৮. ততিযনাৰাৰিমানৰত্থু

৬৩. ‘‘সুৰণ্ণচ্ছদনং নাৰং, নারি আরুয্হ তিট্ঠসি;

ওগাহসি পোক্খরণিং, পদ্মং ছিন্দসি পাণিনা.

৬৪. ‘‘কূটাগারা নিৰেসা তে, ৰিভত্তা ভাগসো মিতা;

দদ্দল্লমানা [দদ্দল়্হমানা (ক.)] আভন্তি, সমন্তা চতুরো দিসা.

৬৫. ‘‘কেন তেতাদিসো ৰণ্ণো, কেন তে ইধ মিজ্ঝতি;

উপ্পজ্জন্তি চ তে ভোগা, যে কেচি মনসো পিযা.

৬৬. ‘‘পুচ্ছামি তং দেৰি মহানুভাৰে, মনুস্সভূতা কিমকাসি পুঞ্ঞং;

কেনাসি এৰং জলিতানুভাৰা, ৰণ্ণো চ তে সব্বদিসা পভাসতী’’তি.

৬৭. সা দেৰতা অত্তমনা, সম্বুদ্ধেনেৰ পুচ্ছিতা;

পঞ্হং পুট্ঠা ৰিযাকাসি, যস্স কম্মস্সিদং ফলং.

৬৮. ‘‘অহং মনুস্সেসু মনুস্সভূতা, পুরিমায জাতিযা মনুস্সলোকে;

দিস্ৰান ভিক্খূ তসিতে কিলন্তে, উট্ঠায পাতুং উদকং অদাসিং.

৬৯. ‘‘যো ৰে কিলন্তান পিপাসিতানং, উট্ঠায পাতুং উদকং দদাতি;

সীতোদকা তস্স ভৰন্তি নজ্জো, পহূতমল্যা বহুপুণ্ডরীকা.

৭০. ‘‘তং আপগা অনুপরিযন্তি সব্বদা, সীতোদকা ৰালুকসন্থতা নদী;

অম্বা চ সালা তিলকা চ জম্বুযো, উদ্দালকা পাটলিযো চ ফুল্লা.

৭১. ‘‘তং ভূমিভাগেহি উপেতরূপং, ৰিমানসেট্ঠং ভুসসোভমানং;

তস্সীধ কম্মস্স অযং ৰিপাকো, এতাদিসং পুঞ্ঞকতা লভন্তি.

৭২. ‘‘কূটাগারা নিৰেসা মে, ৰিভত্তা ভাগসো মিতা;

দদ্দল্লমানা আভন্তি, সমন্তা চতুরো দিসা.

৭৩. ‘‘তেন মেতাদিসো ৰণ্ণো, তেন মে ইধ মিজ্ঝতি;

উপ্পজ্জন্তি চ মে ভোগা, যে কেচি মনসো পিযা.

৭৪. ‘‘অক্খামি তে বুদ্ধ মহানুভাৰ, মনুস্সভূতা যমকাসি পুঞ্ঞং;

তেনম্হি এৰং জলিতানুভাৰা, ৰণ্ণো চ মে সব্বদিসা পভাসতি;

এতস্স কম্মস্স ফলং মমেদং, অত্থায বুদ্ধো উদকং অপাযী’’তি [অপাসীতি (সী. স্যা. পী.)].

ততিযনাৰাৰিমানং অট্ঠমং.