৭. উপোসথাৰিমানৰত্থু

২২৯. ‘‘অভিক্কন্তেন ৰণ্ণেন, যা ত্ৰং তিট্ঠসি দেৰতে;

ওভাসেন্তী দিসা সব্বা, ওসধী ৰিয তারকা.

২৩০. ‘‘কেন তেতাদিসো ৰণ্ণো…পে…

ৰণ্ণো চ তে সব্বদিসা পভাসতী’’তি.

২৩২. সা দেৰতা অত্তমনা…পে… যস্স কম্মস্সিদং ফলং.

২৩৩. ‘‘উপোসথাতি মং অঞ্ঞংসু, সাকেতাযং উপাসিকা;

সদ্ধা সীলেন সম্পন্না, সংৰিভাগরতা সদা.

২৩৪. ‘‘অচ্ছাদনঞ্চ ভত্তঞ্চ, সেনাসনং পদীপিযং;

অদাসিং উজুভূতেসু, ৰিপ্পসন্নেন চেতসা.

২৩৫. ‘‘চাতুদ্দসিং পঞ্চদসিং, যা চ পক্খস্স অট্ঠমী;

পাটিহারিযপক্খঞ্চ, অট্ঠঙ্গসুসমাগতং.

২৩৬. ‘‘উপোসথং উপৰসিস্সং, সদা সীলেসু সংৰুতা;

সঞ্ঞমা সংৰিভাগা চ, ৰিমানং আৰসামহং.

২৩৭. ‘‘পাণাতিপাতা ৰিরতা, মুসাৰাদা চ সঞ্ঞতা;

থেয্যা চ অতিচারা চ, মজ্জপানা চ আরকা.

২৩৮. ‘‘পঞ্চসিক্খাপদে রতা, অরিযসচ্চান কোৰিদা;

উপাসিকা চক্খুমতো, গোতমস্স যসস্সিনো.

২৩৯. ‘‘তেন মেতাদিসো ৰণ্ণো…পে…

ৰণ্ণো চ মে সব্বদিসা পভাসতী’’তি.

২৪১. ‘‘অভিক্খণং নন্দনং সুত্ৰা, ছন্দো মে উদপজ্জথ [উপপজ্জথ (বহূসু)];

তত্থ চিত্তং পণিধায, উপপন্নম্হি নন্দনং.

২৪২. ‘‘নাকাসিং সত্থু ৰচনং, বুদ্ধস্সাদিচ্চবন্ধুনো;

হীনে চিত্তং পণিধায, সাম্হি পচ্ছানুতাপিনী’’তি.

২৪৩. ‘‘কীৰ চিরং ৰিমানম্হি, ইধ ৰচ্ছসুপোসথে [ৰস্সসুপোসথে (সী.)];

দেৰতে পুচ্ছিতাচিক্খ, যদি জানাসি আযুনো’’তি.

২৪৪. ‘‘সট্ঠিৰস্সসহস্সানি [সট্ঠি সতসহস্সানি (?)], তিস্সো চ ৰস্সকোটিযো;

ইধ ঠত্ৰা মহামুনি, ইতো চুতা গমিস্সামি;

মনুস্সানং সহব্যত’’ন্তি.

২৪৫. ‘‘মা ত্ৰং উপোসথে ভাযি, সম্বুদ্ধেনাসি ব্যাকতা;

সোতাপন্না ৰিসেসযি, পহীনা তৰ দুগ্গতী’’তি.

উপোসথাৰিমানং সত্তমং.