৫. অনুমানসুত্তং

১৮১. এৰং মে সুতং – একং সমযং আযস্মা মহামোগ্গল্লানো ভগ্গেসু ৰিহরতি সুসুমারগিরে [সুংসুমারগিরে (সী. স্যা. পী.)] ভেসকল়াৰনে মিগদাযে. তত্র খো আযস্মা মহামোগ্গল্লানো ভিক্খূ আমন্তেসি – ‘‘আৰুসো, ভিক্খৰো’’তি. ‘‘আৰুসো’’তি খো তে ভিক্খূ আযস্মতো মহামোগ্গল্লানস্স পচ্চস্সোসুং. আযস্মা মহামোগ্গল্লানো এতদৰোচ –

‘‘পৰারেতি চেপি, আৰুসো, ভিক্খু – ‘ৰদন্তু মং আযস্মন্তো, ৰচনীযোম্হি আযস্মন্তেহী’তি, সো চ হোতি দুব্বচো, দোৰচস্সকরণেহি ধম্মেহি সমন্নাগতো, অক্খমো অপ্পদক্খিণগ্গাহী অনুসাসনিং, অথ খো নং সব্রহ্মচারী ন চেৰ ৰত্তব্বং মঞ্ঞন্তি, ন চ অনুসাসিতব্বং মঞ্ঞন্তি, ন চ তস্মিং পুগ্গলে ৰিস্সাসং আপজ্জিতব্বং মঞ্ঞন্তি.

‘‘কতমে চাৰুসো, দোৰচস্সকরণা ধম্মা? ইধাৰুসো, ভিক্খু পাপিচ্ছো হোতি, পাপিকানং ইচ্ছানং ৰসং গতো. যম্পাৰুসো, ভিক্খু পাপিচ্ছো হোতি, পাপিকানং ইচ্ছানং ৰসং গতো – অযম্পি ধম্মো দোৰচস্সকরণো.

‘‘পুন চপরং, আৰুসো, ভিক্খু অত্তুক্কংসকো হোতি পরৰম্ভী. যম্পাৰুসো, ভিক্খু অত্তুক্কংসকো হোতি পরৰম্ভী – অযম্পি ধম্মো দোৰচস্সকরণো.

‘‘পুন চপরং, আৰুসো, ভিক্খু কোধনো হোতি কোধাভিভূতো. যম্পাৰুসো, ভিক্খু কোধনো হোতি কোধাভিভূতো – অযম্পি ধম্মো দোৰচস্সকরণো.

‘‘পুন চপরং, আৰুসো, ভিক্খু কোধনো হোতি কোধহেতু উপনাহী. যম্পাৰুসো, ভিক্খু কোধনো হোতি কোধহেতু উপনাহী – অযম্পি ধম্মো দোৰচস্সকরণো.

‘‘পুন চপরং, আৰুসো, ভিক্খু কোধনো হোতি কোধহেতু অভিসঙ্গী. যম্পাৰুসো, ভিক্খু কোধনো হোতি কোধহেতু অভিসঙ্গী – অযম্পি ধম্মো দোৰচস্সকরণো.

‘‘পুন চপরং, আৰুসো, ভিক্খু কোধনো হোতি কোধসামন্তা [কোধসামন্তং (স্যা. পী. ক.)] ৰাচং নিচ্ছারেতা. যম্পাৰুসো, ভিক্খু কোধনো হোতি কোধসামন্তা ৰাচং নিচ্ছারেতা – অযম্পি ধম্মো দোৰচস্সকরণো.

‘‘পুন চপরং, আৰুসো, ভিক্খু চোদিতো [চুদিতো (সী. স্যা. পী.)] চোদকেন চোদকং পটিপ্ফরতি. যম্পাৰুসো, ভিক্খু চোদিতো চোদকেন চোদকং পটিপ্ফরতি – অযম্পি ধম্মো দোৰচস্সকরণো.

‘‘পুন চপরং, আৰুসো, ভিক্খু চোদিতো চোদকেন চোদকং অপসাদেতি. যম্পাৰুসো, ভিক্খু চোদিতো চোদকেন চোদকং অপসাদেতি – অযম্পি ধম্মো দোৰচস্সকরণো.

‘‘পুন চপরং, আৰুসো, ভিক্খু চোদিতো চোদকেন চোদকস্স পচ্চারোপেতি. যম্পাৰুসো, ভিক্খু চোদিতো চোদকেন চোদকস্স পচ্চারোপেতি – অযম্পি ধম্মো দোৰচস্সকরণো.

‘‘পুন চপরং, আৰুসো, ভিক্খু চোদিতো চোদকেন অঞ্ঞেনঞ্ঞং পটিচরতি, বহিদ্ধা কথং অপনামেতি, কোপঞ্চ দোসঞ্চ অপ্পচ্চযঞ্চ পাতুকরোতি. যম্পাৰুসো, ভিক্খু চোদিতো চোদকেন অঞ্ঞেনঞ্ঞং পটিচরতি, বহিদ্ধা কথং অপনামেতি, কোপঞ্চ দোসঞ্চ অপ্পচ্চযঞ্চ পাতুকরোতি – অযম্পি ধম্মো দোৰচস্সকরণো.

‘‘পুন চপরং, আৰুসো, ভিক্খু চোদিতো চোদকেন অপদানে ন সম্পাযতি. যম্পাৰুসো, ভিক্খু চোদিতো চোদকেন অপদানে ন সম্পাযতি – অযম্পি ধম্মো দোৰচস্সকরণো.

