৮. পুণ্ণিকাথেরীঅপদানং

১৮৪. ‘‘ৰিপস্সিনো ভগৰতো, সিখিনো ৰেস্সভুস্স চ;

ককুসন্ধস্স মুনিনো, কোণাগমনতাদিনো.

১৮৫. ‘‘কস্সপস্স চ বুদ্ধস্স, পব্বজিত্ৰান সাসনে;

ভিক্খুনী সীলসম্পন্না, নিপকা সংৰুতিন্দ্রিযা.

১৮৬. ‘‘বহুস্সুতা ধম্মধরা, ধম্মত্থপটিপুচ্ছিকা;

উগ্গহেতা চ ধম্মানং, সোতা পযিরুপাসিতা.

১৮৭. ‘‘দেসেন্তী জনমজ্ঝেহং, অহোসিং জিনসাসনে;

বাহুসচ্চেন তেনাহং, পেসলা অতিমঞ্ঞিসং.

১৮৮. ‘‘পচ্ছিমে চ ভৰে দানি, সাৰত্থিযং পুরুত্তমে;

অনাথপিণ্ডিনো গেহে, জাতাহং কুম্ভদাসিযা.

১৮৯. ‘‘গতা উদকহারিযং, সোত্থিযং দিজমদ্দসং;

সীতট্টং তোযমজ্ঝম্হি, তং দিস্ৰা ইদমব্রৰিং.

১৯০. ‘‘‘উদহারী অহং সীতে, সদা উদকমোতরিং;

অয্যানং দণ্ডভযভীতা, ৰাচাদোসভযট্টিতা [ৰাচারোসভযট্টিতা (স্যা.)].

১৯১. ‘‘‘কস্স ব্রাহ্মণ ত্ৰং ভীতো, সদা উদকমোতরি;

ৰেধমানেহি গত্তেহি, সীতং ৰেদযসে ভুসং’.

১৯২. ‘‘‘জানন্তী ৰত মং ভোতি, পুণ্ণিকে পরিপুচ্ছসি;

করোন্তং কুসলং কম্মং, রুন্ধন্তং [নিদ্ধন্তং (সী. পী.), নুদন্তং (স্যা.)] কতপাপকং.

১৯৩. ‘‘‘যো চে ৰুড্ঢো দহরো ৰা, পাপকম্মং পকুব্বতি;

দকাভিসিঞ্চনা সোপি [ভোতি (সী. ক.) থেরীগা. ২৩৯], পাপকম্মা পমুচ্চতি’.

১৯৪. ‘‘উত্তরন্তস্স অক্খাসিং, ধম্মত্থসংহিতং পদং;

তঞ্চ সুত্ৰা স সংৰিগ্গো [সুসংৰিগ্গো (স্যা.)], পব্বজিত্ৰারহা অহু.

১৯৫. ‘‘পূরেন্তী ঊনকসতং, জাতা দাসিকুলে যতো;

ততো পুণ্ণাতি নামং মে, ভুজিস্সং মং অকংসু তে.

১৯৬. ‘‘সেট্ঠিং ততোনুজানেত্ৰা [ততো অনুমোদেত্ৰা (সী. স্যা.), ততো অনুমানেত্ৰা (পী.)], পব্বজিং অনগারিযং;

ন চিরেনেৰ কালেন, অরহত্তমপাপুণিং.

১৯৭. ‘‘ইদ্ধীসু চ ৰসী হোমি, দিব্বায সোতধাতুযা;

চেতোপরিযঞাণস্স, ৰসী হোমি মহামুনে.

১৯৮. ‘‘পুব্বেনিৰাসং জানামি, দিব্বচক্খু ৰিসোধিতং;

সব্বাসৰপরিক্খীণা, নত্থি দানি পুনব্ভৰো.

১৯৯. ‘‘অত্থধম্মনিরুত্তীসু, পটিভানে তথেৰ চ;

ঞাণং মে ৰিমলং সুদ্ধং, বুদ্ধসেট্ঠস্স ৰাহসা.

২০০. ‘‘ভাৰনায মহাপঞ্ঞা, সুতেনেৰ সুতাৰিনী;

মানেন নীচকুলজা, ন হি কম্মং ৰিনস্সতি [পনস্সতি (স্যা.)].

২০১. ‘‘কিলেসা ঝাপিতা ময্হং…পে… ৰিহরামি অনাসৰা.

২০২. ‘‘স্ৰাগতং ৰত মে আসি…পে… কতং বুদ্ধস্স সাসনং.

২০৩. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং পুণ্ণিকা ভিক্খুনী ইমা গাথাযো অভাসিত্থাতি.

পুণ্ণিকাথেরিযাপদানং অট্ঠমং.