১. দাসিৰিমানৰত্থু

১৫৭. ‘‘অপি সক্কোৰ দেৰিন্দো, রম্মে চিত্তলতাৰনে;

সমন্তা অনুপরিযাসি, নারীগণপুরক্খতা;

ওভাসেন্তী দিসা সব্বা, ওসধী ৰিয তারকা.

১৫৮. ‘‘কেন তেতাদিসো ৰণ্ণো, কেন তে ইধ মিজ্ঝতি;

উপ্পজ্জন্তি চ তে ভোগা, যে কেচি মনসো পিযা.

১৫৯. ‘‘পুচ্ছামি তং দেৰি মহানুভাৰে, মনুস্সভূতা কিমকাসি পুঞ্ঞং;

কেনাসি এৰং জলিতানুভাৰা, ৰণ্ণো চ তে সব্বদিসা পভাসতী’’তি.

১৬০. সা দেৰতা অত্তমনা, মোগ্গল্লানেন পুচ্ছিতা;

পঞ্হং পুট্ঠা ৰিযাকাসি, যস্স কম্মস্সিদং ফলং.

১৬১. ‘‘অহং মনুস্সেসু মনুস্সভূতা, দাসী অহোসিং পরপেস্সিযা [পরপেসিযা (ক.)] কুলে.

১৬২. ‘‘উপাসিকা চক্খুমতো, গোতমস্স যসস্সিনো;

তস্সা মে নিক্কমো আসি, সাসনে তস্স তাদিনো.

১৬৩. ‘‘কামং ভিজ্জতুযং কাযো, নেৰ অত্থেত্থ সণ্ঠনং [সন্থনং (সী. স্যা. পী.)];

সিক্খাপদানং পঞ্চন্নং, মগ্গো সোৰত্থিকো সিৰো.

১৬৪. ‘‘অকণ্টকো অগহনো, উজু সব্ভি পৰেদিতো;

নিক্কমস্স ফলং পস্স, যথিদং পাপুণিত্থিকা.

১৬৫. ‘‘আমন্তনিকা রঞ্ঞোম্হি, সক্কস্স ৰসৰত্তিনো;

সট্ঠি তুরিয [তুরিয (সী. স্যা. পী.)] সহস্সানি, পটিবোধং করোন্তি মে.

১৬৬. ‘‘আলম্বো গগ্গরো [গগ্গমো (স্যা.), ভগ্গরো (ক.)] ভীমো [ভিম্মো (ক.)], সাধুৰাদী চ সংসযো;

পোক্খরো চ সুফস্সো চ, ৰিণামোক্খা [ৰিলামোক্খা (ক.)] চ নারিযো.

১৬৭. ‘‘নন্দা চেৰ সুনন্দা চ, সোণদিন্না সুচিম্হিতা [সুচিম্ভিকা (স্যা.)];

অলম্বুসা মিস্সকেসী চ, পুণ্ডরীকাতি দারুণী.

১৬৮. ‘‘এণীফস্সা সুফস্সা চ, সুভদ্দা মুদুৰাদিনী;

এতা চঞ্ঞা চ সেয্যাসে, অচ্ছরানং পবোধিকা.

১৬৯. ‘‘তা মং কালেনুপাগন্ত্ৰা, অভিভাসন্তি দেৰতা;

হন্দ নচ্চাম গাযাম, হন্দ তং রমযামসে.

১৭০. ‘‘নযিদং অকতপুঞ্ঞানং, কতপুঞ্ঞানমেৰিদং;

অসোকং নন্দনং রম্মং, তিদসানং মহাৰনং.

১৭১. ‘‘সুখং অকতপুঞ্ঞানং, ইধ নত্থি পরত্থ চ;

সুখঞ্চ কতপুঞ্ঞানং, ইধ চেৰ পরত্থ চ.

১৭২. ‘‘তেসং সহব্যকামানং, কত্তব্বং কুসলং বহুং;

কতপুঞ্ঞা হি মোদন্তি, সগ্গে ভোগসমঙ্গিনো’’তি.

দাসিৰিমানং পঠমং.