‘‘পুন চপরং, আৰুসো, ভিক্খু মক্খী হোতি পল়াসী. যম্পাৰুসো, ভিক্খু মক্খী হোতি পল়াসী – অযম্পি ধম্মো দোৰচস্সকরণো.

‘‘পুন চপরং, আৰুসো, ভিক্খু ইস্সুকী হোতি মচ্ছরী. যম্পাৰুসো, ভিক্খু ইস্সুকী হোতি মচ্ছরী – অযম্পি ধম্মো দোৰচস্সকরণো.

‘‘পুন চপরং, আৰুসো, ভিক্খু সঠো হোতি মাযাৰী. যম্পাৰুসো, ভিক্খু সঠো হোতি মাযাৰী – অযম্পি ধম্মো দোৰচস্সকরণো.

‘‘পুন চপরং, আৰুসো, ভিক্খু থদ্ধো হোতি অতিমানী. যম্পাৰুসো, ভিক্খু থদ্ধো হোতি অতিমানী – অযম্পি ধম্মো দোৰচস্সকরণো.

‘‘পুন চপরং, আৰুসো, ভিক্খু সন্দিট্ঠিপরামাসী হোতি আধানগ্গাহী দুপ্পটিনিস্সগ্গী. যম্পাৰুসো, ভিক্খু সন্দিট্ঠিপরামাসী হোতি আধানগ্গাহী দুপ্পটিনিস্সগ্গী – অযম্পি ধম্মো দোৰচস্সকরণো. ইমে ৰুচ্চন্তাৰুসো, দোৰচস্সকরণা ধম্মা.

১৮২. ‘‘নো চেপি, আৰুসো, ভিক্খু পৰারেতি – ‘ৰদন্তু মং আযস্মন্তো, ৰচনীযোম্হি আযস্মন্তেহী’তি, সো চ হোতি সুৰচো, সোৰচস্সকরণেহি ধম্মেহি সমন্নাগতো, খমো পদক্খিণগ্গাহী অনুসাসনিং, অথ খো নং সব্রহ্মচারী ৰত্তব্বঞ্চেৰ মঞ্ঞন্তি, অনুসাসিতব্বঞ্চ মঞ্ঞন্তি, তস্মিঞ্চ পুগ্গলে ৰিস্সাসং আপজ্জিতব্বং মঞ্ঞন্তি.

‘‘কতমে চাৰুসো, সোৰচস্সকরণা ধম্মা? ইধাৰুসো, ভিক্খু ন পাপিচ্ছো হোতি, ন পাপিকানং ইচ্ছানং ৰসং গতো. যম্পাৰুসো, ভিক্খু ন পাপিচ্ছো হোতি ন পাপিকানং ইচ্ছানং ৰসং গতো – অযম্পি ধম্মো সোৰচস্সকরণো.

‘‘পুন চপরং, আৰুসো, ভিক্খু অনত্তুক্কংসকো হোতি অপরৰম্ভী. যম্পাৰুসো, ভিক্খু অনত্তুক্কংসকো হোতি অপরৰম্ভী – অযম্পি ধম্মো সোৰচস্সকরণো.

‘‘পুন চপরং, আৰুসো, ভিক্খু ন কোধনো হোতি ন কোধাভিভূতো. যম্পাৰুসো, ভিক্খু ন কোধনো হোতি ন কোধাভিভূতো – অযম্পি ধম্মো সোৰচস্সকরণো.

‘‘পুন চপরং, আৰুসো, ভিক্খু ন কোধনো হোতি ন কোধহেতু উপনাহী. যম্পাৰুসো, ভিক্খু ন কোধনো হোতি ন কোধহেতু উপনাহী – অযম্পি ধম্মো সোৰচস্সকরণো.

‘‘পুন চপরং, আৰুসো, ভিক্খু ন কোধনো হোতি ন কোধহেতু অভিসঙ্গী. যম্পাৰুসো, ভিক্খু ন কোধনো হোতি ন কোধহেতু অভিসঙ্গী – অযম্পি ধম্মো সোৰচস্সকরণো.

‘‘পুন চপরং, আৰুসো, ভিক্খু ন কোধনো হোতি ন কোধসামন্তা ৰাচং নিচ্ছারেতা. যম্পাৰুসো, ভিক্খু ন কোধনো হোতি ন কোধসামন্তা ৰাচং নিচ্ছারেতা – অযম্পি ধম্মো সোৰচস্সকরণো.

‘‘পুন চপরং, আৰুসো, ভিক্খু চোদিতো চোদকেন চোদকং নপ্পটিপ্ফরতি. যম্পাৰুসো, ভিক্খু চোদিতো চোদকেন চোদকং নপ্পটিপ্ফরতি – অযম্পি ধম্মো সোৰচস্সকরণো.

‘‘পুন চপরং, আৰুসো, ভিক্খু চোদিতো চোদকেন চোদকং ন অপসাদেতি. যম্পাৰুসো, ভিক্খু চোদিতো চোদকেন চোদকং ন অপসাদেতি – অযম্পি ধম্মো সোৰচস্সকরণো.

‘‘পুন চপরং, আৰুসো, ভিক্খু চোদিতো চোদকেন চোদকস্স ন পচ্চারোপেতি. যম্পাৰুসো, ভিক্খু চোদিতো চোদকেন চোদকস্স ন পচ্চারোপেতি – অযম্পি ধম্মো সোৰচস্সকরণো.

