৪. ঘোটমুখসুত্তং

৪১২. এৰং মে সুতং – একং সমযং আযস্মা উদেনো বারাণসিযং ৰিহরতি খেমিযম্বৰনে. তেন খো পন সমযেন ঘোটমুখো ব্রাহ্মণো বারাণসিং অনুপ্পত্তো হোতি কেনচিদেৰ করণীযেন. অথ খো ঘোটমুখো ব্রাহ্মণো জঙ্ঘাৰিহারং অনুচঙ্কমমানো অনুৰিচরমানো যেন খেমিযম্বৰনং তেনুপসঙ্কমি. তেন খো পন সমযেন আযস্মা উদেনো অব্ভোকাসে চঙ্কমতি. অথ খো ঘোটমুখো ব্রাহ্মণো যেনাযস্মা উদেনো তেনুপসঙ্কমি; উপসঙ্কমিত্ৰা আযস্মতা উদেনেন সদ্ধিং সম্মোদি. সম্মোদনীযং কথং সারণীযং ৰীতিসারেত্ৰা আযস্মন্তং উদেনং চঙ্কমন্তং অনুচঙ্কমমানো এৰমাহ – ‘‘অম্ভো সমণ, ‘নত্থি ধম্মিকো পরিব্বজো’ [পরিব্বাজো (সী. পী.)] – এৰং মে এত্থ হোতি. তঞ্চ খো ভৰন্তরূপানং ৰা অদস্সনা, যো ৰা পনেত্থ ধম্মো’’তি.

এৰং ৰুত্তে, আযস্মা উদেনো চঙ্কমা ওরোহিত্ৰা ৰিহারং পৰিসিত্ৰা পঞ্ঞত্তে আসনে নিসীদি. ঘোটমুখোপি খো ব্রাহ্মণো চঙ্কমা ওরোহিত্ৰা ৰিহারং পৰিসিত্ৰা একমন্তং অট্ঠাসি. একমন্তং ঠিতং খো ঘোটমুখং ব্রাহ্মণং আযস্মা উদেনো এতদৰোচ – ‘‘সংৰিজ্জন্তি [সংৰিজ্জন্তে (বহূসু)] খো, ব্রাহ্মণ, আসনানি. সচে আকঙ্খসি, নিসীদা’’তি. ‘‘এতদেৰ খো পন মযং ভোতো উদেনস্স আগমযমানা (ন) নিসীদাম. কথঞ্হি নাম মাদিসো পুব্বে অনিমন্তিতো আসনে নিসীদিতব্বং মঞ্ঞেয্যা’’তি? অথ খো ঘোটমুখো ব্রাহ্মণো অঞ্ঞতরং নীচং আসনং গহেত্ৰা একমন্তং নিসীদি. একমন্তং নিসিন্নো খো ঘোটমুখো ব্রাহ্মণো আযস্মন্তং উদেনং এতদৰোচ – ‘‘অম্ভো সমণ, ‘নত্থি ধম্মিকো পরিব্বজো’ – এৰং মে এত্থ হোতি. তঞ্চ খো ভৰন্তরূপানং ৰা অদস্সনা, যো ৰা পনেত্থ ধম্মো’’তি. ‘‘সচে খো পন মে ত্ৰং, ব্রাহ্মণ, অনুঞ্ঞেয্যং অনুজানেয্যাসি, পটিক্কোসিতব্বঞ্চ পটিক্কোসেয্যাসি; যস্স চ পন মে ভাসিতস্স অত্থং ন জানেয্যাসি, মমংযেৰ তত্থ উত্তরি পটিপুচ্ছেয্যাসি – ‘ইদং, ভো উদেন, কথং, ইমস্স ক্ৰত্থো’তি? এৰং কত্ৰা সিযা নো এত্থ কথাসল্লাপো’’তি. ‘‘অনুঞ্ঞেয্যং খ্ৰাহং ভোতো উদেনস্স অনুজানিস্সামি, পটিক্কোসিতব্বঞ্চ পটিক্কোসিস্সামি; যস্স চ পনাহং ভোতো উদেনস্স ভাসিতস্স অত্থং ন জানিস্সামি, ভৰন্তংযেৰ তত্থ উদেনং উত্তরি পটিপুচ্ছিস্সামি – ‘ইদং, ভো উদেন, কথং, ইমস্স ক্ৰত্থো’তি? এৰং কত্ৰা হোতু নো এত্থ কথাসল্লাপো’’তি.

৪১৩. ‘‘চত্তারোমে, ব্রাহ্মণ, পুগ্গলা সন্তো সংৰিজ্জমানা লোকস্মিং. কতমে চত্তারো? ইধ, ব্রাহ্মণ, একচ্চো পুগ্গলো অত্তন্তপো হোতি অত্তপরিতাপনানুযোগমনুযুত্তো. ইধ পন, ব্রাহ্মণ, একচ্চো পুগ্গলো পরন্তপো হোতি পরপরিতাপনানুযোগমনুযুত্তো. ইধ পন, ব্রাহ্মণ, একচ্চো পুগ্গলো অত্তন্তপো চ হোতি অত্তপরিতাপনানুযোগমনুযুত্তো পরন্তপো চ পরপরিতাপনানুযোগমনুযুত্তো. ইধ পন, ব্রাহ্মণ, একচ্চো পুগ্গলো নেৰত্তন্তপো হোতি নাত্তপরিতাপনানুযোগমনুযুত্তো, ন পরন্তপো ন পরপরিতাপনানুযোগমনুযুত্তো. সো অনত্তন্তপো অপরন্তপো দিট্ঠেৰ ধম্মে নিচ্ছাতো নিব্বুতো সীতীভূতো সুখপ্পটিসংৰেদী ব্রহ্মভূতেন অত্তনা ৰিহরতি. ইমেসং, ব্রাহ্মণ, চতুন্নং পুগ্গলানং কতমো তে পুগ্গলো চিত্তং আরাধেতী’’তি?

