৬. ৰিহারৰিমানৰত্থু

৭২৯. ‘‘অভিক্কন্তেন ৰণ্ণেন…পে… ওসধী ৰিয তারকা.

৭৩০. ‘‘তস্সা তে নচ্চমানায, অঙ্গমঙ্গেহি সব্বসো;

দিব্বা সদ্দা নিচ্ছরন্তি, সৰনীযা মনোরমা.

৭৩১. ‘‘তস্সা তে নচ্চমানায, অঙ্গমঙ্গেহি সব্বসো;

দিব্বা গন্ধা পৰাযন্তি, সুচিগন্ধা মনোরমা.

৭৩২. ‘‘ৰিৰত্তমানা কাযেন, যা ৰেণীসু পিল়ন্ধনা;

তেসং সুয্যতি নিগ্ঘোসো, তুরিযে পঞ্চঙ্গিকে যথা.

৭৩৩. ‘‘ৰটংসকা ৰাতধুতা, ৰাতেন সম্পকম্পিতা;

তেসং সুয্যতি নিগ্ঘোসো, তুরিযে পঞ্চঙ্গিকে যথা.

৭৩৪. ‘‘যাপি তে সিরস্মিং মালা, সুচিগন্ধা মনোরমা;

ৰাতি গন্ধো দিসা সব্বা, রুক্খো মঞ্জূসকো যথা.

৭৩৫. ‘‘ঘাযসে তং সুচিগন্ধং, রূপং পস্সসি অমানুসং;

দেৰতে পুচ্ছিতাচিক্খ, কিস্স কম্মস্সিদং ফল’’ন্তি.

৭৩৬. ‘‘সাৰত্থিযং ময্হং সখী ভদন্তে, সঙ্ঘস্স কারেসি মহাৰিহারং;

তত্থপ্পসন্না অহমানুমোদিং, দিস্ৰা অগারঞ্চ পিযঞ্চ মেতং.

৭৩৭. ‘‘তাযেৰ মে সুদ্ধনুমোদনায, লদ্ধং ৰিমানব্ভুতদস্সনেয্যং;

সমন্ততো সোল়সযোজনানি, ৰেহাযসং গচ্ছতি ইদ্ধিযা মম.

৭৩৮. ‘‘কূটাগারা নিৰেসা মে, ৰিভত্তা ভাগসো মিতা;

দদ্দল্লমানা আভন্তি, সমন্তা সতযোজনং.

৭৩৯. ‘‘পোক্খরঞ্ঞো চ মে এত্থ, পুথুলোমনিসেৰিতা;

অচ্ছোদকা [অচ্ছোদিকা (সী.)] ৰিপ্পসন্না, সোণ্ণৰালুকসন্থতা.

৭৪০. ‘‘নানাপদুমসঞ্ছন্না, পুণ্ডরীকসমোততা [পণ্ডরীকসমোনতা (সী.)];

সুরভী সম্পৰাযন্তি, মনুঞ্ঞা মালুতেরিতা.

৭৪১. ‘‘জম্বুযো পনসা তালা, নাল়িকেরৰনানি চ;

অন্তোনিৰেসনে জাতা, নানারুক্খা অরোপিমা.

৭৪২. ‘‘নানাতূরিযসঙ্ঘুট্ঠং, অচ্ছরাগণঘোসিতং;

যোপি মং সুপিনে পস্সে, সোপি ৰিত্তো সিযা নরো.

৭৪৩. ‘‘এতাদিসং অব্ভুতদস্সনেয্যং, ৰিমানং সব্বসোপভং;

মম কম্মেহি নিব্বত্তং, অলং পুঞ্ঞানি কাতৰে’’তি.

৭৪৪. ‘‘তাযেৰ তে সুদ্ধনুমোদনায, লদ্ধং ৰিমানব্ভুতদস্সনেয্যং;

যা চেৰ সা দানমদাসি নারী, তস্সা গতিং ব্রূহি কুহিং উপ্পন্না [উপপন্না (ক.)] সা’’তি.

৭৪৫. ‘‘যা সা অহু ময্হং সখী ভদন্তে, সঙ্ঘস্স কারেসি মহাৰিহারং;

ৰিঞ্ঞাতধম্মা সা অদাসি দানং, উপ্পন্না নিম্মানরতীসু দেৰেসু.

৭৪৬. ‘‘পজাপতী তস্স সুনিম্মিতস্স, অচিন্তিযা কম্মৰিপাকা তস্স;

যমেতং পুচ্ছসি কুহিং উপ্পন্না [উপপন্না (ক.)] সাতি, তং তে ৰিযাকাসিং অনঞ্ঞথা অহং.

৭৪৭. ‘‘তেনহঞ্ঞেপি সমাদপেথ, সঙ্ঘস্স দানানি দদাথ ৰিত্তা;

ধম্মঞ্চ সুণাথ পসন্নমানসা, সুদুল্লভো লদ্ধো মনুস্সলাভো.

৭৪৮. ‘‘যং মগ্গং মগ্গাধিপতী অদেসযি [মগ্গাধিপত্যদেসযি (সী.)], ব্রহ্মস্সরো কঞ্চনসন্নিভত্তচো;

সঙ্ঘস্স দানানি দদাথ ৰিত্তা, মহপ্ফলা যত্থ ভৰন্তি দক্খিণা.

৭৪৯. [খু. পা. ৬.৬; সু. নি. ২২৯] ‘‘যে পুগ্গলা অট্ঠ সতং পসত্থা, চত্তারি এতানি যুগানি হোন্তি;

তে দক্খিণেয্যা সুগতস্স সাৰকা, এতেসু দিন্নানি মহপ্ফলানি.

৭৫০. [ৰি. ৰ. ৬৪১] ‘‘চত্তারো চ পটিপন্না, চত্তারো চ ফলে ঠিতা;

এস সঙ্ঘো উজুভূতো, পঞ্ঞাসীলসমাহিতো.

৭৫১. [ৰি. ৰ. ৬৪২] ‘‘যজমানানং মনুস্সানং, পুঞ্ঞপেক্খান পাণিনং;

করোতং ওপধিকং পুঞ্ঞং, সঙ্ঘে দিন্নং মহপ্ফলং.

৭৫২. [ৰি. ৰ. ৬৪৩] ‘‘এসো হি সঙ্ঘো ৰিপুলো মহগ্গতো, এসপ্পমেয্যো উদধীৰ সাগরো;

এতেহি সেট্ঠা নরৰীরসাৰকা, পভঙ্করা ধম্মমুদীরযন্তি [নত্থেত্থ পাঠভেদো].

৭৫৩. [ৰি. ৰ. ৬৪৪] ‘‘তেসং সুদিন্নং সুহুতং সুযিট্ঠং, যে সঙ্ঘমুদ্দিস্স দদন্তি দানং;

সা দক্খিণা সঙ্ঘগতা পতিট্ঠিতা, মহপ্ফলা লোকৰিদূন [লোকৰিদূহি (ক.)] ৰণ্ণিতা.

৭৫৪. ‘‘এতাদিসং যঞ্ঞমনুস্সরন্তা, যে ৰেদজাতা ৰিচরন্তি লোকে;

ৰিনেয্য মচ্ছেরমলং সমূলং, অনিন্দিতা সগ্গমুপেন্তি ঠান’’ন্তি.

ৰিহারৰিমানং ছট্ঠং.

ভাণৰারং দুতিযং নিট্ঠিতং.