৪. সুজাতাথেরীগাথা

১৪৫. ‘‘অলঙ্কতা সুৰসনা, মালিনী চন্দনোক্খিতা;

সব্বাভরণসঞ্ছন্না, দাসীগণপুরক্খতা.

১৪৬. ‘‘অন্নং পানঞ্চ আদায, খজ্জং ভোজ্জং অনপ্পকং;

গেহতো নিক্খমিত্ৰান, উয্যানমভিহারযিং.

১৪৭. ‘‘তত্থ রমিত্ৰা কীল়িত্ৰা, আগচ্ছন্তী সকং ঘরং;

ৰিহারং দট্ঠুং পাৰিসিং, সাকেতে অঞ্জনং ৰনং.

১৪৮. ‘‘দিস্ৰান লোকপজ্জোতং, ৰন্দিত্ৰান উপাৰিসিং;

সো মে ধম্মমদেসেসি, অনুকম্পায চক্খুমা.

১৪৯. ‘‘সুত্ৰা চ খো মহেসিস্স, সচ্চং সম্পটিৰিজ্ঝহং;

তত্থেৰ ৰিরজং ধম্মং, ফুসযিং অমতং পদং.

১৫০. ‘‘ততো ৰিঞ্ঞাতসদ্ধম্মা, পব্বজিং অনগারিযং;

তিস্সো ৰিজ্জা অনুপ্পত্তা, অমোঘং বুদ্ধসাসন’’ন্তি.

… সুজাতা থেরী….