‘‘য্ৰাযং, ভো উদেন, পুগ্গলো অত্তন্তপো অত্তপরিতাপনানুযোগমনুযুত্তো অযং মে পুগ্গলো চিত্তং নারাধেতি; যোপাযং, ভো উদেন, পুগ্গলো পরন্তপো পরপরিতাপনানুযোগমনুযুত্তো অযম্পি মে পুগ্গলো চিত্তং নারাধেতি; যোপাযং, ভো উদেন, পুগ্গলো অত্তন্তপো চ অত্তপরিতাপনানুযোগমনুযুত্তো পরন্তপো চ পরপরিতাপনানুযোগমনুযুত্তো অযম্পি মে পুগ্গলো চিত্তং নারাধেতি; যো চ খো অযং, ভো উদেন, পুগ্গলো নেৰত্তন্তপো নাত্তপরিতাপনানুযোগমনুযুত্তো ন পরন্তপো ন পরপরিতাপনানুযোগমনুযুত্তো সো অনত্তন্তপো অপরন্তপো দিট্ঠেৰ ধম্মে নিচ্ছাতো নিব্বুতো সীতীভূতো সুখপ্পটিসংৰেদী ব্রহ্মভূতেন অত্তনা ৰিহরতি. অযমেৰ মে পুগ্গলো চিত্তং আরাধেতী’’তি.

‘‘কস্মা পন তে, ব্রাহ্মণ, ইমে তযো পুগ্গলা চিত্তং নারাধেন্তী’’তি? ‘‘য্ৰাযং, ভো উদেন, পুগ্গলো অত্তন্তপো অত্তপরিতাপনানুযোগমনুযুত্তো সো অত্তানং সুখকামং দুক্খপটিক্কূলং আতাপেতি পরিতাপেতি; ইমিনা মে অযং পুগ্গলো চিত্তং নারাধেতি. যোপাযং, ভো উদেন, পুগ্গলো পরন্তপো পরপরিতাপনানুযোগমনুযুত্তো সো পরং সুখকামং দুক্খপটিক্কূলং আতাপেতি পরিতাপেতি; ইমিনা মে অযং পুগ্গলো চিত্তং নারাধেতি. যোপাযং, ভো উদেন, পুগ্গলো অত্তন্তপো চ অত্তপরিতাপনানুযোগমনুযুত্তো পরন্তপো চ পরপরিতাপনানুযোগমনুযুত্তো সো অত্তানঞ্চ পরঞ্চ সুখকামং দুক্খপটিক্কূলং আতাপেতি পরিতাপেতি; ইমিনা মে অযং পুগ্গলো চিত্তং নারাধেতি. যো চ খো অযং, ভো উদেন, পুগ্গলো নেৰত্তন্তপো নাত্তপরিতাপনানুযোগমনুযুত্তো ন পরন্তপো ন পরপরিতাপনানুযোগমনুযুত্তো সো অনত্তন্তপো অপরন্তপো দিট্ঠেৰ ধম্মে নিচ্ছাতো নিব্বুতো সীতীভূতো সুখপ্পটিসংৰেদী ব্রহ্মভূতেন অত্তনা ৰিহরতি, সো অত্তানঞ্চ পরঞ্চ সুখকামং দুক্খপটিক্কূলং নেৰ আতাপেতি ন পরিতাপেতি; ইমিনা মে অযং পুগ্গলো চিত্তং আরাধেতী’’তি.

৪১৪. ‘‘দ্ৰেমা, ব্রাহ্মণ, পরিসা. কতমা দ্ৰে? ইধ, ব্রাহ্মণ, একচ্চা পরিসা সারত্তরত্তা মণিকুণ্ডলেসু পুত্তভরিযং পরিযেসতি, দাসিদাসং পরিযেসতি, খেত্তৰত্থুং পরিযেসতি, জাতরূপরজতং পরিযেসতি.

‘‘ইধ পন, ব্রাহ্মণ, একচ্চা পরিসা অসারত্তরত্তা মণিকুণ্ডলেসু পুত্তভরিযং পহায, দাসিদাসং পহায, খেত্তৰত্থুং পহায, জাতরূপরজতং পহায, অগারস্মা অনগারিযং পব্বজিতা. স্ৰাযং, ব্রাহ্মণ, পুগ্গলো নেৰত্তন্তপো নাত্তপরিতাপনানুযোগমনুযুত্তো ন পরন্তপো ন পরপরিতাপনানুযোগমনুযুত্তো. সো অনত্তন্তপো অপরন্তপো দিট্ঠেৰ ধম্মে নিচ্ছাতো নিব্বুতো সীতীভূতো সুখপ্পটিসংৰেদী ব্রহ্মভূতেন অত্তনা ৰিহরতি. ইধ কতমং ত্ৰং, ব্রাহ্মণ, পুগ্গলং কতমায পরিসায বহুলং সমনুপস্সসি – যা চাযং পরিসা সারত্তরত্তা মণিকুণ্ডলেসু পুত্তভরিযং পরিযেসতি দাসিদাসং পরিযেসতি খেত্তৰত্থুং পরিযেসতি জাতরূপরজতং পরিযেসতি, যা চাযং পরিসা অসারত্তরত্তা মণিকুণ্ডলেসু পুত্তভরিযং পহায দাসিদাসং পহায খেত্তৰত্থুং পহায জাতরূপরজতং পহায অগারস্মা অনগারিযং পব্বজিতা’’তি?

