৪. চূল়দুক্খক্খন্ধসুত্তং

১৭৫. এৰং মে সুতং – একং সমযং ভগৰা সক্কেসু ৰিহরতি কপিলৰত্থুস্মিং নিগ্রোধারামে. অথ খো মহানামো সক্কো যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি. একমন্তং নিসিন্নো খো মহানামো সক্কো ভগৰন্তং এতদৰোচ – ‘‘দীঘরত্তাহং, ভন্তে, ভগৰতা এৰং ধম্মং দেসিতং আজানামি – ‘লোভো চিত্তস্স উপক্কিলেসো, দোসো চিত্তস্স উপক্কিলেসো, মোহো চিত্তস্স উপক্কিলেসো’তি. এৰঞ্চাহং [এৰংপাহং (ক.)], ভন্তে, ভগৰতা ধম্মং দেসিতং আজানামি – ‘লোভো চিত্তস্স উপক্কিলেসো, দোসো চিত্তস্স উপক্কিলেসো, মোহো চিত্তস্স উপক্কিলেসো’তি. অথ চ পন মে একদা লোভধম্মাপি চিত্তং পরিযাদায তিট্ঠন্তি, দোসধম্মাপি চিত্তং পরিযাদায তিট্ঠন্তি, মোহধম্মাপি চিত্তং পরিযাদায তিট্ঠন্তি. তস্স ময্হং, ভন্তে, এৰং হোতি – ‘কোসু নাম মে ধম্মো অজ্ঝত্তং অপ্পহীনো যেন মে একদা লোভধম্মাপি চিত্তং পরিযাদায তিট্ঠন্তি, দোসধম্মাপি চিত্তং পরিযাদায তিট্ঠন্তি, মোহধম্মাপি চিত্তং পরিযাদায তিট্ঠন্তী’’’তি.

১৭৬. ‘‘সো এৰ খো তে, মহানাম, ধম্মো অজ্ঝত্তং অপ্পহীনো যেন তে একদা লোভধম্মাপি চিত্তং পরিযাদায তিট্ঠন্তি, দোসধম্মাপি চিত্তং পরিযাদায তিট্ঠন্তি, মোহধম্মাপি চিত্তং পরিযাদায তিট্ঠন্তি. সো চ হি তে, মহানাম, ধম্মো অজ্ঝত্তং পহীনো অভৰিস্স, ন ত্ৰং অগারং অজ্ঝাৰসেয্যাসি, ন কামে পরিভুঞ্জেয্যাসি. যস্মা চ খো তে, মহানাম, সো এৰ ধম্মো অজ্ঝত্তং অপ্পহীনো তস্মা ত্ৰং অগারং অজ্ঝাৰসসি, কামে পরিভুঞ্জসি.

১৭৭. ‘‘‘অপ্পস্সাদা কামা বহুদুক্খা বহুপাযাসা, আদীনৰো [বহূপাযাসা (সী. স্যা. পী.)] এত্থ ভিয্যো’তি – ইতি চেপি, মহানাম, অরিযসাৰকস্স যথাভূতং সম্মপ্পঞ্ঞায সুদিট্ঠং হোতি, সো চ [সোৰ (ক.)] অঞ্ঞত্রেৰ কামেহি অঞ্ঞত্র অকুসলেহি ধম্মেহি পীতিসুখং নাধিগচ্ছতি, অঞ্ঞং ৰা ততো সন্ততরং; অথ খো সো নেৰ তাৰ অনাৰট্টী কামেসু হোতি. যতো চ খো, মহানাম, অরিযসাৰকস্স ‘অপ্পস্সাদা কামা বহুদুক্খা বহুপাযাসা, আদীনৰো এত্থ ভিয্যো’তি – এৰমেতং যথাভূতং সম্মপ্পঞ্ঞায সুদিট্ঠং হোতি, সো চ অঞ্ঞত্রেৰ কামেহি অঞ্ঞত্র অকুসলেহি ধম্মেহি পীতিসুখং অধিগচ্ছতি অঞ্ঞং ৰা ততো সন্ততরং; অথ খো সো অনাৰট্টী কামেসু হোতি.

