৮. অভযরাজকুমারসুত্তং

৮৩. এৰং মে সুতং – একং সমযং ভগৰা রাজগহে ৰিহরতি ৰেল়ুৰনে কলন্দকনিৰাপে. অথ খো অভযো রাজকুমারো যেন নিগণ্ঠো নাটপুত্তো তেনুপসঙ্কমি; উপসঙ্কমিত্ৰা নিগণ্ঠং নাটপুত্তং অভিৰাদেত্ৰা একমন্তং নিসীদি. একমন্তং নিসিন্নং খো অভযং রাজকুমারং নিগণ্ঠো নাটপুত্তো এতদৰোচ – ‘‘এহি ত্ৰং, রাজকুমার, সমণস্স গোতমস্স ৰাদং আরোপেহি. এৰং তে কল্যাণো কিত্তিসদ্দো অব্ভুগ্গচ্ছিস্সতি – ‘অভযেন রাজকুমারেন সমণস্স গোতমস্স এৰং মহিদ্ধিকস্স এৰং মহানুভাৰস্স ৰাদো আরোপিতো’’’তি. ‘‘যথা কথং পনাহং, ভন্তে, সমণস্স গোতমস্স এৰং মহিদ্ধিকস্স এৰং মহানুভাৰস্স ৰাদং আরোপেস্সামী’’তি? ‘‘এহি ত্ৰং, রাজকুমার, যেন সমণো গোতমো তেনুপসঙ্কম; উপসঙ্কমিত্ৰা সমণং গোতমং এৰং ৰদেহি – ‘ভাসেয্য নু খো, ভন্তে, তথাগতো তং ৰাচং যা সা ৰাচা পরেসং অপ্পিযা অমনাপা’তি? সচে তে সমণো গোতমো এৰং পুট্ঠো এৰং ব্যাকরোতি – ‘ভাসেয্য, রাজকুমার, তথাগতো তং ৰাচং যা সা ৰাচা পরেসং অপ্পিযা অমনাপা’তি, তমেনং ত্ৰং এৰং ৰদেয্যাসি – ‘অথ কিঞ্চরহি তে, ভন্তে, পুথুজ্জনেন নানাকরণং? পুথুজ্জনোপি হি তং ৰাচং ভাসেয্য যা সা ৰাচা পরেসং অপ্পিযা অমনাপা’তি. সচে পন তে সমণো গোতমো এৰং পুট্ঠো এৰং ব্যাকরোতি – ‘ন, রাজকুমার, তথাগতো তং ৰাচং ভাসেয্য যা সা ৰাচা পরেসং অপ্পিযা অমনাপা’তি, তমেনং ত্ৰং এৰং ৰদেয্যাসি – ‘অথ কিঞ্চরহি তে, ভন্তে, দেৰদত্তো ব্যাকতো – ‘‘আপাযিকো দেৰদত্তো, নেরযিকো দেৰদত্তো, কপ্পট্ঠো দেৰদত্তো, অতেকিচ্ছো দেৰদত্তো’’তি? তায চ পন তে ৰাচায দেৰদত্তো কুপিতো অহোসি অনত্তমনো’তি. ইমং খো তে, রাজকুমার, সমণো গোতমো উভতোকোটিকং পঞ্হং পুট্ঠো সমানো নেৰ সক্খিতি উগ্গিলিতুং ন সক্খিতি ওগিলিতুং. সেয্যথাপি নাম পুরিসস্স অযোসিঙ্ঘাটকং কণ্ঠে ৰিলগ্গং, সো নেৰ সক্কুণেয্য উগ্গিলিতুং ন সক্কুণেয্য ওগিলিতুং; এৰমেৰ খো তে, রাজকুমার, সমণো গোতমো ইমং উভতোকোটিকং পঞ্হং পুট্ঠো সমানো নেৰ সক্খিতি উগ্গিলিতুং ন সক্খিতি ওগিলিতু’’ন্তি. ‘‘এৰং, ভন্তে’’তি খো অভযো রাজকুমারো নিগণ্ঠস্স নাটপুত্তস্স পটিস্সুত্ৰা উট্ঠাযাসনা নিগণ্ঠং নাটপুত্তং অভিৰাদেত্ৰা পদক্খিণং কত্ৰা যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি.

