিক্খৰে, সম্মাৰাচা সাসৰা পুঞ্ঞভাগিযা উপধিৰেপক্কা. কতমা চ, ভিক্খৰে, সম্মাৰাচা অরিযা অনাসৰা লোকুত্তরা মগ্গঙ্গা? যা খো, ভিক্খৰে, অরিযচিত্তস্স অনাসৰচিত্তস্স অরিযমগ্গসমঙ্গিনো অরিযমগ্গং ভাৰযতো চতূহি ৰচীদুচ্চরিতেহি আরতি ৰিরতি পটিৰিরতি ৰেরমণী – অযং, ভিক্খৰে, সম্মাৰাচা অরিযা অনাসৰা লোকুত্তরা মগ্গঙ্গা. সো মিচ্ছাৰাচায পহানায ৰাযমতি, সম্মাৰাচায উপসম্পদায; স্ৰাস্স হোতি সম্মাৰাযামো. সো সতো মিচ্ছাৰাচং পজহতি, সতো সম্মাৰাচং উপসম্পজ্জ ৰিহরতি; সাস্স হোতি সম্মাসতি. ইতিযিমে তযো ধম্মা সম্মাৰাচং অনুপরিধাৰন্তি অনুপরিৰত্তন্তি, সেয্যথিদং – সম্মাদিট্ঠি, সম্মাৰাযামো, সম্মাসতি.

১৩৯. ‘‘তত্র, ভিক্খৰে, সম্মাদিট্ঠি পুব্বঙ্গমা হোতি. কথঞ্চ, ভিক্খৰে, সম্মাদিট্ঠি পুব্বঙ্গমা হোতি? মিচ্ছাকম্মন্তং ‘মিচ্ছাকম্মন্তো’তি পজানাতি, সম্মাকম্মন্তং ‘সম্মাকম্মন্তো’তি পজানাতি; সাস্স হোতি সম্মাদিট্ঠি. কতমো চ, ভিক্খৰে, মিচ্ছাকম্মন্তো? পাণাতিপাতো, অদিন্নাদানং, কামেসুমিচ্ছাচারো – অযং, ভিক্খৰে, মিচ্ছাকম্মন্তো. কতমো চ, ভিক্খৰে, সম্মাকম্মন্তো? সম্মাকম্মন্তংপহং, ভিক্খৰে, দ্ৰাযং ৰদামি – অত্থি, ভিক্খৰে, সম্মাকম্মন্তো সাসৰো পুঞ্ঞভাগিযো উপধিৰেপক্কো; অত্থি, ভিক্খৰে, সম্মাকম্মন্তো অরিযো অনাসৰো লোকুত্তরো মগ্গঙ্গো. কতমো চ, ভিক্খৰে, সম্মাকম্মন্তো সাসৰো পুঞ্ঞভাগিযো উপধিৰেপক্কো? পাণাতিপাতা ৰেরমণী, অদিন্নাদানা ৰেরমণী, কামেসুমিচ্ছাচারা ৰেরমণী – অযং, ভিক্খৰে, সম্মাকম্মন্তো সাসৰো পুঞ্ঞভাগিযো উপধিৰেপক্কো. কতমো চ, ভিক্খৰে, সম্মাকম্মন্তো অরিযো অনাসৰো লোকুত্তরো মগ্গঙ্গো? যা খো, ভিক্খৰে, অরিযচিত্তস্স অনাসৰচিত্তস্স অরিযমগ্গসমঙ্গিনো অরিযমগ্গং ভাৰযতো তীহি কাযদুচ্চরিতেহি আরতি ৰিরতি পটিৰিরতি ৰেরমণী – অযং, ভিক্খৰে, সম্মাকম্মন্তো অরিযো অনাসৰো লোকুত্তরো মগ্গঙ্গো. সো মিচ্ছাকম্মন্তস্স পহানায ৰাযমতি, সম্মাকম্মন্তস্স উপসম্পদায; স্ৰাস্স হোতি সম্মাৰাযামো. সো সতো মিচ্ছাকম্মন্তং পজহতি, সতো সম্মাকম্মন্তং উপসম্পজ্জ ৰিহরতি; সাস্স হোতি সম্মাসতি. ইতিযিমে তযো ধম্মা সম্মাকম্মন্তং অনুপরিধাৰন্তি অনুপরিৰত্তন্তি, সেয্যথিদং – সম্মাদিট্ঠি, সম্মাৰাযামো, সম্মাসতি.

