৩. নাগৰিমানৰত্থু

৭০৫. ‘‘অলঙ্কতা মণিকঞ্চনাচিতং, সোৰণ্ণজালচিতং মহন্তং;

অভিরুয্হ গজৰরং সুকপ্পিতং, ইধাগমা ৰেহাযসং [ৰেহাসযং (সী.)] অন্তলিক্খে.

৭০৬. ‘‘নাগস্স দন্তেসু দুৰেসু নিম্মিতা, অচ্ছোদকা [অচ্ছোদিকা (সী. ক.)] পদুমিনিযো সুফুল্লা;

পদুমেসু চ তুরিযগণা পভিজ্জরে, ইমা চ নচ্চন্তি মনোহরাযো.

৭০৭. ‘‘দেৰিদ্ধিপত্তাসি মহানুভাৰে, মনুস্সভূতা কিমকাসি পুঞ্ঞং;

কেনাসি এৰং জলিতানুভাৰা, ৰণ্ণো চ তে সব্বদিসা পভাসতী’’তি.

৭০৮. ‘‘বারাণসিযং উপসঙ্কমিত্ৰা, বুদ্ধস্সহং ৰত্থযুগং অদাসিং;

পাদানি ৰন্দিত্ৰা [ৰন্দিত্ৰ (সী.)] ছমা নিসীদিং, ৰিত্তা চহং অঞ্জলিকং অকাসিং.

৭০৯. ‘‘বুদ্ধো চ মে কঞ্চনসন্নিভত্তচো, অদেসযি সমুদযদুক্খনিচ্চতং;

অসঙ্খতং দুক্খনিরোধসস্সতং, মগ্গং অদেসযি [অদেসেসি (সী.)] যতো ৰিজানিসং;

৭১০. ‘‘অপ্পাযুকী কালকতা ততো চুতা, উপপন্না তিদসগণং যসস্সিনী;

সক্কস্সহং অঞ্ঞতরা পজাপতি, যসুত্তরা নাম দিসাসু ৰিস্সুতা’’তি.

নাগৰিমানং ততিযং.