৩. উপ্পলদাযিকাথেরীঅপদানং

৫৭. ‘‘নগরে অরুণৰতিযা, অরুণো নাম খত্তিযো;

তস্স রঞ্ঞো অহুং ভরিযা, একজ্ঝং চারযামহং.

৫৮. ‘‘রহোগতা নিসীদিত্ৰা, এৰং চিন্তেসহং তদা;

‘কুসলং মে কতং নত্থি, আদায গমিযং মম.

৫৯. ‘‘‘মহাভিতাপং কটুকং, ঘোররূপং সুদারুণং;

নিরযং নূন গচ্ছামি, এত্থ মে নত্থি সংসযো’.

৬০. ‘‘এৰাহং চিন্তযিত্ৰান, পহংসেত্ৰান মানসং;

রাজানং উপগন্ত্ৰান, ইদং ৰচনমব্রৰিং.

৬১. ‘‘‘ইত্থী নাম মযং দেৰ, পুরিসানিত্তরা অহু [পুরিসানুগতা সদা (সী.), পুরিসা ন ভৰাম নো (স্যা.), পুরিসানং ভরা মযং (পী.)];

একং মে সমণং দেহি, ভোজযিস্সামি খত্তিয’.

৬২. ‘‘অদাসি মে তদা রাজা, সমণং ভাৰিতিন্দ্রিযং;

তস্স পত্তং গহেত্ৰান, পরমন্নেন পূরযিং.

৬৩. ‘‘পূরেত্ৰা পরমং অন্নং, সহ সুগন্ধলেপনং;

মহাচেলেন ছাদিত্ৰা, অদাসিং তুট্ঠমানসা.

৬৪. ‘‘তেন কম্মেন সুকতেন, চেতনাপণিধীহি চ;

জহিত্ৰা মানুসং দেহং, তাৰতিংসমগচ্ছহং.

৬৫. ‘‘সহস্সদেৰরাজূনং, মহেসিত্তমকারযিং;

সহস্সচক্কৰত্তীনং, মহেসিত্তমকারযিং.

৬৬. ‘‘পদেসরজ্জং ৰিপুলং, গণনাতো অসঙ্খিযং;

নানাৰিধং বহুং অঞ্ঞং, তস্স কম্মফলং ততো.

৬৭. ‘‘উপ্পলস্সেৰ মে ৰণ্ণো, অভিরূপা সুদস্সনা;

ইত্থিসব্বঙ্গসম্পন্না, অভিজাতা জুতিন্ধরা.

৬৮. ‘‘পচ্ছিমে ভৰে সম্পত্তে, অজাযিং সাকিযে কুলে;

নারীসহস্সপামোক্খা, সুদ্ধোদনসুতস্সহং.

৬৯. ‘‘নিব্বিন্দিত্ৰা অগারেহং, পব্বজিং অনগারিযং;

সত্তমীরত্তিসম্পত্তা [সত্তমিংরত্তিমপত্তা (সী. স্যা. পী.)], চতুসচ্চমপাপুণিং.

৭০. ‘‘চীৰরং পিণ্ডপাতঞ্চ, পচ্চযং সযনাসনং;

পরিমেতুং ন সক্কোমি, পিণ্ডপাতস্সিদং ফলং.

৭১. ‘‘যং ময্হং পূরিতং কম্মং, কুসলং সরসে মুনি;

তুয্হত্থায মহাৰীর, পরিচত্তং বহুং মযা.

৭২. ‘‘একত্তিংসে ইতো কপ্পে, যং দানমদদিং তদা;

দুগ্গতিং নাভিজানামি, পিণ্ডপাতস্সিদং ফলং.

৭৩. ‘‘দ্ৰে গতিযো পজানামি, দেৰত্তং অথ মানুসং;

অঞ্ঞং গতিং ন জানামি, পিণ্ডপাতস্সিদং ফলং.

৭৪. ‘‘উচ্চে কুলে পজাযামি, মহাসালে [তযো সাল (ক.)] মহদ্ধনে;

অঞ্ঞে কুলে ন জাযামি, পিণ্ডপাতস্সিদং ফলং.

৭৫. ‘‘ভৰাভৰে সংসরিত্ৰা, সুক্কমূলেন চোদিতা;

অমনাপং ন পস্সামি, সোমনস্সকতং ফলং.

৭৬. ‘‘ইদ্ধীসু চ ৰসী হোমি, দিব্বায সোতধাতুযা;

চেতোপরিযঞাণস্স, ৰসী হোমি মহামুনে.

৭৭. ‘‘পুব্বেনিৰাসং জানামি, দিব্বচক্খু ৰিসোধিতং;

সব্বাসৰপরিক্খীণা, নত্থি দানি পুনব্ভৰো.

৭৮. ‘‘অত্থধম্মনিরুত্তীসু, পটিভানে তথেৰ চ;

ঞাণং মম মহাৰীর, উপ্পন্নং তৰ সন্তিকে.

৭৯. ‘‘কিলেসা ঝাপিতা ময্হং…পে… ৰিহরামি অনাসৰা.

৮০. ‘‘স্ৰাগতং ৰত মে আসি…পে… কতং বুদ্ধস্স সাসনং.

৮১. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং উপ্পলদাযিকা ভিক্খুনী ভগৰতো সম্মুখা ইমা গাথাযো অভাসিত্থাতি.

উপ্পলদাযিকাথেরিযাপদানং ততিযং.