‘‘য্ৰাযং, ভো উদেন, পুগ্গলো নেৰত্তন্তপো নাত্তপরিতাপনানুযোগমনুযুত্তো ন পরন্তপো ন পরপরিতাপনানুযোগমনুযুত্তো সো অনত্তন্তপো অপরন্তপো দিট্ঠেৰ ধম্মে নিচ্ছাতো নিব্বুতো সীতীভূতো সুখপ্পটিসংৰেদী ব্রহ্মভূতেন অত্তনা ৰিহরতি; ইমাহং পুগ্গলং যাযং পরিসা অসারত্তরত্তা মণিকুণ্ডলেসু পুত্তভরিযং পহায দাসিদাসং পহায খেত্তৰত্থুং পহায জাতরূপরজতং পহায অগারস্মা অনগারিযং পব্বজিতা ইমিস্সং পরিসাযং বহুলং সমনুপস্সামী’’তি.

‘‘ইদানেৰ খো পন তে, ব্রাহ্মণ, ভাসিতং – ‘মযং এৰং আজানাম – অম্ভো সমণ, নত্থি ধম্মিকো পরিব্বজো, এৰং মে এত্থ হোতি. তঞ্চ খো ভৰন্তরূপানং ৰা অদস্সনা, যো ৰা পনেত্থ ধম্মো’’’তি. ‘‘অদ্ধা মেসা, ভো উদেন, সানুগ্গহা ৰাচা ভাসিতা. ‘অত্থি ধম্মিকো পরিব্বজো’ – এৰং মে এত্থ হোতি. এৰঞ্চ পন মং ভৰং উদেনো ধারেতু. যে চ মে ভোতা উদেনেন চত্তারো পুগ্গলা সংখিত্তেন ৰুত্তা ৰিত্থারেন অৰিভত্তা, সাধু মে ভৰং, উদেনো ইমে চত্তারো পুগ্গলে ৰিত্থারেন ৰিভজতু অনুকম্পং উপাদাযা’’তি. ‘‘তেন হি, ব্রাহ্মণ, সুণাহি, সাধুকং মনসি করোহি, ভাসিস্সামী’’তি. ‘‘এৰং, ভো’’তি খো ঘোটমুখো ব্রাহ্মণো আযস্মতো উদেনস্স পচ্চস্সোসি. আযস্মা উদেনো এতদৰোচ –

৪১৫. ‘‘কতমো চ, ব্রাহ্মণ, পুগ্গলো অত্তন্তপো অত্তপরিতাপনানুযোগমনুযুত্তো? ইধ, ব্রাহ্মণ, একচ্চো পুগ্গলো অচেলকো হোতি মুত্তাচারো হত্থাপলেখনো নএহিভদ্দন্তিকো নতিট্ঠভদ্দন্তিকো, নাভিহটং ন উদ্দিস্সকতং ন নিমন্তনং সাদিযতি. সো ন কুম্ভিমুখা পটিগ্গণ্হাতি, ন কল়োপিমুখা পটিগ্গণ্হাতি, ন এল়কমন্তরং, ন দণ্ডমন্তরং, ন মুসলমন্তরং, ন দ্ৰিন্নং ভুঞ্জমানানং, ন গব্ভিনিযা, ন পাযমানায, ন পুরিসন্তরগতায, ন সঙ্কিত্তীসু, ন যত্থ সা উপট্ঠিতো হোতি, ন যত্থ মক্খিকা সণ্ডসণ্ডচারিনী, ন মচ্ছং ন মংসং, ন সুরং ন মেরযং ন থুসোদকং পিৰতি. সো একাগারিকো ৰা হোতি একালোপিকো, দ্ৰাগারিকো ৰা হোতি দ্ৰালোপিকো…পে… সত্তাগারিকো ৰা হোতি সত্তালোপিকো; একিস্সাপি দত্তিযা যাপেতি, দ্ৰীহিপি দত্তীহি যাপেতি…পে… সত্তহিপি দত্তীহি যাপেতি; একাহিকম্পি আহারং আহারেতি, দ্ৰীহিকম্পি আহারং আহারেতি…পে… সত্তাহিকম্পি আহারং আহারেতি – ইতি এৰরূপং অদ্ধমাসিকং পরিযাযভত্তভোজনানুযোগমনুযুত্তো ৰিহরতি. সো সাকভক্খো ৰা হোতি, সামাকভক্খো ৰা হোতি, নীৰারভক্খো ৰা হোতি, দদ্দুলভক্খো ৰা হোতি, হটভক্খো ৰা হোতি, কণভক্খো ৰা হোতি, আচামভক্খো ৰা হোতি, পিঞ্ঞাকভক্খো ৰা হোতি, তিণভক্খো ৰা হোতি, গোমযভক্খো ৰা হোতি, ৰনমূলফলাহারো যাপেতি পৰত্তফলভোজী. সো সাণানিপি ধারেতি, মসাণানিপি ধারেতি, ছৰদুস্সানিপি ধারেতি, পংসুকূলানিপি ধারেতি, তিরীটানিপি ধারেতি, অজিনম্পি ধারেতি, অজিনক্খিপম্পি ধারেতি, কুসচীরম্পি ধারেতি, ৰাকচীরম্পি ধারেতি, ফলকচীরম্পি ধারেতি, কেসকম্বলম্পি ধারেতি, ৰাল়কম্বলম্পি ধারেতি, উলূকপক্খম্পি ধারেতি; কেসমস্সুলোচকোপি হোতি কেসমস্সুলোচনানুযোগমনুযুত্তো, উব্ভট্ঠকোপি হোতি আসনপটিক্খিত্তো, উক্কুটিকোপি হোতি উক্কুটিকপ্পধানমনুযুত্তো, কণ্টকাপস্সযিকোপি হোতি কণ্টকাপস্সযে সেয্যং কপ্পেতি; সাযততিযকম্পি উদকোরোহনানুযোগমনুযুত্তো ৰিহরতি – ইতি এৰরূপং অনেকৰিহিতং কাযস্স আতাপনপরিতাপনানুযোগমনুযুত্তো ৰিহরতি. অযং ৰুচ্চতি, ব্রাহ্মণ, পুগ্গলো অত্তন্তপো অত্তপরিতাপনানুযোগমনুযুত্তো.

