২. মহাসীহনাদসুত্তং

১৪৬. এৰং মে সুতং – একং সমযং ভগৰা ৰেসালিযং ৰিহরতি বহিনগরে অপরপুরে ৰনসণ্ডে. তেন খো পন সমযেন সুনক্খত্তো লিচ্ছৰিপুত্তো অচিরপক্কন্তো হোতি ইমস্মা ধম্মৰিনযা. সো ৰেসালিযং পরিসতি [পরিসতিং (সী. পী.)] এৰং [এতং (পী. ক.)] ৰাচং ভাসতি – ‘‘নত্থি সমণস্স গোতমস্স উত্তরি [উত্তরিং (পী.)] মনুস্সধম্মা অলমরিযঞাণদস্সনৰিসেসো. তক্কপরিযাহতং সমণো গোতমো ধম্মং দেসেতি ৰীমংসানুচরিতং সযংপটিভানং. যস্স চ খ্ৰাস্স অত্থায ধম্মো দেসিতো সো নিয্যাতি তক্করস্স সম্মা দুক্খক্খযাযা’’তি.

অথ খো আযস্মা সারিপুত্তো পুব্বণ্হসমযং নিৰাসেত্ৰা পত্তচীৰরমাদায ৰেসালিং পিণ্ডায পাৰিসি. অস্সোসি খো আযস্মা সারিপুত্তো সুনক্খত্তস্স লিচ্ছৰিপুত্তস্স ৰেসালিযং পরিসতি এৰং ৰাচং ভাসমানস্স – ‘‘নত্থি সমণস্স গোতমস্স উত্তরিমনুস্সধম্মা অলমরিযঞাণদস্সনৰিসেসো. তক্কপরিযাহতং সমণো গোতমো ধম্মং দেসেতি ৰীমংসানুচরিতং সযংপটিভানং. যস্স চ খ্ৰাস্স অত্থায ধম্মো দেসিতো সো নিয্যাতি তক্করস্স সম্মা দুক্খক্খযাযা’’তি.

অথ খো আযস্মা সারিপুত্তো ৰেসালিযং পিণ্ডায চরিত্ৰা পচ্ছাভত্তং পিণ্ডপাতপটিক্কন্তো যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি. একমন্তং নিসিন্নো খো আযস্মা সারিপুত্তো ভগৰন্তং এতদৰোচ – ‘‘সুনক্খত্তো, ভন্তে, লিচ্ছৰিপুত্তো অচিরপক্কন্তো ইমস্মা ধম্মৰিনযা. সো ৰেসালিযং পরিসতি এৰং ৰাচং ভাসতি – ‘নত্থি সমণস্স গোতমস্স উত্তরিমনুস্সধম্মা অলমরিযঞাণদস্সনৰিসেসো. তক্কপরিযাহতং সমণো গোতমো ধম্মং দেসেতি ৰীমংসানুচরিতং সযংপটিভানং. যস্স চ খ্ৰাস্স অত্থায ধম্মো দেসিতো সো নিয্যাতি তক্করস্স সম্মা দুক্খক্খযাযা’’’তি.

১৪৭. ‘‘কোধনো হেসো, সারিপুত্ত, সুনক্খত্তো মোঘপুরিসো. কোধা চ পনস্স এসা ৰাচা ভাসিতা. ‘অৰণ্ণং ভাসিস্সামী’তি খো, সারিপুত্ত, সুনক্খত্তো মোঘপুরিসো ৰণ্ণংযেৰ তথাগতস্স ভাসতি. ৰণ্ণো হেসো, সারিপুত্ত, তথাগতস্স যো এৰং ৰদেয্য – ‘যস্স চ খ্ৰাস্স অত্থায ধম্মো দেসিতো সো নিয্যাতি তক্করস্স সম্মা দুক্খক্খযাযা’তি.

‘‘অযম্পি হি নাম, সারিপুত্ত, সুনক্খত্তস্স মোঘপুরিসস্স মযি ধম্মন্ৰযো ন ভৰিস্সতি – ‘ইতিপি সো ভগৰা অরহং সম্মাসম্বুদ্ধো ৰিজ্জাচরণসম্পন্নো সুগতো লোকৰিদূ অনুত্তরো পুরিসদম্মসারথি, সত্থা দেৰমনুস্সানং, বুদ্ধো ভগৰা’তি.

‘‘অযম্পি হি নাম, সারিপুত্ত, সুনক্খত্তস্স মোঘপুরিসস্স মযি ধম্মন্ৰযো ন ভৰিস্সতি – ‘ইতিপি সো ভগৰা অনেকৰিহিতং ইদ্ধিৰিধং পচ্চনুভোতি – একোপি হুত্ৰা বহুধা হোতি, বহুধাপি হুত্ৰা একো হোতি; আৰিভাৰং, তিরোভাৰং; তিরোকুট্টং তিরোপাকারং তিরোপব্বতং অসজ্জমানো গচ্ছতি, সেয্যথাপি আকাসে; পথৰিযাপি উম্মুজ্জনিমুজ্জং করোতি, সেয্যথাপি উদকে; উদকেপি অভিজ্জমানো গচ্ছতি, সেয্যথাপি পথৰিযং; আকাসেপি পল্লঙ্কেন কমতি, সেয্যথাপি পক্খী সকুণো; ইমেপি চন্দিমসূরিযে এৰংমহিদ্ধিকে এৰংমহানুভাৰে পাণিনা পরিমসতি পরিমজ্জতি; যাৰ ব্রহ্মলোকাপি কাযেন ৰসং ৰত্তেতী’তি.

‘‘অযম্পি হি নাম, সারিপুত্ত, সুনক্খত্তস্স মোঘপুরিসস্স মযি ধম্মন্ৰযো ন ভৰিস্সতি – ‘ইতিপি সো ভগৰা দিব্বায সোতধাতুযা ৰিসুদ্ধায অতিক্কন্তমানুসিকায উভো সদ্দে সুণাতি – দিব্বে চ মানুসে চ, যে দূরে সন্তিকে চা’তি.

‘‘অযম্পি হি নাম, সারিপুত্ত, সুনক্খত্তস্স মোঘপুরিসস্স মযি ধম্মন্ৰযো ন ভৰিস্সতি – ‘ইতিপি সো ভগৰা পরসত্তানং পরপুগ্গলানং চেতসা চেতো পরিচ্চ পজানাতি – সরাগং ৰা চিত্তং সরাগং চিত্তন্তি পজানাতি, ৰীতরাগং ৰা চিত্তং ৰীতরাগং চিত্তন্তি পজানাতি; সদোসং ৰা চিত্তং সদোসং চিত্তন্তি পজানাতি, ৰীতদোসং ৰা চিত্তং ৰীতদোসং চিত্তন্তি পজানাতি; সমোহং ৰা চিত্তং সমোহং চিত্তন্তি পজানাতি, ৰীতমোহং ৰা চিত্তং ৰীতমোহং চিত্তন্তি পজানাতি; সংখিত্তং ৰা চিত্তং সংখিত্তং চিত্তন্তি পজানাতি, ৰিক্খিত্তং ৰা চিত্তং ৰিক্খিত্তং চিত্তন্তি পজানাতি; মহগ্গতং ৰা চিত্তং মহগ্গতং চিত্তন্তি পজানাতি, অমহগ্গতং ৰা চিত্তং অমহগ্গতং চিত্তন্তি পজানাতি; সউত্তরং ৰা চিত্তং সউত্তরং চিত্তন্তি পজানাতি, অনুত্তরং ৰা চিত্তং অনুত্তরং চিত্তন্তি পজানাতি; সমাহিতং ৰা চিত্তং সমাহিতং চিত্তন্তি পজানাতি, অসমাহিতং ৰা চিত্তং অসমাহিতং চিত্তন্তি পজানাতি; ৰিমুত্তং ৰা চিত্তং ৰিমুত্তং চিত্তন্তি পজানাতি, অৰিমুত্তং ৰা চিত্তং অৰিমুত্তং চিত্তন্তি পজানাতী’তি.

১৪৮. ‘‘দস খো পনিমানি, সারিপুত্ত, তথাগতস্স তথাগতবলানি যেহি বলেহি সমন্নাগতো তথাগতো আসভং ঠানং পটিজানাতি, পরিসাসু সীহনাদং নদতি, ব্রহ্মচক্কং পৰত্তেতি. কতমানি দস?

‘‘ইধ, সারিপুত্ত, তথাগতো ঠানঞ্চ ঠানতো অট্ঠানঞ্চ অট্ঠানতো যথাভূতং পজানাতি. যম্পি, সারিপুত্ত, তথাগতো ঠানঞ্চ ঠানতো অট্ঠানঞ্চ অট্ঠানতো যথাভূতং পজানাতি, ইদম্পি, সারিপুত্ত, তথাগতস্স তথাগতবলং হোতি যং বলং আগম্ম তথাগতো আসভং ঠানং পটিজানাতি, পরিসাসু সীহনাদং নদতি, ব্রহ্মচক্কং পৰত্তেতি.

‘‘পুন চপরং, সারিপুত্ত, তথাগতো অতীতানাগতপচ্চুপ্পন্নানং কম্মসমাদানানং ঠানসো হেতুসো ৰিপাকং যথাভূতং পজানাতি. যম্পি, সারিপুত্ত, তথাগতো অতীতানাগতপচ্চুপ্পন্নানং কম্মসমাদানানং ঠানসো হেতুসো ৰিপাকং যথাভূতং পজানাতি, ইদম্পি, সারিপুত্ত, তথাগতস্স তথাগতবলং হোতি যং বলং আগম্ম তথাগতো আসভং ঠানং পটিজানাতি, পরিসাসু সীহনাদং নদতি, ব্রহ্মচক্কং পৰত্তেতি.