৮৪. একমন্তং নিসিন্নস্স খো অভযস্স রাজকুমারস্স সূরিযং [সুরিযং (সী. স্যা. কং. পী.)] উল্লোকেত্ৰা এতদহোসি – ‘‘অকালো খো অজ্জ ভগৰতো ৰাদং আরোপেতুং. স্ৰে দানাহং সকে নিৰেসনে ভগৰতো ৰাদং আরোপেস্সামী’’তি ভগৰন্তং এতদৰোচ – ‘‘অধিৰাসেতু মে, ভন্তে, ভগৰা স্ৰাতনায অত্তচতুত্থো ভত্ত’’ন্তি. অধিৰাসেসি ভগৰা তুণ্হীভাৰেন. অথ খো অভযো রাজকুমারো ভগৰতো অধিৰাসনং ৰিদিত্ৰা উট্ঠাযাসনা ভগৰন্তং অভিৰাদেত্ৰা পদক্খিণং কত্ৰা পক্কামি. অথ খো ভগৰা তস্সা রত্তিযা অচ্চযেন পুব্বণ্হসমযং নিৰাসেত্ৰা পত্তচীৰরমাদায যেন অভযস্স রাজকুমারস্স নিৰেসনং তেনুপসঙ্কমি; উপসঙ্কমিত্ৰা পঞ্ঞত্তে আসনে নিসীদি. অথ খো অভযো রাজকুমারো ভগৰন্তং পণীতেন খাদনীযেন ভোজনীযেন সহত্থা সন্তপ্পেসি সম্পৰারেসি. অথ খো অভযো রাজকুমারো ভগৰন্তং ভুত্তাৰিং ওনীতপত্তপাণিং অঞ্ঞতরং নীচং আসনং গহেত্ৰা একমন্তং নিসীদি.

৮৫. একমন্তং নিসিন্নো খো অভযো রাজকুমারো ভগৰন্তং এতদৰোচ – ‘‘ভাসেয্য নু খো, ভন্তে, তথাগতো তং ৰাচং যা সা ৰাচা পরেসং অপ্পিযা অমনাপা’’তি? ‘‘ন খ্ৰেত্থ, রাজকুমার, একংসেনা’’তি. ‘‘এত্থ, ভন্তে, অনস্সুং নিগণ্ঠা’’তি. ‘‘কিং পন ত্ৰং, রাজকুমার, এৰং ৰদেসি – ‘এত্থ, ভন্তে, অনস্সুং নিগণ্ঠা’’’তি? ‘‘ইধাহং, ভন্তে, যেন নিগণ্ঠো নাটপুত্তো তেনুপসঙ্কমি; উপসঙ্কমিত্ৰা নিগণ্ঠং নাটপুত্তং অভিৰাদেত্ৰা একমন্তং নিসীদিং. একমন্তং নিসিন্নং খো মং, ভন্তে, নিগণ্ঠো নাটপুত্তো এতদৰোচ – ‘এহি ত্ৰং, রাজকুমার, সমণস্স গোতমস্স ৰাদং আরোপেহি. এৰং তে কল্যাণো কিত্তিসদ্দো অব্ভুগ্গচ্ছিস্সতি – অভযেন রাজকুমারেন সমণস্স গোতমস্স এৰং মহিদ্ধিকস্স এৰং মহানুভাৰস্স ৰাদো আরোপিতো’তি. এৰং ৰুত্তে, অহং, ভন্তে, নিগণ্ঠং নাটপুত্তং এতদৰোচং – ‘যথা কথং পনাহং, ভন্তে, সমণস্স গোতমস্স এৰং মহিদ্ধিকস্স এৰং মহানুভাৰস্স ৰাদং আরোপেস্সামী’তি? ‘এহি ত্ৰং, রাজকুমার, যেন সমণো গোতমো তেনুপসঙ্কম; উপসঙ্কমিত্ৰা সমণং গোতমং এৰং ৰদেহি – ভাসেয্য নু খো, ভন্তে, তথাগতো তং ৰাচং যা সা ৰাচা পরেসং অপ্পিযা অমনাপাতি? সচে তে সমণো গোতমো এৰং পুট্ঠো এৰং ব্যাকরোতি – ভাসেয্য, রাজকুমার, তথাগতো তং ৰাচং যা সা ৰাচা পরেসং অপ্পিযা অমনাপাতি, তমেনং ত্ৰং এৰং ৰদেয্যাসি – অথ কিঞ্চরহি তে, ভন্তে, পুথুজ্জনেন নানাকরণং? পুথুজ্জনোপি হি তং ৰাচং ভাসেয্য যা সা ৰাচা পরেসং অপ্পিযা অমনাপাতি. সচে পন তে সমণো গোতমো এৰং পুট্ঠো এৰং ব্যাকরোতি – ন, রাজকুমার, তথাগতো তং ৰাচং ভাসেয্য যা সা ৰাচা পরেসং অপ্পিযা অমনাপাতি, তমেনং ত্ৰং এৰং ৰদেয্যাসি – অথ কিঞ্চরহি তে, ভন্তে, দেৰদত্তো ব্যাকতো – আপাযিকো দেৰদত্তো, নেরযিকো দেৰদত্তো, কপ্পট্ঠো দেৰদত্তো, অতেকিচ্ছো দেৰদত্তোতি? তায চ পন তে ৰাচায দেৰদত্তো কুপিতো অহোসি অনত্তমনোতি. ইমং খো তে, রাজকুমার, সমণো গোতমো উভতোকোটিকং পঞ্হং পুট্ঠো সমানো নেৰ সক্খিতি উগ্গিলিতুং ন সক্খিতি ওগিলিতুং. সেয্যথাপি নাম পুরিসস্স অযোসিঙ্ঘাটকং কণ্ঠে ৰিলগ্গং, সো নেৰ সক্কুণেয্য উগ্গিলিতুং ন সক্কুণেয্য ওগিলিতুং; এৰমেৰ খো তে, রাজকুমার, সমণো গোতমো ইমং উভতোকোটিকং পঞ্হং পুট্ঠো সমানো নেৰ সক্খিতি উগ্গিলিতুং ন সক্খিতি ওগিলিতু’’’ন্তি.