১৪০. ‘‘তত্র, ভিক্খৰে, সম্মাদিট্ঠি পুব্বঙ্গমা হোতি. কথঞ্চ, ভিক্খৰে, সম্মাদিট্ঠি পুব্বঙ্গমা হোতি? মিচ্ছাআজীৰং ‘মিচ্ছাআজীৰো’তি পজানাতি, সম্মাআজীৰং ‘সম্মাআজীৰো’তি পজানাতি; সাস্স হোতি সম্মাদিট্ঠি. কতমো চ, ভিক্খৰে, মিচ্ছাআজীৰো? কুহনা, লপনা, নেমিত্তিকতা, নিপ্পেসিকতা, লাভেন লাভং নিজিগীসনতা [নিজিগিং সনতা (সী. স্যা. কং. পী.)] – অযং, ভিক্খৰে, মিচ্ছাআজীৰো. কতমো চ, ভিক্খৰে, সম্মাআজীৰো? সম্মাআজীৰংপহং, ভিক্খৰে, দ্ৰাযং ৰদামি – অত্থি, ভিক্খৰে, সম্মাআজীৰো সাসৰো পুঞ্ঞভাগিযো উপধিৰেপক্কো; অত্থি, ভিক্খৰে, সম্মাআজীৰো অরিযো অনাসৰো লোকুত্তরো মগ্গঙ্গো. কতমো চ, ভিক্খৰে, সম্মাআজীৰো সাসৰো পুঞ্ঞভাগিযো উপধিৰেপক্কো? ইধ, ভিক্খৰে, অরিযসাৰকো মিচ্ছাআজীৰং পহায সম্মাআজীৰেন জীৰিকং কপ্পেতি – অযং, ভিক্খৰে, সম্মাআজীৰো সাসৰো পুঞ্ঞভাগিযো উপধিৰেপক্কো. কতমো চ, ভিক্খৰে, সম্মাআজীৰো অরিযো অনাসৰো লোকুত্তরো মগ্গঙ্গো? যা খো, ভিক্খৰে, অরিযচিত্তস্স অনাসৰচিত্তস্স অরিযমগ্গসমঙ্গিনো অরিযমগ্গং ভাৰযতো মিচ্ছাআজীৰা আরতি ৰিরতি পটিৰিরতি ৰেরমণী – অযং, ভিক্খৰে, সম্মাআজীৰো অরিযো অনাসৰো লোকুত্তরো মগ্গঙ্গো. সো মিচ্ছাআজীৰস্স পহানায ৰাযমতি, সম্মাআজীৰস্স উপসম্পদায; স্ৰাস্স হোতি সম্মাৰাযামো. সো সতো মিচ্ছাআজীৰং পজহতি, সতো সম্মাআজীৰং উপসম্পজ্জ ৰিহরতি; সাস্স হোতি সম্মাসতি. ইতিযিমে তযো ধম্মা সম্মাআজীৰং অনুপরিধাৰন্তি অনুপরিৰত্তন্তি, সেয্যথিদং – সম্মাদিট্ঠি, সম্মাৰাযামো, সম্মাসতি.

১৪১. ‘‘তত্র, ভিক্খৰে, সম্মাদিট্ঠি পুব্বঙ্গমা হোতি. কথঞ্চ, ভিক্খৰে, সম্মাদিট্ঠি পুব্বঙ্গমা হোতি? সম্মাদিট্ঠিস্স, ভিক্খৰে, সম্মাসঙ্কপ্পো পহোতি, সম্মাসঙ্কপ্পস্স সম্মাৰাচা পহোতি, সম্মাৰাচস্স সম্মাকম্মন্তো পহোতি, সম্মাকম্মন্তস্স সম্মাআজীৰো পহোতি, সম্মাআজীৰস্স সম্মাৰাযামো পহোতি, সম্মাৰাযামস্স সম্মাসতি পহোতি, সম্মাসতিস্স সম্মাসমাধি পহোতি, সম্মাসমাধিস্স সম্মাঞাণং পহোতি, সম্মাঞাণস্স সম্মাৰিমুত্তি পহোতি. ইতি খো, ভিক্খৰে, অট্ঠঙ্গসমন্নাগতো সেক্খো [অট্ঠঙ্গসমন্নাগতা সেখা পটিপদা (সী.), অট্ঠঙ্গসমন্নাগতো সেখো পাটিপদো (পী. ক.) ( ) নত্থি সী. স্যা. কং. পী. পোত্থকেসু], দসঙ্গসমন্নাগতো অরহা হোতি. (তত্রপি সম্মাঞাণেন অনেকে পাপকা অকুসলা ধম্মা ৰিগতা ভাৰনাপারিপূরিং গচ্ছন্তি).