‘‘পুন চপরং, সারিপুত্ত, তথাগতো সব্বত্থগামিনিং পটিপদং যথাভূতং পজানাতি. যম্পি, সারিপুত্ত, তথাগতো সব্বত্থগামিনিং পটিপদং যথাভূতং পজানাতি, ইদম্পি, সারিপুত্ত, তথাগতস্স তথাগতবলং হোতি যং বলং আগম্ম তথাগতো আসভং ঠানং পটিজানাতি, পরিসাসু সীহনাদং নদতি, ব্রহ্মচক্কং পৰত্তেতি.

‘‘পুন চপরং, সারিপুত্ত, তথাগতো অনেকধাতুনানাধাতুলোকং যথাভূতং পজানাতি. যম্পি, সারিপুত্ত, তথাগতো অনেকধাতুনানাধাতুলোকং যথাভূতং পজানাতি, ইদম্পি, সারিপুত্ত, তথাগতস্স তথাগতবলং হোতি যং বলং আগম্ম তথাগতো আসভং ঠানং পটিজানাতি, পরিসাসু সীহনাদং নদতি, ব্রহ্মচক্কং পৰত্তেতি.

‘‘পুন চপরং, সারিপুত্ত, তথাগতো সত্তানং নানাধিমুত্তিকতং যথাভূতং পজানাতি. যম্পি, সারিপুত্ত, তথাগতো সত্তানং নানাধিমুত্তিকতং যথাভূতং পজানাতি, ইদম্পি, সারিপুত্ত, তথাগতস্স তথাগতবলং হোতি যং বলং আগম্ম তথাগতো আসভং ঠানং পটিজানাতি, পরিসাসু সীহনাদং নদতি, ব্রহ্মচক্কং পৰত্তেতি.

‘‘পুন চপরং, সারিপুত্ত, তথাগতো পরসত্তানং পরপুগ্গলানং ইন্দ্রিযপরোপরিযত্তং যথাভূতং পজানাতি. যম্পি, সারিপুত্ত, তথাগতো পরসত্তানং পরপুগ্গলানং ইন্দ্রিযপরোপরিযত্তং যথাভূতং পজানাতি, ইদম্পি, সারিপুত্ত, তথাগতস্স তথাগতবলং হোতি যং বলং আগম্ম তথাগতো আসভং ঠানং পটিজানাতি, পরিসাসু সীহনাদং নদতি, ব্রহ্মচক্কং পৰত্তেতি.

‘‘পুন চপরং, সারিপুত্ত, তথাগতো ঝানৰিমোক্খসমাধিসমাপত্তীনং সংকিলেসং ৰোদানং ৰুট্ঠানং যথাভূতং পজানাতি. যম্পি, সারিপুত্ত, তথাগতো ঝানৰিমোক্খসমাধিসমাপত্তীনং সংকিলেসং ৰোদানং ৰুট্ঠানং যথাভূতং পজানাতি, ইদম্পি, সারিপুত্ত, তথাগতস্স তথাগতবলং হোতি যং বলং আগম্ম তথাগতো আসভং ঠানং পটিজানাতি, পরিসাসু সীহনাদং নদতি, ব্রহ্মচক্কং পৰত্তেতি.

‘‘পুন চপরং, সারিপুত্ত, তথাগতো অনেকৰিহিতং পুব্বেনিৰাসং অনুস্সরতি, সেয্যথিদং – একম্পি জাতিং দ্ৰেপি জাতিযো তিস্সোপি জাতিযো চতস্সোপি জাতিযো পঞ্চপি জাতিযো দসপি জাতিযো ৰীসম্পি জাতিযো তিংসম্পি জাতিযো চত্তালীসম্পি জাতিযো পঞ্ঞাসম্পি জাতিযো জাতিসতম্পি জাতিসহস্সম্পি জাতিসতসহস্সম্পি অনেকেপি সংৰট্টকপ্পে অনেকেপি ৰিৰট্টকপ্পে অনেকেপি সংৰট্টৰিৰট্টকপ্পে – ‘অমুত্রাসিং এৰংনামো এৰংগোত্তো এৰংৰণ্ণো এৰমাহারো এৰংসুখদুক্খপ্পটিসংৰেদী এৰমাযুপরিযন্তো, সো ততো চুতো অমুত্র উদপাদিং; তত্রাপাসিং এৰংনামো এৰংগোত্তো এৰংৰণ্ণো এৰমাহারো এৰংসুখদুক্খপ্পটিসংৰেদী এৰমাযুপরিযন্তো, সো ততো চুতো ইধূপপন্নো’তি. ইতি সাকারং সউদ্দেসং অনেকৰিহিতং পুব্বেনিৰাসং অনুস্সরতি. যম্পি, সারিপুত্ত, তথাগতো অনেকৰিহিতং পুব্বেনিৰাসং অনুস্সরতি, সেয্যথিদং – একম্পি জাতিং দ্ৰেপি জাতিযো…পে… ইতি সাকারং সউদ্দেসং অনেকৰিহিতং পুব্বেনিৰাসং অনুস্সরতি, ইদম্পি, সারিপুত্ত, তথাগতস্স তথাগতবলং হোতি যং বলং আগম্ম তথাগতো আসভং ঠানং পটিজানাতি, পরিসাসু সীহনাদং নদতি, ব্রহ্মচক্কং পৰত্তেতি.

‘‘পুন চপরং, সারিপুত্ত, তথাগতো দিব্বেন চক্খুনা ৰিসুদ্ধেন অতিক্কন্তমানুসকেন সত্তে পস্সতি চৰমানে উপপজ্জমানে হীনে পণীতে সুৰণ্ণে দুব্বণ্ণে সুগতে দুগ্গতে যথাকম্মূপগে সত্তে পজানাতি – ‘ইমে ৰত ভোন্তো সত্তা কাযদুচ্চরিতেন সমন্নাগতা ৰচীদুচ্চরিতেন সমন্নাগতা মনোদুচ্চরিতেন সমন্নাগতা অরিযানং উপৰাদকা মিচ্ছাদিট্ঠিকা মিচ্ছাদিট্ঠিকম্মসমাদানা, তে কাযস্স ভেদা পরং মরণা অপাযং দুগ্গতিং ৰিনিপাতং নিরযং উপপন্না. ইমে ৰা পন ভোন্তো সত্তা কাযসুচরিতেন সমন্নাগতা ৰচীসুচরিতেন সমন্নাগতা মনোসুচরিতেন সমন্নাগতা অরিযানং অনুপৰাদকা সম্মাদিট্ঠিকা সম্মাদিট্ঠিকম্মসমাদানা, তে কাযস্স ভেদা পরং মরণা সুগতিং সগ্গং লোকং উপপন্না’তি. ইতি দিব্বেন চক্খুনা ৰিসুদ্ধেন অতিক্কন্তমানুসকেন সত্তে পস্সতি চৰমানে উপপজ্জমানে হীনে পণীতে সুৰণ্ণে দুব্বণ্ণে সুগতে দুগ্গতে যথাকম্মূপগে সত্তে পজানাতি. যম্পি, সারিপুত্ত, তথাগতো দিব্বেন চক্খুনা ৰিসুদ্ধেন অতিক্কন্তমানুসকেন সত্তে পস্সতি চৰমানে উপপজ্জমানে হীনে পণীতে সুৰণ্ণে দুব্বণ্ণে সুগতে দুগ্গতে যথাকম্মূপগে সত্তে পজানাতি – ‘ইমে ৰত ভোন্তো সত্তা কাযদুচ্চরিতেন সমন্নাগতা ৰচীদুচ্চরিতেন সমন্নাগতা মনোদুচ্চরিতেন সমন্নাগতা অরিযানং উপৰাদকা মিচ্ছাদিট্ঠিকা মিচ্ছাদিট্ঠিকম্মসমাদানা, তে কাযস্স ভেদা পরং মরণা অপাযং দুগ্গতিং ৰিনিপাতং নিরযং উপপন্না. ইমে ৰা পন ভোন্তো সত্তা কাযসুচরিতেন সমন্নাগতা ৰচীসুচরিতেন সমন্নাগতা মনোসুচরিতেন সমন্নাগতা অরিযানং অনুপৰাদকা সম্মাদিট্ঠিকা সম্মাদিট্ঠিকম্মসমাদানা, তে কাযস্স ভেদা পরং মরণা সুগতিং সগ্গং লোকং উপপন্না’তি. ইতি দিব্বেন চক্খুনা ৰিসুদ্ধেন অতিক্কন্তমানুসকেন সত্তে পস্সতি চৰমানে উপপজ্জমানে হীনে পণীতে সুৰণ্ণে দুব্বণ্ণে সুগতে দুগ্গতে যথাকম্মূপগে সত্তে পজানাতি. ইদম্পি, সারিপুত্ত, তথাগতস্স তথাগতবলং হোতি যং বলং আগম্ম তথাগতো আসভং ঠানং পটিজানাতি, পরিসাসু সীহনাদং নদতি, ব্রহ্মচক্কং পৰত্তেতি.

‘‘পুন চপরং, সারিপুত্ত, তথাগতো আসৰানং খযা অনাসৰং চেতোৰিমুত্তিং পঞ্ঞাৰিমুত্তিং দিট্ঠেৰ ধম্মে সযং অভিঞ্ঞা সচ্ছিকত্ৰা উপসম্পজ্জ ৰিহরতি. যম্পি, সারিপুত্ত, তথাগতো আসৰানং খযা অনাসৰং চেতোৰিমুত্তিং পঞ্ঞাৰিমুত্তিং দিট্ঠেৰ ধম্মে সযং অভিঞ্ঞা সচ্ছিকত্ৰা উপসম্পজ্জ ৰিহরতি, ইদম্পি, সারিপুত্ত, তথাগতস্স তথাগতবলং হোতি যং বলং আগম্ম তথাগতো আসভং ঠানং পটিজানাতি, পরিসাসু সীহনাদং নদতি, ব্রহ্মচক্কং পৰত্তেতি.