৮৬. তেন খো পন সমযেন দহরো কুমারো মন্দো উত্তানসেয্যকো অভযস্স রাজকুমারস্স অঙ্কে নিসিন্নো হোতি. অথ খো ভগৰা অভযং রাজকুমারং এতদৰোচ – ‘‘তং কিং মঞ্ঞসি, রাজকুমার, সচাযং কুমারো তুয্হং ৰা পমাদমন্ৰায ধাতিযা ৰা পমাদমন্ৰায কট্ঠং ৰা কঠলং [কথলং (ক.)] ৰা মুখে আহরেয্য, কিন্তি নং করেয্যাসী’’তি? ‘‘আহরেয্যস্সাহং, ভন্তে. সচে, ভন্তে, ন সক্কুণেয্যং আদিকেনেৰ আহত্তুং [আহরিতুং (স্যা. কং.)], ৰামেন হত্থেন সীসং পরিগ্গহেত্ৰা [পগ্গহেত্ৰা (সী.)] দক্খিণেন হত্থেন ৰঙ্কঙ্গুলিং করিত্ৰা সলোহিতম্পি আহরেয্যং. তং কিস্স হেতু? অত্থি মে, ভন্তে, কুমারে অনুকম্পা’’তি. ‘‘এৰমেৰ খো, রাজকুমার, যং তথাগতো ৰাচং জানাতি অভূতং অতচ্ছং অনত্থসংহিতং সা চ পরেসং অপ্পিযা অমনাপা, ন তং তথাগতো ৰাচং ভাসতি. যম্পি তথাগতো ৰাচং জানাতি ভূতং তচ্ছং অনত্থসংহিতং সা চ পরেসং অপ্পিযা অমনাপা, তম্পি তথাগতো ৰাচং ন ভাসতি. যঞ্চ খো তথাগতো ৰাচং জানাতি ভূতং তচ্ছং অত্থসংহিতং সা চ পরেসং অপ্পিযা অমনাপা, তত্র কালঞ্ঞূ তথাগতো হোতি তস্সা ৰাচায ৰেয্যাকরণায. যং তথাগতো ৰাচং জানাতি অভূতং অতচ্ছং অনত্থসংহিতং সা চ পরেসং পিযা মনাপা, ন তং তথাগতো ৰাচং ভাসতি. যম্পি তথাগতো ৰাচং জানাতি ভূতং তচ্ছং অনত্থসংহিতং সা চ পরেসং পিযা মনাপা তম্পি তথাগতো ৰাচং ন ভাসতি. যঞ্চ তথাগতো ৰাচং জানাতি ভূতং তচ্ছং অত্থসংহিতং সা চ পরেসং পিযা মনাপা, তত্র কালঞ্ঞূ তথাগতো হোতি তস্সা ৰাচায ৰেয্যাকরণায. তং কিস্স হেতু? অত্থি, রাজকুমার, তথাগতস্স সত্তেসু অনুকম্পা’’তি.