‘‘ময্হম্পি খো, মহানাম, পুব্বেৰ সম্বোধা, অনভিসম্বুদ্ধস্স বোধিসত্তস্সেৰ সতো, ‘অপ্পস্সাদা কামা বহুদুক্খা বহুপাযাসা, আদীনৰো এত্থ ভিয্যো’তি – এৰমেতং যথাভূতং সম্মপ্পঞ্ঞায সুদিট্ঠং হোতি, সো চ অঞ্ঞত্রেৰ কামেহি অঞ্ঞত্র অকুসলেহি ধম্মেহি পীতিসুখং নাজ্ঝগমং, অঞ্ঞং ৰা ততো সন্ততরং; অথ খ্ৰাহং নেৰ তাৰ অনাৰট্টী কামেসু পচ্চঞ্ঞাসিং. যতো চ খো মে, মহানাম, ‘অপ্পস্সাদা কামা বহুদুক্খা বহুপাযাসা, আদীনৰো এত্থ ভিয্যো’তি – এৰমেতং যথাভূতং সম্মপ্পঞ্ঞায সুদিট্ঠং অহোসি, সো চ [সোৰ (ক.)] অঞ্ঞত্রেৰ কামেহি অঞ্ঞত্র অকুসলেহি ধম্মেহি পীতিসুখং অজ্ঝগমং, অঞ্ঞং ৰা ততো সন্ততরং; অথাহং অনাৰট্টী কামেসু পচ্চঞ্ঞাসিং.

১৭৮. ‘‘কো চ, মহানাম, কামানং অস্সাদো? পঞ্চিমে, মহানাম, কামগুণা. কতমে পঞ্চ? চক্খুৰিঞ্ঞেয্যা রূপা ইট্ঠা কন্তা মনাপা পিযরূপা কামূপসংহিতা রজনীযা; সোতৰিঞ্ঞেয্যা সদ্দা…পে… ঘানৰিঞ্ঞেয্যা গন্ধা… জিৰ্হাৰিঞ্ঞেয্যা রসা… কাযৰিঞ্ঞেয্যা ফোট্ঠব্বা ইট্ঠা কন্তা মনাপা পিযরূপা কামূপসংহিতা রজনীযা – ইমে খো, মহানাম, পঞ্চ কামগুণা. যং খো, মহানাম, ইমে পঞ্চ কামগুণে পটিচ্চ উপ্পজ্জতি সুখং সোমনস্সং – অযং কামানং অস্সাদো.

‘‘কো চ, মহানাম, কামানং আদীনৰো? ইধ, মহানাম, কুলপুত্তো যেন সিপ্পট্ঠানেন জীৰিকং কপ্পেতি – যদি মুদ্দায যদি গণনায যদি সঙ্খানেন যদি কসিযা যদি ৰণিজ্জায যদি গোরক্খেন যদি ইস্সত্থেন যদি রাজপোরিসেন যদি সিপ্পঞ্ঞতরেন, সীতস্স পুরক্খতো উণ্হস্স পুরক্খতো ডংসমকসৰাতাতপসরীংসপসম্ফস্সেহি রিস্সমানো খুপ্পিপাসায মীযমানো; অযম্পি, মহানাম, কামানং আদীনৰো সন্দিট্ঠিকো দুক্খক্খন্ধো কামহেতু কামনিদানং কামাধিকরণং কামানমেৰ হেতু.

