১৬. সিরিমাৰিমানৰত্থু

১৩৭. ‘‘যুত্তা চ তে পরমঅলঙ্কতা হযা, অধোমুখা অঘসিগমা বলী জৰা;

অভিনিম্মিতা পঞ্চরথাসতা চ তে, অন্ৰেন্তি তং সারথিচোদিতা হযা.

১৩৮. ‘‘সা তিট্ঠসি রথৰরে অলঙ্কতা, ওভাসযং জলমিৰ জোতি পাৰকো;

পুচ্ছামি তং ৰরতনু [ৰরচারু (কত্থচি)] অনোমদস্সনে, কস্মা নু কাযা অনধিৰরং উপাগমি.

১৩৯. ‘‘কামগ্গপত্তানং যমাহুনুত্তরং [… নুত্তরা (ক.), অনুত্তরা (স্যা.)], নিম্মায নিম্মায রমন্তি দেৰতা;

তস্মা কাযা অচ্ছরা কামৰণ্ণিনী, ইধাগতা অনধিৰরং নমস্সিতুং.

১৪০. ‘‘কিং ত্ৰং পুরে সুচরিতমাচরীধ [সুচরিতং অচারিধ (পী.)],

কেনচ্ছসি ত্ৰং অমিতযসা সুখেধিতা;

ইদ্ধী চ তে অনধিৰরা ৰিহঙ্গমা,

ৰণ্ণো চ তে দস দিসা ৰিরোচতি.

১৪১. ‘‘দেৰেহি ত্ৰং পরিৰুতা সক্কতা চসি,

কুতো চুতা সুগতিগতাসি দেৰতে;

কস্স ৰা ত্ৰং ৰচনকরানুসাসনিং,

আচিক্খ মে ত্ৰং যদি বুদ্ধসাৰিকা’’তি.

১৪২. ‘‘নগন্তরে নগরৰরে সুমাপিতে, পরিচারিকা রাজৰরস্স সিরিমতো;

নচ্চে গীতে পরমসুসিক্খিতা অহুং, সিরিমাতি মং রাজগহে অৰেদিংসু [অৰেদিসুং (?)].

১৪৩. ‘‘বুদ্ধো চ মে ইসিনিসভো ৰিনাযকো, অদেসযী সমুদযদুক্খনিচ্চতং;

অসঙ্খতং দুক্খনিরোধসস্সতং, মগ্গঞ্চিমং অকুটিলমঞ্জসং সিৰং.

১৪৪. ‘‘সুত্ৰানহং অমতপদং অসঙ্খতং, তথাগতস্সনধিৰরস্স সাসনং;

সীলেস্ৰহং পরমসুসংৰুতা অহুং, ধম্মে ঠিতা নরৰরবুদ্ধদেসিতে [ভাসিতে (সী.)].

১৪৫. ‘‘ঞত্ৰানহং ৰিরজপদং অসঙ্খতং, তথাগতেননধিৰরেন দেসিতং;

তত্থেৰহং সমথসমাধিমাফুসিং, সাযেৰ মে পরমনিযামতা অহু.

১৪৬. ‘‘লদ্ধানহং অমতৰরং ৰিসেসনং, একংসিকা অভিসমযে ৰিসেসিয;

অসংসযা বহুজনপূজিতা অহং, খিড্ডারতিং [খিড্ডং রতিং (স্যা. পী.)] পচ্চনুভোমনপ্পকং.

১৪৭. ‘‘এৰং অহং অমতদসম্হি [অমতরসম্হি (ক.)] দেৰতা, তথাগতস্সনধিৰরস্স সাৰিকা;

ধম্মদ্দসা পঠমফলে পতিট্ঠিতা, সোতাপন্না ন চ পন মত্থি দুগ্গতি.

১৪৮. ‘‘সা ৰন্দিতুং অনধিৰরং উপাগমিং, পাসাদিকে কুসলরতে চ ভিক্খৰো;

নমস্সিতুং সমণসমাগমং সিৰং, সগারৰা সিরিমতো ধম্মরাজিনো.

১৪৯. ‘‘দিস্ৰা মুনিং মুদিতমনম্হি পীণিতা, তথাগতং নরৰরদম্মসারথিং;

তণ্হচ্ছিদং কুসলরতং ৰিনাযকং, ৰন্দামহং পরমহিতানুকম্পক’’ন্তি.

সিরিমাৰিমানং সোল়সমং.