‘‘পুন চপরং, আৰুসো, ভিক্খু চোদিতো চোদকেন ন অঞ্ঞেনঞ্ঞং পটিচরতি, ন বহিদ্ধা কথং অপনামেতি, ন কোপঞ্চ দোসঞ্চ অপ্পচ্চযঞ্চ পাতুকরোতি. যম্পাৰুসো, ভিক্খু চোদিতো চোদকেন ন অঞ্ঞেনঞ্ঞং পটিচরতি, ন বহিদ্ধা কথং অপনামেতি, ন কোপঞ্চ দোসঞ্চ অপ্পচ্চযঞ্চ পাতুকরোতি – অযম্পি ধম্মো সোৰচস্সকরণো.

‘‘পুন চপরং, আৰুসো, ভিক্খু চোদিতো চোদকেন অপদানে সম্পাযতি. যম্পাৰুসো, ভিক্খু চোদিতো চোদকেন অপদানে সম্পাযতি – অযম্পি ধম্মো সোৰচস্সকরণো.

‘‘পুন চপরং, আৰুসো, ভিক্খু অমক্খী হোতি অপল়াসী. যম্পাৰুসো, ভিক্খু অমক্খী হোতি অপল়াসী – অযম্পি ধম্মো সোৰচস্সকরণো.

‘‘পুন চপরং, আৰুসো, ভিক্খু অনিস্সুকী হোতি অমচ্ছরী. যম্পাৰুসো, ভিক্খু অনিস্সুকী হোতি অমচ্ছরী – অযম্পি ধম্মো সোৰচস্সকরণো.

‘‘পুন চপরং, আৰুসো, ভিক্খু অসঠো হোতি অমাযাৰী. যম্পাৰুসো, ভিক্খু অসঠো হোতি অমাযাৰী – অযম্পি ধম্মো সোৰচস্সকরণো.

‘‘পুন চপরং, আৰুসো, ভিক্খু অত্থদ্ধো হোতি অনতিমানী. যম্পাৰুসো, ভিক্খু অত্থদ্ধো হোতি অনতিমানী – অযম্পি ধম্মো সোৰচস্সকরণো.

‘‘পুন চপরং, আৰুসো, ভিক্খু অসন্দিট্ঠিপরামাসী হোতি অনাধানগ্গাহী সুপ্পটিনিস্সগ্গী. যম্পাৰুসো, ভিক্খু অসন্দিট্ঠিপরামাসী হোতি, অনাধানগ্গাহী সুপ্পটিনিস্সগ্গী – অযম্পি ধম্মো সোৰচস্সকরণো. ইমে ৰুচ্চন্তাৰুসো, সোৰচস্সকরণা ধম্মা.

১৮৩. ‘‘তত্রাৰুসো, ভিক্খুনা অত্তনাৰ অত্তানং এৰং অনুমিনিতব্বং [অনুমানিতব্বং (সী.)] – ‘যো খ্ৰাযং পুগ্গলো পাপিচ্ছো, পাপিকানং ইচ্ছানং ৰসং গতো, অযং মে পুগ্গলো অপ্পিযো অমনাপো; অহঞ্চেৰ খো পনস্সং পাপিচ্ছো পাপিকানং ইচ্ছানং ৰসং গতো, অহংপাস্সং পরেসং অপ্পিযো অমনাপো’তি. এৰং জানন্তেনাৰুসো, ভিক্খুনা ‘ন পাপিচ্ছো ভৰিস্সামি, ন পাপিকানং ইচ্ছানং ৰসং গতো’তি চিত্তং উপ্পাদেতব্বং.

‘‘‘যো খ্ৰাযং পুগ্গলো অত্তুক্কংসকো পরৰম্ভী, অযং মে পুগ্গলো অপ্পিযো অমনাপো; অহঞ্চেৰ খো পনস্সং অত্তুক্কংসকো পরৰম্ভী, অহংপাস্সং পরেসং অপ্পিযো অমনাপো’তি. এৰং জানন্তেনাৰুসো, ভিক্খুনা ‘অনত্তুক্কংসকো ভৰিস্সামি অপরৰম্ভী’তি চিত্তং উপ্পাদেতব্বং.

‘‘‘যো খ্ৰাযং পুগ্গলো কোধনো কোধাভিভূতো, অযং মে পুগ্গলো অপ্পিযো অমনাপো. অহঞ্চেৰ খো পনস্সং কোধনো কোধাভিভূতো, অহংপাস্সং পরেসং অপ্পিযো অমনাপো’তি. এৰং জানন্তেনাৰুসো, ভিক্খুনা ‘ন কোধনো ভৰিস্সামি ন কোধাভিভূতো’তি চিত্তং উপ্পাদেতব্বং.

‘‘‘যো খ্ৰাযং পুগ্গলো কোধনো কোধহেতু উপনাহী, অযং মে পুগ্গলো অপ্পিযো অমনাপো; অহঞ্চেৰ খো পনস্সং কোধনো কোধহেতু উপনাহী, অহংপাস্সং পরেসং অপ্পিযো অমনাপো’তি. এৰং জানন্তেনাৰুসো, ভিক্খুনা ‘ন কোধনো ভৰিস্সামি ন কোধহেতু উপনাহী’তি চিত্তং উপ্পাদেতব্বং.