১৪২. ‘‘তত্র, ভিক্খৰে, সম্মাদিট্ঠি পুব্বঙ্গমা হোতি. কথঞ্চ, ভিক্খৰে, সম্মাদিট্ঠি পুব্বঙ্গমা হোতি? সম্মাদিট্ঠিস্স, ভিক্খৰে, মিচ্ছাদিট্ঠি নিজ্জিণ্ণা হোতি. যে চ মিচ্ছাদিট্ঠিপচ্চযা অনেকে পাপকা অকুসলা ধম্মা সম্ভৰন্তি তে চস্স নিজ্জিণ্ণা হোন্তি. সম্মাদিট্ঠিপচ্চযা অনেকে কুসলা ধম্মা ভাৰনাপারিপূরিং গচ্ছন্তি. সম্মাসঙ্কপ্পস্স, ভিক্খৰে, মিচ্ছাসঙ্কপ্পো নিজ্জিণ্ণো হোতি…পে… সম্মাৰাচস্স, ভিক্খৰে, মিচ্ছাৰাচা নিজ্জিণ্ণা হোতি… সম্মাকম্মন্তস্স, ভিক্খৰে, মিচ্ছাকম্মন্তো নিজ্জিণ্ণো হোতি… সম্মাআজীৰস্স, ভিক্খৰে, মিচ্ছাআজীৰো নিজ্জিণ্ণো হোতি… সম্মাৰাযামস্স, ভিক্খৰে, মিচ্ছাৰাযামো নিজ্জিণ্ণো হোতি… সম্মাসতিস্স, ভিক্খৰে, মিচ্ছাসতি নিজ্জিণ্ণা হোতি… সম্মাসমাধিস্স, ভিক্খৰে, মিচ্ছাসমাধি নিজ্জিণ্ণো হোতি… সম্মাঞাণস্স, ভিক্খৰে, মিচ্ছাঞাণং নিজ্জিণ্ণং হোতি… সম্মাৰিমুত্তস্স, ভিক্খৰে, মিচ্ছাৰিমুত্তি নিজ্জিণ্ণা হোতি. যে চ মিচ্ছাৰিমুত্তিপচ্চযা অনেকে পাপকা অকুসলা ধম্মা সম্ভৰন্তি তে চস্স নিজ্জিণ্ণা হোন্তি. সম্মাৰিমুত্তিপচ্চযা চ অনেকে কুসলা ধম্মা ভাৰনাপারিপূরিং গচ্ছন্তি.

‘‘ইতি খো, ভিক্খৰে, ৰীসতি কুসলপক্খা, ৰীসতি অকুসলপক্খা – মহাচত্তারীসকো ধম্মপরিযাযো পৰত্তিতো অপ্পটিৰত্তিযো সমণেন ৰা ব্রাহ্মণেন ৰা দেৰেন ৰা মারেন ৰা ব্রহ্মুনা ৰা কেনচি ৰা লোকস্মিং.

১৪৩. ‘‘যো হি কোচি, ভিক্খৰে, সমণো ৰা ব্রাহ্মণো ৰা ইমং মহাচত্তারীসকং ধম্মপরিযাযং গরহিতব্বং পটিক্কোসিতব্বং মঞ্ঞেয্য তস্স দিট্ঠেৰ ধম্মে দসসহধম্মিকা ৰাদানুৰাদা গারয্হং ঠানং আগচ্ছন্তি – সম্মাদিট্ঠিং চে ভৰং গরহতি, যে চ মিচ্ছাদিট্ঠী সমণব্রাহ্মণা তে ভোতো পুজ্জা, তে ভোতো পাসংসা; সম্মাসঙ্কপ্পং চে ভৰং গরহতি, যে চ মিচ্ছাসঙ্কপ্পা সমণব্রাহ্মণা তে ভোতো পুজ্জা, তে ভোতো পাসংসা; সম্মাৰাচং চে ভৰং গরহতি…পে… সম্মাকম্মন্তং চে ভৰং গরহতি… সম্মাআজীৰং চে ভৰং গরহতি… সম্মাৰাযামং চে ভৰং গরহতি… সম্মাসতিং চে ভৰং গরহতি… সম্মাসমাধিং চে ভৰং গরহতি… সম্মাঞাণং চে ভৰং গরহতি … সম্মাৰিমুত্তিং চে ভৰং গরহতি, যে চ মিচ্ছাৰিমুত্তী সমণব্রাহ্মণা তে ভোতো পুজ্জা, তে ভোতো পাসংসা. যো কোচি, ভিক্খৰে, সমণো ৰা ব্রাহ্মণো ৰা ইমং মহাচত্তারীসকং ধম্মপরিযাযং গরহিতব্বং পটিক্কোসিতব্বং মঞ্ঞেয্য তস্স দিট্ঠেৰ ধম্মে ইমে দসসহধম্মিকা ৰাদানুৰাদা গারয্হং ঠানং আগচ্ছন্তি. যেপি তে, ভিক্খৰে, অহেসুং ওক্কলা ৰস্সভঞ্ঞা [ৰযভিঞ্ঞা (ক.) সং. নি. ৩.৬২; অ. নি. ৪.৩০ পস্সিতব্বং] অহেতুৰাদা অকিরিযৰাদা নত্থিকৰাদা তেপি মহাচত্তারীসকং ধম্মপরিযাযং ন গরহিতব্বং নপটিক্কোসিতব্বং অমঞ্ঞিংসু [মঞ্ঞেয্যুং (ক.)]. তং কিস্স হেতু? নিন্দাব্যারোসউপারম্ভভযা’’তি.

ইদমৰোচ ভগৰা. অত্তমনা তে ভিক্খূ ভগৰতো ভাসিতং অভিনন্দুন্তি.

মহাচত্তারীসকসুত্তং নিট্ঠিতং সত্তমং.