‘‘তস্স চে মহানাম কুলপুত্তস্স এৰং উট্ঠহতো ঘটতো ৰাযমতো তে ভোগা নাভিনিপ্ফজ্জন্তি, সো সোচতি কিলমতি পরিদেৰতি উরত্তাল়িং কন্দতি সম্মোহং আপজ্জতি ‘মোঘং ৰত মে উট্ঠানং, অফলো ৰত মে ৰাযামো’তি. অযম্পি, মহানাম, কামানং আদীনৰো সন্দিট্ঠিকো দুক্খক্খন্ধো কামহেতু কামনিদানং কামাধিকরণং কামানমেৰ হেতু.

‘‘তস্স চে, মহানাম, কুলপুত্তস্স এৰং উট্ঠহতো ঘটতো ৰাযমতো তে ভোগা অভিনিপ্ফজ্জন্তি. সো তেসং ভোগানং আরক্খাধিকরণং দুক্খং দোমনস্সং পটিসংৰেদেতি – ‘কিন্তি মে ভোগে নেৰ রাজানো হরেয্যুং, ন চোরা হরেয্যুং, ন অগ্গি দহেয্য, ন উদকং ৰহেয্য, ন অপ্পিযা ৰা দাযাদা হরেয্যু’ন্তি. তস্স এৰং আরক্খতো গোপযতো তে ভোগে রাজানো ৰা হরন্তি, চোরা ৰা হরন্তি, অগ্গি ৰা দহতি, উদকং ৰা ৰহতি, অপ্পিযা ৰা দাযাদা হরন্তি. সো সোচতি কিলমতি পরিদেৰতি উরত্তাল়িং কন্দতি সম্মোহং আপজ্জতি – ‘যম্পি মে অহোসি তম্পি নো নত্থী’তি. অযম্পি, মহানাম, কামানং আদীনৰো সন্দিট্ঠিকো দুক্খক্খন্ধো কামহেতু কামনিদানং কামাধিকরণং কামানমেৰ হেতু.

‘‘পুন চপরং, মহানাম, কামহেতু কামনিদানং কামাধিকরণং কামানমেৰ হেতু রাজানোপি রাজূহি ৰিৰদন্তি, খত্তিযাপি খত্তিযেহি ৰিৰদন্তি, ব্রাহ্মণাপি ব্রাহ্মণেহি ৰিৰদন্তি, গহপতীপি গহপতীহি ৰিৰদন্তি, মাতাপি পুত্তেন ৰিৰদতি, পুত্তোপি মাতরা ৰিৰদতি, পিতাপি পুত্তেন ৰিৰদতি, পুত্তোপি পিতরা ৰিৰদতি, ভাতাপি ভাতরা ৰিৰদতি, ভাতাপি ভগিনিযা ৰিৰদতি, ভগিনীপি ভাতরা ৰিৰদতি, সহাযোপি সহাযেন ৰিৰদতি. তে তত্থ কলহৰিগ্গহৰিৰাদাপন্না অঞ্ঞমঞ্ঞং পাণীহিপি উপক্কমন্তি, লেড্ডূহিপি উপক্কমন্তি, দণ্ডেহিপি উপক্কমন্তি, সত্থেহিপি উপক্কমন্তি. তে তত্থ মরণম্পি নিগচ্ছন্তি, মরণমত্তম্পি দুক্খং. অযম্পি, মহানাম, কামানং আদীনৰো সন্দিট্ঠিকো দুক্খক্খন্ধো কামহেতু কামনিদানং কামাধিকরণং কামানমেৰ হেতু.

‘‘পুন চপরং, মহানাম, কামহেতু কামনিদানং কামাধিকরণং কামানমেৰ হেতু অসিচম্মং গহেত্ৰা, ধনুকলাপং সন্নয্হিত্ৰা, উভতোব্যূল়্হং সঙ্গামং পক্খন্দন্তি উসূসুপি খিপ্পমানেসু, সত্তীসুপি খিপ্পমানাসু, অসীসুপি ৰিজ্জোতলন্তেসু. তে তত্থ উসূহিপি ৰিজ্ঝন্তি, সত্তিযাপি ৰিজ্ঝন্তি, অসিনাপি সীসং ছিন্দন্তি. তে তত্থ মরণম্পি নিগচ্ছন্তি, মরণমত্তম্পি দুক্খং. অযম্পি, মহানাম, কামানং আদীনৰো সন্দিট্ঠিকো দুক্খক্খন্ধো কামহেতু কামনিদানং কামাধিকরণং কামানমেৰ হেতু.