‘‘‘যো খ্ৰাযং পুগ্গলো কোধনো কোধহেতু অভিসঙ্গী, অযং মে পুগ্গলো অপ্পিযো অমনাপো; অহঞ্চেৰ খো পনস্সং কোধনো কোধহেতু অভিসঙ্গী, অহংপাস্সং পরেসং অপ্পিযো অমনাপো’তি. এৰং জানন্তেনাৰুসো, ভিক্খুনা ‘ন কোধনো ভৰিস্সামি ন কোধহেতু অভিসঙ্গী’তি চিত্তং উপ্পাদেতব্বং.

‘‘‘যো খ্ৰাযং পুগ্গলো কোধনো কোধসামন্তা ৰাচং নিচ্ছারেতা, অযং মে পুগ্গলো অপ্পিযো অমনাপো; অহঞ্চেৰ খো পনস্সং কোধনো কোধসামন্তা ৰাচং নিচ্ছারেতা, অহংপাস্সং পরেসং অপ্পিযো অমনাপো’তি. এৰং জানন্তেনাৰুসো, ভিক্খুনা ‘ন কোধনো ভৰিস্সামি ন কোধসামন্তা ৰাচং নিচ্ছারেস্সামী’তি চিত্তং উপ্পাদেতব্বং.

‘‘‘যো খ্ৰাযং পুগ্গলো চোদিতো চোদকেন চোদকং পটিপ্ফরতি, অযং মে পুগ্গলো অপ্পিযো অমনাপো; অহঞ্চেৰ খো পন চোদিতো চোদকেন চোদকং পটিপ্ফরেয্যং, অহংপাস্সং পরেসং অপ্পিযো অমনাপো’তি. এৰং জানন্তেনাৰুসো, ভিক্খুনা ‘চোদিতো চোদকেন চোদকং নপ্পটিপ্ফরিস্সামী’তি চিত্তং উপ্পাদেতব্বং.

‘‘‘যো খ্ৰাযং পুগ্গলো চোদিতো চোদকেন চোদকং অপসাদেতি, অযং মে পুগ্গলো অপ্পিযো অমনাপো; অহঞ্চেৰ খো পন চোদিতো চোদকেন চোদকং অপসাদেয্যং, অহংপাস্সং পরেসং অপ্পিযো অমনাপো’তি. এৰং জানন্তেনাৰুসো, ভিক্খুনা ‘চোদিতো চোদকেন চোদকং ন অপসাদেস্সামী’তি চিত্তং উপ্পাদেতব্বং.

‘‘‘যো খ্ৰাযং পুগ্গলো চোদিতো চোদকেন চোদকস্স পচ্চারোপেতি, অযং মে পুগ্গলো অপ্পিযো অমনাপো; অহঞ্চেৰ খো পন চোদিতো চোদকেন চোদকস্স পচ্চারোপেয্যং, অহংপাস্সং পরেসং অপ্পিযো অমনাপো’তি. এৰং জানন্তেনাৰুসো, ভিক্খুনা ‘চোদিতো চোদকেন চোদকস্স ন পচ্চারোপেস্সামী’তি চিত্তং উপ্পাদেতব্বং.

‘‘‘যো খ্ৰাযং পুগ্গলো চোদিতো চোদকেন অঞ্ঞেনঞ্ঞং পটিচরতি, বহিদ্ধা কথং অপনামেতি, কোপঞ্চ দোসঞ্চ অপ্পচ্চযঞ্চ পাতুকরোতি, অযং মে পুগ্গলো অপ্পিযো অমনাপো; অহঞ্চেৰ খো পন চোদিতো চোদকেন অঞ্ঞেনঞ্ঞং পটিচরেয্যং, বহিদ্ধা কথং অপনামেয্যং, কোপঞ্চ দোসঞ্চ অপ্পচ্চযঞ্চ পাতুকরেয্যং, অহংপাস্সং পরেসং অপ্পিযো অমনাপো’তি. এৰং জানন্তেনাৰুসো, ভিক্খুনা ‘চোদিতো চোদকেন ন অঞ্ঞেনঞ্ঞং পটিচরিস্সামি, ন বহিদ্ধা কথং অপনামেস্সামি, ন কোপঞ্চ দোসঞ্চ অপ্পচ্চযঞ্চ পাতুকরিস্সামী’তি চিত্তং উপ্পাদেতব্বং.

‘‘‘যো খ্ৰাযং পুগ্গলো চোদিতো চোদকেন অপদানে ন সম্পাযতি, অযং মে পুগ্গলো অপ্পিযো অমনাপো; অহঞ্চেৰ খো পন চোদিতো চোদকেন অপদানে ন সম্পাযেয্যং, অহংপাস্সং পরেসং অপ্পিযো অমনাপো’তি. এৰং জানন্তেনাৰুসো, ভিক্খুনা ‘চোদিতো চোদকেন অপদানে সম্পাযিস্সামী’তি চিত্তং উপ্পাদেতব্বং.

‘‘‘যো খ্ৰাযং পুগ্গলো মক্খী পল়াসী, অযং মে পুগ্গলো অপ্পিযো অমনাপো; অহঞ্চেৰ খো পনস্সং মক্খী পল়াসী, অহংপাস্সং পরেসং অপ্পিযো অমনাপো’তি. এৰং জানন্তেনাৰুসো, ভিক্খুনা ‘অমক্খী ভৰিস্সামি অপল়াসী’তি চিত্তং উপ্পাদেতব্বং.

‘‘‘যো খ্ৰাযং পুগ্গলো ইস্সুকী মচ্ছরী, অযং মে পুগ্গলো অপ্পিযো অমনাপো; অহঞ্চেৰ খো পনস্সং ইস্সুকী মচ্ছরী, অহংপাস্সং পরেসং অপ্পিযো অমনাপো’তি. এৰং জানন্তেনাৰুসো, ভিক্খুনা ‘অনিস্সুকী ভৰিস্সামি অমচ্ছরী’তি চিত্তং উপ্পাদেতব্বং.

