১. সীসূপচালাথেরীগাথা

১৯৬. ‘‘ভিক্খুনী সীলসম্পন্না, ইন্দ্রিযেসু সুসংৰুতা;

অধিগচ্ছে পদং সন্তং, অসেচনকমোজৰং’’.

১৯৭. ‘‘তাৰতিংসা চ যামা চ, তুসিতা চাপি দেৰতা;

নিম্মানরতিনো দেৰা, যে দেৰা ৰসৰত্তিনো;

তত্থ চিত্তং পণীধেহি, যত্থ তে ৰুসিতং পুরে’’.

১৯৮. ‘‘তাৰতিংসা চ যামা চ, তুসিতা চাপি দেৰতা;

নিম্মানরতিনো দেৰা, যে দেৰা ৰসৰত্তিনো.

১৯৯. ‘‘কালং কালং ভৰাভৰং, সক্কাযস্মিং পুরক্খতা;

অৰীতিৰত্তা সক্কাযং, জাতিমরণসারিনো.

২০০. ‘‘সব্বো আদীপিতো লোকো, সব্বো লোকো পদীপিতো;

সব্বো পজ্জলিতো লোকো, সব্বো লোকো পকম্পিতো.

২০১. ‘‘অকম্পিযং অতুলিযং, অপুথুজ্জনসেৰিতং;

বুদ্ধো ধম্মমদেসেসি, তত্থ মে নিরতো মনো.

২০২. ‘‘তস্সাহং ৰচনং সুত্ৰা, ৰিহরিং সাসনে রতা;

তিস্সো ৰিজ্জা অনুপ্পত্তা, কতং বুদ্ধস্স সাসনং.

২০৩. ‘‘সব্বত্থ ৰিহতা নন্দী, তমোখন্ধো পদালিতো;

এৰং জানাহি পাপিম, নিহতো ত্ৰমসি অন্তক’’.

… সীসূপচালা থেরী….

অট্ঠকনিপাতো নিট্ঠিতো.