৬. অভিরূপনন্দাথেরীঅপদানং

১৪৩. ‘‘একনৰুতিতো কপ্পে, ৰিপস্সী নাম নাযকো;

উপ্পজ্জি চারুদস্সনো, সব্বধম্মেসু চক্খুমা.

১৪৪. ‘‘তদাহং বন্ধুমতিযং, ইদ্ধে ফীতে মহাকুলে;

জাতা সুরূপা দযিতা, পূজনীযা জনস্স চ.

১৪৫. ‘‘উপগন্ত্ৰা মহাৰীরং, ৰিপস্সিং লোকনাযকং;

ধম্মং সুণিত্ৰা সরণং, উপেসিং নরনাযকং.

১৪৬. ‘‘সীলেসু সংৰুতা হুত্ৰা, নিব্বুতে চ নরুত্তমে;

ধাতুথূপস্স উপরি, সোণ্ণচ্ছত্তমপূজযিং.

১৪৭. ‘‘মুত্তচাগা সীলৰতী, যাৰজীৰং ততো চুতা;

জহিত্ৰা মানুসং দেহং, তাৰতিংসূপগা অহং.

১৪৮. ‘‘তদা দসহি ঠানেহি, অধিভোত্ৰান সেসকে [অধিভোত্ৰা অসেসতো (স্যা.)];

রূপসদ্দেহি গন্ধেহি, রসেহি ফুসনেহি চ.

১৪৯. ‘‘আযুনাপি চ ৰণ্ণেন, সুখেন যসসাপি চ;

তথেৰাধিপতেয্যেন, অধিগয্হ ৰিরোচহং.

১৫০. ‘‘পচ্ছিমে চ ভৰে দানি, জাতাহং কপিলৰ্হযে;

ধীতা খেমকসক্কস্স, নন্দা নামাতি ৰিস্সুতা.

১৫১. ‘‘অভিরূপসম্পদম্পি [অভিরুপং উপপদং (সী.), অভিরুপং উপ্পাদং (পী.)], অহু মে কন্তিসূচকং;

যদাহং যোব্বনপ্পত্তা, রূপলাৰঞ্ঞভূসিতা.

১৫২. ‘‘তদা [তদা মমত্থং (সী.), ইধ মমত্তে (স্যা. ক.)] মত্থে সক্যানং, ৰিৰাদো সুমহা অহু;

পব্বাজেসি ততো তাতো, মা সক্যা ৰিনস্সিংসুতি.

১৫৩. ‘‘পব্বজিত্ৰা তথাগতং, রূপদেস্সিং নরুত্তমং;

সুত্ৰান নোপগচ্ছামি, মম রূপেন গব্বিতা.

১৫৪. ‘‘ওৰাদম্পি ন গচ্ছামি, বুদ্ধদস্সনভীরুতা;

তদা জিনো উপাযেন, উপনেত্ৰা সসন্তিকং.

১৫৫. ‘‘তিস্সিত্থিযো [তিস্সো থীযো (সী. পী.)] নিদস্সেসি, ইদ্ধিযা মগ্গকোৰিদো;

অচ্ছরারূপসদিসং, তরুণিং জরিতং [জরিকং (স্যা. ক.)] মতং.

১৫৬. ‘‘তাযো দিস্ৰা সুসংৰিগ্গা, ৰিরত্তাসে কল়েৰরে;

অট্ঠাসিং ভৰনিব্বিন্দা, তদা মং আহ নাযকো.

১৫৭. ‘‘‘আতুরং অসুচিং পূতিং, পস্স নন্দে সমুস্সযং;

উগ্ঘরন্তং পগ্ঘরন্তং, বালানং অভিনন্দিতং.

১৫৮. ‘‘‘অসুভায চিত্তং ভাৰেহি, একগ্গং সুসমাহিতং;

যথা ইদং তথা এতং, যথা এতং তথা ইদং.

১৫৯. ‘‘‘এৰমেতং অৰেক্খন্তী, রত্তিন্দিৰমতন্দিতা;

ততো সকায পঞ্ঞায, অভিনিব্বিজ্ঝ ৰচ্ছসি’.

১৬০. ‘‘তস্সা মে অপ্পমত্তায, ৰিচরন্তিযা [ৰিচরন্ত্ৰাধ (সী.), ৰিচিনন্তীধ (স্যা. পী.)] যোনিসো;

যথাভূতং অযং কাযো, দিট্ঠো সন্তরবাহিরো.

১৬১. ‘‘অথ নিব্বিন্দহং কাযে, অজ্ঝত্তঞ্চ ৰিরজ্জহং;

অপ্পমত্তা ৰিসংযুত্তা, উপসন্তাম্হি নিব্বুতা.

১৬২. ‘‘ইদ্ধীসু চ ৰসী হোমি, দিব্বায সোতধাতুযা;

চেতোপরিযঞাণস্স, ৰসী হোমি মহামুনে.

১৬৩. ‘‘পুব্বেনিৰাসং জানামি, দিব্বচক্খু ৰিসোধিতং;

সব্বাসৰপরিক্খীণা, নত্থি দানি পুনব্ভৰো.

১৬৪. ‘‘অত্থধম্মনিরুত্তীসু, পটিভানে তথেৰ চ;

ঞাণং মম মহাৰীর, উপ্পন্নং তৰ সন্তিকে.

১৬৫. ‘‘কিলেসা ঝাপিতা ময্হং…পে… ৰিহরামি অনাসৰা.

১৬৬. ‘‘স্ৰাগতং ৰত মে আসি…পে… কতং বুদ্ধস্স সাসনং.

১৬৭. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং অভিরূপনন্দা ভিক্খুনী ইমা গাথাযো অভাসিত্থাতি.

অভিরূপনন্দাথেরিযাপদানং ছট্ঠং.