‘‘‘যো খ্ৰাযং পুগ্গলো সঠো মাযাৰী, অযং মে পুগ্গলো অপ্পিযো অমনাপো; অহঞ্চেৰ খো পনস্সং সঠো মাযাৰী, অহংপাস্সং পরেসং অপ্পিযো অমনাপো’তি. এৰং জানন্তেনাৰুসো, ভিক্খুনা ‘অসঠো ভৰিস্সামি অমাযাৰী’তি চিত্তং উপ্পাদেতব্বং.

‘‘‘যো খ্ৰাযং পুগ্গলো থদ্ধো অতিমানী, অযং মে পুগ্গলো অপ্পিযো অমনাপো; অহঞ্চেৰ খো পনস্সং থদ্ধো অতিমানী, অহংপাস্সং পরেসং অপ্পিযো অমনাপো’তি. এৰং জানন্তেনাৰুসো, ভিক্খুনা ‘অত্থদ্ধো ভৰিস্সামি অনতিমানী’তি চিত্তং উপ্পাদেতব্বং.

‘‘‘যো খ্ৰাযং পুগ্গলো সন্দিট্ঠিপরামাসী আধানগ্গাহী দুপ্পটিনিস্সগ্গী, অযং মে পুগ্গলো অপ্পিযো অমনাপো; অহঞ্চেৰ খো পনস্সং সন্দিট্ঠিপরামাসী আধানগ্গাহী দুপ্পটিনিস্সগ্গী, অহংপাস্সং পরেসং অপ্পিযো অমনাপো’তি. এৰং জানন্তেনাৰুসো, ভিক্খুনা ‘অসন্দিট্ঠিপরামাসী ভৰিস্সামি অনাধানগ্গাহী সুপ্পটিনিস্সগ্গী’তি চিত্তং উপ্পাদেতব্বং.

১৮৪. ‘‘তত্রাৰুসো, ভিক্খুনা অত্তনাৰ অত্তানং এৰং পচ্চৰেক্খিতব্বং – ‘কিং নু খোম্হি পাপিচ্ছো, পাপিকানং ইচ্ছানং ৰসং গতো’তি? সচে, আৰুসো, ভিক্খু পচ্চৰেক্খমানো এৰং জানাতি – ‘পাপিচ্ছো খোম্হি, পাপিকানং ইচ্ছানং ৰসং গতো’তি, তেনাৰুসো, ভিক্খুনা তেসংযেৰ পাপকানং অকুসলানং ধম্মানং পহানায ৰাযমিতব্বং. সচে পনাৰুসো, ভিক্খু পচ্চৰেক্খমানো এৰং জানাতি – ‘ন খোম্হি পাপিচ্ছো, ন পাপিকানং ইচ্ছানং ৰসং গতো’তি, তেনাৰুসো, ভিক্খুনা তেনেৰ পীতিপামোজ্জেন ৰিহাতব্বং অহোরত্তানুসিক্খিনা কুসলেসু ধম্মেসু.

‘‘পুন চপরং, আৰুসো, ভিক্খুনা অত্তনাৰ অত্তানং এৰং পচ্চৰেক্খিতব্বং – ‘কিং নু খোম্হি অত্তুক্কংসকো পরৰম্ভী’তি? সচে, আৰুসো, ভিক্খু পচ্চৰেক্খমানো এৰং জানাতি – ‘অত্তুক্কংসকো খোম্হি পরৰম্ভী’তি, তেনাৰুসো, ভিক্খুনা তেসংযেৰ পাপকানং অকুসলানং ধম্মানং পহানায ৰাযমিতব্বং. সচে পনাৰুসো, ভিক্খু পচ্চৰেক্খমানো এৰং জানাতি – ‘অনত্তুক্কংসকো খোম্হি অপরৰম্ভী’তি, তেনাৰুসো, ভিক্খুনা তেনেৰ পীতিপামোজ্জেন ৰিহাতব্বং অহোরত্তানুসিক্খিনা কুসলেসু ধম্মেসু.

‘‘পুন চপরং, আৰুসো, ভিক্খুনা অত্তনাৰ অত্তানং এৰং পচ্চৰেক্খিতব্বং – ‘কিং নু খোম্হি কোধনো কোধাভিভূতো’তি? সচে, আৰুসো, ভিক্খু পচ্চৰেক্খমানো এৰং জানাতি – ‘কোধনো খোম্হি কোধাভিভূতো’তি, তেনাৰুসো, ভিক্খুনা তেসংযেৰ পাপকানং অকুসলানং ধম্মানং পহানায ৰাযমিতব্বং. সচে পনাৰুসো, ভিক্খু পচ্চৰেক্খমানো এৰং জানাতি – ‘ন খোম্হি কোধনো কোধাভিভূতো’তি, তেনাৰুসো, ভিক্খুনা তেনেৰ পীতিপামোজ্জেন ৰিহাতব্বং অহোরত্তানুসিক্খিনা কুসলেসু ধম্মেসু.