‘‘ইমানি খো, সারিপুত্ত, দস তথাগতস্স তথাগতবলানি যেহি বলেহি সমন্নাগতো তথাগতো আসভং ঠানং পটিজানাতি, পরিসাসু সীহনাদং নদতি, ব্রহ্মচক্কং পৰত্তেতি.

১৪৯. ‘‘যো খো মং, সারিপুত্ত, এৰং জানন্তং এৰং পস্সন্তং এৰং ৰদেয্য – ‘নত্থি সমণস্স গোতমস্স উত্তরিমনুস্সধম্মা অলমরিযঞাণদস্সনৰিসেসো; তক্কপরিযাহতং সমণো গোতমো ধম্মং দেসেতি ৰীমংসানুচরিতং সযংপটিভান’ন্তি, তং, সারিপুত্ত, ৰাচং অপ্পহায তং চিত্তং অপ্পহায তং দিট্ঠিং অপ্পটিনিস্সজ্জিত্ৰা যথাভতং নিক্খিত্তো এৰং নিরযে. সেয্যথাপি, সারিপুত্ত, ভিক্খু সীলসম্পন্নো সমাধিসম্পন্নো পঞ্ঞাসম্পন্নো দিট্ঠেৰ ধম্মে অঞ্ঞং আরাধেয্য, এৰং সম্পদমিদং, সারিপুত্ত, ৰদামি. তং ৰাচং অপ্পহায, তং চিত্তং অপ্পহায তং দিট্ঠিং অপ্পটিনিস্সজ্জিত্ৰা যথাভতং নিক্খিত্তো এৰং নিরযে.

১৫০. ‘‘চত্তারিমানি, সারিপুত্ত, তথাগতস্স ৰেসারজ্জানি যেহি ৰেসারজ্জেহি সমন্নাগতো তথাগতো আসভং ঠানং পটিজানাতি, পরিসাসু সীহনাদং নদতি, ব্রহ্মচক্কং পৰত্তেতি. কতমানি চত্তারি?

‘‘‘সম্মাসম্বুদ্ধস্স তে পটিজানতো ইমে ধম্মা অনভিসম্বুদ্ধা’তি. তত্র ৰত মং সমণো ৰা ব্রাহ্মণো ৰা দেৰো ৰা মারো ৰা ব্রহ্মা ৰা কোচি ৰা লোকস্মিং সহধম্মেন পটিচোদেস্সতীতি নিমিত্তমেতং, সারিপুত্ত, ন সমনুপস্সামি. এতমহং [এতম্পহং (সী. পী.)], সারিপুত্ত, নিমিত্তং অসমনুপস্সন্তো খেমপ্পত্তো অভযপ্পত্তো ৰেসারজ্জপ্পত্তো ৰিহরামি.

‘‘‘খীণাসৰস্স তে পটিজানতো ইমে আসৰা অপরিক্খীণা’তি. তত্র ৰত মং সমণো ৰা ব্রাহ্মণো ৰা দেৰো ৰা মারো ৰা ব্রহ্মা ৰা কোচি ৰা লোকস্মিং সহধম্মেন পটিচোদেস্সতীতি নিমিত্তমেতং, সারিপুত্ত, ন সমনুপস্সামি. এতমহং, সারিপুত্ত, নিমিত্তং অসমনুপস্সন্তো খেমপ্পত্তো অভযপ্পত্তো ৰেসারজ্জপ্পত্তো ৰিহরামি.

‘‘‘যে খো পন তে অন্তরাযিকা ধম্মা ৰুত্তা, তে পটিসেৰতো নালং অন্তরাযাযা’তি. তত্র ৰত মং সমণো ৰা ব্রাহ্মণো ৰা দেৰো ৰা মারো ৰা ব্রহ্মা ৰা কোচি ৰা লোকস্মিং সহধম্মেন পটিচোদেস্সতীতি নিমিত্তমেতং, সারিপুত্ত, ন সমনুপস্সামি. এতমহং, সারিপুত্ত, নিমিত্তং অসমনুপস্সন্তো খেমপ্পত্তো অভযপ্পত্তো ৰেসারজ্জপ্পত্তো ৰিহরামি.

‘‘‘যস্স খো পন তে অত্থায ধম্মো দেসিতো, সো ন নিয্যাতি তক্করস্স সম্মা দুক্খক্খযাযা’তি. তত্র ৰত মং সমণো ৰা ব্রাহ্মণো ৰা দেৰো ৰা মারো ৰা ব্রহ্মা ৰা কোচি ৰা লোকস্মিং সহধম্মেন পটিচোদেস্সতী’তি নিমিত্তমেতং, সারিপুত্ত, ন সমনুপস্সামি. এতমহং, সারিপুত্ত, নিমিত্তং অসমনুপস্সন্তো খেমপ্পত্তো অভযপ্পত্তো ৰেসারজ্জপ্পত্তো ৰিহরামি.

‘‘ইমানি খো, সারিপুত্ত, চত্তারি তথাগতস্স ৰেসারজ্জানি যেহি ৰেসারজ্জেহি সমন্নাগতো তথাগতো আসভং ঠানং পটিজানাতি, পরিসাসু সীহনাদং নদতি, ব্রহ্মচক্কং পৰত্তেতি.

‘‘যো খো মং, সারিপুত্ত, এৰং জানন্তং এৰং পস্সন্তং এৰং ৰদেয্য – ‘নত্থি সমণস্স গোতমস্স উত্তরিমনুস্সধম্মা অলমরিযঞাণদস্সনৰিসেসো, তক্কপরিযাহতং সমণো গোতমো ধম্মং দেসেতি ৰীমংসানুচরিতং সযংপটিভান’ন্তি, তং, সারিপুত্ত, ৰাচং অপ্পহায তং চিত্তং অপ্পহায তং দিট্ঠিং অপ্পটিনিস্সজ্জিত্ৰা যথাভতং নিক্খিত্তো এৰং নিরযে. সেয্যথাপি, সারিপুত্ত, ভিক্খু সীলসম্পন্নো সমাধিসম্পন্নো পঞ্ঞাসম্পন্নো দিট্ঠেৰ ধম্মে অঞ্ঞং আরাধেয্য, এৰং সম্পদমিদং, সারিপুত্ত, ৰদামি. তং ৰাচং অপ্পহায তং চিত্তং অপ্পহায তং দিট্ঠিং অপ্পটিনিস্সজ্জিত্ৰা যথাভতং নিক্খিত্তো এৰং নিরযে.

১৫১. ‘‘অট্ঠ খো ইমা, সারিপুত্ত, পরিসা. কতমা অট্ঠ? খত্তিযপরিসা, ব্রাহ্মণপরিসা, গহপতিপরিসা, সমণপরিসা, চাতুমহারাজিকপরিসা [চাতুম্মহারাজিকা (সী. স্যা. পী.)], তাৰতিংসপরিসা, মারপরিসা, ব্রহ্মপরিসা – ইমা খো, সারিপুত্ত, অট্ঠ পরিসা. ইমেহি খো, সারিপুত্ত, চতূহি ৰেসারজ্জেহি সমন্নাগতো তথাগতো ইমা অট্ঠ পরিসা উপসঙ্কমতি অজ্ঝোগাহতি. অভিজানামি খো পনাহং, সারিপুত্ত, অনেকসতং খত্তিযপরিসং উপসঙ্কমিতা. তত্রপি মযা সন্নিসিন্নপুব্বঞ্চেৰ, সল্লপিতপুব্বঞ্চ, সাকচ্ছা চ সমাপজ্জিতপুব্বা. তত্র ৰত মং ভযং ৰা সারজ্জং ৰা ওক্কমিস্সতীতি নিমিত্তমেতং, সারিপুত্ত, ন সমনুপস্সামি. এতমহং, সারিপুত্ত, নিমিত্তং অসমনুপস্সন্তো খেমপ্পত্তো অভযপ্পত্তো ৰেসারজ্জপ্পত্তো ৰিহরামি.

‘‘অভিজানামি খো পনাহং, সারিপুত্ত, অনেকসতং ব্রাহ্মণপরিসং…পে… গহপতিপরিসং… সমণপরিসং… চাতুমহারাজিকপরিসং… তাৰতিংসপরিসং… মারপরিসং… ব্রহ্মপরিসং উপসঙ্কমিতা. তত্রপি মযা সন্নিসিন্নপুব্বঞ্চেৰ, সল্লপিতপুব্বঞ্চ, সাকচ্ছা চ সমাপজ্জিতপুব্বা. তত্র ৰত মং ভযং ৰা সারজ্জং ৰা ওক্কমিস্সতীতি নিমিত্তমেতং, সারিপুত্ত, ন সমনুপস্সামি. এতমহং, সারিপুত্ত, নিমিত্তং অসমনুপস্সন্তো খেমপ্পত্তো অভযপ্পত্তো ৰেসারজ্জপ্পত্তো ৰিহরামি.

১৫২. ‘‘চতস্সো খো ইমা, সারিপুত্ত, যোনিযো. কতমা চতস্সো? অণ্ডজা যোনি, জলাবুজা যোনি, সংসেদজা যোনি, ওপপাতিকা যোনি. কতমা চ, সারিপুত্ত, অণ্ডজা যোনি? যে খো তে, সারিপুত্ত, সত্তা অণ্ডকোসং অভিনিব্ভিজ্জ জাযন্তি – অযং ৰুচ্চতি, সারিপুত্ত, অণ্ডজা যোনি. কতমা চ, সারিপুত্ত, জলাবুজা যোনি? যে খো তে, সারিপুত্ত, সত্তা ৰত্থিকোসং অভিনিব্ভিজ্জ জাযন্তি – অযং ৰুচ্চতি, সারিপুত্ত, জলাবুজা যোনি. কতমা চ, সারিপুত্ত, সংসেদজা যোনি? যে খো তে, সারিপুত্ত, সত্তা পূতিমচ্ছে ৰা জাযন্তি পূতিকুণপে ৰা পূতিকুম্মাসে ৰা চন্দনিকাযে ৰা ওল়িগল্লে ৰা জাযন্তি – অযং ৰুচ্চতি, সারিপুত্ত, সংসেদজা যোনি. কতমা চ, সারিপুত্ত, ওপপাতিকা যোনি? দেৰা, নেরযিকা, একচ্চে চ মনুস্সা, একচ্চে চ ৰিনিপাতিকা – অযং ৰুচ্চতি, সারিপুত্ত, ওপপাতিকা যোনি. ইমা খো, সারিপুত্ত, চতস্সো যোনিযো.

