৯. দীপৰিমানৰত্থু

৭৫. ‘‘অভিক্কন্তেন ৰণ্ণেন, যা ত্ৰং তিট্ঠসি দেৰতে;

ওভাসেন্তী দিসা সব্বা, ওসধী ৰিয তারকা.

৭৬. ‘‘কেন তেতাদিসো ৰণ্ণো, কেন তে ইধ মিজ্ঝতি;

উপ্পজ্জন্তি চ তে ভোগা, যে কেচি মনসো পিযা.

৭৭. ‘‘কেন ত্ৰং ৰিমলোভাসা, অতিরোচসি দেৰতা [দেৰতে (বহূসু) ৮৩ ৰিস্সজ্জনগাথায সংসন্দেতব্বং];

কেন তে সব্বগত্তেহি, সব্বা ওভাসতে দিসা.

৭৮. ‘‘পুচ্ছামি তং দেৰি মহানুভাৰে, মনুস্সভূতা কিমকাসি পুঞ্ঞং;

কেনাসি এৰং জলিতানুভাৰা, ৰণ্ণো চ তে সব্বদিসা পভাসতী’’তি.

৭৯. সা দেৰতা অত্তমনা, মোগ্গল্লানেন পুচ্ছিতা;

পঞ্হং পুট্ঠা ৰিযাকাসি, যস্স কম্মস্সিদং ফলং.

৮০. ‘‘অহং মনুস্সেসু মনুস্সভূতা, পুরিমায জাতিযা মনুস্সলোকে;

তমন্ধকারম্হি তিমীসিকাযং, পদীপকালম্হি অদাসি দীপং [অদং পদীপং (সী. স্যা. পী.)].

৮১. ‘‘যো অন্ধকারম্হি তিমীসিকাযং, পদীপকালম্হি দদাতি দীপং;

উপ্পজ্জতি জোতিরসং ৰিমানং, পহূতমল্যং বহুপুণ্ডরীকং.

৮২. ‘‘তেন মেতাদিসো ৰণ্ণো, তেন মে ইধ মিজ্ঝতি;

উপ্পজ্জন্তি চ মে ভোগা, যে কেচি মনসো পিযা.

৮৩. ‘‘তেনাহং ৰিমলোভাসা, অতিরোচামি দেৰতা;

তেন মে সব্বগত্তেহি, সব্বা ওভাসতে দিসা.

৮৪. ‘‘অক্খামি তে ভিক্খু মহানুভাৰ, মনুস্সভূতা যমকাসি পুঞ্ঞং;

তেনম্হি এৰং জলিতানুভাৰা, ৰণ্ণো চ মে সব্বদিসা পভাসতী’’তি.

দীপৰিমানং নৰমং.