‘‘পুন চপরং, আৰুসো, ভিক্খুনা অত্তনাৰ অত্তানং এৰং পচ্চৰেক্খিতব্বং – ‘কিং নু খোম্হি কোধনো কোধহেতু উপনাহী’তি? সচে, আৰুসো, ভিক্খু পচ্চৰেক্খমানো এৰং জানাতি ‘কোধনো খোম্হি কোধহেতু উপনাহী’তি, তেনাৰুসো, ভিক্খুনা তেসংযেৰ পাপকানং অকুসলানং ধম্মানং পহানায ৰাযমিতব্বং. সচে পনাৰুসো, ভিক্খু পচ্চৰেক্খমানো এৰং জানাতি ‘ন খোম্হি কোধনো কোধহেতু উপনাহী’তি, তেনাৰুসো, ভিক্খুনা তেনেৰ পীতিপামোজ্জেন ৰিহাতব্বং অহোরত্তানুসিক্খিনা কুসলেসু ধম্মেসু.

‘‘পুন চপরং, আৰুসো, ভিক্খুনা অত্তনাৰ অত্তানং এৰং পচ্চৰেক্খিতব্বং – ‘কিং নু খোম্হি কোধনো কোধহেতু অভিসঙ্গী’তি? সচে, আৰুসো, ভিক্খু পচ্চৰেক্খমানো এৰং জানাতি – ‘কোধনো খোম্হি কোধহেতু অভিসঙ্গী’তি, তেনাৰুসো, ভিক্খুনা তেসংযেৰ পাপকানং অকুসলানং ধম্মানং পহানায ৰাযমিতব্বং. সচে পনাৰুসো, ভিক্খু পচ্চৰেক্খমানো এৰং জানাতি – ‘ন খোম্হি কোধনো কোধহেতু অভিসঙ্গী’তি, তেনাৰুসো, ভিক্খুনা তেনেৰ পীতিপামোজ্জেন ৰিহাতব্বং অহোরত্তানুসিক্খিনা কুসলেসু ধম্মেসু.

‘‘পুন চপরং, আৰুসো, ভিক্খুনা অত্তনাৰ অত্তানং এৰং পচ্চৰেক্খিতব্বং – ‘কিং নু খোম্হি কোধনো কোধসামন্তা ৰাচং নিচ্ছারেতা’তি? সচে, আৰুসো, ভিক্খু পচ্চৰেক্খমানো এৰং জানাতি – ‘কোধনো খোম্হি কোধসামন্তা ৰাচং নিচ্ছারেতা’তি, তেনাৰুসো, ভিক্খুনা তেসংযেৰ পাপকানং অকুসলানং ধম্মানং পহানায ৰাযমিতব্বং. সচে পনাৰুসো, ভিক্খু পচ্চৰেক্খমানো এৰং জানাতি – ‘ন খোম্হি কোধনো কোধসামন্তা ৰাচং নিচ্ছারেতা’তি, তেনাৰুসো, ভিক্খুনা তেনেৰ পীতিপামোজ্জেন ৰিহাতব্বং অহোরত্তানুসিক্খিনা কুসলেসু ধম্মেসু.

‘‘পুন চপরং, আৰুসো, ভিক্খুনা অত্তনাৰ অত্তানং এৰং পচ্চৰেক্খিতব্বং – ‘কিং নু খোম্হি চোদিতো চোদকেন চোদকং পটিপ্ফরামী’তি? সচে, আৰুসো, ভিক্খু পচ্চৰেক্খমানো এৰং জানাতি ‘চোদিতো খোম্হি চোদকেন চোদকং পটিপ্ফরামী’তি, তেনাৰুসো, ভিক্খুনা তেসংযেৰ পাপকানং অকুসলানং ধম্মানং পহানায ৰাযমিতব্বং. সচে পনাৰুসো, ভিক্খু পচ্চৰেক্খমানো এৰং জানাতি – ‘চোদিতো খোম্হি চোদকেন চোদকং নপ্পটিপ্ফরামী’তি, তেনাৰুসো, ভিক্খুনা তেনেৰ পীতিপামোজ্জেন ৰিহাতব্বং অহোরত্তানুসিক্খিনা কুসলেসু ধম্মেসু.

‘‘পুন চপরং, আৰুসো, ভিক্খুনা অত্তনাৰ অত্তানং এৰং পচ্চৰেক্খিতব্বং – ‘কিং নু খোম্হি চোদিতো চোদকেন চোদকং অপসাদেমী’তি? সচে, আৰুসো, ভিক্খু পচ্চৰেক্খমানো এৰং জানাতি ‘চোদিতো খোম্হি চোদকেন চোদকং অপসাদেমী’তি, তেনাৰুসো, ভিক্খুনা তেসংযেৰ পাপকানং অকুসলানং ধম্মানং পহানায ৰাযমিতব্বং. সচে পনাৰুসো, ভিক্খু পচ্চৰেক্খমানো এৰং জানাতি – ‘চোদিতো খোম্হি চোদকেন চোদকং ন অপসাদেমী’তি, তেনাৰুসো, ভিক্খুনা তেনেৰ পীতিপামোজ্জেন ৰিহাতব্বং অহোরত্তানুসিক্খিনা কুসলেসু ধম্মেসু.

‘‘পুন চপরং, আৰুসো, ভিক্খুনা অত্তনাৰ অত্তানং এৰং পচ্চৰেক্খিতব্বং – ‘কিং নু খোম্হি চোদিতো চোদকেন চোদকস্স পচ্চারোপেমী’তি? সচে, আৰুসো, ভিক্খু পচ্চৰেক্খমানো এৰং জানাতি – ‘চোদিতো খোম্হি চোদকেন চোদকস্স পচ্চারোপেমী’তি, তেনাৰুসো, ভিক্খুনা তেসংযেৰ পাপকানং অকুসলানং ধম্মানং পহানায ৰাযমিতব্বং. সচে পনাৰুসো, ভিক্খু পচ্চৰেক্খমানো এৰং জানাতি – ‘চোদিতো খোম্হি চোদকেন চোদকস্স ন পচ্চারোপেমী’তি, তেনাৰুসো, ভিক্খুনা তেনেৰ পীতিপামোজ্জেন ৰিহাতব্বং অহোরত্তানুসিক্খিনা কুসলেসু ধম্মেসু.