‘‘পুন চপরং, মহানাম, কামহেতু কামনিদানং কামাধিকরণং কামানমেৰ হেতু অসিচম্মং গহেত্ৰা, ধনুকলাপং সন্নয্হিত্ৰা, অদ্দাৰলেপনা উপকারিযো পক্খন্দন্তি উসূসুপি খিপ্পমানেসু, সত্তীসুপি খিপ্পমানাসু, অসীসুপি ৰিজ্জোতলন্তেসু. তে তত্থ উসূহিপি ৰিজ্ঝন্তি, সত্তিযাপি ৰিজ্ঝন্তি, ছকণকাযপি ওসিঞ্চন্তি, অভিৰগ্গেনপি ওমদ্দন্তি, অসিনাপি সীসং ছিন্দন্তি. তে তত্থ মরণম্পি নিগচ্ছন্তি, মরণমত্তম্পি দুক্খং. অযম্পি, মহানাম, কামানং আদীনৰো সন্দিট্ঠিকো দুক্খক্খন্ধো কামহেতু কামনিদানং কামাধিকরণং কামানমেৰ হেতু.

‘‘পুন চপরং, মহানাম, কামহেতু কামনিদানং কামাধিকরণং কামানমেৰ হেতু সন্ধিম্পি ছিন্দন্তি, নিল্লোপম্পি হরন্তি, একাগারিকম্পি করোন্তি, পরিপন্থেপি তিট্ঠন্তি, পরদারম্পি গচ্ছন্তি. তমেনং রাজানো গহেত্ৰা ৰিৰিধা কম্মকারণা কারেন্তি – কসাহিপি তাল়েন্তি, ৰেত্তেহিপি তাল়েন্তি, অড্ঢদণ্ডকেহিপি তাল়েন্তি; হত্থম্পি ছিন্দন্তি, পাদম্পি ছিন্দন্তি, হত্থপাদম্পি ছিন্দন্তি, কণ্ণম্পি ছিন্দন্তি, নাসম্পি ছিন্দন্তি, কণ্ণনাসম্পি ছিন্দন্তি; বিলঙ্গথালিকম্পি করোন্তি, সঙ্খমুণ্ডিকম্পি করোন্তি, রাহুমুখম্পি করোন্তি, জোতিমালিকম্পি করোন্তি, হত্থপজ্জোতিকম্পি করোন্তি, এরকৰত্তিকম্পি করোন্তি, চীরকৰাসিকম্পি করোন্তি, এণেয্যকম্পি করোন্তি, বল়িসমংসিকম্পি করোন্তি, কহাপণিকম্পি করোন্তি, খারাপতচ্ছিকম্পি করোন্তি, পলিঘপরিৰত্তিকম্পি করোন্তি, পলালপীঠকম্পি করোন্তি, তত্তেনপি তেলেন ওসিঞ্চন্তি, সুনখেহিপি খাদাপেন্তি, জীৰন্তম্পি সূলে উত্তাসেন্তি, অসিনাপি সীসং ছিন্দন্তি. তে তত্থ মরণম্পি নিগচ্ছন্তি, মরণমত্তম্পি দুক্খং. অযম্পি, মহানাম, কামানং আদীনৰো সন্দিট্ঠিকো দুক্খক্খন্ধো কামহেতু কামনিদানং কামাধিকরণং কামানমেৰ হেতু.