৪১৬. ‘‘কতমো চ, ব্রাহ্মণ, পুগ্গলো পরন্তপো পরপরিতাপনানুযোগমনুযুত্তো? ইধ, ব্রাহ্মণ, একচ্চো পুগ্গলো ওরব্ভিকো হোতি সূকরিকো সাকুণিকো মাগৰিকো লুদ্দো মচ্ছঘাতকো চোরো চোরঘাতকো গোঘাতকো বন্ধনাগারিকো – যে ৰা পনঞ্ঞেপি কেচি কুরূরকম্মন্তা. অযং ৰুচ্চতি, ব্রাহ্মণ, পুগ্গলো পরন্তপো পরপরিতাপনানুযোগমনুযুত্তো.

৪১৭. ‘‘কতমো চ, ব্রাহ্মণ, পুগ্গলো অত্তন্তপো চ অত্তপরিতাপনানুযোগমনুযুত্তো, পরন্তপো চ পরপরিতাপনানুযোগমনুযুত্তো? ইধ, ব্রাহ্মণ, একচ্চো পুগ্গলো রাজা ৰা হোতি খত্তিযো মুদ্ধাৰসিত্তো, ব্রাহ্মণো ৰা মহাসালো. সো পুরত্থিমেন নগরস্স নৰং সন্থাগারং কারাপেত্ৰা কেসমস্সুং ওহারেত্ৰা খরাজিনং নিৰাসেত্ৰা সপ্পিতেলেন কাযং অব্ভঞ্জিত্ৰা মগৰিসাণেন পিট্ঠিং কণ্ডুৰমানো নৰং সন্থাগারং পৰিসতি সদ্ধিং মহেসিযা ব্রাহ্মণেন চ পুরোহিতেন. সো তত্থ অনন্তরহিতায ভূমিযা হরিতুপলিত্তায সেয্যং কপ্পেতি. একিস্সায গাৰিযা সরূপৰচ্ছায যং একস্মিং থনে খীরং হোতি তেন রাজা যাপেতি, যং দুতিযস্মিং থনে খীরং হোতি তেন মহেসী যাপেতি, যং ততিযস্মিং থনে খীরং হোতি তেন ব্রাহ্মণো পুরোহিতো যাপেতি, যং চতুত্থস্মিং থনে খীরং হোতি তেন অগ্গিং জুহতি, অৰসেসেন ৰচ্ছকো যাপেতি. সো এৰমাহ – ‘এত্তকা উসভা হঞ্ঞন্তু যঞ্ঞত্থায, এত্তকা ৰচ্ছতরা হঞ্ঞন্তু যঞ্ঞত্থায, এত্তকা ৰচ্ছতরিযো হঞ্ঞন্তু যঞ্ঞত্থায, এত্তকা অজা হঞ্ঞন্তু যঞ্ঞত্থায’, এত্তকা উরব্ভা হঞ্ঞন্তু যঞ্ঞত্থায, এত্তকা অস্সা হঞ্ঞন্তু যঞ্ঞত্থায, এত্তকা রুক্খা ছিজ্জন্তু যূপত্থায, এত্তকা দব্ভা লূযন্তু বরিহিসত্থাযা’তি. যেপিস্স তে হোন্তি ‘দাসা’তি ৰা ‘পেস্সা’তি ৰা ‘কম্মকরা’তি ৰা তেপি দণ্ডতজ্জিতা ভযতজ্জিতা অস্সুমুখা রুদমানা পরিকম্মানি করোন্তি. অযং ৰুচ্চতি, ব্রাহ্মণ, পুগ্গলো অত্তন্তপো চ অত্তপরিতাপনানুযোগমনুযুত্তো, পরন্তপো চ পরপরিতাপনানুযোগমনুযুত্তো.

৪১৮. ‘‘কতমো চ, ব্রাহ্মণ, পুগ্গলো নেৰত্তন্তপো নাত্তপরিতাপনানুযোগমনুযুত্তো, ন পরন্তপো ন পরপরিতাপনানুযোগমনুযুত্তো; সো অনত্তন্তপো অপরন্তপো দিট্ঠেৰ ধম্মে নিচ্ছাতো নিব্বুতো সীতীভূতো সুখপ্পটিসংৰেদী ব্রহ্মভূতেন অত্তনা ৰিহরতি? ইধ, ব্রাহ্মণ, তথাগতো লোকে উপ্পজ্জতি অরহং সম্মাসম্বুদ্ধো ৰিজ্জাচরণসম্পন্নো সুগতো লোকৰিদূ অনুত্তরো পুরিসদম্মসারথি সত্থা দেৰমনুস্সানং বুদ্ধো ভগৰা. সো ইমং লোকং সদেৰকং সমারকং সব্রহ্মকং সস্সমণব্রাহ্মণিং পজং সদেৰমনুস্সং সযং অভিঞ্ঞা সচ্ছিকত্ৰা পৰেদেতি. সো ধম্মং দেসেতি আদিকল্যাণং মজ্ঝেকল্যাণং পরিযোসানকল্যাণং সাত্থং সব্যঞ্জনং, কেৰলপরিপুণ্ণং পরিসুদ্ধং ব্রহ্মচরিযং পকাসেতি. তং ধম্মং সুণাতি গহপতি ৰা গহপতিপুত্তো ৰা অঞ্ঞতরস্মিং ৰা কুলে পচ্চাজাতো. সো তং ধম্মং সুত্ৰা তথাগতে সদ্ধং পটিলভতি. সো তেন সদ্ধাপটিলাভেন সমন্নাগতো ইতি পটিসঞ্চিক্খতি – ‘সম্বাধো ঘরাৰাসো রজোপথো অব্ভোকাসো পব্বজ্জা. নযিদং সুকরং অগারং অজ্ঝাৰসতা একন্তপরিপুণ্ণং একন্তপরিসুদ্ধং সঙ্খলিখিতং ব্রহ্মচরিযং চরিতুং. যংনূনাহং কেসমস্সুং ওহারেত্ৰা কাসাযানি ৰত্থানি অচ্ছাদেত্ৰা অগারস্মা অনগারিযং পব্বজেয্য’ন্তি. সো অপরেন সমযেন অপ্পং ৰা ভোগক্খন্ধং পহায মহন্তং ৰা ভোগক্খন্ধং পহায, অপ্পং ৰা ঞাতিপরিৰট্টং পহায মহন্তং ৰা ঞাতিপরিৰট্টং পহায, কেসমস্সুং ওহারেত্ৰা কাসাযানি ৰত্থানি অচ্ছাদেত্ৰা অগারস্মা অনগারিযং পব্বজতি. সো এৰং পব্বজিতো সমানো ভিক্খূনং সিক্খাসাজীৰসমাপন্নো পাণাতিপাতং পহায পাণাতিপাতা পটিৰিরতো হোতি, নিহিতদণ্ডো নিহিতসত্থো লজ্জী দযাপন্নো সব্বপাণভূতহিতানুকম্পী ৰিহরতি.