‘‘পুন চপরং, আৰুসো, ভিক্খুনা অত্তনাৰ অত্তানং এৰং পচ্চৰেক্খিতব্বং – ‘কিং নু খোম্হি চোদিতো চোদকেন অঞ্ঞেনঞ্ঞং পটিচরামি, বহিদ্ধা কথং অপনামেমি, কোপঞ্চ দোসঞ্চ অপ্পচ্চযঞ্চ পাতুকরোমী’তি? সচে, আৰুসো, ভিক্খু পচ্চৰেক্খমানো এৰং জানাতি – ‘চোদিতো খোম্হি চোদকেন অঞ্ঞেনঞ্ঞং পটিচরামি, বহিদ্ধা কথং অপনামেমি, কোপঞ্চ দোসঞ্চ অপ্পচ্চযঞ্চ পাতুকরোমী’তি, তেনাৰুসো, ভিক্খুনা তেসংযেৰ পাপকানং অকুসলানং ধম্মানং পহানায ৰাযমিতব্বং. সচে পনাৰুসো, ভিক্খু পচ্চৰেক্খমানো এৰং জানাতি – ‘চোদিতো খোম্হি চোদকেন ন অঞ্ঞেনঞ্ঞং পটিচরামি, ন বহিদ্ধা কথং অপনামেমি, ন কোপঞ্চ দোসঞ্চ অপ্পচ্চযঞ্চ পাতুকরোমী’তি, তেনাৰুসো, ভিক্খুনা তেনেৰ পীতিপামোজ্জেন ৰিহাতব্বং অহোরত্তানুসিক্খিনা কুসলেসু ধম্মেসু.

‘‘পুন চপরং, আৰুসো, ভিক্খুনা অত্তনাৰ অত্তানং এৰং পচ্চৰেক্খিতব্বং – ‘কিং নু খোম্হি চোদিতো চোদকেন অপদানে ন সম্পাযামী’তি? সচে, আৰুসো, ভিক্খু পচ্চৰেক্খমানো এৰং জানাতি – ‘চোদিতো খোম্হি চোদকেন অপদানে ন সম্পাযামী’তি, তেনাৰুসো, ভিক্খুনা তেসংযেৰ পাপকানং অকুসলানং ধম্মানং পহানায ৰাযমিতব্বং. সচে পনাৰুসো, ভিক্খু পচ্চৰেক্খমানো এৰং জানাতি – ‘চোদিতো খোম্হি চোদকেন অপদানে সম্পাযামী’তি, তেনাৰুসো, ভিক্খুনা তেনেৰ পীতিপামোজ্জেন ৰিহাতব্বং অহোরত্তানুসিক্খিনা কুসলেসু ধম্মেসু.

‘‘পুন চপরং, আৰুসো, ভিক্খুনা অত্তনাৰ অত্তানং এৰং পচ্চৰেক্খিতব্বং – ‘কিং নু খোম্হি মক্খী পল়াসী’তি? সচে, আৰুসো, ভিক্খু পচ্চৰেক্খমানো এৰং জানাতি – ‘মক্খী খোম্হি পল়াসী’তি, তেনাৰুসো, ভিক্খুনা তেসংযেৰ পাপকানং অকুসলানং ধম্মানং পহানায ৰাযমিতব্বং. সচে পনাৰুসো, ভিক্খু পচ্চৰেক্খমানো এৰং জানাতি – ‘অমক্খী খোম্হি অপল়াসী’তি, তেনাৰুসো, ভিক্খুনা তেনেৰ পীতিপামোজ্জেন ৰিহাতব্বং অহোরত্তানুসিক্খিনা কুসলেসু ধম্মেসু.

‘‘পুন চপরং, আৰুসো, ভিক্খুনা অত্তনাৰ অত্তানং এৰং পচ্চৰেক্খিতব্বং – ‘কিং নু খোম্হি ইস্সুকী মচ্ছরী’তি? সচে, আৰুসো, ভিক্খু পচ্চৰেক্খমানো এৰং জানাতি – ‘ইস্সুকী খোম্হি মচ্ছরী’তি, তেনাৰুসো, ভিক্খুনা তেসংযেৰ পাপকানং অকুসলানং ধম্মানং পহানায ৰাযমিতব্বং. সচে পনাৰুসো, ভিক্খু পচ্চৰেক্খমানো এৰং জানাতি – ‘অনিস্সুকী খোম্হি অমচ্ছরী’তি, তেনাৰুসো, ভিক্খুনা তেনেৰ পীতিপামোজ্জেন ৰিহাতব্বং অহোরত্তানুসিক্খিনা কুসলেসু ধম্মেসু.