‘‘পুন চপরং, মহানাম, কামহেতু কামনিদানং কামাধিকরণং কামানমেৰ হেতু কাযেন দুচ্চরিতং চরন্তি, ৰাচায দুচ্চরিতং চরন্তি, মনসা দুচ্চরিতং চরন্তি. তে কাযেন দুচ্চরিতং চরিত্ৰা, ৰাচায দুচ্চরিতং চরিত্ৰা, মনসা দুচ্চরিতং চরিত্ৰা, কাযস্স ভেদা পরং মরণা, অপাযং দুগ্গতিং ৰিনিপাতং নিরযং উপপজ্জন্তি. অযম্পি, মহানাম, কামানং আদীনৰো সম্পরাযিকো, দুক্খক্খন্ধো কামহেতু কামনিদানং কামাধিকরণং কামানমেৰ হেতু.

১৭৯. ‘‘একমিদাহং, মহানাম, সমযং রাজগহে ৰিহরামি গিজ্ঝকূটে পব্বতে. তেন খো পন সমযেন সম্বহুলা নিগণ্ঠা [নিগন্থা (স্যা. ক.)] ইসিগিলিপস্সে কাল়সিলাযং উব্ভট্ঠকা হোন্তি আসনপটিক্খিত্তা, ওপক্কমিকা দুক্খা তিব্বা খরা কটুকা ৰেদনা ৰেদযন্তি. অথ খ্ৰাহং, মহানাম, সাযন্হসমযং পটিসল্লানা ৰুট্ঠিতো যেন ইসিগিলিপস্সে কাল়সিলা যেন তে নিগণ্ঠা তেনুপসঙ্কমিং; উপসঙ্কমিত্ৰা তে নিগণ্ঠে এতদৰোচং – ‘কিন্নু তুম্হে, আৰুসো, নিগণ্ঠা উব্ভট্ঠকা আসনপটিক্খিত্তা, ওপক্কমিকা দুক্খা তিব্বা খরা কটুকা ৰেদনা ৰেদযথা’তি? এৰং ৰুত্তে, মহানাম, তে নিগণ্ঠা মং এতদৰোচুং – ‘নিগণ্ঠো, আৰুসো, নাটপুত্তো [নাথপুত্তো (সী. পী.)] সব্বঞ্ঞূ সব্বদস্সাৰী অপরিসেসং ঞাণদস্সনং পটিজানাতি – ‘‘চরতো চ মে তিট্ঠতো চ সুত্তস্স চ জাগরস্স চ সততং সমিতং ঞাণদস্সনং পচ্চুপট্ঠিত’’ন্তি. সো এৰমাহ – ‘‘অত্থি খো ৰো [অত্থি খো ভো (স্যা. ক.)], নিগণ্ঠা, পুব্বে পাপকম্মং কতং, তং ইমায কটুকায দুক্করকারিকায নিজ্জীরেথ [নিজ্জরেথ (সী. স্যা. পী.)]; যং পনেত্থ [মযং পনেত্থ (ক.)] এতরহি কাযেন সংৰুতা ৰাচায সংৰুতা মনসা সংৰুতা তং আযতিং পাপস্স কম্মস্স অকরণং; ইতি পুরাণানং কম্মানং তপসা ব্যন্তিভাৰা, নৰানং কম্মানং অকরণা, আযতিং অনৰস্সৰো; আযতিং অনৰস্সৰা কম্মক্খযো, কম্মক্খযা দুক্খক্খযো, দুক্খক্খযা ৰেদনাক্খযো, ৰেদনাক্খযা সব্বং দুক্খং নিজ্জিণ্ণং ভৰিস্সতী’’তি. তঞ্চ পনম্হাকং রুচ্চতি চেৰ খমতি চ, তেন চম্হ অত্তমনা’তি.