৮৭. ‘‘যেমে, ভন্তে, খত্তিযপণ্ডিতাপি ব্রাহ্মণপণ্ডিতাপি গহপতিপণ্ডিতাপি সমণপণ্ডিতাপি পঞ্হং অভিসঙ্খরিত্ৰা তথাগতং উপসঙ্কমিত্ৰা পুচ্ছন্তি, পুব্বেৰ নু খো, এতং, ভন্তে, ভগৰতো চেতসো পরিৰিতক্কিতং হোতি ‘যে মং উপসঙ্কমিত্ৰা এৰং পুচ্ছিস্সন্তি তেসাহং এৰং পুট্ঠো এৰং ব্যাকরিস্সামী’তি, উদাহু ঠানসোৰেতং তথাগতং পটিভাতী’’তি?

‘‘তেন হি, রাজকুমার, তঞ্ঞেৰেত্থ পটিপুচ্ছিস্সামি, যথা তে খমেয্য তথা নং ব্যাকরেয্যাসি. তং কিং মঞ্ঞসি, রাজকুমার, কুসলো ত্ৰং রথস্স অঙ্গপচ্চঙ্গান’’ন্তি?

‘‘এৰং, ভন্তে, কুসলো অহং রথস্স অঙ্গপচ্চঙ্গান’’ন্তি.

‘‘তং কিং মঞ্ঞসি, রাজকুমার, যে তং উপসঙ্কমিত্ৰা এৰং পুচ্ছেয্যুং – ‘কিং নামিদং রথস্স অঙ্গপচ্চঙ্গ’ন্তি? পুব্বেৰ নু খো তে এতং চেতসো পরিৰিতক্কিতং অস্স ‘যে মং উপসঙ্কমিত্ৰা এৰং পুচ্ছিস্সন্তি তেসাহং এৰং পুট্ঠো এৰং ব্যাকরিস্সামী’তি, উদাহু ঠানসোৰেতং পটিভাসেয্যা’’তি?

‘‘অহঞ্হি, ভন্তে, রথিকো সঞ্ঞাতো কুসলো রথস্স অঙ্গপচ্চঙ্গানং. সব্বানি মে রথস্স অঙ্গপচ্চঙ্গানি সুৰিদিতানি. ঠানসোৰেতং মং পটিভাসেয্যা’’তি.

‘‘এৰমেৰ খো, রাজকুমার, যে তে খত্তিযপণ্ডিতাপি ব্রাহ্মণপণ্ডিতাপি গহপতিপণ্ডিতাপি সমণপণ্ডিতাপি পঞ্হং অভিসঙ্খরিত্ৰা তথাগতং উপসঙ্কমিত্ৰা পুচ্ছন্তি, ঠানসোৰেতং তথাগতং পটিভাতি. তং কিস্স হেতু? সা হি, রাজকুমার, তথাগতস্স ধম্মধাতু সুপ্পটিৰিদ্ধা যস্সা ধম্মধাতুযা সুপ্পটিৰিদ্ধত্তা ঠানসোৰেতং তথাগতং পটিভাতী’’তি.

এৰং ৰুত্তে, অভযো রাজকুমারো ভগৰন্তং এতদৰোচ – ‘‘অভিক্কন্তং, ভন্তে, অভিক্কন্তং, ভন্তে…পে… অজ্জতগ্গে পাণুপেতং সরণং গত’’ন্তি.

অভযরাজকুমারসুত্তং নিট্ঠিতং অট্ঠমং.