৪. চতুক্কনিপাতো

১. ভদ্দাকাপিলানীথেরীগাথা

৬৩. ‘‘পুত্তো বুদ্ধস্স দাযাদো, কস্সপো সুসমাহিতো;

পুব্বেনিৰাসং যোৰেদি, সগ্গাপাযঞ্চ পস্সতি.

৬৪. ‘‘অথো জাতিক্খযং পত্তো, অভিঞ্ঞাৰোসিতো মুনি;

এতাহি তীহি ৰিজ্জাহি, তেৰিজ্জো হোতি ব্রাহ্মণো.

৬৫. ‘‘তথেৰ ভদ্দা কাপিলানী, তেৰিজ্জা মচ্চুহাযিনী;

ধারেতি অন্তিমং দেহং, জেত্ৰা মারং সৰাহনং.

৬৬. ‘‘দিস্ৰা আদীনৰং লোকে, উভো পব্বজিতা মযং;

ত্যম্হ খীণাসৰা দন্তা, সীতিভূতম্হ নিব্বুতা’’তি.

… ভদ্দা কাপিলানী থেরী….

চতুক্কনিপাতো নিট্ঠিতো.