১৫৩. ‘‘পঞ্চ খো ইমা, সারিপুত্ত, গতিযো. কতমা পঞ্চ? নিরযো, তিরচ্ছানযোনি, পেত্তিৰিসযো, মনুস্সা, দেৰা. নিরযঞ্চাহং, সারিপুত্ত, পজানামি, নিরযগামিঞ্চ মগ্গং, নিরযগামিনিঞ্চ পটিপদং; যথা পটিপন্নো চ কাযস্স ভেদা পরং মরণা অপাযং দুগ্গতিং ৰিনিপাতং নিরযং উপপজ্জতি তঞ্চ পজানামি. তিরচ্ছানযোনিঞ্চাহং, সারিপুত্ত, পজানামি, তিরচ্ছানযোনিগামিঞ্চ মগ্গং, তিরচ্ছানযোনিগামিনিঞ্চ পটিপদং; যথা পটিপন্নো চ কাযস্স ভেদা পরং মরণা তিরচ্ছানযোনিং উপপজ্জতি তঞ্চ পজানামি. পেত্তিৰিসযং চাহং, সারিপুত্ত, পজানামি, পেত্তিৰিসযগামিঞ্চ মগ্গং, পেত্তিৰিসযগামিনিঞ্চ পটিপদং; যথা পটিপন্নো চ কাযস্স ভেদা পরং মরণা পেত্তিৰিসযং উপপজ্জতি তঞ্চ পজানামি. মনুস্সে চাহং, সারিপুত্ত, পজানামি, মনুস্সলোকগামিঞ্চ মগ্গং, মনুস্সলোকগামিনিঞ্চ পটিপদং; যথা পটিপন্নো চ কাযস্স ভেদা পরং মরণা মনুস্সেসু উপপজ্জতি তঞ্চ পজানামি. দেৰে চাহং, সারিপুত্ত, পজানামি, দেৰলোকগামিঞ্চ মগ্গং, দেৰলোকগামিনিঞ্চ পটিপদং; যথা পটিপন্নো চ কাযস্স ভেদা পরং মরণা সুগতিং সগ্গং লোকং উপপজ্জতি তঞ্চ পজানামি. নিব্বানঞ্চাহং, সারিপুত্ত, পজানামি, নিব্বানগামিঞ্চ মগ্গং, নিব্বানগামিনিঞ্চ পটিপদং; যথা পটিপন্নো চ আসৰানং খযা অনাসৰং চেতোৰিমুত্তিং পঞ্ঞাৰিমুত্তিং দিট্ঠেৰ ধম্মে সযং অভিঞ্ঞা সচ্ছিকত্ৰা উপসম্পজ্জ ৰিহরতি তঞ্চ পজানামি.

১৫৪. ‘‘ইধাহং, সারিপুত্ত, একচ্চং পুগ্গলং এৰং চেতসা চেতো পরিচ্চ পজানামি – তথাযং পুগ্গলো পটিপন্নো তথা চ ইরিযতি তঞ্চ মগ্গং সমারূল়্হো, যথা কাযস্স ভেদা পরং মরণা অপাযং দুগ্গতিং ৰিনিপাতং নিরযং উপপজ্জিস্সতীতি. তমেনং পস্সামি অপরেন সমযেন দিব্বেন চক্খুনা ৰিসুদ্ধেন অতিক্কন্তমানুসকেন কাযস্স ভেদা পরং মরণা অপাযং দুগ্গতিং ৰিনিপাতং নিরযং উপপন্নং, একন্তদুক্খা তিব্বা কটুকা ৰেদনা ৰেদযমানং. সেয্যথাপি, সারিপুত্ত, অঙ্গারকাসু সাধিকপোরিসা পূরা অঙ্গারানং ৰীতচ্চিকানং ৰীতধূমানং. অথ পুরিসো আগচ্ছেয্য ঘম্মাভিতত্তো ঘম্মপরেতো কিলন্তো তসিতো পিপাসিতো একাযনেন মগ্গেন তমেৰ অঙ্গারকাসুং পণিধায. তমেনং চক্খুমা পুরিসো দিস্ৰা এৰং ৰদেয্য – ‘তথাযং ভৰং পুরিসো পটিপন্নো তথা চ ইরিযতি তঞ্চ মগ্গং সমারূল়্হো, যথা ইমংযেৰ অঙ্গারকাসুং আগমিস্সতী’তি. তমেনং পস্সেয্য অপরেন সমযেন তস্সা অঙ্গারকাসুযা পতিতং, একন্তদুক্খা তিব্বা কটুকা ৰেদনা ৰেদযমানং. এৰমেৰ খো অহং, সারিপুত্ত, ইধেকচ্চং পুগ্গলং এৰং চেতসা চেতো পরিচ্চ পজানামি – তথাযং পুগ্গলো পটিপন্নো তথা চ ইরিযতি তঞ্চ মগ্গং সমারূল়্হো যথা কাযস্স ভেদা পরং মরণা অপাযং দুগ্গতিং ৰিনিপাতং নিরযং উপপজ্জিস্সতীতি. তমেনং পস্সামি অপরেন সমযেন দিব্বেন চক্খুনা ৰিসুদ্ধেন অতিক্কন্তমানুসকেন কাযস্স ভেদা পরং মরণা অপাযং দুগ্গতিং ৰিনিপাতং নিরযং উপপন্নং, একন্তদুক্খা তিব্বা কটুকা ৰেদনা ৰেদযমানং.

‘‘ইধ পনাহং, সারিপুত্ত, একচ্চং পুগ্গলং এৰং চেতসা চেতো পরিচ্চ পজানামি – তথাযং পুগ্গলো পটিপন্নো তথা চ ইরিযতি তঞ্চ মগ্গং সমারূল়্হো, যথা কাযস্স ভেদা পরং মরণা তিরচ্ছানযোনিং উপপজ্জিস্সতীতি. তমেনং পস্সামি অপরেন সমযেন দিব্বেন চক্খুনা ৰিসুদ্ধেন অতিক্কন্তমানুসকেন কাযস্স ভেদা পরং মরণা তিরচ্ছানযোনিং উপপন্নং, দুক্খা তিব্বা কটুকা ৰেদনা ৰেদযমানং. সেয্যথাপি, সারিপুত্ত, গূথকূপো সাধিকপোরিসো, পূরো গূথস্স. অথ পুরিসো আগচ্ছেয্য ঘম্মাভিতত্তো ঘম্মপরেতো কিলন্তো তসিতো পিপাসিতো একাযনেন মগ্গেন তমেৰ গূথকূপং পণিধায. তমেনং চক্খুমা পুরিসো দিস্ৰা এৰং ৰদেয্য – ‘তথাযং ভৰং পুরিসো পটিপন্নো তথা চ ইরিযতি তঞ্চ মগ্গং সমারূল়্হো যথা ইমংযেৰ গূথকূপং আগমিস্সতী’তি. তমেনং পস্সেয্য অপরেন সমযেন তস্মিং গূথকূপে পতিতং, দুক্খা তিব্বা কটুকা ৰেদনা ৰেদযমানং. এৰমেৰ খো অহং, সারিপুত্ত, ইধেকচ্চং পুগ্গলং এৰং চেতসা চেতো পরিচ্চ পজানামি – তথাযং পুগ্গলো পটিপন্নো তথা চ ইরিযতি তঞ্চ মগ্গং সমারূল়্হো, যথা কাযস্স ভেদা পরং মরণা তিরচ্ছানযোনিং উপপজ্জিস্সতীতি. তমেনং পস্সামি অপরেন সমযেন দিব্বেন চক্খুনা ৰিসুদ্ধেন অতিক্কন্তমানুসকেন কাযস্স ভেদা পরং মরণা তিরচ্ছানযোনিং উপপন্নং, দুক্খা তিব্বা কটুকা ৰেদনা ৰেদযমানং.