‘‘পুন চপরং, আৰুসো, ভিক্খুনা অত্তনাৰ অত্তানং এৰং পচ্চৰেক্খিতব্বং – ‘কিং নু খোম্হি সঠো মাযাৰী’তি? সচে, আৰুসো, ভিক্খু পচ্চৰেক্খমানো এৰং জানাতি – ‘সঠো খোম্হি মাযাৰী’তি, তেনাৰুসো, ভিক্খুনা তেসংযেৰ পাপকানং অকুসলানং ধম্মানং পহানায ৰাযমিতব্বং. সচে পনাৰুসো, ভিক্খু পচ্চৰেক্খমানো এৰং জানাতি – ‘অসঠো খোম্হি অমাযাৰী’তি, তেনাৰুসো, ভিক্খুনা তেনেৰ পীতিপামোজ্জেন ৰিহাতব্বং অহোরত্তানুসিক্খিনা কুসলেসু ধম্মেসু.

‘‘পুন চপরং, আৰুসো, ভিক্খুনা অত্তনাৰ অত্তানং এৰং পচ্চৰেক্খিতব্বং – ‘কিং নু খোম্হি থদ্ধো অতিমানী’তি? সচে, আৰুসো, ভিক্খু পচ্চৰেক্খমানো এৰং জানাতি – ‘থদ্ধো খোম্হি অতিমানী’তি, তেনাৰুসো, ভিক্খুনা তেসংযেৰ পাপকানং অকুসলানং ধম্মানং পহানায ৰাযমিতব্বং. সচে পনাৰুসো, ভিক্খু পচ্চৰেক্খমানো এৰং জানাতি – ‘অত্থদ্ধো খোম্হি অনতিমানী’তি, তেনাৰুসো, ভিক্খুনা তেনেৰ পীতিপামোজ্জেন ৰিহাতব্বং অহোরত্তানুসিক্খিনা কুসলেসু ধম্মেসু.

‘‘পুন চপরং, আৰুসো, ভিক্খুনা অত্তনাৰ অত্তানং এৰং পচ্চৰেক্খিতব্বং – ‘কিং নু খোম্হি সন্দিট্ঠিপরামাসী আধানগ্গাহী দুপ্পটিনিস্সগ্গী’তি? সচে, আৰুসো, ভিক্খু পচ্চৰেক্খমানো এৰং জানাতি – ‘সন্দিট্ঠিপরামাসী খোম্হি আধানগ্গাহী দুপ্পটিনিস্সগ্গী’তি, তেনাৰুসো, ভিক্খুনা তেসংযেৰ পাপকানং অকুসলানং ধম্মানং পহানায ৰাযমিতব্বং. সচে পনাৰুসো, ভিক্খু পচ্চৰেক্খমানো এৰং জানাতি – ‘অসন্দিট্ঠিপরামাসী খোম্হি অনাধানগ্গাহী সুপ্পটিনিস্সগ্গী’তি, তেনাৰুসো, ভিক্খুনা তেনেৰ পীতিপামোজ্জেন ৰিহাতব্বং অহোরত্তানুসিক্খিনা কুসলেসু ধম্মেসু.

‘‘সচে, আৰুসো, ভিক্খু পচ্চৰেক্খমানো সব্বেপিমে পাপকে অকুসলে ধম্মে অপ্পহীনে অত্তনি সমনুপস্সতি, তেনাৰুসো, ভিক্খুনা সব্বেসংযেৰ ইমেসং পাপকানং অকুসলানং ধম্মানং পহানায ৰাযমিতব্বং. সচে পনাৰুসো, ভিক্খু পচ্চৰেক্খমানো সব্বেপিমে পাপকে অকুসলে ধম্মে পহীনে অত্তনি সমনুপস্সতি, তেনাৰুসো, ভিক্খুনা তেনেৰ পীতিপামোজ্জেন ৰিহাতব্বং, অহোরত্তানুসিক্খিনা কুসলেসু ধম্মেসু.

‘‘সেয্যথাপি, আৰুসো, ইত্থী ৰা পুরিসো ৰা, দহরো যুৰা মণ্ডনজাতিকো, আদাসে ৰা পরিসুদ্ধে পরিযোদাতে, অচ্ছে ৰা উদকপত্তে, সকং মুখনিমিত্তং পচ্চৰেক্খমানো, সচে তত্থ পস্সতি রজং ৰা অঙ্গণং ৰা, তস্সেৰ রজস্স ৰা অঙ্গণস্স ৰা পহানায ৰাযমতি; নো চে তত্থ পস্সতি রজং ৰা অঙ্গণং ৰা, তেনেৰ অত্তমনো হোতি – ‘লাভা ৰত মে, পরিসুদ্ধং ৰত মে’তি. এৰমেৰ খো, আৰুসো, সচে ভিক্খু পচ্চৰেক্খমানো সব্বেপিমে পাপকে অকুসলে ধম্মে অপ্পহীনে অত্তনি সমনুপস্সতি, তেনাৰুসো, ভিক্খুনা সব্বেসংযেৰ ইমেসং পাপকানং অকুসলানং ধম্মানং পহানায ৰাযমিতব্বং. সচে পনাৰুসো, ভিক্খু পচ্চৰেক্খমানো সব্বেপিমে পাপকে অকুসলে ধম্মে পহীনে অত্তনি সমনুপস্সতি, তেনাৰুসো, ভিক্খুনা তেনেৰ পীতিপামোজ্জেন ৰিহাতব্বং, অহোরত্তানুসিক্খিনা কুসলেসু ধম্মেসূ’’তি.

ইদমৰোচাযস্মা মহামোগ্গল্লানো. অত্তমনা তে ভিক্খূ আযস্মতো মহামোগ্গল্লানস্স ভাসিতং অভিনন্দুন্তি.

অনুমানসুত্তং নিট্ঠিতং পঞ্চমং.