১. যসৰতীপমুখঅট্ঠারসভিক্খুনীসহস্সঅপদানং

১. ‘‘ভৰা সব্বে পরিক্খীণা, ভৰা সন্তি ৰিমোচিতা;

সব্বাসৰা চ নো নত্থি, আরোচেম মহামুনে.

২. ‘‘পুরিমং কুসলং কম্মং [পরিকম্মঞ্চ কুসলং (স্যা.)], যং কিঞ্চি সাধুপত্থিতং;

পরিভোগমযং দিন্নং, তুয্হত্থায মহামুনে.

৩. ‘‘বুদ্ধপচ্চেকবুদ্ধানং, সাৰকানঞ্চ পত্থিতং [বুদ্ধানং সাৰকানঞ্চ (সী. ক.)];

পরিভোগমযং দিন্নং, তুয্হত্থায মহামুনে.

৪. ‘‘উচ্চনীচমযং কম্মং, ভিক্খূনং সাধুপত্থিতং;

উচ্চাকুলপরিকম্মং, কতমেতং মহামুনে [কতম্হেহি মহামুনে (স্যা. পী.)].

৫. ‘‘তেনেৰ সুক্কমূলেন, চোদিতা কম্মসম্পদা;

মানুসিকমতিক্কন্তা, জাযিংসু খত্তিযে কুলে.

৬. ‘‘উপ্পত্তে চ কতে কম্মে, জাতিযা ৰাপি একতো;

পচ্ছিমে একতো জাতা, খত্তিযা কুলসম্ভৰা.

৭. ‘‘রূপৰতী ভোগৰতী, লাভসক্কারপূজিতা;

অন্তেপুরে মহাৰীর, দেৰানং ৰিয নন্দনে.

৮. ‘‘নিব্বিন্দিত্ৰা অগারম্হা, পব্বজিম্হনগারিযং;

কতিপাহং উপাদায, সব্বা পত্তাম্হ নিব্বুতিং.

৯. ‘‘চীৰরং পিণ্ডপাতঞ্চ, পচ্চযং সযনাসনং;

উপনেন্তি বহূ অম্হে, সদা সক্কতপূজিতা.

১০. ‘‘কিলেসা ঝাপিতা অম্হং, ভৰা সব্বে সমূহতা;

নাগীৰ বন্ধনং ছেত্ৰা, ৰিহরাম অনাসৰা.

১১. ‘‘স্ৰাগতং ৰত নো আসি, মম বুদ্ধস্স সন্তিকে;

তিস্সো ৰিজ্জা অনুপ্পত্তা, কতং বুদ্ধস্স সাসনং.

১২. ‘‘পটিসম্ভিদা চতস্সো, ৰিমোক্খাপি চ অট্ঠিমে;

ছল়ভিঞ্ঞা সচ্ছিকতা, কতং বুদ্ধস্স সাসনং’’.

ইত্থং সুদং যসৰতীপমুখানি খত্তিযকঞ্ঞাভিক্খুনিযো অট্ঠারসসহস্সানি ভগৰতো সম্মুখা ইমা গাথাযো অভাসিত্থাতি.

যসৰতীপমুখঅট্ঠারসভিক্খুনীসহস্সাপদানং পঠমং.