‘‘ইধ পনাহং, সারিপুত্ত, একচ্চং পুগ্গলং এৰং চেতসা চেতো পরিচ্চ পজানামি – তথাযং পুগ্গলো পটিপন্নো তথা চ ইরিযতি তঞ্চ মগ্গং সমারূল়্হো, যথা কাযস্স ভেদা পরং মরণা পেত্তিৰিসযং উপপজ্জিস্সতীতি. তমেনং পস্সামি অপরেন সমযেন দিব্বেন চক্খুনা ৰিসুদ্ধেন অতিক্কন্তমানুসকেন কাযস্স ভেদা পরং মরণা পেত্তিৰিসযং উপপন্নং, দুক্খবহুলা ৰেদনা ৰেদযমানং. সেয্যথাপি, সারিপুত্ত, রুক্খো ৰিসমে ভূমিভাগে জাতো তনুপত্তপলাসো কবরচ্ছাযো. অথ পুরিসো আগচ্ছেয্য ঘম্মাভিতত্তো ঘম্মপরেতো কিলন্তো তসিতো পিপাসিতো একাযনেন মগ্গেন তমেৰ রুক্খং পণিধায. তমেনং চক্খুমা পুরিসো দিস্ৰা এৰং ৰদেয্য – ‘তথাযং ভৰং পুরিসো পটিপন্নো তথা চ ইরিযতি তঞ্চ মগ্গং সমারূল়্হো, যথা ইমংযেৰ রুক্খং আগমিস্সতী’তি. তমেনং পস্সেয্য, অপরেন সমযেন তস্স রুক্খস্স ছাযায নিসিন্নং ৰা নিপন্নং ৰা দুক্খবহুলা ৰেদনা ৰেদযমানং. এৰমেৰ খো অহং, সারিপুত্ত, ইধেকচ্চং পুগ্গলং এৰং চেতসা চেতো পরিচ্চ পজানামি – তথাযং পুগ্গলো পটিপন্নো তথা চ ইরিযতি তঞ্চ মগ্গং সমারূল়্হো, যথা কাযস্স ভেদা পরং মরণা পেত্তিৰিসযং উপপজ্জিস্সতীতি. তমেনং পস্সামি অপরেন সমযেন দিব্বেন চক্খুনা ৰিসুদ্ধেন অতিক্কন্তমানুসকেন কাযস্স ভেদা পরং মরণা পেত্তিৰিসযং উপপন্নং, দুক্খবহুলা ৰেদনা ৰেদযমানং.

‘‘ইধ পনাহং, সারিপুত্ত, একচ্চং পুগ্গলং এৰং চেতসা চেতো পরিচ্চ পজানামি – তথাযং পুগ্গলো পটিপন্নো তথা চ ইরিযতি তঞ্চ মগ্গং সমারূল়্হো যথা কাযস্স ভেদা পরং মরণা মনুস্সেসু উপপজ্জিস্সতীতি. তমেনং পস্সামি অপরেন সমযেন দিব্বেন চক্খুনা ৰিসুদ্ধেন অতিক্কন্তমানুসকেন কাযস্স ভেদা পরং মরণা মনুস্সেসু উপপন্নং, সুখবহুলা ৰেদনা ৰেদযমানং. সেয্যথাপি, সারিপুত্ত, রুক্খো সমে ভূমিভাগে জাতো বহলপত্তপলাসো সন্দচ্ছাযো [সণ্ডচ্ছাযো (স্যা.), সন্তচ্ছাযো (ক.)]. অথ পুরিসো আগচ্ছেয্য ঘম্মাভিতত্তো ঘম্মপরেতো কিলন্তো তসিতো পিপাসিতো একাযনেন মগ্গেন তমেৰ রুক্খং পণিধায. তমেনং চক্খুমা পুরিসো দিস্ৰা এৰং ৰদেয্য – ‘তথাযং ভৰং পুরিসো পটিপন্নো তথা চ ইরিযতি তঞ্চ মগ্গং সমারূল়্হো, যথা ইমমেৰ রুক্খং আগমিস্সতী’তি. তমেনং পস্সেয্য অপরেন সমযেন তস্স রুক্খস্স ছাযায নিসিন্নং ৰা নিপন্নং ৰা সুখবহুলা ৰেদনা ৰেদযমানং. এৰমেৰ খো অহং, সারিপুত্ত, ইধেকচ্চং পুগ্গলং এৰং চেতসা চেতো পরিচ্চ পজানামি – তথাযং পুগ্গলো পটিপন্নো তথা চ ইরিযতি তঞ্চ মগ্গং সমারূল়্হো যথা কাযস্স ভেদা পরং মরণা মনুস্সেসু উপপজ্জিস্সতীতি. তমেনং পস্সামি অপরেন সমযেন দিব্বেন চক্খুনা ৰিসুদ্ধেন অতিক্কন্তমানুসকেন কাযস্স ভেদা পরং মরণা মনুস্সেসু উপপন্নং, সুখবহুলা ৰেদনা ৰেদযমানং.

‘‘ইধ পনাহং, সারিপুত্ত, একচ্চং পুগ্গলং এৰং চেতসা চেতো পরিচ্চ পজানামি – তথাযং পুগ্গলো পটিপন্নো তথা চ ইরিযতি তঞ্চ মগ্গং সমারূল়্হো, যথা কাযস্স ভেদা পরং মরণা সুগতিং সগ্গং লোকং উপপজ্জিস্সতী’তি. তমেনং পস্সামি অপরেন সমযেন দিব্বেন চক্খুনা ৰিসুদ্ধেন অতিক্কন্তমানুসকেন কাযস্স ভেদা পরং মরণা সুগতিং সগ্গং লোকং উপপন্নং, একন্তসুখা ৰেদনা ৰেদযমানং. সেয্যথাপি, সারিপুত্ত, পাসাদো, তত্রাস্স কূটাগারং উল্লিত্তাৰলিত্তং নিৰাতং ফুসিতগ্গল়ং পিহিতৰাতপানং. তত্রাস্স পল্লঙ্কো গোনকত্থতো পটিকত্থতো পটলিকত্থতো কদলিমিগপৰরপচ্চত্থরণো সউত্তরচ্ছদো উভতোলোহিতকূপধানো. অথ পুরিসো আগচ্ছেয্য ঘম্মাভিতত্তো ঘম্মপরেতো কিলন্তো তসিতো পিপাসিতো একাযনেন মগ্গেন তমেৰ পাসাদং পণিধায. তমেনং চক্খুমা পুরিসো দিস্ৰা এৰং ৰদেয্য – ‘তথাযং ভৰং পুরিসো পটিপন্নো তথা চ ইরিযতি তঞ্চ মগ্গং সমারূল়্হো, যথা ইমংযেৰ পাসাদং আগমিস্সতী’তি. তমেনং পস্সেয্য অপরেন সমযেন তস্মিং পাসাদে তস্মিং কূটাগারে তস্মিং পল্লঙ্কে নিসিন্নং ৰা নিপন্নং ৰা একন্তসুখা ৰেদনা ৰেদযমানং. এৰমেৰ খো অহং, সারিপুত্ত, ইধেকচ্চং পুগ্গলং এৰং চেতসা চেতো পরিচ্চ পজানামি – তথাযং পুগ্গলো পটিপন্নো তথা চ ইরিযতি তঞ্চ মগ্গং সমারূল়্হো যথা কাযস্স ভেদা পরং মরণা সুগতিং সগ্গং লোকং উপপজ্জিস্সতীতি. তমেনং পস্সামি অপরেন সমযেন দিব্বেন চক্খুনা ৰিসুদ্ধেন অতিক্কন্তমানুসকেন কাযস্স ভেদা পরং মরণা সুগতিং সগ্গং লোকং উপপন্নং, একন্তসুখা ৰেদনা ৰেদযমানং.

‘‘ইধ পনাহং, সারিপুত্ত, একচ্চং পুগ্গলং চেতসা চেতো পরিচ্চ পজানামি – তথাযং পুগ্গলো পটিপন্নো তথা চ ইরিযতি তঞ্চ মগ্গং সমারূল়্হো, যথা আসৰানং খযা অনাসং চেতোৰিমুত্তিং পঞ্ঞাৰিমুত্তিং দিট্ঠেৰ ধম্মে সযং অভিঞ্ঞা সচ্ছিকত্ৰা উপসম্পজ্জ ৰিহরিস্সতীতি. তমেনং পস্সামি অপরেন সমযেন আসৰানং খযা অনাসৰং চেতোৰিমুত্তিং পঞ্ঞাৰিমুত্তিং দিট্ঠেৰ ধম্মে সযং অভিঞ্ঞা সচ্ছিকত্ৰা উপসম্পজ্জ ৰিহরন্তং, একন্তসুখা ৰেদনা ৰেদযমানং. সেয্যথাপি, সারিপুত্ত, পোক্খরণী অচ্ছোদকা সাতোদকা সীতোদকা সেতকা সুপতিত্থা রমণীযা. অৰিদূরে চস্সা তিব্বো ৰনসণ্ডো. অথ পুরিসো আগচ্ছেয্য ঘম্মাভিতত্তো ঘম্মপরেতো কিলন্তো তসিতো পিপাসিতো একাযনেন মগ্গেন তমেৰ পোক্খরণিং পণিধায. তমেনং চক্খুমা পুরিসো দিস্ৰা এৰং ৰদেয্য – ‘তথা ভৰং পুরিসো পটিপন্নো তথা চ ইরিযতি তঞ্চ মগ্গং সমারূল়্হো, যথা ইমংযেৰ পোক্খরণিং আগমিস্সতী’তি. তমেনং পস্সেয্য অপরেন সমযেন তং পোক্খরণিং ওগাহেত্ৰা ন্হাযিত্ৰা চ পিৰিত্ৰা চ সব্বদরথকিলমথপরিল়াহং পটিপ্পস্সম্ভেত্ৰা পচ্চুত্তরিত্ৰা তস্মিং ৰনসণ্ডে নিসিন্নং ৰা নিপন্নং ৰা, একন্তসুখা ৰেদনা ৰেদযমানং. এৰমেৰ খো অহং, সারিপুত্ত, ইধেকচ্চং পুগ্গলং এৰং চেতসা চেতো পরিচ্চ পজানামি – তথাযং পুগ্গলো পটিপন্নো তথা চ ইরিযতি তঞ্চ মগ্গং সমারূল়্হো, যথা আসৰানং খযা অনাসৰং চেতোৰিমুত্তিং পঞ্ঞাৰিমুত্তিং দিট্ঠেৰ ধম্মে সযং অভিঞ্ঞা সচ্ছিকত্ৰা উপসম্পজ্জ ৰিহরিস্সতী’তি. তমেনং পস্সামি অপরেন সমযেন আসৰানং খযা অনাসৰং চেতোৰিমুত্তিং পঞ্ঞাৰিমুত্তিং দিট্ঠেৰ ধম্মে সযং অভিঞ্ঞা সচ্ছিকত্ৰা উপসম্পজ্জ ৰিহরন্তং, একন্তসুখা ৰেদনা ৰেদযমানং. ইমা খো, সারিপুত্ত, পঞ্চ গতিযো.