১৮০. ‘‘এৰং ৰুত্তে, অহং, মহানাম, তে নিগণ্ঠে এতদৰোচং – ‘কিং পন তুম্হে, আৰুসো নিগণ্ঠা, জানাথ – অহুৰম্হেৰ মযং পুব্বে ন নাহুৰম্হা’তি? ‘নো হিদং, আৰুসো’. ‘কিং পন তুম্হে, আৰুসো নিগণ্ঠা, জানাথ – অকরম্হেৰ মযং পুব্বে পাপকম্মং ন নাকরম্হা’তি? ‘নো হিদং, আৰুসো’. ‘কিং পন তুম্হে, আৰুসো নিগণ্ঠা, জানাথ – এৰরূপং ৰা এৰরূপং ৰা পাপকম্মং অকরম্হা’তি? ‘নো হিদং, আৰুসো’. ‘কিং পন তুম্হে, আৰুসো নিগণ্ঠা, জানাথ – এত্তকং ৰা দুক্খং নিজ্জিণ্ণং, এত্তকং ৰা দুক্খং নিজ্জীরেতব্বং, এত্তকম্হি ৰা দুক্খে নিজ্জিণ্ণে সব্বং দুক্খং নিজ্জিণ্ণং ভৰিস্সতী’তি? ‘নো হিদং, আৰুসো’. ‘কিং পন তুম্হে, আৰুসো নিগণ্ঠা, জানাথ – দিট্ঠেৰ ধম্মে অকুসলানং ধম্মানং পহানং, কুসলানং ধম্মানং উপসম্পদ’ন্তি? ‘নো হিদং, আৰুসো’.

‘‘‘ইতি কির তুম্হে, আৰুসো নিগণ্ঠা, ন জানাথ – অহুৰম্হেৰ মযং পুব্বে ন নাহুৰম্হাতি, ন জানাথ – অকরম্হেৰ মযং পুব্বে পাপকম্মং ন নাকরম্হাতি, ন জানাথ – এৰরূপং ৰা এৰরূপং ৰা পাপকম্মং অকরম্হাতি, ন জানাথ – এত্তকং ৰা দুক্খং নিজ্জিণ্ণং, এত্তকং ৰা দুক্খং নিজ্জীরেতব্বং, এত্তকম্হি ৰা দুক্খে নিজ্জিণ্ণে সব্বং দুক্খং নিজ্জিণ্ণং ভৰিস্সতীতি. ন জানাথ – দিট্ঠেৰ ধম্মে অকুসলানং ধম্মানং পহানং, কুসলানং ধম্মানং উপসম্পদং. এৰং সন্তে, আৰুসো নিগণ্ঠা, যে লোকে লুদ্দা লোহিতপাণিনো কুরূরকম্মন্তা মনুস্সেসু পচ্চাজাতা তে নিগণ্ঠেসু পব্বজন্তী’তি? ‘ন খো, আৰুসো গোতম, সুখেন সুখং অধিগন্তব্বং, দুক্খেন খো সুখং অধিগন্তব্বং; সুখেন চাৰুসো গোতম, সুখং অধিগন্তব্বং অভৰিস্স, রাজা মাগধো সেনিযো বিম্বিসারো সুখং অধিগচ্ছেয্য, রাজা মাগধো সেনিযো বিম্বিসারো সুখৰিহারিতরো আযস্মতা গোতমেনা’তি.

