১৭. কেসকারীৰিমানৰত্থু

১৫০. ‘‘ইদং ৰিমানং রুচিরং পভস্সরং, ৰেল়ুরিযথম্ভং সততং সুনিম্মিতং;

সুৰণ্ণরুক্খেহি সমন্তমোত্থতং, ঠানং মমং কম্মৰিপাকসম্ভৰং.

১৫১. ‘‘তত্রূপপন্না পুরিমচ্ছরা ইমা, সতং সহস্সানি সকেন কম্মুনা;

তুৰংসি অজ্ঝুপগতা যসস্সিনী, ওভাসযং তিট্ঠসি পুব্বদেৰতা.

১৫২. ‘‘সসী অধিগ্গয্হ যথা ৰিরোচতি, নক্খত্তরাজারিৰ তারকাগণং;

তথেৰ ত্ৰং অচ্ছরাসঙ্গণং [অচ্ছরাসঙ্গমং (সী.)] ইমং, দদ্দল্লমানা যসসা ৰিরোচসি.

১৫৩. ‘‘কুতো নু আগম্ম অনোমদস্সনে, উপপন্না ত্ৰং ভৰনং মমং ইদং;

ব্রহ্মংৰ দেৰা তিদসা সহিন্দকা, সব্বে ন তপ্পামসে দস্সনেন ত’’ন্তি.

১৫৪. ‘‘যমেতং সক্ক অনুপুচ্ছসে মমং, ‘কুতো চুতা ত্ৰং ইধ আগতা’তি [কুতো চুতা ইধ আগতা তুৰং (স্যা.), কুতো চুতায আগতি তৰ (পী.)];

বারাণসী নাম পুরত্থি কাসিনং, তত্থ অহোসিং পুরে কেসকারিকা.

১৫৫. ‘‘বুদ্ধে চ ধম্মে চ পসন্নমানসা, সঙ্ঘে চ একন্তগতা অসংসযা;

অখণ্ডসিক্খাপদা আগতপ্ফলা, সম্বোধিধম্মে নিযতা অনামযা’’তি.

১৫৬. ‘‘তন্ত্যাভিনন্দামসে স্ৰাগতঞ্চ [সাগতঞ্চ (সী.)] তে, ধম্মেন চ ত্ৰং যসসা ৰিরোচসি;

বুদ্ধে চ ধম্মে চ পসন্নমানসে, সঙ্ঘে চ একন্তগতে অসংসযে;

অখণ্ডসিক্খাপদে আগতপ্ফলে, সম্বোধিধম্মে নিযতে অনামযে’’তি.

কেসকারীৰিমানং সত্তরসমং.

পীঠৰগ্গো পঠমো নিট্ঠিতো.

তস্সুদ্দানং –

পঞ্চ পীঠা তযো নাৰা, দীপতিলদক্খিণা দ্ৰে;

পতি দ্ৰে সুণিসা উত্তরা, সিরিমা কেসকারিকা;

ৰগ্গো তেন পৰুচ্চতীতি.