‘‘যো খো মং, সারিপুত্ত, এৰং জানন্তং এৰং পস্সন্তং এৰং ৰদেয্য – ‘নত্থি সমণস্স গোতমস্স উত্তরিমনুস্সধম্মা অলমরিযঞাণদস্সনৰিসেসো; তক্কপরিযাহতং সমণো গোতমো ধম্মং দেসেতি ৰীমংসানুচরিতং সযংপটিভান’ন্তি তং, সারিপুত্ত, ৰাচং অপ্পহায তং চিত্তং অপ্পহায তং দিট্ঠিং অপ্পটিনিস্সজ্জিত্ৰা যথাভতং নিক্খিত্তো এৰং নিরযে. সেয্যথাপি, সারিপুত্ত, ভিক্খু সীলসম্পন্নো সমাধিসম্পন্নো পঞ্ঞাসম্পন্নো দিট্ঠেৰ ধম্মে অঞ্ঞং আরাধেয্য, এৰং সম্পদমিদং, সারিপুত্ত, ৰদামি ‘তং ৰাচং অপ্পহায তং চিত্তং অপ্পহায তং দিট্ঠিং অপ্পটিনিস্সজ্জিত্ৰা যথাভতং নিক্খিত্তো এৰং নিরযে’.

১৫৫. ‘‘অভিজানামি খো পনাহং, সারিপুত্ত, চতুরঙ্গসমন্নাগতং ব্রহ্মচরিযং চরিতা [চরিত্ৰা (ক.)] – তপস্সী সুদং হোমি পরমতপস্সী, লূখো সুদং [লূখস্সুদং (সী. পী.)] হোমি পরমলূখো, জেগুচ্ছী সুদং হোমি পরমজেগুচ্ছী, পৰিৰিত্তো সুদং [পৰিৰিত্তস্সুদং (সী. পী.)] হোমি পরমপৰিৰিত্তো. তত্রাস্সু মে ইদং, সারিপুত্ত, তপস্সিতায হোতি – অচেলকো হোমি মুত্তাচারো হত্থাপলেখনো [হত্থাৰলেখনো (স্যা.)], ন এহিভদ্দন্তিকো ন তিট্ঠভদ্দন্তিকো; নাভিহটং ন উদ্দিস্সকতং ন নিমন্তনং সাদিযামি. সো ন কুম্ভিমুখা পটিগ্গণ্হামি, ন কল়োপিমুখা পটিগ্গণ্হামি, ন এল়কমন্তরং, ন দণ্ডমন্তরং, ন মুসলমন্তরং, ন দ্ৰিন্নং ভুঞ্জমানানং, ন গব্ভিনিযা, ন পাযমানায [পাযন্তিযা (ক.)], ন পুরিসন্তরগতায, ন সঙ্কিত্তীসু, ন যত্থ সা উপট্ঠিতো হোতি, ন যত্থ মক্খিকা সণ্ডসণ্ডচারিনী; ন মচ্ছং ন মংসং ন সুরং ন মেরযং ন থুসোদকং পিৰামি; সো একাগারিকো ৰা হোমি একালোপিকো, দ্ৰাগারিকো ৰা হোমি দ্ৰালোপিকো…পে… সত্তাগারিকো ৰা হোমি সত্তালোপিকো; একিস্সাপি দত্তিযা যাপেমি, দ্ৰীহিপি দত্তীহি যাপেমি…পে… সত্তহিপি দত্তীহি যাপেমি; একাহিকম্পি আহারং আহারেমি, দ্ৰীহিকম্পি আহারং আহারেমি…পে… সত্তাহিকম্পি আহারং আহারেমি; ইতি এৰরূপং অদ্ধমাসিকম্পি পরিযাযভত্তভোজনানুযোগমনুযুত্তো ৰিহরামি.

‘‘সো সাকভক্খো ৰা হোমি, সামাকভক্খো ৰা হোমি, নীৰারভক্খো ৰা হোমি, দদ্দুলভক্খো ৰা হোমি, হটভক্খো ৰা হোমি, কণভক্খো ৰা হোমি, আচামভক্খো ৰা হোমি, পিঞ্ঞাকভক্খো ৰা হোমি, তিণভক্খো ৰা হোমি, গোমযভক্খো ৰা হোমি, ৰনমূলফলাহারো যাপেমি পৰত্তফলভোজী.

‘‘সো সাণানিপি ধারেমি, মসাণানিপি ধারেমি, ছৰদুস্সানিপি ধারেমি, পংসুকূলানিপি ধারেমি, তিরীটানিপি ধারেমি, অজিনম্পি ধারেমি, অজিনক্খিপম্পি ধারেমি, কুসচীরম্পি ধারেমি, ৰাকচীরম্পি ধারেমি, ফলকচীরম্পি ধারেমি, কেসকম্বলম্পি ধারেমি, ৰাল়কম্বলম্পি ধারেমি, উলূকপক্খম্পি ধারেমি; কেসমস্সুলোচকোপি হোমি কেসমস্সুলোচনানুযোগমনুযুত্তো; উব্ভট্ঠকোপি হোমি আসনপটিক্খিত্তো; উক্কুটিকোপি হোমি উক্কুটিকপ্পধানমনুযুত্তো; কণ্টকাপস্সযিকোপি হোমি কণ্টকাপস্সযে সেয্যং কপ্পেমি [ইমস্সানন্তরে অঞ্ঞোপি কোচি পাঠপদেসো অঞ্ঞেসু আজীৰকৰতদীপকসুত্তেসু দিস্সতি]; সাযততিযকম্পি উদকোরোহনানুযোগমনুযুত্তো ৰিহরামি – ইতি এৰরূপং অনেকৰিহিতং কাযস্স আতাপনপরিতাপনানুযোগমনুযুত্তো ৰিহরামি. ইদংসু মে, সারিপুত্ত, তপস্সিতায হোতি.

১৫৬. ‘‘তত্রাস্সু মে ইদং, সারিপুত্ত, লূখস্মিং হোতি – নেকৰস্সগণিকং রজোজল্লং কাযে সন্নিচিতং হোতি পপটিকজাতং. সেয্যথাপি, সারিপুত্ত, তিন্দুকখাণু নেকৰস্সগণিকো সন্নিচিতো হোতি পপটিকজাতো, এৰমেৰাস্সু মে, সারিপুত্ত, নেকৰস্সগণিকং রজোজল্লং কাযে সন্নিচিতং হোতি পপটিকজাতং. তস্স ময্হং, সারিপুত্ত, ন এৰং হোতি – ‘অহো ৰতাহং ইমং রজোজল্লং পাণিনা পরিমজ্জেয্যং, অঞ্ঞে ৰা পন মে ইমং রজোজল্লং পাণিনা পরিমজ্জেয্যু’ন্তি. এৰম্পি মে, সারিপুত্ত, ন হোতি. ইদংসু মে, সারিপুত্ত, লূখস্মিং হোতি.

‘‘তত্রাস্সু মে ইদং, সারিপুত্ত, জেগুচ্ছিস্মিং হোতি – সো খো অহং, সারিপুত্ত, সতোৰ অভিক্কমামি, সতোৰ পটিক্কমামি, যাৰ উদকবিন্দুম্হিপি মে দযা পচ্চুপট্ঠিতা হোতি – ‘মাহং খুদ্দকে পাণে ৰিসমগতে সঙ্ঘাতং আপাদেসি’ন্তি. ইদংসু মে, সারিপুত্ত, জেগুচ্ছিস্মিং হোতি.

‘‘তত্রাস্সু মে ইদং, সারিপুত্ত, পৰিৰিত্তস্মিং হোতি – সো খো অহং, সারিপুত্ত, অঞ্ঞতরং অরঞ্ঞাযতনং অজ্ঝোগাহেত্ৰা ৰিহরামি. যদা পস্সামি গোপালকং ৰা পসুপালকং ৰা তিণহারকং ৰা কট্ঠহারকং ৰা ৰনকম্মিকং ৰা, ৰনেন ৰনং গহনেন গহনং নিন্নেন নিন্নং থলেন থলং সংপতামি [পপতামি (সী. স্যা. পী.)]. তং কিস্স হেতু? মা মং তে অদ্দসংসু অহঞ্চ মা তে অদ্দসন্তি. সেয্যথাপি, সারিপুত্ত, আরঞ্ঞকো মগো মনুস্সে দিস্ৰা ৰনেন ৰনং গহনেন গহনং নিন্নেন নিন্নং থলেন থলং সংপততি, এৰমেৰ খো অহং, সারিপুত্ত, যদা পস্সামি গোপালকং ৰা পসুপালকং ৰা তিণহারকং ৰা কট্ঠহারকং ৰা ৰনকম্মিকং ৰা ৰনেন ৰনং গহনেন গহনং নিন্নেন নিন্নং থলেন থলং সংপতামি. তং কিস্স হেতু? মা মং তে অদ্দসংসু অহঞ্চ মা তে অদ্দসন্তি. ইদংসু মে, সারিপুত্ত, পৰিৰিত্তস্মিং হোতি.

‘‘সো খো অহং, সারিপুত্ত, যে তে গোট্ঠা পট্ঠিতগাৰো অপগতগোপালকা, তত্থ চতুক্কুণ্ডিকো উপসঙ্কমিত্ৰা যানি তানি ৰচ্ছকানং তরুণকানং ধেনুপকানং গোমযানি তানি সুদং আহারেমি. যাৰকীৰঞ্চ মে, সারিপুত্ত, সকং মুত্তকরীসং অপরিযাদিন্নং হোতি, সকংযেৰ সুদং মুত্তকরীসং আহারেমি. ইদংসু মে, সারিপুত্ত, মহাৰিকটভোজনস্মিং হোতি.