‘‘অদিন্নাদানং পহায অদিন্নাদানা পটিৰিরতো হোতি দিন্নাদাযী দিন্নপাটিকঙ্খী. অথেনেন সুচিভূতেন অত্তনা ৰিহরতি.

‘‘অব্রহ্মচরিযং পহায ব্রহ্মচারী হোতি আরাচারী ৰিরতো মেথুনা গামধম্মা.

‘‘মুসাৰাদং পহায মুসাৰাদা পটিৰিরতো হোতি সচ্চৰাদী সচ্চসন্ধো থেতো পচ্চযিকো অৰিসংৰাদকো লোকস্স.

‘‘পিসুণং ৰাচং পহায পিসুণায ৰাচায পটিৰিরতো হোতি; ইতো সুত্ৰা ন অমুত্র অক্খাতা ইমেসং ভেদায, অমুত্র ৰা সুত্ৰা ন ইমেসং অক্খাতা অমূসং ভেদায. ইতি ভিন্নানং ৰা সন্ধাতা সহিতানং ৰা অনুপ্পদাতা, সমগ্গারামো সমগ্গরতো সমগ্গনন্দী সমগ্গকরণিং ৰাচং ভাসিতা হোতি.

‘‘ফরুসং ৰাচং পহায ফরুসায ৰাচায পটিৰিরতো হোতি. যা সা ৰাচা নেলা কণ্ণসুখা পেমনীযা হদযঙ্গমা পোরী বহুজনকন্তা বহুজনমনাপা তথারূপিং ৰাচং ভাসিতা হোতি.

‘‘সম্ফপ্পলাপং পহায সম্ফপ্পলাপা পটিৰিরতো হোতি, কালৰাদী ভূতৰাদী অত্থৰাদী ধম্মৰাদী ৰিনযৰাদী, নিধানৰতিং ৰাচং ভাসিতা কালেন সাপদেসং পরিযন্তৰতিং অত্থসংহিতং.

‘‘সো বীজগামভূতগামসমারম্ভা পটিৰিরতো হোতি. একভত্তিকো হোতি রত্তূপরতো ৰিরতো ৰিকালভোজনা. নচ্চগীতৰাদিতৰিসূকদস্সনা পটিৰিরতো হোতি. মালাগন্ধৰিলেপনধারণমণ্ডনৰিভূসনট্ঠানা পটিৰিরতো হোতি. উচ্চাসযনমহাসযনা পটিৰিরতো হোতি. জাতরূপরজতপটিগ্গহণা পটিৰিরতো হোতি. আমকধঞ্ঞপটিগ্গহণা পটিৰিরতো হোতি. আমকমংসপটিগ্গহণা পটিৰিরতো হোতি. ইত্থিকুমারিকপটিগ্গহণা পটিৰিরতো হোতি. দাসিদাসপটিগ্গহণা পটিৰিরতো হোতি. অজেল়কপটিগ্গহণা পটিৰিরতো হোতি. কুক্কুটসূকরপটিগ্গহণা পটিৰিরতো হোতি. হত্থিগৰস্সৰল়ৰপটিগ্গহণা পটিৰিরতো হোতি. খেত্তৰত্থুপটিগ্গহণা পটিৰিরতো হোতি. দূতেয্যপহিণগমনানুযোগা পটিৰিরতো হোতি. কযৰিক্কযা পটিৰিরতো হোতি. তুলাকূটকংসকূটমানকূটা পটিৰিরতো হোতি. উক্কোটনৰঞ্চননিকতিসাচিযোগা পটিৰিরতো হোতি. ছেদনৰধবন্ধনৰিপরামোসআলোপসহসাকারা পটিৰিরতো হোতি.

‘‘সো সন্তুট্ঠো হোতি কাযপরিহারিকেন চীৰরেন, কুচ্ছিপরিহারিকেন পিণ্ডপাতেন. সো যেন যেনেৰ পক্কমতি সমাদাযেৰ পক্কমতি. সেয্যথাপি নাম পক্খী সকুণো যেন যেনেৰ ডেতি সপত্তভারোৰ ডেতি, এৰমেৰ ভিক্খু সন্তুট্ঠো হোতি কাযপরিহারিকেন চীৰরেন, কুচ্ছিপরিহারিকেন পিণ্ডপাতেন. সো যেন যেনেৰ পক্কমতি সমাদাযেৰ পক্কমতি. সো ইমিনা অরিযেন সীলক্খন্ধেন সমন্নাগতো অজ্ঝত্তং অনৰজ্জসুখং পটিসংৰেদেতি.

