১৫. উত্তরাৰিমানৰত্থু

১২৪. ‘‘অভিক্কন্তেন ৰণ্ণেন, যা ত্ৰং তিট্ঠসি দেৰতে;

ওভাসেন্তী দিসা সব্বা, ওসধী ৰিয তারকা.

১২৫. ‘‘কেন তেতাদিসো ৰণ্ণো, কেন তে ইধ মিজ্ঝতি;

উপ্পজ্জন্তি চ তে ভোগা, যে কেচি মনসো পিযা.

১২৬. ‘‘পুচ্ছামি তং দেৰি মহানুভাৰে, মনুস্সভূতা কিমকাসি পুঞ্ঞং;

কেনাসি এৰং জলিতানুভাৰা, ৰণ্ণো চ তে সব্বদিসা পভাসতী’’তি.

১২৭. সা দেৰতা অত্তমনা, মোগ্গল্লানেন পুচ্ছিতা;

পঞ্হং পুট্ঠা ৰিযাকাসি, যস্স কম্মস্সিদং ফলং.

১২৮. ‘‘ইস্সা চ মচ্ছেরমথো [মচ্ছরিযমথো চ (ক.)] পল়াসো, নাহোসি ময্হং ঘরমাৰসন্তিযা;

অক্কোধনা ভত্তুৰসানুৰত্তিনী, উপোসথে নিচ্চহমপ্পমত্তা.

১২৯. ‘‘চাতুদ্দসিং পঞ্চদসিং, যা চ [যাৰ (সী. অট্ঠ., ক. অট্ঠ.) থেরীগাথাঅট্ঠকথা পস্সিতব্বা] পক্খস্স অট্ঠমী;

পাটিহারিযপক্খঞ্চ, অট্ঠঙ্গসুসমাগতং.

১৩০. ‘‘উপোসথং উপৰসিস্সং, সদা সীলেসু সংৰুতা;

সঞ্ঞমা সংৰিভাগা চ, ৰিমানং আৰসামহং [আৰসামিমং (সী. অট্ঠ., ক.) পরতো পন সব্বত্থপি ‘‘আৰসামহং’’ ইচ্চেৰ দিস্সতি].

১৩১. ‘‘পাণাতিপাতা ৰিরতা, মুসাৰাদা চ সঞ্ঞতা;

থেয্যা চ অতিচারা চ, মজ্জপানা চ আরকা [আরতা (?)].

১৩২. ‘‘পঞ্চসিক্খাপদে রতা, অরিযসচ্চান কোৰিদা;

উপাসিকা চক্খুমতো, গোতমস্স যসস্সিনো.

১৩৩. ‘‘সাহং সকেন সীলেন, যসসা চ যসস্সিনী;

অনুভোমি সকং পুঞ্ঞং, সুখিতা চম্হিনামযা.

১৩৪. ‘‘তেন মেতাদিসো ৰণ্ণো, তেন মে ইধ মিজ্ঝতি;

উপ্পজ্জন্তি চ মে ভোগা, যে কেচি মনসো পিযা.

১৩৫. ‘‘অক্খামি তে ভিক্খু মহানুভাৰ, মনুস্সভূতা যমহং অকাসিং;

তেনম্হি এৰং জলিতানুভাৰা, ৰণ্ণো চ মে সব্বদিসা পভাসতীতি.

১৩৬. ‘‘মম চ, ভন্তে, ৰচনেন ভগৰতো পাদে সিরসা ৰন্দেয্যাসি – ‘উত্তরা নাম, ভন্তে, উপাসিকা ভগৰতো পাদে সিরসা ৰন্দতী’তি. অনচ্ছরিযং খো পনেতং, ভন্তে, যং মং ভগৰা অঞ্ঞতরস্মিং সামঞ্ঞফলে ব্যাকরেয্য [ব্যাকরেয্যাতি (?)], তং ভগৰা সকদাগামিফলে ব্যাকাসী’’তি.

উত্তরাৰিমানং পন্নরসমং.