১৫৭. ‘‘সো খো অহং, সারিপুত্ত, অঞ্ঞতরং ভিংসনকং ৰনসণ্ডং অজ্ঝোগাহেত্ৰা ৰিহরামি. তত্রাস্সুদং, সারিপুত্ত, ভিংসনকস্স ৰনসণ্ডস্স ভিংসনকতস্মিং হোতি – যো কোচি অৰীতরাগো তং ৰনসণ্ডং পৰিসতি, যেভুয্যেন লোমানি হংসন্তি. সো খো অহং, সারিপুত্ত, যা তা রত্তিযো সীতা হেমন্তিকা অন্তরট্ঠকা হিমপাতসমযা [অন্তরট্ঠকে হিমপাতসমযে (সী. পী.)] তথারূপাসু রত্তীসু রত্তিং অব্ভোকাসে ৰিহরামি, দিৰা ৰনসণ্ডে; গিম্হানং পচ্ছিমে মাসে দিৰা অব্ভোকাসে ৰিহরামি, রত্তিং ৰনসণ্ডে. অপিস্সু মং, সারিপুত্ত, অযং অনচ্ছরিযগাথা পটিভাসি পুব্বে অস্সুতপুব্বা –

‘‘সোতত্তো সোসিন্নো [সোসীনো (সী. পী. ক.), সোসিনো (স্যা.), সোসিন্দো (সদ্দনীতি)] চেৰ, একো ভিংসনকে ৰনে;

নগ্গো ন চগ্গিমাসীনো, এসনাপসুতো মুনী’’তি.

‘‘সো খো অহং, সারিপুত্ত, সুসানে সেয্যং কপ্পেমি ছৰট্ঠিকানি উপধায. অপিস্সু মং, সারিপুত্ত, গামণ্ডলা [গোমণ্ডলা (বহূসু) চরিযাপিটকঅট্ঠকথা ওলোকেতব্বা] উপসঙ্কমিত্ৰা ওট্ঠুভন্তিপি, ওমুত্তেন্তিপি, পংসুকেনপি ওকিরন্তি, কণ্ণসোতেসুপি সলাকং পৰেসেন্তি. ন খো পনাহং, সারিপুত্ত, অভিজানামি তেসু পাপকং চিত্তং উপ্পাদেতা. ইদংসু মে, সারিপুত্ত, উপেক্খাৰিহারস্মিং হোতি.

১৫৮. ‘‘সন্তি খো পন, সারিপুত্ত, একে সমণব্রাহ্মণা এৰংৰাদিনো এৰংদিট্ঠিনো – ‘আহারেন সুদ্ধী’তি. তে এৰমাহংসু – ‘কোলেহি যাপেমা’তি. তে কোলম্পি খাদন্তি, কোলচুণ্ণম্পি খাদন্তি, কোলোদকম্পি পিৰন্তি – অনেকৰিহিতম্পি কোলৰিকতিং পরিভুঞ্জন্তি. অভিজানামি খো পনাহং, সারিপুত্ত, একংযেৰ কোলং আহারং আহারিতা. সিযা খো পন তে, সারিপুত্ত, এৰমস্স – ‘মহা নূন তেন সমযেন কোলো অহোসী’তি. ন খো পনেতং, সারিপুত্ত, এৰং দট্ঠব্বং. তদাপি এতপরমোযেৰ কোলো অহোসি সেয্যথাপি এতরহি. তস্স ময্হং, সারিপুত্ত, একংযেৰ কোলং আহারং আহারযতো অধিমত্তকসিমানং পত্তো কাযো হোতি. সেয্যথাপি নাম আসীতিকপব্বানি ৰা কাল়পব্বানি ৰা, এৰমেৰস্সু মে অঙ্গপচ্চঙ্গানি ভৰন্তি তাযেৰপ্পাহারতায. সেয্যথাপি নাম ওট্ঠপদং, এৰমেৰস্সু মে আনিসদং হোতি তাযেৰপ্পাহারতায. সেয্যথাপি নাম ৰট্টনাৰল়ী, এৰমেৰস্সু মে পিট্ঠিকণ্টকো উন্নতাৰনতো হোতি তাযেৰপ্পাহারতায. সেয্যথাপি নাম জরসালায গোপানসিযো ওলুগ্গৰিলুগ্গা ভৰন্তি, এৰমেৰস্সু মে ফাসুল়িযো ওলুগ্গৰিলুগ্গা ভৰন্তি তাযেৰপ্পাহারতায. সেয্যথাপি নাম গম্ভীরে উদপানে উদকতারকা গম্ভীরগতা ওক্খাযিকা দিস্সন্তি, এৰমেৰস্সু মে অক্খিকূপেসু অক্খিতারকা গম্ভীরগতা ওক্খাযিকা দিস্সন্তি তাযেৰপ্পাহারতায. সেয্যথাপি নাম তিত্তকালাবুআমকচ্ছিন্নো ৰাতাতপেন সংফুটিতো [সম্ফুসিতো (স্যা.), সংপুটিতো (পী. ক.) এত্থ সংফুটিতোতি সঙ্কুচিতোতি অত্থো] হোতি সম্মিলাতো, এৰমেৰস্সু মে সীসচ্ছৰি সংফুটিতা হোতি সম্মিলাতা তাযেৰপ্পাহারতায. সো খো অহং, সারিপুত্ত, ‘উদরচ্ছৰিং পরিমসিস্সামী’তি পিট্ঠিকণ্টকংযেৰ পরিগ্গণ্হামি, ‘পিট্ঠিকণ্টকং পরিমসিস্সামী’তি উদরচ্ছৰিংযেৰ পরিগ্গণ্হামি, যাৰস্সু মে, সারিপুত্ত, উদরচ্ছৰি পিট্ঠিকণ্টকং অল্লীনা হোতি তাযেৰপ্পাহারতায. সো খো অহং, সারিপুত্ত, ‘ৰচ্চং ৰা মুত্তং ৰা করিস্সামী’তি তত্থেৰ অৰকুজ্জো পপতামি তাযেৰপ্পাহারতায. সো খো অহং, সারিপুত্ত, তমেৰ কাযং অস্সাসেন্তো পাণিনা গত্তানি অনোমজ্জামি. তস্স ময্হং, সারিপুত্ত, পাণিনা গত্তানি অনোমজ্জতো পূতিমূলানি লোমানি কাযস্মা পতন্তি তাযেৰপ্পাহারতায.

১৫৯. ‘‘সন্তি খো পন, সারিপুত্ত, একে সমণব্রাহ্মণা এৰংৰাদিনো এৰংদিট্ঠিনো – ‘আহারেন সুদ্ধী’তি. তে এৰমাহংসু – ‘মুগ্গেহি যাপেম…পে… তিলেহি যাপেম…পে… তণ্ডুলেহি যাপেমা’তি. তে তণ্ডুলম্পি খাদন্তি, তণ্ডুলচুণ্ণম্পি খাদন্তি, তণ্ডুলোদকম্পি পিৰন্তি – অনেকৰিহিতম্পি তণ্ডুলৰিকতিং পরিভুঞ্জন্তি. অভিজানামি খো পনাহং, সারিপুত্ত, একংযেৰ তণ্ডুলং আহারং আহারিতা. সিযা খো পন তে, সারিপুত্ত, এৰমস্স – ‘মহা নূন তেন সমযেন তণ্ডুলো অহোসী’তি. ন খো পনেতং, সারিপুত্ত, এৰং দট্ঠব্বং. তদাপি এতপরমোযেৰ তণ্ডুলো অহোসি, সেয্যথাপি এতরহি. তস্স ময্হং, সারিপুত্ত, একংযেৰ তণ্ডুলং আহারং আহারযতো অধিমত্তকসিমানং পত্তো কাযো হোতি. সেয্যথাপি নাম আসীতিকপব্বানি ৰা কাল়পব্বানি ৰা, এৰমেৰস্সু মে অঙ্গপচ্চঙ্গানি ভৰন্তি তাযেৰপ্পাহারতায. সেয্যথাপি নাম ওট্ঠপদং, এৰমেৰস্সু মে আনিসদং হোতি তাযেৰপ্পাহারতায. সেয্যথাপি নাম ৰট্টনাৰল়ী, এৰমেৰস্সু মে পিট্ঠিকণ্টকো উন্নতাৰনতো হোতি তাযেৰপ্পাহারতায. সেয্যথাপি নাম জরসালায গোপানসিযো ওলুগ্গৰিলুগ্গা ভৰন্তি, এৰমেৰস্সু মে ফাসুল়িযো ওলুগ্গৰিলুগ্গা ভৰন্তি তাযেৰপ্পাহারতায. সেয্যথাপি নাম গম্ভীরে উদপানে উদকতারকা গম্ভীরগতা ওক্খাযিকা দিস্সন্তি, এৰমেৰস্সু মে অক্খিকূপেসু অক্খিতারকা গম্ভীরগতা ওক্খাযিকা দিস্সন্তি তাযেৰপ্পাহারতায. সেয্যথাপি নাম তিত্তকালাবু আমকচ্ছিন্নো ৰাতাতপেন সংফুটিতো হোতি সম্মিলাতো, এৰমেৰস্সু মে সীসচ্ছৰি সংফুটিতা হোতি সম্মিলাতা তাযেৰপ্পাহারতায. সো খো অহং, সারিপুত্ত, ‘উদরচ্ছৰিং পরিমসিস্সামী’তি পিট্ঠিকণ্টকংযেৰ পরিগ্গণ্হামি, ‘পিট্ঠিকণ্টকং পরিমসিস্সামী’তি উদরচ্ছৰিংযেৰ পরিগ্গণ্হামি. যাৰস্সু মে, সারিপুত্ত, উদরচ্ছৰি পিট্ঠিকণ্টকং অল্লীনা হোতি তাযেৰপ্পাহারতায. সো খো অহং, সারিপুত্ত, ‘ৰচ্চং ৰা মুত্তং ৰা করিস্সামী’তি তত্থেৰ অৰকুজ্জো পপতামি তাযেৰপ্পাহারতায. সো খো অহং, সারিপুত্ত, তমেৰ কাযং অস্সাসেন্তো পাণিনা গত্তানি অনোমজ্জামি. তস্স ময্হং, সারিপুত্ত, পাণিনা গত্তানি অনোমজ্জতো পূতিমূলানি লোমানি কাযস্মা পতন্তি তাযেৰপ্পাহারতায.