৪১৯. ‘‘সো চক্খুনা রূপং দিস্ৰা ন নিমিত্তগ্গাহী হোতি নানুব্যঞ্জনগ্গাহী. যত্ৰাধিকরণমেনং চক্খুন্দ্রিযং অসংৰুতং ৰিহরন্তং অভিজ্ঝাদোমনস্সা পাপকা অকুসলা ধম্মা অন্ৰাস্সৰেয্যুং তস্স সংৰরায পটিপজ্জতি, রক্খতি চক্খুন্দ্রিযং, চক্খুন্দ্রিযে সংৰরং আপজ্জতি. সোতেন সদ্দং সুত্ৰা…পে… ঘানেন গন্ধং ঘাযিত্ৰা… জিৰ্হায রসং সাযিত্ৰা… কাযেন ফোট্ঠব্বং ফুসিত্ৰা… মনসা ধম্মং ৰিঞ্ঞাযন ন নিমিত্তগ্গাহী হোতি নানুব্যঞ্জনগ্গাহী. যত্ৰাধিকরণমেনং মনিন্দ্রিযং অসংৰুতং ৰিহরন্তং অভিজ্ঝাদোমনস্সা পাপকা অকুসলা ধম্মা অন্ৰাস্সৰেয্যুং তস্স সংৰরায পটিপজ্জতি, রক্খতি মনিন্দ্রিযং, মনিন্দ্রিযে সংৰরং আপজ্জতি. সো ইমিনা অরিযেন ইন্দ্রিযসংৰরেন সমন্নাগতো অজ্ঝত্তং অব্যাসেকসুখং পটিসংৰেদেতি.

‘‘সো অভিক্কন্তে পটিক্কন্তে সম্পজানকারী হোতি, আলোকিতে ৰিলোকিতে সম্পজানকারী হোতি, সমিঞ্জিতে পসারিতে সম্পজানকারী হোতি, সঙ্ঘাটিপত্তচীৰরধারণে সম্পজানকারী হোতি, অসিতে পীতে খাযিতে সাযিতে সম্পজানকারী হোতি, উচ্চারপস্সাৰকম্মে সম্পজানকারী হোতি, গতে ঠিতে নিসিন্নে সুত্তে জাগরিতে ভাসিতে তুণ্হীভাৰে সম্পজানকারী হোতি.

‘‘সো ইমিনা চ অরিযেন সীলক্খন্ধেন সমন্নাগতো, (ইমায চ অরিযায সন্তুট্ঠিযা সমন্নাগতো,) [পস্স ম. নি. ১.২৯৬] ইমিনা চ অরিযেন ইন্দ্রিযসংৰরেন সমন্নাগতো, ইমিনা চ অরিযেন সতিসম্পজঞ্ঞেন সমন্নাগতো ৰিৰিত্তং সেনাসনং ভজতি অরঞ্ঞং রুক্খমূলং পব্বতং কন্দরং গিরিগুহং সুসানং ৰনপত্থং অব্ভোকাসং পলালপুঞ্জং. সো পচ্ছাভত্তং পিণ্ডপাতপটিক্কন্তো নিসীদতি পল্লঙ্কং আভুজিত্ৰা, উজুং কাযং পণিধায, পরিমুখং সতিং উপট্ঠপেত্ৰা. সো অভিজ্ঝং লোকে পহায ৰিগতাভিজ্ঝেন চেতসা ৰিহরতি, অভিজ্ঝায চিত্তং পরিসোধেতি; ব্যাপাদপদোসং পহায অব্যাপন্নচিত্তো ৰিহরতি সব্বপাণভূতহিতানুকম্পী, ব্যাপাদপদোসা চিত্তং পরিসোধেতি; থিনমিদ্ধং পহায ৰিগতথীনমিদ্ধো ৰিহরতি আলোকসঞ্ঞী সতো সম্পজানো, থীনমিদ্ধা চিত্তং পরিসোধেতি; উদ্ধচ্চকুক্কুচ্চং পহায অনুদ্ধতো ৰিহরতি অজ্ঝত্তং ৰূপসন্তচিত্তো, উদ্ধচ্চকুক্কুচ্চা চিত্তং পরিসোধেতি; ৰিচিকিচ্ছং পহায তিণ্ণৰিচিকিচ্ছো ৰিহরতি অকথংকথী কুসলেসু ধম্মেসু, ৰিচিকিচ্ছায চিত্তং পরিসোধেতি.

‘‘সো ইমে পঞ্চ নীৰরণে পহায চেতসো উপক্কিলেসে পঞ্ঞায দুব্বলীকরণে ৰিৰিচ্চেৰ কামেহি ৰিৰিচ্চ অকুসলেহি ধম্মেহি সৰিতক্কং সৰিচারং ৰিৰেকজং পীতিসুখং পঠমং ঝানং উপসম্পজ্জ ৰিহরতি. ৰিতক্কৰিচারানং ৰূপসমা অজ্ঝত্তং সম্পসাদনং চেতসো একোদিভাৰং অৰিতক্কং অৰিচারং সমাধিজং পীতিসুখং দুতিযং ঝানং উপসম্পজ্জ ৰিহরতি. পীতিযা চ ৰিরাগা উপেক্খকো চ ৰিহরতি সতো চ সম্পজানো, সুখঞ্চ কাযেন পটিসংৰেদেতি, যং তং অরিযা আচিক্খন্তি – ‘উপেক্খকো সতিমা সুখৰিহারী’তি ততিযং ঝানং উপসম্পজ্জ ৰিহরতি. সুখস্স চ পহানা দুক্খস্স চ পহানা, পুব্বেৰ সোমনস্সদোমনস্সানং অত্থঙ্গমা, অদুক্খমসুখং উপেক্খাসতিপারিসুদ্ধিং চতুত্থং ঝানং উপসম্পজ্জ ৰিহরতি.