‘‘‘অদ্ধাযস্মন্তেহি নিগণ্ঠেহি সহসা অপ্পটিসঙ্খা ৰাচা ভাসিতা – ন খো, আৰুসো গোতম, সুখেন সুখং অধিগন্তব্বং, দুক্খেন খো সুখং অধিগন্তব্বং; সুখেন চাৰুসো গোতম, সুখং অধিগন্তব্বং অভৰিস্স, রাজা মাগধো সেনিযো বিম্বিসারো সুখং অধিগচ্ছেয্য, রাজা মাগধো সেনিযো বিম্বিসারো সুখৰিহারিতরো আযস্মতা গোতমেনা’’তি. অপি চ অহমেৰ তত্থ পটিপুচ্ছিতব্বো – কো নু খো আযস্মন্তানং সুখৰিহারিতরো রাজা ৰা মাগধো সেনিযো বিম্বিসারো আযস্মা ৰা গোতমো’তি? অদ্ধাৰুসো গোতম, অম্হেহি সহসা অপ্পটিসঙ্খা ৰাচা ভাসিতা, ন খো, আৰুসো গোতম, সুখেন সুখং অধিগন্তব্বং, দুক্খেন খো সুখং অধিগন্তব্বং; সুখেন চাৰুসো গোতম, সুখং অধিগন্তব্বং অভৰিস্স, রাজা মাগধো সেনিযো বিম্বিসারো সুখং অধিগচ্ছেয্য, রাজা মাগধো সেনিযো বিম্বিসারো সুখৰিহারিতরো আযস্মতা গোতমেনাতি. অপি চ তিট্ঠতেতং, ইদানিপি মযং আযস্মন্তং গোতমং পুচ্ছাম – কো নু খো আযস্মন্তানং সুখৰিহারিতরো রাজা ৰা মাগধো সেনিযো বিম্বিসারো আযস্মা ৰা গোতমো’তি?

‘‘‘তেন হাৰুসো নিগণ্ঠা, তুম্হেৰ তত্থ পটিপুচ্ছিস্সামি, যথা ৰো খমেয্য তথা নং ব্যাকরেয্যাথ. তং কিং মঞ্ঞথাৰুসো নিগণ্ঠা, পহোতি রাজা মাগধো সেনিযো বিম্বিসারো, অনিঞ্জমানো কাযেন, অভাসমানো ৰাচং, সত্ত রত্তিন্দিৰানি একন্তসুখং পটিসংৰেদী ৰিহরিতু’ন্তি? ‘নো হিদং, আৰুসো’.

‘‘‘তং কিং মঞ্ঞথাৰুসো নিগণ্ঠা, পহোতি রাজা মাগধো সেনিযো বিম্বিসারো, অনিঞ্জমানো কাযেন, অভাসমানো ৰাচং, ছ রত্তিন্দিৰানি…পে… পঞ্চ রত্তিন্দিৰানি… চত্তারি রত্তিন্দিৰানি… তীণি রত্তিন্দিৰানি… দ্ৰে রত্তিন্দিৰানি… একং রত্তিন্দিৰং একন্তসুখং পটিসংৰেদী ৰিহরিতু’ন্তি? ‘নো হিদং, আৰুসো’.

‘‘‘অহং খো, আৰুসো নিগণ্ঠা, পহোমি অনিঞ্জমানো কাযেন, অভাসমানো ৰাচং, একং রত্তিন্দিৰং একন্তসুখং পটিসংৰেদী ৰিহরিতুং. অহং খো, আৰুসো নিগণ্ঠা, পহোমি অনিঞ্জমানো কাযেন, অভাসমানো ৰাচং, দ্ৰে রত্তিন্দিৰানি… তীণি রত্তিন্দিৰানি… চত্তারি রত্তিন্দিৰানি… পঞ্চ রত্তিন্দিৰানি… ছ রত্তিন্দিৰানি… সত্ত রত্তিন্দিৰানি একন্তসুখং পটিসংৰেদী ৰিহরিতুং. তং কিং মঞ্ঞথাৰুসো নিগণ্ঠা, এৰং সন্তে কো সুখৰিহারিতরো রাজা ৰা মাগধো সেনিযো বিম্বিসারো অহং ৰা’তি? ‘এৰং সন্তে আযস্মাৰ গোতমো সুখৰিহারিতরো রঞ্ঞা মাগধেন সেনিযেন বিম্বিসারেনা’’’তি.

ইদমৰোচ ভগৰা. অত্তমনো মহানামো সক্কো ভগৰতো ভাসিতং অভিনন্দীতি.

চূল়দুক্খক্খন্ধসুত্তং নিট্ঠিতং চতুত্থং.