‘‘তাযপি খো অহং, সারিপুত্ত, ইরিযায তায পটিপদায তায দুক্করকারিকায নাজ্ঝগমং উত্তরিং মনুস্সধম্মা অলমরিযঞাণদস্সনৰিসেসং. তং কিস্স হেতু? ইমিস্সাযেৰ অরিযায পঞ্ঞায অনধিগমা, যাযং অরিযা পঞ্ঞা অধিগতা অরিযা নিয্যানিকা, নিয্যাতি তক্করস্স সম্মা দুক্খক্খযায.

১৬০. ‘‘সন্তি খো পন, সারিপুত্ত, একে সমণব্রাহ্মণা এৰংৰাদিনো এৰংদিট্ঠিনো – ‘সংসারেন সুদ্ধী’তি. ন খো পন সো [ন খো পনেসো (সী. স্যা.)], সারিপুত্ত, সংসারো সুলভরূপো যো মযা অসংসরিতপুব্বো ইমিনা দীঘেন অদ্ধুনা, অঞ্ঞত্র সুদ্ধাৰাসেহি দেৰেহি. সুদ্ধাৰাসে চাহং, সারিপুত্ত, দেৰে সংসরেয্যং, নযিমং লোকং পুনরাগচ্ছেয্যং.

‘‘সন্তি খো পন, সারিপুত্ত, একে সমণব্রাহ্মণা এৰংৰাদিনো এৰংদিট্ঠিনো – ‘উপপত্তিযা সুদ্ধী’তি. ন খো পন সা, সারিপুত্ত, উপপত্তি সুলভরূপা যা মযা অনুপপন্নপুব্বা ইমিনা দীঘেন অদ্ধুনা, অঞ্ঞত্র সুদ্ধাৰাসেহি দেৰেহি. সুদ্ধাৰাসে চাহং, সারিপুত্ত, দেৰে উপপজ্জেয্যং, নযিমং লোকং পুনরাগচ্ছেয্যং.

‘‘সন্তি খো পন, সারিপুত্ত, একে সমণব্রাহ্মণা এৰংৰাদিনো এৰংদিট্ঠিনো – ‘আৰাসেন সুদ্ধী’তি. ন খো পন সো, সারিপুত্ত, আৰাসো সুলভরূপো যো মযা অনাৰুট্ঠপুব্বো [অনাৰুত্থপুব্বো (সী. পী.)] ইমিনা দীঘেন অদ্ধুনা, অঞ্ঞত্র সুদ্ধাৰাসেহি দেৰেহি. সুদ্ধাৰাসে চাহং, সারিপুত্ত, দেৰে আৰসেয্যং, নযিমং লোকং পুনরাগচ্ছেয্যং.

‘‘সন্তি খো পন, সারিপুত্ত, একে সমণব্রাহ্মণা এৰংৰাদিনো এৰংদিট্ঠিনো – ‘যঞ্ঞেন সুদ্ধী’তি. ন খো পন সো, সারিপুত্ত, যঞ্ঞো সুলভরূপো যো মযা অযিট্ঠপুব্বো ইমিনা দীঘেন অদ্ধুনা, তঞ্চ খো রঞ্ঞা ৰা সতা খত্তিযেন মুদ্ধাৰসিত্তেন ব্রাহ্মণেন ৰা মহাসালেন.

‘‘সন্তি খো পন, সারিপুত্ত, একে সমণব্রাহ্মণা এৰংৰাদিনো এৰংদিট্ঠিনো – ‘অগ্গিপরিচরিযায সুদ্ধী’তি. ন খো পন সো, সারিপুত্ত, অগ্গি সুলভরূপো যো মযা অপরিচিণ্ণপুব্বো ইমিনা দীঘেন অদ্ধুনা, তঞ্চ খো রঞ্ঞা ৰা সতা খত্তিযেন মুদ্ধাৰসিত্তেন ব্রাহ্মণেন ৰা মহাসালেন.

১৬১. ‘‘সন্তি খো পন, সারিপুত্ত, একে সমণব্রাহ্মণা এৰংৰাদিনো এৰংদিট্ঠিনো – ‘যাৰদেৰাযং ভৰং পুরিসো দহরো হোতি যুৰা সুসুকাল়কেসো ভদ্রেন যোব্বনেন সমন্নাগতো পঠমেন ৰযসা তাৰদেৰ পরমেন পঞ্ঞাৰেয্যত্তিযেন সমন্নাগতো হোতি. যতো চ খো অযং ভৰং পুরিসো জিণ্ণো হোতি ৰুদ্ধো মহল্লকো অদ্ধগতো ৰযোঅনুপ্পত্তো, আসীতিকো ৰা নাৰুতিকো ৰা ৰস্সসতিকো ৰা জাতিযা, অথ তম্হা পঞ্ঞাৰেয্যত্তিযা, পরিহাযতী’তি. ন খো পনেতং, সারিপুত্ত, এৰং দট্ঠব্বং. অহং খো পন, সারিপুত্ত, এতরহি জিণ্ণো ৰুদ্ধো মহল্লকো অদ্ধগতো ৰযোঅনুপ্পত্তো, আসীতিকো মে ৰযো ৰত্ততি. ইধ মে অস্সু, সারিপুত্ত, চত্তারো সাৰকা ৰস্সসতাযুকা ৰস্সসতজীৰিনো, পরমায সতিযা চ গতিযা চ ধিতিযা চ সমন্নাগতা পরমেন চ পঞ্ঞাৰেয্যত্তিযেন. সেয্যথাপি, সারিপুত্ত, দল়্হধম্মা [দল়্হধম্মো (বহূসু) টীকা চ মোগ্গল্লানব্যাকরণং চ ওলোকেতব্বং] ধনুগ্গহো সিক্খিতো কতহত্থো কতূপাসনো লহুকেন অসনেন অপ্পকসিরেনেৰ তিরিযং তালচ্ছাযং অতিপাতেয্য, এৰং অধিমত্তসতিমন্তো এৰং অধিমত্তগতিমন্তো এৰং অধিমত্তধিতিমন্তো এৰং পরমেন পঞ্ঞাৰেয্যত্তিযেন সমন্নাগতা. তে মং চতুন্নং সতিপট্ঠানানং উপাদাযুপাদায পঞ্হং পুচ্ছেয্যুং, পুট্ঠো পুট্ঠো চাহং তেসং ব্যাকরেয্যং, ব্যাকতঞ্চ মে ব্যাকততো ধারেয্যুং, ন চ মং দুতিযকং উত্তরি পটিপুচ্ছেয্যুং. অঞ্ঞত্র অসিতপীতখাযিতসাযিতা অঞ্ঞত্র উচ্চারপস্সাৰকম্মা, অঞ্ঞত্র নিদ্দাকিলমথপটিৰিনোদনা অপরিযাদিন্নাযেৰস্স, সারিপুত্ত, তথাগতস্স ধম্মদেসনা, অপরিযাদিন্নংযেৰস্স তথাগতস্স ধম্মপদব্যঞ্জনং, অপরিযাদিন্নংযেৰস্স তথাগতস্স পঞ্হপটিভানং. অথ মে তে চত্তারো সাৰকা ৰস্সসতাযুকা ৰস্সসতজীৰিনো ৰস্সসতস্স অচ্চযেন কালং করেয্যুং. মঞ্চকেন চেপি মং, সারিপুত্ত, পরিহরিস্সথ, নেৰত্থি তথাগতস্স পঞ্ঞাৰেয্যত্তিযস্স অঞ্ঞথত্তং. যং খো তং [যং খো পনেতং (সী.)], সারিপুত্ত, সম্মা ৰদমানো ৰদেয্য – ‘অসম্মোহধম্মো সত্তো লোকে উপ্পন্নো বহুজনহিতায বহুজনসুখায লোকানুকম্পায অত্থায হিতায সুখায দেৰমনুস্সান’ন্তি, মমেৰ তং সম্মা ৰদমানো ৰদেয্য ‘অসম্মোহধম্মো সত্তো লোকে উপ্পন্নো বহুজনহিতায বহুজনসুখায লোকানুকম্পায অত্থায হিতায সুখায দেৰমনুস্সান’’’ন্তি.

১৬২. তেন খো পন সমযেন আযস্মা নাগসমালো ভগৰতো পিট্ঠিতো ঠিতো হোতি ভগৰন্তং বীজযমানো. অথ খো আযস্মা নাগসমালো ভগৰন্তং এতদৰোচ – ‘‘অচ্ছরিযং, ভন্তে, অব্ভুতং, ভন্তে! অপি হি মে, ভন্তে, ইমং ধম্মপরিযাযং সুত্ৰা লোমানি হট্ঠানি. কোনামো অযং, ভন্তে, ধম্মপরিযাযো’’তি? ‘‘তস্মাতিহ ত্ৰং, নাগসমাল, ইমং ধম্মপরিযাযং লোমহংসনপরিযাযো ত্ৰেৰ নং ধারেহী’’তি.

ইদমৰোচ ভগৰা. অত্তমনো আযস্মা নাগসমালো ভগৰতো ভাসিতং অভিনন্দীতি.

মহাসীহনাদসুত্তং নিট্ঠিতং দুতিযং.