৪২০. ‘‘সো এৰং সমাহিতে চিত্তে পরিসুদ্ধে পরিযোদাতে অনঙ্গণে ৰিগতূপক্কিলেসে মুদুভূতে কম্মনিযে ঠিতে আনেঞ্জপ্পত্তে পুব্বেনিৰাসানুস্সতিঞাণায চিত্তং অভিনিন্নামেতি. সো অনেকৰিহিতং পুব্বেনিৰাসং অনুস্সরতি, সেয্যথিদং – একম্পি জাতিং দ্ৰেপি জাতিযো তিস্সোপি জাতিযো চতস্সোপি জাতিযো পঞ্চপি জাতিযো দসপি জাতিযো ৰীসম্পি জাতিযো তিংসম্পি জাতিযো চত্তালীসম্পি জাতিযো পঞ্ঞাসম্পি জাতিযো জাতিসতম্পি জাতিসহস্সম্পি জাতিসতসহস্সম্পি, অনেকেপি সংৰট্টকপ্পে অনেকেপি ৰিৰট্টকপ্পে অনেকেপি সংৰট্টৰিৰট্টকপ্পে – ‘অমুত্রাসিং এৰংনামো এৰংগোত্তো এৰংৰণ্ণো এৰমাহারো এৰংসুখদুক্খপ্পটিসংৰেদী এৰমাযুপরিযন্তো; সো ততো চুতো অমুত্র উদপাদিং; তত্রাপাসিং এৰংনামো এৰংগোত্তো এৰংৰণ্ণো এৰমাহারো এৰংসুখদুক্খপ্পটিসংৰেদী এৰমাযুপরিযন্তো; সো ততো চুতো ইধূপপন্নো’তি. ইতি সাকারং সউদ্দেসং অনেকৰিহিতং পুব্বেনিৰাসং অনুস্সরতি.

‘‘সো এৰং সমাহিতে চিত্তে পরিসুদ্ধে পরিযোদাতে অনঙ্গণে ৰিগতূপক্কিলেসে মুদুভূতে কম্মনিযে ঠিতে আনেঞ্জপ্পত্তে সত্তানং চুতূপপাতঞাণায চিত্তং অভিনিন্নামেতি. সো দিব্বেন চক্খুনা ৰিসুদ্ধেন অতিক্কন্তমানুসকেন সত্তে পস্সতি চৰমানে উপপজ্জমানে হীনে পণীতে সুৰণ্ণে দুব্বণ্ণে সুগতে দুগ্গতে যথাকম্মূপগে সত্তে পজানাতি – ‘ইমে ৰত ভোন্তো সত্তা কাযদুচ্চরিতেন সমন্নাগতা…পে… অরিযানং উপৰাদকা মিচ্ছাদিট্ঠিকা মিচ্ছাদিট্ঠিকম্মসমাদানা, তে কাযস্স ভেদা পরং মরণা অপাযং দুগ্গতিং ৰিনিপাতং নিরযং উপপন্না. ইমে ৰা পন ভোন্তো সত্তা কাযসুচরিতেন সমন্নাগতা…পে… অরিযানং অনুপৰাদকা সম্মাদিট্ঠিকা সম্মাদিট্ঠিকম্মসমাদানা, তে কাযস্স ভেদা পরং মরণা সুগতিং সগ্গং লোকং উপপন্না’তি. ইতি দিব্বেন চক্খুনা ৰিসুদ্ধেন অতিক্কন্তমানুসকেন সত্তে পস্সতি চৰমানে উপপজ্জমানে হীনে পণীতে সুৰণ্ণে দুব্বণ্ণে সুগতে দুগ্গতে যথাকম্মূপগে সত্তে পজানাতি.

‘‘সো এৰং সমাহিতে চিত্তে পরিসুদ্ধে পরিযোদাতে অনঙ্গণে ৰিগতূপক্কিলেসে মুদুভূতে কম্মনিযে ঠিতে আনেঞ্জপ্পত্তে আসৰানং খযঞাণায চিত্তং অভিনিন্নামেতি. সো ‘ইদং দুক্খ’ন্তি যথাভূতং পজানাতি, ‘অযং দুক্খসমুদযো’তি যথাভূতং পজানাতি, ‘অযং দুক্খনিরোধো’তি যথাভূতং পজানাতি, ‘অযং দুক্খনিরোধগামিনী পটিপদা’তি যথাভূতং পজানাতি; ‘ইমে আসৰা’তি যথাভূতং পজানাতি, ‘অযং আসৰসমুদযো’তি যথাভূতং পজানাতি, ‘অযং আসৰনিরোধো’তি যথাভূতং পজানাতি, ‘অযং আসৰনিরোধগামিনী পটিপদা’তি যথাভূতং পজানাতি. তস্স এৰং জানতো এৰং পস্সতো কামাসৰাপি চিত্তং ৰিমুচ্চতি, ভৰাসৰাপি চিত্তং ৰিমুচ্চতি, অৰিজ্জাসৰাপি চিত্তং ৰিমুচ্চতি. ৰিমুত্তস্মিং ৰিমুত্তমিতি ঞাণং হোতি. ‘খীণা জাতি, ৰুসিতং ব্রহ্মচরিযং, কতং করণীযং, নাপরং ইত্থত্তাযা’তি পজানাতি.

‘‘অযং ৰুচ্চতি, ব্রাহ্মণ, পুগ্গলো নেৰত্তন্তপো নাত্তপরিতাপনানুযোগমনুযুত্তো, ন পরন্তপো ন পরপরিতাপনানুযোগমনুযুত্তো. সো অনত্তন্তপো অপরন্তপো দিট্ঠেৰ ধম্মে নিচ্ছাতো নিব্বুতো সীতীভূতো সুখপ্পটিসংৰেদী ব্রহ্মভূতেন অত্তনা ৰিহরতী’’তি.

৪২১. এৰং ৰুত্তে, ঘোটমুখো ব্রাহ্মণো আযস্মন্তং উদেনং এতদৰোচ – ‘‘অভিক্কন্তং, ভো উদেন, অভিক্কন্তং, ভো উদেন! সেয্যথাপি, ভো উদেন, নিক্কুজ্জিতং ৰা উক্কুজ্জেয্য, পটিচ্ছন্নং ৰা ৰিৰরেয্য, মূল়্হস্স ৰা মগ্গং আচিক্খেয্য, অন্ধকারে ৰা তেলপজ্জোতং ধারেয্য – চক্খুমন্তো রূপানি দক্খন্তীতি – এৰমেৰং ভোতা উদেনেন অনেকপরিযাযেন ধম্মো পকাসিতো. এসাহং ভৰন্তং উদেনং সরণং গচ্ছামি ধম্মঞ্চ ভিক্খুসঙ্ঘঞ্চ. উপাসকং মং ভৰং উদেনো ধারেতু অজ্জতগ্গে পাণুপেতং সরণং গত’’ন্তি. ‘‘মা খো মং ত্ৰং, ব্রাহ্মণ, সরণং অগমাসি. তমেৰ ভগৰন্তং সরণং গচ্ছাহি যমহং সরণং গতো’’তি. ‘‘কহং পন, ভো উদেন, এতরহি সো ভৰং গোতমো ৰিহরতি অরহং সম্মাসম্বুদ্ধো’’তি? ‘‘পরিনিব্বুতো খো, ব্রাহ্মণ, এতরহি সো ভগৰা অরহং সম্মাসম্বুদ্ধো’’তি.

‘‘সচেপি [সচে হি (সী. স্যা. কং. পী.)] মযং, ভো উদেন, সুণেয্যাম তং ভৰন্তং গোতমং দসসু যোজনেসু, দসপি মযং যোজনানি গচ্ছেয্যাম তং ভৰন্তং গোতমং দস্সনায অরহন্তং সম্মাসম্বুদ্ধং. সচেপি [সচে (সী. পী.), সচে হি (স্যা. কং.)] মযং, ভো উদেন, সুণেয্যাম তং ভৰন্তং গোতমং ৰীসতিযা যোজনেসু… তিংসায যোজনেসু… চত্তারীসায যোজনেসু… পঞ্ঞাসায যোজনেসু, পঞ্ঞাসম্পি মযং যোজনানি গচ্ছেয্যাম তং ভৰন্তং গোতমং দস্সনায অরহন্তং সম্মাসম্বুদ্ধং. যোজনসতে চেপি [যোজনসতেপি (সী. স্যা. কং. পী.)] মযং, ভো উদেন, সুণেয্যাম তং ভৰন্তং গোতমং, যোজনসতম্পি মযং গচ্ছেয্যাম তং ভৰন্তং গোতমং দস্সনায অরহন্তং সম্মাসম্বুদ্ধং.

‘‘যতো চ খো, ভো উদেন, পরিনিব্বুতো সো ভৰং গোতমো, পরিনিব্বুতম্পি মযং তং ভৰন্তং গোতমং সরণং গচ্ছাম ধম্মঞ্চ ভিক্খুসঙ্ঘঞ্চ. উপাসকং মং ভৰং উদেনো ধারেতু অজ্জতগ্গে পাণুপেতং সরণং গতং. অত্থি চ মে, ভো উদেন, অঙ্গরাজা দেৰসিকং নিচ্চভিক্খং দদাতি, ততো অহং ভোতো উদেনস্স একং নিচ্চভিক্খং দদামী’’তি. ‘‘কিং পন তে, ব্রাহ্মণ, অঙ্গরাজা দেৰসিকং নিচ্চভিক্খং দদাতী’’তি? ‘‘পঞ্চ, ভো উদেন, কহাপণসতানী’’তি. ‘‘ন খো নো, ব্রাহ্মণ, কপ্পতি জাতরূপরজতং পটিগ্গহেতু’’ন্তি. ‘‘সচে তং ভোতো উদেনস্স ন কপ্পতি ৰিহারং ভোতো উদেনস্স কারাপেস্সামী’’তি. ‘‘সচে খো মে ত্ৰং, ব্রাহ্মণ, ৰিহারং, কারাপেতুকামো, পাটলিপুত্তে সঙ্ঘস্স উপট্ঠানসালং কারাপেহী’’তি. ‘‘ইমিনাপাহং ভোতো উদেনস্স ভিয্যোসোমত্তায অত্তমনো অভিরদ্ধো যং মং ভৰং উদেনো সঙ্ঘে দানে সমাদপেতি. এসাহং, ভো উদেন, এতিস্সা চ নিচ্চভিক্খায অপরায চ নিচ্চভিক্খায পাটলিপুত্তে সঙ্ঘস্স উপট্ঠানসালং কারাপেস্সামী’’তি. অথ খো ঘোটমুখো ব্রাহ্মণো এতিস্সা চ নিচ্চভিক্খায অপরায চ নিচ্চভিক্খায পাটলিপুত্তে সঙ্ঘস্স উপট্ঠানসালং কারাপেসি. সা এতরহি ‘ঘোটমুখী’তি ৰুচ্চতীতি.

ঘোটমুখসুত্তং নিট্ঠিতং চতুত্থং.